Okhurula 29
29
Obwahulwi bwaHaruni nabaanabe
(Lawi 8.1-36)
1Ne kano niko aka olabakholele khulwa okhubaahula okhu'khaabanila mubukuhani; mbu obukule ihuunwa ndala nende amamiiku kabili ebibula obulema bwosi, 2nemikaate echibulamwo amamela, namaandasi akabulamwo amamela, akatsokasiibwe amafura, nebisikuti ebibulamwo amamela ebibashilwekhwo amafura; obikasie ebiobusie obunyushe bweingano. 3Obire mushimwelo shilala, niwitsa ninabio mushimwelo tsana, halala nende ihuunwa nende amamiiku kabili ako. 4Mana oleere Haruni nende abaanabe khumuliango weliheema liokhwakaana, nobasinga amatsi. 5Mana obukule ebiifwalo, omufwale Haruni likoti, neikanzu yeifoti, neifoti, neiloloti tsana yeshilifu, nomuboha omushiipi kwobulushi bwamang'oole kweifoti; 6nora eshilemba khumurwekwe, nora olusimbi olutakatifu khushilemba tsana. 7Mana obukule amafura akokhutsushiilila, otsushe khumurwekwe, abe omutsushiililwa. 8Oleere nende abaanabe, nobafwala amakoti. 9Obabohe emishiipi Haruni nende abaanabe, nobaboha tsikofia; nabo balaba nobukuhani khulwa lilako elirahwaho ta. Nilwo olwa oleemekha Haruni nende abaanabe.
10Mana oleere ihuunwa eyo imbeli weliheema liokhwakaana; naye Haruni nabaanabe bare amakhono kabwe khumurwe kweihuunwa. 11Mana wirile ihuunwa eyo imbeli wOMWAMI, hamuliango weliheema liokhwakaana. 12Obukule khumalasile keihuunwa, okare khunzika tsieshimalilo nende olwalalwo; notsukha amalasile kosi akaba nikatong'a hasi weshimalilo. 13Mana obukule amasinya kosi akafuunikhanga amala, nende olufuurilo olwokhushini, netsifiko tsiombi, namasinya katsio, nobituumilia khushimalilo. 14Habula inyama yeihuunwa, neliseelo liayo, nobuse, obisambile mumulilo elwanyi weikambi; nomusango kwobwonooni.
15Mana obukule elala khumamiiku ako; naye Haruni nende abaanabe bare amakhono kabwe khumurwe kwelimiiku. 16Mana wire limiiku elo, obukule amalasile kalio, okoohe hashimalilo tsimbeka tsiosi. 17Ofwone limiiku ebitonye, niwosia amala, nende ebilenje bialio, nobira halala nebitonye bialio nende omurwe, 18notuumilia limiiku liosi khushimalilo; nilio omusango omusambe kwOMWAMI; neshiuya eshilayi, neshihaanwa eshihaanilwa OMWAMI khulwa omulilo.
19Mana obukule limiiku lindi elo; naye Haruni nabaanabe bare amakhono kabwe khumurwe kwelimiiku. 20Mana wire limiiku tsana, obukule khumalasile kalio, okabashe khubutsunzu bweshirwe eshisaatsa shiaHaruni, khandi khubutsunzu bwebirwi ebisaatsa biabaanabe, khandi khunzala tsingali etsiokhumakhono kabwe amasaatsa, khandi khubino ebikali biebilenje biabwe ebisaatsa, niwoha amalasile kandi akatong'a khushimalilo tsimbeka tsiosi. 21Khandi obukule khumalasile akali khushimalilo, nende khumafura akokhutsushiilila, nokanyululusia khuHaruni, nokhubiifwalobie, nokhubaanabe, nende khubiifwalo biabaanabe halala ninaye; kho alaba omutakatifu, nende ebiifwalobie, nende abaanabe, nende ebiifwalo biabaanabe halala ninaye.
22Khandi obukule amasinya kelimiiku elo, neisembe, namasinya kosi akafuunikhanga amala, nende olufuurilo olwokhushini, netsifiko tsiombi namasinya katsio, nende eshiatakho eshisaatsa, shichila nelimiiku liobwemeshi; 23nomukaate mulala, neliandasi elala liamafura, neshisikuti shilala, ebiomushimwelo shiemikaate echibulamwo amamela eshili imbeli wOMWAMI; 24obire biosi khubikalo biaHaruni khandi khubikalo biabaanabe; nobichela bibe omusango kwokhuchelwa imbeli wOMWAMI. 25Mana obibukule mumakhono kabwe, nobituumilia khushimalilo, khushihaanwa eshisambe, bibe eshiuya eshilayi imbeli wOMWAMI; neshihaanwa eshihaamlwa OMWAMI khulwa omulilo.
26Mana obukule itakatal yelimiiku liobwemeshi liaHaruni, nochichela, yibe omusango kwokhuchelwa imbeli wOMWAMI; nayo yibe omukabolewe. 27Wahule itakata yomusango kwokhuchelwa nende eshiatakho shieisadaka eyichelwa eshio, isadaka eyokhwimiiku liobwemeshi, elili liaHaruni, nende eliabaanabe; 28nashi shilabeetsanga eshiaHaruni nabaanabe, nomukabo kwabwe obushia nobushia okhurula khubaana baIsiraeli; shichila neisadaka eyirula khubaana baIsiraeli, eyirula mumisango chiebihaanwa biabwe biokhwishia; neisadaka yabwe khuMWAMI.
29Ebiifwalo ebitakatifu biaHaruni bilabeetsanga ebiabaanabe inyumawe, babiifwale nibatsushiililwa amafura nende okhwemekhwa 30Omwanawe ouba omukuhani mushilenjeshie abiifwale tsindaalo musaafu, olwa yenjila mwiheema liokhwakaana okhukhalabanila habundu ahatakatifu.
31Nawe obukule limiiku l obwemeshi, oteeshe inyama yalio habundu undi ahatakatifu. 32Naye Haruni nabaanabe balie inyama eyo yelimiiku, nende emikaate echili mushimwelo hamuliang, weliheema liokhwakaana. 33Balie ebindu ebi, bieshitiso khulwa okhubeemekha nokhubaahula ne omundu butswa araliakhwo ta, shichila nebi takatifu. 34Ne inyama yosi eyobwemeshi, kat omukaate kwosi, eshiba nishitong'a okhuula mu kamba, kho osambe eshitong'ile eshio nomulilo shishilaliibwa ta, shichila neshitakatifu.
35Obakholele Haruni nende abaanabe ori nanwa, kosi aka ekhulachile kano shinga olwa kali; omale tsindaalo musaatu nobeemekhanga. 36Ne buli nyanga otisenje ihuunwa yomusango kwobwonooni; osiiye eshimalilo noshitisa; oshitsushiilile amafura, khulwa okhushiahula. 37Tsindaalo musaafu otisenje eshimalilo noshiahula; eshimalilo nashio shilaba eshitakatifu muno; shiosi shiosi eshitiilakhwo khushimalilo nashio shilaba eshitakatifu.
Emisango chiakhatsotso
38Kho bulaano ebia olamalilanga khushimalilo mbiebino, mbu amakondi keshimwamwane kabili inyanga buli nyanga, obushia nobushia. 39Omalenje likondi elala musenya; elindi nalio omalenje mungoloobe; 40nahalala nelikondi eliambeli, eshitonye shielikhumi shiheloeshie shiobusie obunyushe obutsokasiibwe nende amafura amaswache irobo yeihini; nende idivai irobo yeihini khulwa omusango kwokhutsushila. 41Ne likondi lindi olimale mungoloobe, nolikholela shinga omusango kweimele okwomusenya olwa kubeele, nende omusango kwokhutsushila kwakwo, khulwa eshiuya eshilayi, eshihaanwa eshihaanilwa OMWAMI khulwa omulilo. 42Kube omusango omusambe kwakhatsotso munzibulo tsieenywe tsiosi hamuliango weliheema liokhwakaana imbeli wOMWAMI, ewa ndalaakaanilanga nineenywe, okhusungana ninawe ebweneyo.
43Nasi ndalaakaanilanga nende abaana baEsiraeli ebweneyo; ne liheema lilaahulwa noluyali lwanje. 44Ne ndalaahula liheema liokhwakaana, nende eshimalilo; naye Haruni nende abaanabe, ndalabaahula, mbu ba'khalabanile mubukuhani. 45Ne ndalamenyanga hakari mubaana baIsiraeli, nimba Nyasaye wabwe. 46Nabo balamanya mbu isie nisie OMWAMI Nyasaye wabwe, owabarusia mushialo shiaMisiri, mbu emenyenje hakari mubo. Nisie OMWAMI Nyasaye wabwe.
Currently Selected:
Okhurula 29: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
