Okhurula 2
2
Okhwibulwa khwaMusa
1Haho omundu undi owomunzu yaLawi yarula, naleera omukhaana undi khubaLawi. 2Omukhasi oyo nahela inda, niyeebula omwana omusiani; nolwa yamulola, shinga olwa ali omwana omulayi, yamubisa emiesi chitaru. 3Ne olwa yakhaywa okhumubisa khandi, yamubukulila akhasafina khamaturu, nachihoomela ilamu nende inimbo; namura omwana mubwenomwo narenjekha mwise khundulo womwalo. 4Omukhaana wabwe omwana oyo naye nasinjila ehalekhwo, mbu amanye akeetsa okhumukwila. 5Ne omukhaana waFarao yakholomokha okhwisinga mumwalo; mana nalola akhasafina akho mwise, naruma omukhaana omukhalabaniwe okhukheenda. 6Nakhafuunula, nalola omwana; ne lola, omwana nalira. Naye namutiililwa eshisa, nasunga mbu Uno nimulala khubaana babaHeburania. 7Mana omukhaana wabwe omwana oyo namureeba omukhaana waFarao ari Enzie ekhulanjile omuleli owokhubakhasi abaHeburania, akhunuunilie omwana uno? 8Omukhaana waFarao namusunjila mbu Khatsie. Omukhaana naye natsia nalanga nyinamwana omwana. 9Mana omukhaana waFarao namusunjila mbu Tsia nomwana uno, unuunilinjie, nasi ndalakhuheelesia omurungokwo. Omukhasi naye nabukula omwana namunuuninjia. 10Omwana nakhula, mana omukhasi oyo namuleera ewomukhaana waFarao, naba omwanawe. Naye namukulikha eliira mbu Musa; nasunga mbu Shichila ndamukhwesa nimurusia mumatsi.
Musa yeelushila eMidiani
11Ne inyanga yindi, olwa Musa yali namalile okhukhula, yarula natsia ewa abandu babwe bali, nalola obusiro bwemisiiko echia bareebwakhwo; ne yalola omuMisiri nakhupa omuHeburania, omuluyia wabwe. 12Nahenga eyi nende eyi, ne olwa yalola mbu omundu abulaho, yeera omuMisiri, namubisa mumuyeshe. 13Khandi inyanga yakhabili yarula; ne lola, abandu babili abokhubaHeburania bali nibakhupananga; namusunjila owakhola libii ari Nishiina eshichila nomuupa owashio? 14Naye nasunga ari Niwina owakhukhola okhuba omukhulundu khandi omwilwatsii khwifwe? Wenya okhunzira isie, shinga olwa wayeerile omuMisiri ulia? Musa naria, napaara mbu Khane likhuwa elo limanyiishe! 15Ne olwa Farao yahulila likhuwa elo, yeenya okhumwira Musa.
Nebutswa Musa yeelukha narula imbeli waFarao, namenya mushibala shiaMidiani; niyeekhala heeyabo lindi. 16Ne omwisaaliisi waMidiani yali nende abaanabe abakhaana musaafu; nabo nibeetsa nibataha amatsi, nibeetsusia tsinzeelo okhunyweesia ebiayo biasaabwe. 17Mana abaayi bandi nibeetsa nibabeelusia; habula Musa yasinjila nabakhoonya, nanyweesia ebiayo biabwe. 18Nolwa boola ewaReueli saabwe, yabareeba ari Mubeele murie nimuchelela murio khale leelo? 19Nabo nibakalusia bari OmuMisiri undi akhuhabiine mumukhono kwabaayi, khandi akhutayiile amatsi, nanyweesia ebiayo. 20Nabareeba abakhaanabe ari Ne ali heena? Mbushiina nimumulekha omundu oyo? Mumulanje, alie ebiliibwa. 21Kho Musa yachama okhumenya nende omusaatsa oyo; naye namubashila Musa omwanawe omukhaana mbu Zipora. 22Naye niyeebula omwana omusiani, Musa namukulikha eliira mbu Gerishomu; okhuba yasunga mbu Embeelenje omuchen mushialo shiabeene.
23Mana olunyuma lwetsindaalo tsinyinji etsio, omuruchi waMisiri nafwa; abaana baIsiraeli nabo nibeesia amahumo khulwa obunyakhani, nibakhupa tsimbungu; okhulakaya khwabwe nikhuula ewaNyasaye, khulwa obunyakhani obwo. 24Naye Nyasaye nahulila okhubinda khwabwe, khandi Nyasaye niyeetsulila indakanoye eya yalakana nende Aburahamu, nende Isaka, nende Yakobo. 25Mana Nyasaye nalola abaana baIsiraeli; khandi Nyasaye namanya akabwe.
Currently Selected:
Okhurula 2: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
