Okhurula 36
36
1Nabo Bezaleli nende Oholiabu bakhole emilimo, nende buli mundu omusitsa, owa OMWAMI yareele muye obusitsa nende obumanyilisi mbu amanye okhukhola emilimo chiosi chiobukhalabani bwahabundu aho ahatakatifu, shinga olwa OMWAMI yalachilisiye.
Abandu baleera ebindu ebinji okhushilaasia
2Mana Musa yalanga Bezaleli nende Oholiabu, nende buli mundu omusitsa, owa OMWAMI yali nareele mumwoyokwe obusitsa, buli mundu owa omwoyokwe kwamubuusia okhwitsa khumilimo mbu achikhole; 3Musa nabaheelesia omusololo okwo kwosi okwa abaana baIsiraeli bali nibaleerile khulwa emilimo chiobukhalabani bwahabundu aho ahatakatifu, okhuhakhola. Nabo nibatasa okhumuleerela buli mutsuli ebihaanwa biokhuchama. 4Nabo abandu bosi bobusitsa abali nibakholanga emilimo chiosi chiahabundu ahatakatifu, beetsa nibarula buli mundu khumilimo echia yali nakholanga; 5nibamusunjila Musa bari Abandu baleeranga ebindu ebinji muno ebishilaasia obukhalabani bwemilimo echia OMWAMI yakhulachile okhukhola. 6Naye Musa nalachilisia, nabo nibatswania amakhuwa ebulafu mukambi, mbu Omundu yesi, kata omusaatsa kata omukhasi, aleshe okhukhola emilimo chindi khulwa omusololo kwahabundu ahatakatifu ta. Nindio abandu bakaywa oburaleera khandi ta. 7Shichila ebindu ebia bali ninabio biali nibihelile emilimo chiosi okhuchikhola, nende okhushilaho.
Obukholi bweshimenyo
(Okhuru. 26.1-37)
8Ne bosi abali abasitsa mubakholanga emilimo echio, nibakhola eshimenyo netsingubo tsinzeleesia ekhumi; etsieikitani indorotoro isiire, netsingubo tsieibuluu, netsieisambarau, netsiranzayi, nende abakerubi, emilimo chiomulushi wamang'oole, bashikhola. 9Oburambi bwabuli ngubo inzeleesia bwali emikhono amakhumi kabili namunaane, nobubambalifu bwabuli ngubo inzeleesia emikhono chine; tsingubo tsinzeleesia tsiosi tsiali etsieshichelo shilala.
10Ne yoonga tsingubo tsinzeleesia tsiraano halala, buli ngubo khuyindi; khandi etsindi tsingubo tsinzeleesia tsiraano yatsiunga, buli ngubo khuyindi. 11Khandi yakhola ebifuulwa bieibuluu khundulo weingubo inzeleesia eyahelelesia khutsioongwa tsiambeli; khandi nakhola ario khundulo weingubo inzeleesia eyahelelesia khutsioongwa tsiakhabili. 12Yakhola ebifuulwa amakhumi karaano khungubo inzeleesia ndala, khandi yakhola ebifuulwa amakhumi karaano khundulo weingubo inzeleesia eyali mutsioongwa tsiakhabili; ebifuulwa ebio nibihengana. 13Khandi yakhola ebitiili amakhumi karaano bieitsahaabu, niyoongasia ingubo inzeleesia ndala khuyindi nebitiili bienebio; eshimenyo nishiba shirio shilala.
14Yakhola nende tsingubo tsinzeleesia tsiobwoya bwetsimbusi, tsibe liheema hekulu weshimenyo; yakhola tsingubo tsinzeleesia ekhumi nandala. 15Oburambi bwabuli ngubo inzeleesia bwali emikhono amakhumi kataru, nobubambalifu bwabuli ngubo inzeleesia emikhono chine; tsingubo tsinzeleesia etsio ekhumi nandala tsiali etsieshichelo shilala. 16Niyoonga tsingubo tsinzeleesia tsiraano khubwatsio, khandi tsingubo tsinzeleesia tsisasaba khubwatsio. 17Khandi yakhola ebifuulwa amakhumi karaano khundulo weingubo inzeleesia eyahelelesia khutsioongwa etsio, khandi ebifuulwa amakhumi karaano khundulo weingubo inzeleesia khutsioongwa tsiakhabili. 18Nakhola nende ebitiili amakhumi karaano ebiomukasa okhuungasia liheema halala, libe elala. 19Khandi yakhola eshifuunikho shieliheema shiamaseelo kamamiiku akanyushilwa iranji iranzayi, khandi nende eshifuunikho shiamaseelo kandi amanyushe ikulu.
20Mana yakasia ebitiisi bieshimenyo emisaala chiomupeeli, ebisinjila. 21Oburambi bweshitiisi bwali emikhono ekhumi, khandi obuchiikha bwabuli shitiisi omukhono neinusu. 22Buli shitiisi shiali norwanzo rubili, nirwoongasibwa nindio yakhola ebitiisi biosi bieshimenyo. 23Yakhola ebitiisi bieshimenyo, ebitiisi amakhumi kabili khulubeka Iwomukhono musaatsa okuhenjile eNegebu; 24nakhola nende ebichibi amakhumi kane ebieifeetsa hasi webitiisi ebio amakhumi kabili; ebichibi bibili hasi weshitiisi shilala khulwa orwanzo rwashio rubili, khandi ebichibi bibili hasi weshitiisi shindi khulwa orwanzo rwashio rubili. 25Khandi khulubeka lwakhabili Iweshimenyo, khulubeka Iwenotsi, yakhola ebitiisi amakhumi kabili, 26nebichibi biabio bieifeetsa amakhumi kane; ebichibi bibili hasi weshitiisi shilala, khandi ebichibi bibili hasi weshitiisi shindi. 27Ne khulwa olubeka Iweindangu Iweshimenyo, elubeka lwamumbo, yakasia ebitiisi bisasaba. 28Yakhola nende ebitiisi bibili ebietsikoona tsieshimenyo indangu. 29Hasi bialiimaasibwa shikhabili, khandi bialiimaasibwa shikhabili birio okhuula khumurwe washio okhuula khungaka yambeli; nindio yabikhola biombi mutsikoona tsiombi. 30Bialiho ebitiisi munaane, nebichibi biabio bieifeetsa, ebichibi ekhumi nabisasaba; ebichibi bibili hasi wabuli shitiisi.
31Khandi yakhola tsisheti tsiomupeeli; tsiraano tsiebitiisi bieshimenyo khulubeka lulala, 32nende tsisheti tsiraano tsiebitiisi bieshimenyo khulubeka lundi, nende tsisheti tsiraano tsiebitiisi bieshimenyo indangu, elubeka lwamumbo. 33Ne yakhola olusheti lwahakari lubirile hakari webitiisi, okhuula khundulo eyi nende eyi. 34Khandi yafuuma ebitiisi ebio itsahaabu, nakhola tsingaka tsiabio tsibe habundu wetsisheti; khandi tsisheti natsio yatsifuuma itsahaabu.
35Khandi yakhola ingubo ishinga yeibuluu, neyeisambarau, neiranzayi, neikitani indorotoro isiire, nende abakerubi, emilimo chiomulushi wamang'oole, yachikhola. 36Nachikholela tsisiilo tsine tsiomupeeli etsiafuumwa itsahaabu, nitsili nebikuru' bieitsahaabu; natsisalulusilia ebichibi bine bieifeetsa. 37Nakhola nende olwichi Iweingubo mumuliango kweLiheema, yeingubo yeibuluu, neyeisambarau, neiranzayi, neikitani indorotoro isiire, emilimo chiomunabi wamang'oole; 38nende tsisiilo tsialwo tsiraano halala nebikuru; ne yafuuma emirwe chiatsio netsinzaha tsiatsio itsahaabu; ebichibi biatsio biraano nabio biali biomukasa.
Currently Selected:
Okhurula 36: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
