Okhurula 38
38
Obukholi bweshimalilo shiemisango emisambe
(Okhuru. 27.1-8)
1Khandi yakhola eshimalilo shiemisango emisambe shiomusaala kwomupeeli; oburambi bwashio bwali emikhono chiraano, nobuchiikha bwashio emikhono chiraano, tsimbeka tsiosi tsine nitsihelana; nobuchinguukhu bwashio emikhono chitaru. 2Nakhola tsinzika tsiashio khukoona tsiashio tsine; tsinzika tsiashio tsiali eshindu shilala ninashio; nashifuuma omukasa. 3Nakhola nende ebichio biosi bieshimalilo, mbu tsinyungu, nemiikho, netsingaye, namakhango, netsindaabo tsiomulilo; ebichio biashio biosi yabikhola biomukasa. 4Khandi yakholela eshimalilo eshindu shingana olukhanda Iwomukasa, hasi wolusiche, khulwalo, niluula shinga khunusu yobuchinguukhu. 5Nasalulusia omukasa nakhola tsingaka tsine khulwa tsindulo tsine tsiolukhanda Iwomukasa olwo, tsibe habundu wetsinyanzo. 6Nakhola nende tsinyanzo tsiomupeeli, natsifuuma omukasa. 7Niyeeniisia tsinyanzo mungaka etsio mumbafu tsieshimalilo, okhushichinga; yashikhola tsimbaho, mukari mwene nimuba mukhaya.
Obukholi bwolutaabo olwokhwiyosiliamwo
(Okhuru. 30.18)
8Khandi yakhola olutaabo Iwomukasa, nende eshichibi shialwo shiomukasa; omukasa okwo kwalinji ebiilolelo biabakhalabani abakhasi abali nibakhalabananga hamuliango weliheema liokhwakaana.
Olwanyi Iweshimenyo
(Okhuru. 27.9-19)
9Khandi yakhola olwanyi; khulubeka Iwomukhono musaatsa, okuhenga eNegebu, tsingubo tsinzeleesia tsiolwanyi tsiali tsieikitani indorotoro isiire, emikhono eshikhumi; 10tsisiilo tsiatsio tsiali amakhumi kabili, nebichibi biatsio amakhumi kabili, biomukasa; ebikuru bietsisiilo nende tsinzaha tsiatsio nibili bieifeetsa. 11Khandi khulubeka Iwenotsi emikhono eshikhumi, tsisiilo tsiatsio amakhumi kabili, nebichibi biatsio amakhumi kabili, biomukasa; ebikuru bietsisiilo nende tsinzaha tsiatsio bieifeetsa. 12Ne khulubeka lwamumbo tsialiho tsingubo tsinzeleesia etsiemikhono amakhumi karaano, tsisiilo tsiatsio likhumi, nebichibi biatsio likhumij ebikuru bietsisiilo nende tsinzaha tsiatsio bieifeetsa. 13Ne khulubeka Iwebukwe okuhenjile ewa eliuba lifwindilanga, emikhono amakhumi karaano. 14Tsingubo tsinzeleesia etsiokhulubeka lulala weshilibwa tsiali emikhono ekhumi nachiraano; tsisiilo tsiatsio tsitaru, nebichibi biatsio bitaru. 15Khandi birio khulubeka lundi; khulubeka eyi nende eyi weshilibwa shiolwanyi tsialiho tsingubo tsinzeleesia tsiemikhono ekhumi nachiraano; tsisiilo tsiatsio tsitaru, nebichibi biatsio bitaru. 16Tsingubo tsinzeleesia tsiosi etsiabotokhasia olwanyi tsiali etsieikitani indorotoro isiire. 17Ebichibi bietsisiilo nabio biali biomukasa; ebikuru bietsisiilo nende tsinzaha tsiatsio tsieifeetsanokhufuuma khwemirwe chiatsio nokhweifeetsa; khandi tsisiilo tsiosi tsiolwanyi tsiabohwa tsinzaha tsieifeetsa. 18Olwichi Iweshilibwa shiolwanyi nalwo lwali emilimo chiomunabi wamang'oole, Iwetsingubo tsieibuluu netsieisambarau, netsiranzayi, neikitani indorotoro isiire; oburambi bwalwo bwali emikhono amakhumi kabiri, nobuchinguukhu mubuchiikha bwalwo bwali emikhono chiraano, okhuleng'aana netsingubo tsinzeleesia tsiolwanyi. 19Tsisiilo tsiatsio tsiali tsine, nebichibi biatsio bine, biomukasa; ebikuru biatsio bieifeetsa, nokhufuumwa khwemirwe chiatsio nende okhwetsinzaha tsiatsio nokhweifeetsa. 20Ne ebibambo biosi bieshimenyo, nende ebiolwanyi tsimbeka tsiosi, biali ebiomukasa.
Ebibia bieshimenyo
21Buno nibwo obunji bwebindu bieshimenyo, mbu eshimenyo shioburumbusi, shinga olwa biabalwa, amalako kaMusa shinga olwa kali, khulwa obukhalabani bwabaIawi, mumukhono kwaItsamari waHaruni omukuhani. 22Naye Bezaleli waUri, waHuri, woluyia lwaYuda, yabikhola biosi ebia OMWAMI yali namulachile Musa. 23Ne halala ninaye yaliho Oholiabu waAhisamaki, woluyia lwaDani, omubaatsi, khandi omulushi wamang'oole, khandi omunabi wamang'oole keibuluu, nakeisambarau, namaranzayi, nende ikitani indorotoro.
24Itsahaabu yosi eyeekhoonyelwa khulwa emilimo, mubukasii bwosi bwahabundu ahatakatifu, niyo itsahaabu yebihaanwa ebio, yachelwa tsitalanda amakhumi kabili nashienda netsishekeli ebikhumi musaafu namakhumi kataru, nochela khushekeli yahabundu ahatakatifu; 25nayo ifeetsa eyarula khubomukhung'aano ababasibwa, yachelwa tsitalanda eshikhumi netsishekeli eshikhumila ebikhumi musaafu amakhumi musaafu natsiraano, nochela khushekeli yahabundu ahatakitifu; 26ibeka buli khumurwe kwomundu, eshisina mbu inusu yeishekeli, nochela khushekeli yahabundu ahatakatifu, khubuli mundu owabira natsia mubabasibwa, okhurula khubemiyika amakhumi kabili nende abashilaho, khulwa abandu ebikhumila ebikhumi bisasaba nabitaru, ebikhumi biraano namakhumi karaano. 27Tsitalanda etsio eshikhumi tsieifeetsa tsiali etsiokhusalulusia khulwa ebichibi biahabundu ahatakatifu, nende ebichibi bieingubo ishinga eyo; ebichibi eshikhumi khutsitalanda eshikhumi, mbu italanda khulwa eshichibi. 28Ne khutsishekeli etsio eshikhumila ebikhumi musaafu amakhumi musaafu natsiraano, yatsikhola ebikuru bietsisiilo, nafuuma khumirwe chiatsio, natsikholela tsinzaha. 29Ebihaanwa biomukasa nabio biachelwa tsitalanda amakhumi musaafu, netsishekeli ebikhumila bibili nende ebikhumi bine. 30Okwenokwo yakukhola ebichibi biomuliango kweliheema liokhwakaana, nende eshimalilo shiomukasa. Nende olukhanda lwashio Iwomukasa, nebichio biosi bieshimalilo. 31Nebichibi biolwanyi tsimbeka tsiosi, nebichibi bieshilibwa shiolwanyi, nebibambo biosi bieshimenyo, nebibambo biosi biolwanyi tsimbeka tsiosi.
Currently Selected:
Okhurula 38: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
