Okhurula 6
6
1Naye OMWAMI namusu-njila Musa mbu Bulaano witsa okhulola eshia ndiitsa okhumukholela Farao; okhuba khulwa omukhono kwamaani alabalekhuula, khandi khulwa omukhono kwamaani alabeelusia mushialoshie.
Omulango kwakhabili kwaMusa
2Mana Nyasaye yaboolela Musa mbu Nisie YAHWEH. 3Ne ndaloleshela Aburahamu, nende Isaka, nende Yakobo, nindilanganga mbu Nyasaye Ounyalabiosi; ne khuliira lianje YAHWEH shindabamanyishila tawe. 4Khandi ndatinyisiye indakano yanje ninabo, okhubaheelesia eshibala shiaKanaani, eshibala shiobucheniyi bwabwe, eshia balinjimwo shinga abacheni. 5Khandi ndahuliile okhubinda khwabaana baIsiraeli, shinga olwa abaMisiri babakhosia emilimo emitinyu, ne nditsuliile indakano yanje. 6Khulwako osunjile abaana baIsiraeli ori Nisie YAHWEH, ne ndalamurusia okhurula khumisiiko emisiro chiabaMisiri, nimuboholola okhurula mubunyakhani bwabwe, nimununula nende omukhono okunyiililwe, khandi nende obwilwatsii obukhongo; 7khandi ndalamubukula mube lihanga lianje, nasi ndalabeetsanga khwinywe Nyasaye weenywe; khandi mulamanya shinga olua endi Yahweh Nyasaye weenywe, oumurusia okhurula khumisiiko chiabaMisiri. 8Khandi ndalamuusia khushialo shiatsana eshiachila ndachinguula omukhono okhushiheelesia Aburahamu, nende Isaka, nende Yakobo; khandi ndalakhuheelesia iwe, shikhubeele obulaame; nisie Yahweh. 9Kho Musa yaboolela abaana baIsiraeli ario; nebutswa shibamurechela Musa amarwi ta, khulwa okhukhaywa okhwisimilisia khandi khulwa okhumiinikha khwemilimo.
10Mana OMWAMI nasunjila Musa ari 11Yinjila osungane nende Farao omuruchi waMisiri, mbu alekhuule abaana baIsiraeli, barule mushialoshie. 12Ne Musa nasunjila OMWAMI ari Lola, abaana balsiraeli shibayambuliilekhwo ta; kho bulaano Farao alanyala arie okhumbulila, isie owomunwa okubula eshishebo ta? 13OMWAMI nasungana nende Musa nende Haruni, nabalachilisia okhubatsiila abaana balsiraeli, khandi okhumutsiila Farao omuruchi waMisiri, okhurusia abaana balsiraeli mushialo shiaMisiri.
Tsinzibulo tsiabakuukanyene Musa
14Bano nibo abakhulundu betsinzu tsiabakuuka babwe; abaana baReubeni omwana wambeli walsiraeli mbabano, mbu Hanoki, naPalu, naHezeroni, naKarami; bino nibio ebilibwa biaReubeni. 15Nabaana baSimeoni mbabano, mbu Yemueli, naYamini, naOhadi, naYakhini, naZohari, naShauli omwana womukhaana omuKanaani; bino nibio ebilibwa biaSimeoni. 16Kano niko ameera kabaana baLawi khunzibulo tsiabwe shinga olwa tsiali, mbu Gereshoni, naKohatsi, naMerari; nemiyika echia Lawi yayindila chiali eshikhumi nende amakhumi kataru namusaafu. 17Nabaana baGereshoni mbabano, mbu Libini nende Shimei, ebilibwa biabwe shinga olwa biali. 18Nabaana baKohatsi mbabano mbu Aburamu, nalzihari, naHeberoni, naUzieli, nemiyika echia Kohatsi yayindila chiali eshikhumi nende amakhumi kataru nachitaru. 19Nabaana baMerari mbabano, mbu Mali nende Mushibino nibio ebilibwa biabaLawi, khunzibulo tsiabwe shinga olwa tsiali. 20Naye Amuramu yaleera Yokebedi nyakhusenjenyene abe omukhasiwe; naye niyeebula Haruni nende Musa; nemiyika echia Amuramu yayindila chiali eshikhumi nende amakhumi kataru namusaafu. 21Nabaana baIzihari mbabano, mbu Kora, naNefegi, naZikhiri. 22Nabaana baUzieli mbabano, mbu Mishaeli, naElizafani, naSitsiri. 23Naye Haruni yaleera Elisheba, omukhaana waAminadabu, omukhaana wabwe Nashoni; naye niyeebula Nadabu naAbihu, Eleazari naItsamari. 24Nabaana baKora mbabano; mbu Asiri, naElekana, naAbiasafu; bino nibio ebilibwa biabaKora. 25Naye Eleazari omwana waHaruni yaleera mulala khubakhaana baPutieli; naye niyeebula Finehasi. Bano nibo abakhulundu betsinzu tsiabakuuka babwe abaLawi, ebilibwa biabwe shinga olwa biali.
26Bano nibo Haruni nende Musa batsana, aba OMWAMI yasunjila mbu Rusie abaana baIsiraeli mushialo shiaMisiri, emikanda chiabwe shinga amahe. 27Nabo nibo abasungana nende Farao omuruchi waMisiri, okhurusia abaana baIsiraeli muMisiri; nibo Musa nende Haruni batsana.
Aka OMWAMI yalachilisia Musa naHaruni
28Ne khunyanga eyo olwa OMWAMI yasungana nende Musa mushialo shiaMisiri, 29OMWAMI yasunjila Musa mbu Nisie OMWAMI; omuboolele Farao omuruchi waMisiri kosi aka ekhusunjilanga. 30Naye Musa naboolela OMWAMI ari Lola, isie endi owomunwa okubula eshishebo ta; kho Farao nanyale arie okhumbulila?
Currently Selected:
Okhurula 6: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
