Okhurula 4
4
1Musa nakalusia naboola mbu Nebutswa, lola, shibakhafuchiilile kata okhuhulila okhuboola khwanje ta; shichila bakhasunje mbu OMWAMI shiyakhulolesheele tawe. 2Mana OMWAMI namureeba ari Nishiina eshia oli ninashio mumukhono eshio? Nakalusia mbu Neindabushi. 3Nasunga mbu 'Chifuube hasi. Musa nachifuuba hasi, niyikwa inzokha; mana nachiilukha. 4Mana OMWAMI namusunjila Musa ari Nyiila omukhonokwo ochitiile omushila. Naye nanyiila omukhono, nachitiila, niyikwa indabushi mumukhonokwe; 5mbu mana basuubile shinga olwa OMWAMI, Nyasaye waAburahamu, Nyasaye waIsaka, khandi Nyasaye waYakobo, yakhulolesheele. 6OMWAMI nameeta namusunjila mbu Khandi ra omukhono mungubo khushilifushio. Naye nara omukhonokwe khushilifu; nolwa yakurusia, lola, omukhonokwe kwali nikulikhwo obuchele, nikulabile tserelele shinga itsaluchi. 7Nyasaye nasunga mbu Kalusia omukhono khushilifushio. Naye nakalusia omukhonokwe khushilifu; nolwa yakurusia khushilifushie, lola, kwali nikukalukhaane khandi shinga omubilikwe kwosi. 8Nyasaye naboola mbu Ne nibaba nibakhaya okhukhufuchiilila, kata okhurechelesia akeshilolelo shiambeli, bakhasuubile akeshilolelo shiolunyuma. 9Khandi nibaba nibarasuubila kata ebilolelo bino bibili, kata okhuhulila okhuboolakhwo ta, otahekhwo khumatsi akomumwalo kwaNaili, okasundule khwiloba eliumu; namatsi ako aka otayile okhurula mumwalo kwaNaili kalakwa amabanga khushialo eshiumu.
10Mana Musa namusunjila OMWAMI ari O, Omwami, isie shindi owolulimi olwangu tawe, kata okhurula khale, kata bulaano olwa osungaane nende omusumbawo; okhuba shindi omwangu okhuboola ta; olulimi lwanje nolusiro. 11OMWAMI namusunjila ari Niwina owalonga omunwa kwomundu? Kata niwina oukhola omundu abe omusilu, kata oweekala amarwi, kata owokhulola, kata omubofu? Shindi nisie OMWAMI? 12Kho bulaano tsia, nasi ndalabeetsanga halala nende omunwakwo, nikhwibaalila aka witsa okhuboola. 13Naye nasunga mbu O, Omwami, ekhusaaya mbu orumile mumukhono kwa oyo owa wenya okhuruma. 14Mana oburima bwOMWAMI bwamwashila Musa, nasunga mbu Shialiyo Haruni omwana weenywe, omuLawi? Emanyile mbu ye anyala okhuboola bulayi. Khandi lola, arulile, yeetsanga okhukhwakaanila; olwa alakhulola, yeetsa okhusangaala mumwoyokwe. 15Nawe olamuboolelangakhwo, nomwechesia amakhuwa aka akhoyile okhuboola; nasi ndalabeetsanga halala nende omunwakwo, khandi nende omunwakwe, nimwechesia aka mukhoyile okhukhola. 16Naye alabeetsanga omusunjiwo imbeli wabandu; ye alakhubeelanga shinga omunwakwo, nawe olabeetsanga khuye shinga Nyasaye. 17Khandi olatsia nende indabushi yino mumukhono, eya nokholelenje ebilolelo ebio.
Musa yakalukha eMisiri
18Kho Musa natsia, nakalukha ewaYetsero nyakhufialanyene, namusunjila ari Chama ofuchiilile enzie engalushe ewabaana beefwe abali muMisiri, endole nibaba nibashiliyo mwoyo. Yetsero namusunjila Musa ari Otsie nomulembe. 19OMWAMI namusunjila Musa ebweneyo eMidiani, mbu Tsia okalushe eMisiri; okhuba abandu bosi abali nibayiimanga obulamubwo bamala okhufwa. 20Mana Musa nabukula omukhasiwe nende abaanabe abasiani, nabaniinia khusishili, nakalukha mushialo shiaMisiri; Musa natsia neindabushi yaNyasaye mumukhono.
21OMWAMI namusunjila Musa ari Olwa wakhabe nokaluushe eMisiri, orachweya okhukhola imbeli waFarao amakana ako kosi aka ndareele mumukhonokwo tawe; nebutswa ndalatinyia omwoyokwe, naye shialalekhuula abandu batsie ta. 22Mana omusunjile Farao ori Kano niko aka OMWAMI aboola; mbu Isiraeli niye omwana wanje, nomwikulanda wanje; 23nasi emalile okhukhusunjila mbu Lekhuula omwana wanje atsie, mbu yakhalabanile; nawe wakhayile okhumulekhuula; lola, enzitsa okhwira omwana wuwo, omwikulandawo.
24Mana khunjila, habundu ewa bakona, OMWAMI yaakaana ninaye, niyeenya okhumwira. 25Mana Zipora yabukula lichina limemu, nasheba likhoba lielifunga liomwanawe, nalifuuba habilenje biaMusa; nasunga mbu Toto, oli omusaatsa weshitsayi khwisie! 26Mana OMWAMI namulekha. Nilwo olwa yaboola mbu Oli omusaatsa weshitsayi, mbu khulwa eshishebo.
27Mana OMWAMI yamusunjila Haruni ari Otsie mushitsiimi okhumwakaanila Musa. Naye natsia, niyaakaana ninaye mushikulu shiaNyasaye, namufumbeelela namutsunzuuna. 28Naye Musa namuboolela haruni amakhuwa kosi kOMWAMI, aka yali namurumile ninako, nende ebilolelo biosi ebia yali niyamulachilisia.
29Mana Musa nende Haruni nibatsia nibakhung'aasia halala abakofu bosi babaana baIsiraeli; 30Haruni naboola amakhuwa kosi aka OMWAMI yali niyamuboolela Musa, nakhola ebilolelo ebio imbeli wabandu. 31Abandu nabo nibasuubila; nolwa bahulila shinga OMWAMI olwa yali nakoonyile abaana baIsiraeli, khandi shinga olwa yali nalolanga obusandibwi bwabwe, mana babunamia emirwe chiabwe nibamwinamila.
Currently Selected:
Okhurula 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
