Okhurula 40
40
Eshimenyo shiasinjisibwa nishiahulwa
1An Haho OMWAMI nasunjila Musa ari 2Omwesi kwambeli nikuli lulala, olasinjisie eshimenyo shieliheema liokhwakaana. 3Ne oremwo lisanduku lioburumbusi, noshinga lisanduku neingubo ishinga eyo. 4Mana oleeremwo imeesa, niwanza ebindu ebiakhwo; oleeremwo nende eshichibi shietsitaha, norenjekhakhwo tsitaha tsiashio. 5Kho orenjeshe eshimalilo shieitsahaabu shiamalesi kelibuuliesi imbeli welisanduku lioburumbusi, noraho olwichi Iwomuliango kweshimenyo. 6Khandi orenjeshe eshimalilo shiemisango emisambe imbeli womuliango kweshimenyo shieliheema liokhwakaana. 7Ne orenjeshe olutaabo olwo hakari weliheema liokhwakaana nende eshimalilo shiemisango, noramwo amatsi. 8Mana osinjisie tsisiilo tsiolwanyi okhubotokhasiaho, niweleesia olwichi Iweingubo Iweshilibwa shiolwanyi. 9Ne obukule amafura akokhutsushiilila, otsushiilile khushimenyo, nende khubiosi ebilimwo, noshiahula, nende ebichio biashio biosi; nashio shilaba eshitakatifu. 10Khandi obitsushiilile amafura eshimalilo shiemisango emisambe, nebichio biashio biosi, niwahula eshimalilo; eshimalilo nashio shilaba eshitakatifu muno. 11Khandi obitsushiilile amafura olutaabo neshichibi shialwo, nobiahula.
12Mana oleere Haruni nabaanabe hamuliango weliheema liokhwakaana, nobasinga amatsi. 13Nomufwala Haruni ebiifwalo ebitakatifu; nomutsushiilila amafura, nomwahula, mbu ya'khalabanile mubukuhani. 14Oleere nende abaanabe, nobafwala amakoti; 15nobatsushiilila amafura, shinga olwa omutsushiiliile saabwe, mbu bakhalabanile mubukuhani; ne okhutsushiililwa khwabwe khulababeela khulwa obukuhani oburahwaho ta, munzibulo tsiabwe tsiosi. 16Musa nakhola ario; kosi aka OMWAMI yamulaka shinga olwa kali, nakhola ario.
17Kho mumwesi kwambeli okwomumuyika kwakhabili, nikuli lulala, eshimenyo shiasinjisibwa; 18Musa nasinjisia eshimenyo, narenjekha ebichibi niyeemekha ebitiisi biashio, niyeenjisiamwo tsisheti tsiashio, nasinjisia tsisiilo tsiashio. 19Niyaala liheema hekulu weshimenyo, nafuunikhakhwo eshifuunikho shieliheema hekulu khushio; shinga OMWAMI olwa yamulaka Musa. 20Ne yabukula oburumbusi obwo nabura mwisanduku, nara tsinyanzo khwisanduku, nara litisilo hekulu khwisanduku; 21ne yaleera lisanduku mushimenyo, niyaachikha ingubo ishinga, nashinga lisanduku lioburumbusi; shinga OMWAMI olwa yamulaka Musa. 22Musa nara imeesa mwiheema liokhwakaana, elubeka Iweshimenyo okuhenjile enotsi, elwanyi weingubo ishinga. 23Niyaanzakhwo emikaate tsana imbeli wOMWAMI; shinga OMWAMI olwa yamulaka Musa. 24Ne nara eshichibi shietsitaha mwiheema liokhwakaana, okhuhengana neimeesa, elubeka Iweshimenyo okuhenjile eNegebu. 25Narenjekha tsitaha imbeli wOMWAMI; shinga OMWAMI olwa yamulaka Musa. 26Mana nara eshimalilo shieitsahaabu mwiheema liokhwakaana ahambi neingubo ishinga; 27natuumiliakhwo amalesi kelibuuliesi akeshing'aari; shinga OMWAMI olwa yamulaka Musa. 28Mana naraho olwichi Iwomuliango kweshimenyo. 29Khandi narenjekha eshimalilo shiemisango emisambe hamuliango weshimenyo shieliheema liokhwakaana, namalilakhwo omusango omusambe nende omusango kweimele; shinga OMWAMI olwa yamulaka Musa. 30Narenjekha olutaabo olwo hakari weliheema liokhwakaana nende eshimalilo, naramwo amatsi akokhwiyosia. 31Naye Musa nende Haruni nabaanabe nibeeyosiamwo amakhono kabwe nebilenje; 32olwa beenjilanga mwiheema liokhwakaana, khandi olwa basitanga ahambi khushimalilo, beeyosilinjiamwo; shinga OMWAMI olwa yamulaka Musa. 33Mana yasinjisia tsisiilo tsiolwanyi okhubotokhasia eshimenyo nende eshimalilo, niyeeleesia olwichi Iweingubo Iweshilibwa shiolwanyi. Nilwo olwa Musa yamalilisia emilimo echio.
Lileesi liafuunikha liheema liokhwakaana
34Mana lileesi elo liafuunikha liheema liokhwakaana, oluyali LwOMWAMI nalwo nilwitsula mushimenyo. 35Kata Musa shiyanyala okhwinjila mwiheema liokhwakaana ta, shichila lileesi liamenyakhwo, oluyali lwOMWAMI nilwitsula mushimenyo. 36Ne olwa lileesi liarusibungwakhwo hekulu weshimenyo. Abaana baIsiraeli batsiilililanga, munjendo tsiabwe tsiosi. 37Nebutswa lileesi nilirashiarusibwakhwo, shibachendanga tawe, okhuula khunyanga olwa liarusibungwa. 38Okhuba lileesi liOMWAMI lialinji khushimenyo mushiteere, ne lialinjimwo omulilo mushilo, mumoni tsiabomunzu yaIsiraeli bosi. Munjendo tsiabwe tsiosi.
Currently Selected:
Okhurula 40: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
