Okhurula 32
32
1Olwa abandu balola shinga Musa olwa yashinda okhurula mushikulu, abandu abo beekhung'asia halala ewa Haruni yali, nibamusunjila mbu Chenda okhukholele omunyasaye, akhwimilile; shichila Musa oyo, omundu owakhutikulusia okhurula mushialo shiaMisiri, shikhumanyile akamwikholilekhwo ta. 2Haruni nabasunjila ari Tsaanuule tsingaka tsieitsahaabu etsili mumarwi kabakhasi beenywe, nakabaana beenywe abasiani, nakabaana beenywe abakhaana mutsindeelele. 3Abandu bosi nibatsaanuula tsingaka tsieitsahaabu etsiali mumarwi kabwe, nibatsiyilila Haruni. 4Naye natsibukula mumakhono kabwe, natsikasia neshibaatsilo nakhola eshimoosi eshisalule; nibaboola bari Iwe Isiraelij uno niye nyasayewo owakhutikulusia okhurula mushialo shiaMisiri. 5Nolwa Haruni yalola, yoombakha eshimalilo imbeli washio; Haruni nalanjisia, naboola mbu Mukamba lisabo liOMWAMI lilabaho. 6Kho nibahuuna mukamba, nibamala emisango emisambe, nibaleera emisango chiokhwishia; abandu nibeekhala okhulia nende okhunywa, nibabuukha okhushina.
7OMWAMI nasuniila Musa ari Yikha, tsia; shichila abandubo, aba watikulusia okhurula mushibala shiaMisiri, beeyonooniye; 8bakotoole bwangu nibarula khunjila eya ndabalaka; beekholeele eshimoosi eshisalule nibashiinamila, nibashimalila omusango, nibasunga bari Iwe Isiraeli, uno niye nyasayewo owakhutikulusia okhurula mushialo shiaMisiri. 9OMWAMI namusunjila Musa mbu Ndaluutsi abandu bano, ne lola, nelihanga liabandu abelikosi litinyu; 10kho bulaano ndekha embe, oburima bwanje bwashe khubo, embatibie; ne ndalakhukhola iwe obe lihanga likhongo. 11Mana Musa namusaaya OMWAMI Nyasayewe muno, naboola mbu OMWAMI, nishiina eshichila oburimabwo nibwashile khubandubo aba warusia mushialo shiaMisiri nobunyali obukhongo khandi nomukhono kwamaani? 12Nishiina eshichila abaMisiri bakhasunga mbu Khane yabarusia mbu abayile mububii, okhubeerela mubikulu, nokhubatibia okhurula mushibala? Shiukhasia oburimabwo obululu, wikalukhasie oburaleera obubii buno khubandubo. 13Witsulile Aburahamu, naIsaka. NaIsiraeli, abasumbabo, aba weetsubila khululwo omwene, nobasunjila ori Ndaleenjiyia olwibulo Iweenywe shinga tsinyininyini etsiomwikulu, ne eshialo shino shiosi eshia ndaboolilekhwo ndalaheelesia olwibulolwo, nashio shilaba eshiabwe obushia nobushia. 14Mana OMWAMI niyeekalukhasia, naraleera obubii obwa yali nasunjile mbu yakhakholela abandube, ta.
15Kho Musa yashiukhana, niyeekha okhurula mushikulu, nali norubaho orwo rubili rwoburumbusi mumukhono, oruhandiichilwekhwo tsimbeka tsiombi; khulubeka lulala nende khulundi ruhandiichilwekhwo. 16Orubaho orwo rwali emilimo chiaNyasaye, nabwo obuhandiichi bwali obuhandiichi bwaNyasaye, obwasaarwa khurubaho. 17Ne olwa Yoswa yahulila obuyoka bwabandu nibachinga amakhu, yasunjila Musa ari Buliho obuyoka bwelihe mukambi. 18Nasunga mbu Shichili emioyo chiabalangana khulwa okhuhula, kata shichili emioyo chiabalangana khulwa okhukoyaasibwa, tawe; habula nokhwongulilana khwabeembanga okhwa embulilanga. 19Ne olwa yali niyakhoola ahambi khukambi, yalola eshimoosi eshio nende okhushina; mana oburima bwaMusa nibwakha, naruulaka orubaho orwo okhurula mumakhonoke, nirwatishilayo mundaalila weshikulu. 20Nabukula eshimoosi eshia bali nibakholile, nashisamba nomulilo, nasia nishikwa obusie, nashimiitsa khumatsi, nanyweesia abaana baIsiraeli. 21Mana Musa nareeba Haruni ari Obeele orie nabandu bano, akachilile nobaleerela eshionoono eshikali? 22Haruni nakalusia mbu Oburima bwomwami wanje buleshe okhwakha; wamanya abandu bano, mbu bachooma khububii. 23Okhuba basunjiile mbu Khukholela omunyasaye, akhwimilile; shichila Musa oyo, omundu owakhutikulusia okhurula mushialo shiaMisiri, shikhumanyile akamwikholilekhwo ta. 24Nasi nimbasunjila ndi Oulikhwo nende itsahaabu yosi, achitsaanuule; kho nibambeelesia bario; nasi ninjifuuba mumulilo, niyirulamwo eshimoosi shino.
25Ne olwa Musa yalola shinga abandu olwa bali nibeerimuule, okhuba Haruni yali nabaleshile beerimule, nachila nibamoonywa mubasuku babwe; 26kho Musa yasinjila mushilibwa shieikambi, nasunga mbu Ouli khulubeka Iw, yeetse ewa endi. Abaana baLawi bosi nibamwikhung'asilia. 27Nabasunjila mbu Kano niko aka OMWAMI, Nyasaye waIsiraeli, aboola; mbu Mure buli mundu olukangalwe mushishienje, mubiring'ane eyi nende eyi okhurula khushilibwa okhuula khushilibwa shindi mukambi yosi, mwire buli mundu omwana wabwe, khandi buli mundu owashie, khandi buli mundu omumenyaniwe. 28Abaana baLawi nibakhola shinga Musa olwa yabasunjila; abandu nibafwa inyanga eyo shinga ebikhumila bitaru. 29Musa nasunga mbu Mwiyemesheele emilimo chiOMWAMI leelo; buli mundu nahambile omwanawe obusuku, kata nende omwana wabwe; mbu mana OMWAMI amuheelesie ikhabi inyanga yino.
30Mana mukamba Musa yasunjila abandu ari Mwayonoonile eshionoono eshikali; ne bulaano ndalatikulukha ninzia ewa OMWAMI ali; haundi ndalatisa eshionoono shieenywe. 31Musa nakalukha ewOMWAMI, nasunga mbu O, abandu bano boonoonile eshionoono eshikali, nibeekholela abeene abanyasaye beitsahaabu. 32Ne khane bulaano, noba niwakhabaleshela eshionoono shiabwene noba noranyala ta, ekhusaaya mbu usiliisie mushitabushio eshia wahandiika. 33Naye OMWAMI namusunjila Musa ari Ounzonooneele, neniye owa ndalasiliisia mushitabu shianje. 34Kho bulaano otsie, wimilile abandu bano noboosia habundu tsana aha ndakhuboolelakhwo; lola, malaika wanje alakhuranjilila; nebutswa khunyanga olwa ndalakoonya, ndalabakoonya khulwa eshionoono shiabwe. 35OMWAMI nakhupa abandu abo, shichila bakhola eshimoosi shilia eshia Haruni yakhola.
Currently Selected:
Okhurula 32: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
