Okhurula 3
3
Omulango kwaMusa
1Ne Musa yali niyaayanga ebiayo biaYetsero nyakhufialanyene, omwisaaliisi waMidiani; niyeemilila ebiayobie nabiyila injelekha weshitsiimi niyoola khushikulu shiaNyasaye, eHorebu. 2Malaika waNyasaye namuloleshela mulumemo Iwomulilo, hakari mushitsakha shindi; nahenga, ne lola, eshitsakha shiali nishiyiitsanga, ne omulilo shikwashisambanga eshitsakha eshio ta. 3Musa nasunga ari Engotole bulaano, endole likhuwa lino likhongo, elichila omulilo nikurasambanga eshitsakha shino ta. 4Nolwa OMWAMI yalola nakotola mbu atsie okhulola, Nyasaye namulanga hakari mushitsakha, mbu Musa, Musa! Naye nafuchila mbu Endiho. 5Naboola mbu Orasita ahambi hano tawe; wifwalule ebilaaro mubilenjebio, okhuba liloba elia osinjiilekhwo nihabundu hobutakatifu. 6Khandi naboola mbu Isie nisie Nyasaye wabakuukabo, Nyasaye waAburahamu, Nyasaye waIsaka, khandi Nyasaye waYakobo. Musa niyeebisa obweni; shichila yaria okhumuhenga Nyasaye.
7OMWAMI nasunga mbu Toto mwene, ndaluutsinji okhumiinwa khwabandu banje abali eMisiri, khandi embuliile amalilo kabwe khulwa abasinjilili babwe; okhuba ndamanya okhutsuunwa khwabwe; 8ne enzishile okhubahabina mumukhono kwabaMisiri, nokhubatikulusia okhurula mushibala eshio, okhuula mushibala eshilayi khandi eshibambalifu, okhuula mushibala eshiitsuulemwo amabeele nende obuushi; okhuula habundu wabaKanaani, nabaHiti, nabaAmori, nabaPerizi, nabaHiti, nende abaYebusi. 9Ne bulaano, lola amalilo kabaana baIsiraeli kanzuliile; khandi ndaluutsi obumiini bwabaMisiri shinga olwa babamiinanga. 10Kho bulaano yitsa, ekhurume ewaFarao, mbu orusie abandu banje, abaana baIsiraeli, muMisiri. 11Musa namusunjila Nyasaye ari Nasi nisie wina, owakhatsiila Farao, kata mbu erusie abaana baIsiraeli muMisiri? 12Naye naboola mbu Shindalachweya okhubeetsanga ninawe halala tawe; khandi lino lilakhubeela eshilolelo mbu nisie oukhurumile; mbu olwa oliba norusiye abandu abo muMisiri, mulimukhalabanila Nyasaye khushikulu shino.
13Musa namusunjila Nyasaye ari Ne olwa ndakhabatsiile abaana baIsiraeli, nimbasunjila ndi Nyasaye wabakuuka beenywe yarumile khwinywe; nabo olwa bakhareebe bari Eliiralie niye wina? Kho ndakhabakalusie endie? 14Mana Nyasaye namuboolela Musa mbu ISIE NISIE OULI ISIE; nasunga mbu Obasunjile abaana baIsiraeli ori nanwa, mbu ISIE NISIE yarumile khwinywe.
15Nyasaye nameeta namuboolela Musa ari Wakhaboolele abaana baIsiraeli ori nanwa, mbu OMWAMI, Nyasaye wabakuuka beenywe, Nyasaye waAburahamu, Nyasaye waIsaka, khandi Nyasaye waYakobo, yarumile khwinywe; lino nilio eliira lianje obushia nobushia, khandi lino nilio eshiitsulilo shianje okhuula khubisoni nebisoni. 16Tsia, okhung'aasie abakofu baIsiraeli halala, obaboolele mbu OMWAMI, Nyasaye wabakuuka beenywe, Nyasaye waAburahamu, khandi waIsaka, khandi waYakobo, yandolesheele, nasunga mbu Shinjweyile okhumukoonya ta, nindola aka mukholelungwa eMisiri; 17nimuboolela mbu Ndalamutikulusia nimurusia mukhumiinwa khweMisiri, nimuusia mushibala shiabaKanaani, nabaHiti, nabaAmori, nabaPerizi, nabaHiwi, nende abaYebusi, okhuula khushibala eshiitsuulemwo amabeele nende obuushi. 18Ne balahulila okhuboolakhwo; mana mulatsia, iwe nende abakofu baIsiraeli, ewomuruchi waMisiri, mumusunjile mbu OMWAMI, Nyasaye wabaHeburania, abukaane nineefu; kho balaano khukhusaaya ofuchiilile khutsie oluchendo lwetsindaalo tsitaru mushitsiimi, khumumalile OMWAMI Nyasaye weefwe emisango.
19Nasi emanyile mbu omuruchi waMisiri shialamuheelesia omunwa okhutsia nahatuutu ta, kata khulwa omukhono kwamaani tawe. 20Ne ndalanyiila omukhono kwanje, nirootsa Misiri nende ebiamakana bianje ebia enzitsa okhukhola mukari washio; nolunyuma lwa ebio alamulekhuula mutsie. 21Khandi ndalachila abandu bano nibakoosibwa nabaMisiri; ne olwa mutsia, shimulatsia butswa tawe; 22habula buli mukhasi alasaba omumenyaniwe, khandi nende oumenyanga munzuye, ebimili bieifeetsa, nende ebimili bieitsahaabu, nende ebiifwalo; ne mulabifwala abaana beenywe abasiani, nende abaana beenywe abakhaana; nindio mulabayaaya abaMisiri.
Currently Selected:
Okhurula 3: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
