Okhurula 34
34
Orubaho orwakhabili rwamachina
(Okhuka. 10.1-5)
1OMWAMI namusunjila Musa mbu Baatsa orubaho rubili rwamachina rwingana shia orwambeli; nasi ndalahandiika khurubaho orwo amakhuwa keene akabeele khurubaho orwambeli, orwa wayaaraache. 2Nibushili okhushia obe niwikasiye; mana nibushiele, otikulushe mushikulu shiaSinai, undilolosilieyo khubutenje bweshikulu. 3Ne omundu yesi aleshe okhutikulukha ninawe halala, kata omundu yesi aralolekha mushikulu shiosi ta; kata ebiayo nende tsing'ombe nabio biraaya mundaalila weshikulu eshio tawe. 4Kho Musa yabaatsa orubaho rubili rwamachina rwingana shia orwambeli; Musa nahuuna mumabwibwi natikulukha natsia mushikulu shiaSinai, shinga OMWAMI olwa yali namulachile, nali nende orubaho orwo rubili rwamachina mumakhono.
5OMWAMI niyeeshela mwileesi, nasinjilaho ninaye halala, niyeerumbula eliira liOMWAMI. 6OMWAMI nabira imbeliwe, narumbula mbu OMWAMI, OMWAMI, Nyasaye weshisa eshinji nende obukoosia, ourali omwangu okhutiilwa oburima ta, ne nowobuheeli oburalilu nobwatoto obunji; 7oubabeelanga tsimbabasi abandu ebikhumila nebikhumila, ouleshelanga obumayaanu nende obukhayi nende obwonooni; nebutswa ouranyala okhuchweya okhumurakhwo eshiina omundu ouli neshikha ta; oukalusinjia akobumayaanu bwabakuuka yabo khubaana, khandi khubeetsukhulu, okhuula khulwibulo lwakhataru nende olwakhane. 8Musa naye niyaanguyilisia, nabunamia omurwe hasi, namwinamila OMWAMI. 9Nasunga mbu Nimba ningoosibwa imbeliwo, e Omwami, ekhusaaya mbu ochendenje hakari mwifwe; shichila noluyia lwabandu abelikosi litinyu; okhuleshele obumayaanu bweefwe nobwonooni bweefwe, nokhubukula khube obulaamebwo.
Indakano yatiryisibwa
(Okhuru. 23.14-19; Okhuka. 7.1-5; 16.1-17)
10OMWAMI nasunga mbu Lola, endi okhukhola indakano; imbeli wabandubo ndalakhola akamakana, akarashiakholwa mushialo shiosi, kata mwihanga liosi ta; abandu bosi nabo aba oli hakari wabwe balalola emilimo chiOMWAMI, shichila elia ekhukholela nelikhuwa liamariisia.
11Linda bulayi likhuwa elia ekhulaka inyanga yino; lola, enzilusia imbeliwo abaAmori, nabaKanaani, nabaHiti, nabaPerizi, nabaHiwi, nende abaYebusi. 12Wilinde, oleshe okhulia omuuma nende abamenyanga mushibala ewa otsia, lileshe okhukhubeela omubero hakariwo; 13nebutswa mulikulenje ebimalilo biabwe, nimusasaka tsisiilo tsiabwe, nimurema emiAsheral chiabwe; 14okhuba shioleenamilenje nyasaye undi ta; shichila OMWAMI owa eliiralie ni Imbalikha, niye Nyasaye weimbalikha; 15mbu oleshe okhulia omuuma nende abamenyanga mushibala eshio, nabo nibaba nibatsia mubuheyi obwokhulonda khubanyasaye babwe, nibamalila abanyasaye babwe emisango, oundi khubo nakhulanga, nawe nolia khumusangokwe; 16nobukula khubaana babwe abakhaana nobakhweesia abaanabo, abaana babwe abakhaana abo nibatsia mubuheyi obwokhulonda khubanyasaye babwe, nibachila abaanabo nibatsia mubuheyi obwokhulonda khubanyasaye babwe.
17Oreekholela abanyasaye abasalule ta.
18Okhole lisabo liemikaate echibulamwo amamela; tsindaalo musaafu olaliitsanga emikaate echibulamwo amamela, shinga olwa ndakhulaka, khunduukho eyomumwesi kwaAbibu; shichila mumwesi kwaAbibu warula eMisiri. 19Ebiibulwa biambeli biosi biemiruko nebianje; mbu emirukochio chiosi chieshisaatsa, ebiibulwa biambeli bietsing'ombe nebiamakondi. 20Eshiibulwa shiambeli shieisishili oshinunulenje nende eshimeemene noba noreenya okhushinunula ta, oshifunache likosi. Abeekulanda bosi mubaanabo, obanunulenje. Omundu yesi aleshe okhulolekha imbeli wanje nali butswa.
21Tsindaalo tsisasaba okholenje emilimochio, ne khunyanga yomusaafu ohuluushenje; mwilima khandi mwichesa ohuluushenje. 22Okholenje lisabo liamahonga, eliebirongole bielichesa lieingano; khandi nende lisabo liokhwinjisia, khubumaliilishi bwomuyika. 23Khataru mumuyika abeshisaatsabo bosi baloleshenje imbeli w Nyasaye, Nyasaye waIsiraeli. 24Shichila ndaleelusinjia amahanga imbeliwo, nimbambula tsinzakhotsiokata omundu yesi shialiikomba eshialeshio ta, elwa oliba notikulukhanga notsia okhulolekha imbeli w Nyasayewo khataru mumuyika.
25Orahaana amalasile akomusango kwanje halala nende omukaate okulimwo amamela ta; kata omusango kwelisabo lieipasaka kuleshe okhusikala kukone okhuula mukamba tawe. 26Ebiambeli khubirongole ebielilobalio, obileerenje munzu yOMWAMI Nyasayewo. Orateekha eshimeeme mumabeele kanyina ta. 27OMWAMI namusunjila Musa mbu Handiika amakhuwa kano; shichila ekholile indakano ninawe, khandi nende Isiraeli, amakhuwa kano shinga olwa kali. 28Naye nabayo nende OMWAMI tsindaalo amakhumi kane, eshiteere nende eshilo; shiyaliakhwo ebiliibwa kata okhunywa amatsi tawe. Nahandiika khurubaho orwo amakhuwa yako akeindakano, niko amalako ekhumi.
29Nikaba mbu olwa Musa yeekha okhurula mushikulu shiaSinai, nende orubaho orwo rubili rwoburumbusi mumakhonoke, olwa yeekha okhurula mushikulu Musa shiyali namanyile shinga likhoba liomumonimwe olwa liali niling'inang'inanga shichila yasungana nende Nyasaye, tawe. 30Ne olwa Haruni nende abaana baIsiraeli bosi balola Musa, lola, likhoba liomumonimwe liali niling'inang'inanga; nibaria okhusita ahambi ninaye. 31Mana Musa nabalanga; naye Haruni nende abeemilisi bosi bomukhung'aano nibakalukha ewa yali; Musa nasungana ninabo. 32Nolunyumakhwo abaana baIsiraeli bosi nibasita ahambinaye nalachilisia nababoolela kosi aka OMWAMI yali namubooleele mushikulu shiaSinai. 33Ne olwa Musa yali namalile okhusungana ninabo, yeefwimba olububi mumoni 34Nebutswa olwa Musa yeenjilanga okhutsia imbeli wokhusungana ninaye, yeefwimbulanga olububi olwo, okhuula olwa yarulanga; ne yarulanga, naboolela abaana baIsiraeli aka yalachilwe shinga olwa kali; 35abaana baIsiraeli nibalola mumoni mwaMusa, shinga likhoba eliomumonimwe olwa liang'inang'inanga; mana Musa yeefwimbanga olububi mumoni khandi, okhuula olwa yeenjila okhusungana ninaye.
Currently Selected:
Okhurula 34: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
