Okhurula 9
9
Linyasio eliali khung'ombe
1Mana OMWAMI yamusunjila Musa mbu Yinjila ewaFarao nomuboolela mbu Kano niko aka OMWAMI, Nyasaye wabaHeburania, asunga; mbu Lekhuula abandu banje batsie, mbu bakhalabanile. 2Okhuba noba noloba okhubalekhuula, noshibatinyakhwo, 3lola, omukhono kwOMWAMI kulayeekha khumirukochio echili mubwayilo, khutsifarasi, khutsisishili, khungamia, khung'ombe, nende khubiayo; lulabaho oluumbe olutinyu muno. 4Ne OMWAMI alakabukhania hakari wemiruko chiaIsiraeli nende emiruko chiaMisiri; ne ebiabaana baIsiraeli shibiitsa okhufwakhwo kata shilala ta. 5OMWAMI nalaka eshise, nasunga mbu Mukamba OMWAMI alakhola likhuwa lino khushialo. 6Olwa bwashia mukamba OMWAMI nakhola likhuwa elo, emiruko chiosi chiaMisiri nichifwa; habula khumiruko chiabaana baIsiraeli, shikwafwakhwo kata mulala tawe. 7Farao narumana, ne njiechio, shikwaliho kata mulala kwonyene okwokhumiruko chiabaana baIsiraeli okwali nikufwile ta. Nebutswa omwoyo kwaFarao kwali omutinyu, kata shiyalekhuula abandu abo tawe.
Linyasio liamabure
8Mana OMWAMI yasunjila Musa nende Haruni mbu Mufumbare omuyale kwomushisambilo, mana Musa akwohe mwikulu, imbeli waFarao. 9Ne kulakwa olufu olunyushe khushialo shiosi shiaMisiri, nikwikhola khubandu nende khumiruko amabure akanyalukhanga, mushialo shiosi shiaMisiri. 10Kho nibabukula omuyale okwomushisambilo, nibasinjila imbeli waFarao; Musa nakwoha mwikulu; nikuba amabure akanyalukhanga, khubandu nende khumiruko. 11Nabo abafumu bakhaywa okhusiniila imbeli waMusa khulwa amabure; shichila amabure ako kali khubafumu tsana, nende khubaMisiri bosi. 12Nebutswa OMWAMI yatinyia omwoyo kwaFarao, kata shiyabahulila ta; shinga OMWAMI olwa yali namubooleele Musa.
Linyasio lieifula yamachina
13Mana OMWAMI namusunjila Musa mbu Huuna mumabwibwi, osinjile imbeli waFarao, nomusunjila mbu Kano niko aka OMWAMI, Nyasaye wabaHeburania, asunga; mbu Lekhuula abandu banje batsie, mbu bakhalahanile. 14Okhuba luno ndalaruma amanyasio kanje kosi khwiwe omwene, nende khubasumbabo, nende khubandubo; mbu mana omanye shinga olwa abulaho oufwanana ninasi mushialo shiosi. 15Khane bulaano ndakhabeele nimalile okhunyiila omukhono kwanje, nikhukhupa iwe halala nende abandubo noluumbe, nawe wakhabeele nomalile okhukhalachisibwa olkhurula mushialo; 16nebutswa toto mwene, likhuwa lino nilio elichila nikhusinjisiye, mbu ekhulolosilie obunyali bwanje, khandi mbu eliira lianje lif umenje mushialo shiosi pe. 17Iwe oshiichinganga nobeekalila abandu banje, mbu olobe okhubalekhuula? 18Lola, mukamba khushise shinga shino ndalakwisia ifula yamachina amanji muno, eyirashiabaho muMisiri okhurula olwa shiakhupwa omuse okhuula olwa leelo ta. 19Kho bulaano rumana wanguyilisie okhwinjisia emirukochio nende biosi ebia oli ninabio mubwayilo; okhuba buli muruko okwa nakunyoolwe nikuli mubwayilo, nikuraleerilwe hango ta, amachina ako kalakukhupa, nikufwa, kata omundu yesi ario. 20Ne abaria likhuwa liOMWAMI mubasumba baFarao beelusia abasumba babwe nende emiruko chiabwe, nibeenjisia munzu; 21ne abarapaara khwikhuwa liOMWAMI ta balekha abasumba babwe nende emiruko chiabwe mubwayilo.
22Mana OMWAMI nasunjila Musa mbu Nyiila omukhonokwo ikulu, mbu ifula yamachina yibeho mushialo shiosi shiaMisiri, khubandu, nende khumiruko, nende khumiani chiosi echiomumikunda, mushialo shiosi shiaMisiri. 23Musa nanyiira indabushiye mwikulu; OMWAMI naleera okhukukuma khwelikulu nende amachina, omulilo nakwo nikuruuma nikukwa khushialo, OMWAMI nakwisia ifula yamachina khushialo shiaMisiri. 24Kho amachina nikabaho, nende omulilo nikulabushilanga hakari mumachina ako, amabii muno; eyifwana shinga eyo shiyalikhwol o muMisiri okhurula olwa shieekhola lihanga tawe. 25Amachina ako nikakhupa mushialo shiosi shiaMisiri, biosi ebiali mubwayilo, kata abandu kata emiruko; amachina nikakhupa nende emiani chiosi echiomumikunda, nikafunaka emisaala chiosi echiomumikunda. 26Habula mushialo shiaGosheni shionyene, ewa abaana baIsiraeli bali. Amachina nikarabayo ta.
27Kho Farao yarumana nalanga Musa nende Haruni, nabasunjila mbu Kho luno enzonoonile; OMWAMI nomulunjishi, ne isie nende abandu banje khuli abamayaanu. 28Saaye OMWAMI; okhuba okhukukuma khuno nende amachina kano bihelile; mana ndalamulekhuula, oburachweya khandi ta. 29Mana Musa namusunjila ari Nindakhamala okhurula mwitookho, ndalakaliShila OMWAMI amakhono; okhukukuma khwelikulu khulahwa, kata ifula yamachina shiyilabaho khandi ta; mbu mana omanye shinga eshialo olwa shili eshiOMWAMI. 30Nebutswa iwe, nende abasumbabo, emanyile mbu shimulamuria OMWAMI Nyasaye kata bulaano ta. 31Ne ikitani nende ishayiri tsiarootswa; okhuba ishayiri yali niyili okuruli, ikitani nayo niyikanikha. 32Habula ingano nende obule shibiarootswa ta; shichila biali nibishili imbale. 33Naye Musa yarula mutookho ewaFarao, nakalishila OMWAMI amakhono; okhukukuma nende amachina nibihwa, ifula nayo niyirasundukha khushialo ta. 34Nolwa Farao yalola shinga ifula nende amachina nende okhukukuma khwelikulu olwa biali nibihweele, yameeta okhwonoona khandi, niyoomia omwoyokwe, ye nende abasumbabe. 35Ne omwoyo kwaFarao kwatinya, kata shiyalekhuula abaana baIsiraeli mbu batsie ta; shinga OMWAMI olwa yali naboolile mumunwa kwaMusa.
Currently Selected:
Okhurula 9: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
