Okhurula 18
18
Yersero yamukoonya Musa
1Ne Yetsero, omwisaaliisii waMidiani, nyakhufialanyene Musa, yahulila khukosi aka Nyasaye yali nakholeele Musa halala nende Isiraeli abandube, shinga olwa OMWAMI yali narusiye Isiraeli muMisiri. 2Kho Yetsero, nyakhufialanyene Musa, yabukula Zipora, mukha Musa, olwa Musa yali namukalusiye ewabo, 3nende abaanabe babili; eliira liamulala khubo niGerishomu; okhuba yasunga mbu Embeelenje omurende mushialo shiabeene; 4neliira lioundi niFliezeri; okhuba yasunga mbu Nyasaye wapapa niye owali omuhabini wanje, niyareesia mulukanga lwaFarao. 5Kho Yetsero, nyakhufialanyene Musa, halala nende abaana baMusa nende omukhasiwe, nibamwitsila Musa mushitsiimi ewa yali nakhomile ikambi hashikulu shiaNyasaye; 6Musa naboolelwa ari Nyakhufialawo Yetsero al hwitsiile, nende omukhasiwo nabaanabo babili halala ninaye. 7Musa narula okhumwakaanila nyakhufialanyene, namwinamila, namufumbeelela namutsunzuuna; nibareebana khumakhuwa kabwe; nibeenjila mwiheema. 8Musa namuboolela nyakhufialanyene kosi aka OMWAMI yali niyakholeele Farao nende abaMisiri khulwa Isiraeli, namatinyu kosi akabakwilanga khunjila, khandi shinga OMWAMI olwa yabahabina. 9Naye Yetsero yeekhoyela obulayi bwosi obwa OMWAMI yali niyakholeele Isiraeli, shinga olwa yali niyabahabiine mumukhono kwabaMisiri.
10Yetsero nasunga mbu OMWAMI yeetsoomibwe, owamuhabiine mumukhono kwabaMisiri, khandi mumu'khono kwaFarao; owahabiine abandu olwa bali hasi womukhono kwabaMisiri. 11Bulaano emalile okhumanya shinga olwa OMWAMI ashila abanyasaye bosi; toto, mwikhuwa elo, olwa abaMisiri babeekhulumamilia. 12Mana Yetsero, nyakhufialanyene Musa, yamuleerela Nyasaye eshihaanwa eshiokhusambwa nende omusango; naye Haruni niyeetsa, nende abakofu bosi baIsiraeli, okhulia ebiliibwa nende nyakhufialanyene Musa imbeli waNyasaye.
Obwemekhwi bwabayaasii
13Nibushia mukamba Musa yeekhala okhuyaasia' abandu; abandu nabo nibasinjila ewa yali, tsimbeka tsiosi, okhuula olwa bweela. 14Ne olwa nyakhufialanyene Musa yalola kosi aka yakholelanga abandu abo, yareeba ari Nelikhuwa shiina elia okholelanga abandu bano? Mbushiina niwikhalanga orio wenyene, abandu nibasinjila nibakhubotokhana okhurula mutsuli okhuula mungoloobe? 15Musa nakalusia nyakhufialanyene ari Shichila abandu banzitsilanga khulwa okhureeba Nyasaye; 16olwa baba nibali nende likhuwa, banzitsilanga; nasi ekhalakanga hakari womundu nende owashie, nimbamanyia amalako kaNyasaye, nende ameebaaloke. 17Mana nyakhufialanyene Musa namusunjila ari Likhuwa elo elia okholanga shinelilayi ta. 18Witsa okhwotoshelela, iwe kata nende abandu bano aba oli ninabo; okhuba likhuwa lino nelisiro khwiwe; shiolinyala iwe wenyene tawe. 19Bulaano ohulile aka emboola. Isie ndalakhuchesiyia, mana Nyasaye abe ninawe; mbu obe imbeli waNyasaye mushilenje shiabandu, nomuleerela Nyasaye amakhuwa keene, 20khandi obeechesinjie amalako nende ameebaalo, nobamanyinja injila eya bakhoyile okhulondakhwo, nende aka bakhoyile okhukholanga. 21Khandi, olobole mubandu abo bosi abandu abanyala; babe abariitsanga Nyasaye, abandu bobwatoto, abakiyanga ebiomufuusi; abafwana bario, obeemeshe khubo, babe abakhulundu khubikhumila, nabakhulundu khubikhumi, nabakhulundu khumakhumi karaano, nende abakhulundu khwikhumi; 22oleshe abeenabo bayaasinjie abandu tsindaalo tsiosi; buli likhuwa likhongo bakhuleerelenje iwe, ne buli likhuwa lituutu, abeene bakhalachenje; kho mana akoko kalaanguha, nabo nibachinga ninawe obusiro obwo. 23Noba nokhola orio, khandi Nyasaye naba nakhulaka ario, kho mana olanyala okhusinjila, abandu bano bosi nabo balanyala okhukalukhanga ewabo nomulembe.
24Kho Musa yahulila aka nyakhufialanyene yaboola, nakhola kosi aka yali nasunjile. 25Musa nalobola abandu abanyala muIsiraeli yosi, nabeemekha babe khumirwe chiabandu abo, abakhuIundu khubikhumila, nabakhulundu khubikhumi, nabakhulundu khumakhumi karaano, nende abakhulundu khwikhumi; 26nabo bayaasinjia abandu tsindaalo tsiosi; amakhuwa amatinyu bamuleerelanga Musa, ne buli likhuwa lituutu, abeene bali nibakhalakanga. 27Mana Musa yaseebulana nende nyakhufialanyene; naye natsia butsia okhuula mushialo shiabwe.
Currently Selected:
Okhurula 18: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
