Okhurula 22
22
Amalako khukemirungo chiebindu ebionoonekha
1Omundu olwa aba niyeeba ing'ombe, kata likondi, niyeera kata nakusia; kho arunje tsing'ombe tsiraano khung'ombe, namakondi kane khwikondi. Akwanile okhukalusia ebindu biene; naba nabula neshindu, omwene akusibwe khulwa obwibibwe. Eshia yeebile nishiba nishinyoolekha nishili mwoyo mumukhonokwe, kata niyili ing'ombe, kata isishili, kata likondi, arunje shikhabili.
2Ne omwibi oyo naba nanyoolekha nashiyabanga okhwinjila, nakhupwa nafwa, eshiina shiamabanga shishilabaho khululwe ta; 3ne nibuba nibumushieleleele, kho eshiina shiamabanga shilabaho khululwe.
5Olwa omundu aba naliisia omukunda kata omukunda kwemitsabibu, nalekhuulile omurukokwe, nakwo nikwaya mumukunda kwabeene; kho arunje khubishila obulayi ebiomumukundakwe, kata khubishila obulayi ebiomumukundakwe kwemitsabibu.
6Olwa omulilo kuba nikurubukha, nikuhamba mumirobo, mana ebinywa biobule, kata obule obushisinjiile mumukunda, kata omukunda kwene, nibiyia; kho ouhambiye omulilo okhuula arunje.
7Omundu naba nayila emiandu kata amapeesa ewowashie mbu abilinde, nabio nibiibwa munzu yomundu oyo; omwibi naba nanyoolekha, arunje shikhabili. 8Ne omwibi naba naranyoolekha ta, kho omwenetaala elo asite ahambi khuNyasaye, mbu kamanyishe naba narali ye owarakhwo omukhonokwe khumiandu chiowashie nohomba ta.
9Kata buli likhuwa liosi liokhukosia eshindu, kata niliba elieing'ombe, kata isishili, ksta likondi, kata tsingubo, kata eshindu shiosi shiosi eshikorile, eshia oundi khubo aboola ari Shieshino; kho ebifune biabo bombi biitse imbeli waNyasaye; nowa Nyasaye asunga mbu eshiina shimufwiliile, arunje owashie shikhabili.
10Olwa omundu aba niyeechekha isishili, kata ing'ombe, kata likondi, kata omuruko kwosi, ewowashie; nakwo nikufwa, kata okhusaalila, kata okhwilusibwayo, omundu yesi naralola ta; 11kho eshiitsubo shiOMWAMI shibe hakari wabo bombi, naba narareelekhwo omukhonokwe khumiandu chiowashie nohomba ta; ne omwenechio ashifuchiilile, ne aleshe okhuchirunga. 12Ne naba niyeebiilwe omuruko okwo, kho arunje omwenekwo. 13Kata nikuba nikutonyatonyilwe ebitonye netsisolo, akuleele kube obuloli; aleshe okhurunga okwenokwo okutonyatonyilwe.
14Khandi omundu olwa aba nasaba owashie eshindu shiosi, nashio nishionoonekha, kata okhufwa, omweneshio nabulaho, okhuula ashirunje. 15Ne omweneshio naba naliho halala ninashio, aleshe okhushirunga; ne nishiba nishili eshindu eshihosiibwe, kho shiitsiile omurungo kwashio.
Amalako kandi khukehkhole ebibii, nokhukemilukha chieidini
16Khandi olwa omundu aba nahombelesia omukhaana yesi omushisila ourakhweebungwa ta, naba ninaye, okhuula amukhwe abe omukhasiwe. 17Ne samwana naba nalobela elala okhumubashila, kho aleere amapeesa akolukhaana shinga olwa kabeetsanga.
18Orafuchiilila omufila abe mwoyo ta.
19Omundu yesi oukona nomuruko, okhuula yeerwe.
20Oumalila nyasaye yesi omusango, narali OMWAMI yenyene ta, amalilanilwe elala.
21Khandi oramukholela omundu omurende obubii, kata okhumumiina tawe; okhuba mwesi mwali abarende mushibala shiaMisiri. 22Murasandia omukhasi omulekhwa, kata omwana omubisandu, ta. 23Ne noba nobasandia khunjila yosi, nabo nibambaabilakhwo, shindalachweya okhuhulila okhuhaaba khwabwe ta; 24mana oburima bwanje bulalula, nimwira nolukanga; abakhasi beenywe nabo balaba abalekhwa, abaana beenywe nibaba ababisandu.
25Olwa omukhoonya namapeesa omundu yesi ouli omumanani mubandu banje aba muli ninabo, oleshe okhuba khuye shinga oumuhosia; kata oramubanza injelesio ta. 26Noba nobukulakhwo ingubo yowashio yibe omusingo, omukalusilie nibushili okhwila; 27okhuba niyo yonyene eya yeefwimba, neingubo yomubilikwe; yakhakona nende shiina? Ne naba niyambaabila, ndalahulila; okhuba endi owobukoosia.
28Orafwola Nyasaye, kata okhumulaama eshiIaamo shiobubii omwimilisi yesi wabandu beenywe tawe.
29Orashinda tawe okhuhaana khumwitsulu kwelichesalio nende khubiokhunywabio.
Owibulwa owambeli owomubaanabo abasiani, umbeelesie. 30Khandi okholenje orio khung'ombetsio nende khumakondiko; lekha shibe khunyina tsindaalo musaafu; khunyanga yomunaane oshimbeelesie. 31Ne inywe mulaba khwisie abandu abatakatifu; khulwako muraliakhwo inyama yosi eyitonyatonyilwe netsisolo mubulimo ta; muchisukunile tsimbwa.
Currently Selected:
Okhurula 22: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
