Okhurula 17
17
Amatsi akarula muluanda
(Obub. 21.1-13)
1Kho omukhung'aano kwosi kwabaana baIsiraeli bachenda okhurula mushitsiimi shiaSini, nibakonelanga khunjila, shinga olwa OMWAMI yabalakanga, nibakhoma ikambi yabwe eRefidimu; ne amatsi kali nikabulaho aka abandu banywa. 2Niko akachila abandu nibasoolasia Musa, nibasunga bari Okhuheelesie amatsi khunywe. Naye Musa nabasunjila mbu Olwashiina nimusooasia? Kata muteemanga OMWAMI mbushiina? 3Obuloho nibulia abandu ebweneyo; abandu abo nibabuuluulila Musa, bari Okhutikulusiye okhurula eMisiri mbushiina, mbu okhukhwira nobuloho, ifwe halala nende abaana nende emiruko chieefwe, noho? 4Naye Musa namuhaabila OMWAMI, ari Nembakholele endie abandu bano? Beengana abeenya okhundasa namachina. 5OMWAMI namubiila Musa ari Bira imbeli wabandu, ne obe nende abandi abokhubakofu baIsiraeli; khandi indabushiyo eya wakhupila Omwalo kwaNaili, ochibukule mumukhono otsie. 6Lola, ndalasinjila imbeliwo, yaho khulwanda eHorebu; nawe olakhupa olwanda, mana amatsi kalarulamwo, mbu abandu banywe. Musa nakhola ario imbeli wabakofu baIsiraeli, nibalola. 7Nakulikha habundu yaho eliira mbu Masa, nende Meriba, khulwa okhusoolasia khwabaana baIsiraeii, khand; shichila bateema OMWAMI, nibasunga bari OMWAMI ali hakari mwifwe nohomba?
Lihe liabaAmaleki
8Ne abaAmaleki nibeetsa nibaseera Isiraeli eRefidimu. 9Musa namusunjila Yoswa ari Okhulobolele abandu, otsie oseerane nende abaAmaleki; mukamba ndalasinjila khubutenje bweshikulu nindi nende indabushi yaNyasave mumukhono. 10Kho Yoswa yakhola shinga Musa olwa yali namusunjiile, naseerana nende Amaleki; nabo Musa, nende Haruni, nende Huri, nibaniina okhuula khubutenje bweshikulu. 11Ne olwa Musa yachinganga omukhono, Isiraeli bayombeelelanga; ne olwa yeesinjia omukhono, Amaleki bayombeelelanga. 12Ne amakhono kaMusa kaluyilila; kho babukula lichina nibara hasiwe, naye niyeekhalakhwo; nabo Haruni nende Huri nibamutiilila amakhono oundi elubeka noundi elubeka; amakhonoke nikaralila okhuula eliuba niliyeela. 13Naye Yoswa yakoyaasia Amaleki nende abandube netsinganga.
14OMWAMI namusunjila Musa ari Handiika kano kabe eshiitsulilo mushitabo, nokatoonya mumarwi kaYoswa; mbu ndalasiliisilia elala okhwitsulilwa khwaAmaleki hasi welikulu. 15Mana Musa niyoombakha eshimalilo shiemisango, nashikulikha eliira mbu Yahwehnisi; 16nasunga ari Tiile khumbendela yOMWAMI; OMWAMI alaseerananga nende Amaleki ebisoni nebisoni.
Currently Selected:
Okhurula 17: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
