Okhurula 13
13
Obwahulwi bwabeekulanda
1Mana OMWAMI nasunjila Musa ari 2Munzahulile abeekulanda bosi; shiosi eshiikula inda mubaana baIsiraeli, kata mubandu kata mumiruko, neshianje.
Lisabo liemikaate echibulamwo amamela
3Musa nabasunjila abandu mbu Yitsulilenje inyanga yino, olwa mwarula eMisiri, okhurula munzu yobunyakhani; okhuba khulwa amaani komukhonokwe OMWAMI yamurusia habundu hano; emikaate echilimwo amamela shichilaliibwa ta. 4Leelo luno murulanga mumwesi kwaAbibu. 5Ne olwa OMWAMI alamuusia mushibala shiabaKanaani, nabaHiti, nabaAmori, nabaHiwi, nende abaYebusi, eshia yeetsubila abakuuka beenywe mbu yakhamuheelesia, eshibala eshiitsuulemwo amabeele nende obuushi, mulondenje obukhalabani buno mumwesi kuno. 6Tsindaalo musaafu mulaliitsanga emikaate echibulamwo amamela, ne khunyanga yomusaafu lilabaho lisabo liOMWAMI. 7Omukaate okubulamwo amamela kulaliirungwa mundaalo etsio musaafu; kata omukaate okulimwo amamela shikulanyoolekhanga nimuli ninakwo tawe, kata amamela shikalanyoolekhanga nimuli ninako ta, mushialo shieenywe shiosi. 8Ne olamuboolela omwanawo khuilyanga eyo ori Shichila OMWAMI yakholela kano kosi olwa ndarula eMisiri. 9Ne lilabeetsanga khwiwe khulwa eshilolelo khumukhonokwo, khandi khulwa eshiitsulilo khubwenibwo, mbu ameebaalo kOMWAMI kabeetsenje mumunwakwo; okhuba khulwa omukhono kwamaani OMWAMI yakhurusia eMisiri. 10Kho niko akachila olalondanga lilako lino munduukho yalio omuyika buli muyika.
Akabeekulanda
11Ne olwa OMWAMI alimuusia mushialo shiabaKanaani, shinga olwa yakhwitsubila iwe khandi nende abakuukabo, nakhuheelesia eshialo tsana, 12olaahulilenje OMWAMI buli mwikulanda, nende eshiibulwa shiambeli shiosi shiomuruko eshia oli ninashio; ebili ebisaatsa bibeetsenje ebiOMWAMI. 13Buli shiibulwa shiambeli shieisishili onunulenje nende likondi; ne noba noreenya okhushinunula ta, oshifunache likosi; khandi abeekulanda bosi babandu mubaanabo, obanunulenje. 14Ne olwa omwanawo alikhureeba, mundaalo etsili imbeli, ari Kano namakhuwa shiina? Kho olamusunjile ori Khulwa amaani komukhonokwe OMWAMI yakhurusia muMisiri, munzu yobunyakhani; 15okhuba olwa Farao yatinya oburakhulekhuula ta, OMWAMI yeera abeekulanda bosi abali mushialo shiaMisiri, kata abeekulanda babandu kata ebieebulwa biambeli biemiruko; niko akachila nimumalilanga OMWAMI emisango chiabiosi ebiikulanga inda, nibili ebisaatsa; ne abeekulanda abomubaana banje, embanunulanga. 16Ne lilabeetsanga khulwa eshilolelo khumukhonokwo khandi khulwa eshiokhubohwa khubwenibwo; okhuba khulwa amaani komukhonokwe OMWAMI yakhurusia muMisiri.
Isiilo yelileesi nende eisiilo yomulilo
17Ne olwa Farao yali nabalekhuulile abandu abo, Nyasaye shiyabeemilila khunjila yeshialo shiabaFilisiti ta, kata niyali eyahambi; okhuba Nyasaye yasunga mbu Haundi abandu bano bakhafwa omwoyo olwa balola akelihe, nibakalukha chiisiri; 18nebutswa Nyasaye yababotokhasilia abandu abo khunjila yomushitsiimi eshili ahamb i nende Inyanza Inzakhanyu; abaana baIsiraeli nabo nibatikulukha okhurula eMisiri nibeemanuule ebimaululwa. 19Naye Musa yabukula amakumba kaYusufu natsia ninako; okhuba Yusufu yali niyabatsubia abaana baIsiraeli butinyu, ari Nyasaye shialichweya okhumukoonya tawe; nineenywe mulitikulukha nende amakumba Ikanje, mularule hano ninako. 20Kho bachenda okhurula eSukotsi, nibakhoma ikambi yabwe muEtsamu, khundulo weshitsiimi. 21Ne mushiteere OMWAMI yachendanga imbeli wabwe mwileesi eliingana isiilo, okhubeemilila khunjila; khandi mushilo mumulilo okwingana isiilo, okhubakhosilia; mbu batsiitsenje eshiteere neshilo; 22isiilo eyo yelileesi mushiteere, khandi isiilo eyo yomulilo mushilo, shiyahweetsangaho okhurula imbeli wabandu tawe.
Currently Selected:
Okhurula 13: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
