Okhurula 5
5
Musa naHaruni imbeli zuaFarao
1Olunyumakhwo Musa nende Haruni batsia nibamusunjila Farao bari Kano niko aka OMWAMI Nyasaye waIsiraeli aboola; mbu Lekhuula abandu banje batsie, mbu bangasilie lisabo mushitsiimi. 2Farao nasunga mbu OMWAMI naye niye wina, mbu embulile okhuboolakhwe mbu endekhuule Isiraeli? Isie shimumanyile OMWAMI oyo, kata shindalalekhuula Isiraeli mbu batsie tawe. 3Nabo nibasunga mbu Nyasaye wabaHeburania yakhubukaaniile; khukhusaaya mbu lekha khutsie oluchendo lwetsindaalo tsitaru mushitsiimi, khumumalile OMWAMI Nyasaye weefwe omusango; aleshe okhukhurulila nende oluumbe, kata nende olukanga. 4Omuruchi waMisiri nabasunjila ari Inywe Musa nende Haruni, mbushiina nimuboholola abandu khumilimo chiabwe? Kalushe khumisiiko chieenywe. 5Khandi Farao nasunga mbu Lole, abandu beshialo eshio bulaano nabanji; ne inywe muchilanga nibahuluukha khumisiiko chiabwe. 6Kho inyanga yeneyo Farao yalaka abasinjilili babandu, nende abanyapara babwe, ar i 7Murabaheelesia abandu abo olububa okhuupila amatofali khandi tawe, shinga olwa mwakholilenje; abeene batsie beekhaabile olububa. 8Ne obukhumi bwamatofali aka bakholanga okhuula olwa leelo, mubarekhwo murio; murabatiitiyiliekhwo tawe; shichila nabakara; niko akachila nibahaaba, bari Khutsie khumalile Nyasaye weefwe omusango. 9Mubaheelesie abandu abo emilimo emitinyu okhushila echiabeelenje, banyakhane ninachio; baleshe okhulonda amakhuwa kabutswa tawe.
10Kho abasinjilili babandu nibarula, nende abanyapara babwe, nibaboolela abandu bari Farao asunga mbu Shindalamuheelesinjia olububa tawe. 11Abeene mutsie, mwinyoolele olububa ewa lwakhanyoolekha; khandi emilimo chieenywe shichiitsa okhutiitiyibwa nahatuutu ta. 12Kho abandu nibasalaana hosi hosi mushialo shiaMisiri okhukhaaba olububa ewa lwanyala okhunyoolekha mumikunda. 13Abasinjilili nabo nibabaluunyia, bari Male emilimo chieenywe, emilimo chieinyanga, shinga olwa mwakholanga olwa olububa lwabeelenjeho. 14Nabo abanyapara abomubaIsiraeli, aba abasinjilili baFarao bali nibara khubo, banywekhwa, nibareebwa bari Mbushiina nimuramalilisiye emilimo chieenywe, kata eshiabeele kata leelo ta, echiokhuupa amatofali shinga olwa mwakholilenje?
15Mana abanyapara babaIsiraeli nibatsia nibamulilila Farao, nibasunga bari Nishiina eshichila nokholela abasumbabo orio? 16Abasumbabo shibaheebungwakhwo olububa ta, ne bakhubiila bari Khupe amatofali; mana lola, abasumbabo banywekhungwa; nebutswa likosa lili khubandu bobo abeene. 17Naye nasunga mbu Muli abakara inywe, muli abakara; niko akachila nimuboolanga mbu Khutsie khumumalile OMWAMI omusango. 18Tsie bulaano, mukhole emilimo; okhuba shimwitsa okhuheebwakhwo olububa tawe, nebutswa mukhoyile okhuleeranga obukhumi bwamatofali habwene. 19Nabo abanyapara babaana baIsiraeli balola shinga olwa bali mumatinyu, olwa kasungwa mbu Shimulaleemiakhwo obukhumi bwamatofali keenywe, akemilimo chiabuli nyanga, ta.
20Ne olwa bali nibarulanga ewaFarao banyoola Musa nende Haruni nibabalindanga khunjila; 21nibabasunjila bari OMWAMI amuhenje, akabukhasie zmakhuwa; okhuba muchilile nikhuhunyila Farao nende abasumbabe obukundu, nimura olukanga mumukhono kwabwe okhukhwirila.
Okhusaaya khwaMusa
22Mana Musa nakalushila OMWAMI, nasunga ari Omwami, mbushiina nokholeele abandu bano obubii? Nishiina eshichilile niuruma? 23Okhuba okhurula olwa ndatsiile ewaFarao okhuboola muliiralio, abakhoielanga abandu bano obubii; kata iwe shiobahabiine abandubo nahatuutu ta.
Currently Selected:
Okhurula 5: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
