Okhurula 35
35
Akalachilisibwa khukeisabato
1Haho Musa yakhung'aasia omukhung'aano kwosi kwabaana baIsiraeli, nabasunjila mbu Kano niko amakhuwa aka OMWAMI yalachilisiye, mbu mukakhole. 2Emilimo chikholungwe tsindaalo tsisasaba; ne khunyanga yomusaafu mulabeetsanga nende inyanga inzahule, isabato yomuhongo yOMWAMI; omundu yesi oukhola omulimo kwosi khuyeneyo yeerwe. 3Murahambia omulilo kwosi mubimenyo bieenywe khunyanga yeisabato ta.
Omusololo kwOMWAMI
(Okhuru. 25.1-9)
4Musa nasunjila omukhung'aano kwosi kwabaana baIsiraeli ari Lino nilio elia OMWAMI yalachilisiye, 5mbu Musolole abeene mwenyene omusololo kwOMWAMI; omundu yesi owomwoyo okuchama obuhaani, akuleere, omusololo okwo kwOMWAMI; itsahaabu, neifeetsa, nomukasa; 6nende tsingubo tsieibuluu, netsieisambarau, netsiranzayi, neikitani indorotoro isiire, nende obwoya bwetsimbusi; 7nende amaseelo kamamiiku akanyushilwa iranji iranzayi, namaseelo kandi amanyushe, nemisaala chiemipeeli; 8nende amafura ketsitaha etsio, nemisaala chieshing'aari chiamafura akokhutsushiilila, khandi echiamalesi kelibuuliesi keisuuswa; 9amachina keishohamu, namachina kandi akokhureebwa khu ifoti eyo, nende khuloloti eyokhushilifu.
Ehichio bieshimenyo
(Okhuru. 39.32-43)
10Ne buli mundu omusitsa mwinywe yeetse, mukhole biosi ebia OMWAMI yalachilisiye; 11mbu eshimenyo, neliheema liashio, neshifuunikho shiashio, nebitiili biashio, nebitiisi biashio, netsisheti tsiashio, netsisiilo tsiashio, nende ebichibi biashio; 12lisanduku, netsinyanzo tsialio, litisilo, nende ingubo ishinga yolwichi; 13imeesa, netsinyanzo tsiayo, nebichio biayo biosi, nomukaate kwokhubaho khwanje; 14eshichibi shietsitaha nashio khulwa tsitaha, nebikholelo biashio, netsitaha tsiashio, nende amafura ketsitaha; 15nende eshimalilo shiamalesi kelibuuliesi, netsinyanzo tsiashio, namafura akokhutsushiilila, namalesi kelibuuliesi keisuuswa, nolwichi, hamuliango weshimenyo; 16eshimalilo shiemisango emisambe, nolukhanda lwashio lwomukasa, netsinyanzo tsiashio, nebikholelo biashio biosi, nolutaabo neshichibi shialwo; 17tsingubo tsinzeleesia tsiolwanyi, netsisiilo tsiatsio, nebichibi biatsio, nende olwichi Iweshilibwa shiolwanyi; 18ebibambo bieshimenyo, nebibambo biolwanyi, nemikoye chiabio; 19ebiifwalo ebilukhwa bulayi, khulwa okhukhalabanila habundu ahaahule, nibio ebiifwalo ebiahule biaHaruni omukuhani, nebiifwalo biabaanabe, ebiokhukhalabanila mubukuhani.
Abandu baleera ebiomusololo kwOMWAMI
20Mana omukhung'aano kwosi kwabaana baIsiraeli barula ewa Musa yali, 21nibeetsa, buli mundu owa omwoyokwe kwamubuusia, khandi buli mundu owa rohoye yachila nachama, nibaleera omusololo kwOMWAMI, khulwa emilimo chieliheema liokhwakaana, khandi khulwa obukhalabani bwalio, khandi khulwa ebiifwalo ebiahule. 22Nibeetsa, kata abasaatsa kata abakhasi bosi aba emioyo chiabwe chiachama, nibaleera ebitiili, netsingaka tsiomumarwi, netsingaka tsieshibalikho, nebichechele, ebimili biosi bieitsahaabu; mbu buli mundu owayinia eshihaanwa ShiOMWAMI 23Ne buli mundu owalola mbu ali nende tsingubo tsieibuluu, netsieisambarau netsiranzayi, neikitani indorotoro, nobwoya bwetsimbusi, namaseelo kamamiiku akanyushilwa iranji iranzayi, namaseelo baadi amanyushe, nibabileera. 24Buli muluh owayinia omusololo kweifeetsa kata uy yaleera omusololo kwOMWAMI; khandi buli mundu owalola mbu ali nende omusaala kwomupeeli khulwa omulimo kwosi kwobukhalabani obwo, yakuleera. 25Abakhasi nabo abali abasitsa nibasiira namakhono kabwe, nibaleera obwa bali nibasiirile, mbu obuusi bweibuluu, nobweisambarau, noburanzayi, nende ikitani indorotoro isiile. 26Abakhasi bosi aba emioyo chiabwe chiababuusia mubusitsa nibasiila obwoya bwetsimbusi. 27Abeemilisi nabo nibaleera amachina ako keishohamu, namachina kandi akokhureebwa khu ifoti eyo nende khuloloti eyokhushilifu; 28nemisaala chieshing'aari, nende amafura; khulwa tsitaha, khandi khulwa amafura akokhutsushiilila, khandi khulwa amalesi kelibuuliesi keisuuswa. 29Abaana baIsiraeli baleerela OMWAMI eshihaanwa shiokhuchama khwemioyo chiabwe; buli mundu omusaatsa kata omukhasi, owa omwoyokwe kwachila nachama okhuleera ebiemilimo chiosi echia OMWAMI yali nalachile chikholelwe mumukhono kwaMusa.
Omulango kwaBezaleli naOholiabu
(Okhuru. 31.1-11)
30Mana Musa nabasunjila abaana baIsiraeli ari Lole, OMWAMI walanjile eliira liaBezaleli omwana waUri, omwana waHuri, owoluyia lwaYuda; 31namwitsusiamwo roho waNyasaye, abe nobusitsa, nobumanyilisi, nobumanyi, nobukholi bwemilimo chiosi echiahukhaane, 32khandi okhukoora emilimo chiobusitsa, nokhukholela itsahaabu, neifeetsa, nomukasa, 33nokhukhalaka amachina khulwa okhureebwa khushindu, nokhubaatsa emisaala, nokhukhola emilimo chiobusitsa chiosi echiahukhaane. 34Khandi wamuheele omwoyo kwokhwechesia, ye omwene, nende Oholiabu, omwana waAhisamaki, owoluyia lwaDani. 35Abeenabo yabeetsusiye obusitsa okhukhola emilimo chiosi echiahukhaane, kata echiomubaatsi, kata echiomulushi wamang'oole, kata echiomunabi wamang'oole keibuluu nakeisambarau namaranzayi neikitani indorotoro, kata echiomulushi, kata echia abo abakholanga omulimo kwosi, kata nende abo abakooranga emilimo chiobusitsa.
Currently Selected:
Okhurula 35: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
