Omwilwatsi 5
5
Okhwilsuba matetekhana nobusilu
1Wilinde injendayo olwa oba notsiitsanga enanzu yaNyasaye; okhuba okhusita ahambi okhuhulila nokhulayi okhushila okhuhaana omusango kwabayingwa; okhuba bo shibamanya shinga olwa bakholanga obubii ta. 2Oraboola amatetekhana nomunwakwo, kata omwoyokwo kuleshe okhwanguha okhurumbula likhuwa liosi imbeli waNyasaye ta; okhuba Nyasaye ali mwikulu, nawe oli mushialo; khulwako amakhuwako kabe amatuutu.
3Okhuba lilooro liitsanga nokhutiika okhunji, nakwo omwoyo kwomuyingwa namakhuwa amanji.
4Olwa omwitsubila Nyasaye eshiitsubo, orashinda okhushiusia; okhuba shiachama abayingwa ta; yusia akeenako aka weetsuba. 5Bwakhaba bulayi obureetsuba ta, okhushila okhwitsuba mana noroosia ta. 6Orafuchiilila omunwakwo okhuchila niwinjila mukhwonoona, kata oraboola imbeli womurume mbu libeele likosa, ta, shili heena eshiakhachila Nyasaye asinyishila omwoyokwo, kata okhusasia emilimo chiamakhonoko?
7Okhuba mubunji bwamalooro, nakobukhaya, amakhuwa keenjihanga; nebutswa iwe, riitsanga Nyasaye.
Akobulamu buno namakhaya
8Noba nolola mulukongo abamanani nibasandibungwa, nobuyaasii bwatoto niburusibwaho namaani, orahuka ta; okhuba ouli ikulu ahengungwa noundi oumushila; kata baliho abandi khandi abali ikulu okhubashila bosi. 9Ne neinganga eshialo okhuba nomuruchi, mbu eshialo shiemikunda.
10Ouheela tsifeetsa shiyeekuranga tsifeetsa, kata ouheela obuyinda okhwikura amameeto ta; ako nako namakhaya.
11Olwa emiandu chimeetekha, abachilia nabo bameetekha; kho kamukaasila shiina omwenechio, habula okhuchilola butswa netsimoni?
12Tsindoolo tsiomukholi wemilimo netsimbuulu, kata naba naliitsanga ebitiiti kate ebinji; ne okhwikura khwomuyinda khumwikalila oburanyoola tsindoolo ta.
13Buliho obubii bundi obukhongo obwa endolanga hasi weliuba; obwene mbwobuno, mbu obuyinda obubiikhwa nomwenebwo, niyeekhupia khushibii; 14mana nakosia obuyinda obwo khulwa obutiichi oburakaasa ta; ne naba nali nomwana owa yeebula, omwenoyo aba butswa amakhono amakhaya. 15Shinga olwa yarula munda yanyina, nolwa alitsia khandi ario, eshihechenye shinga olwa yeetsa; kata shialibukula eshindu shiosi khulwa emilimochie, eshia atsia ninashio mumukhono ta. 16Lino nalio nobubii obukhongo; mbu mumakhuwa kosi, shinga olwa yeetsa, nolwa alitsia ario; kho neinganga shiina eya aba ninayo, eyichila nanyakhanila omuyeka, 17namala tsindaalotsie tsiosi mushiilima, naba neshibeela nobuteshele nobusinyishi?
18Lole, aka ndaluutsi nikali amalayi, akakhoyeele, ngakano; mbu omundu okhuliitsanga nokhunywa nokhusangaalila emilimochie chiosi echia akholanga hasi weliuba, tsindaalo tsiosi tsiobulamubwe etsia Nyasaye yemuheelesiye, kata olwa tsili tsinduutu; okhuba okwo nikwo omukabokwe. 19Kata buli mundu yesi owa Nyasaye yaheelesiye emiandu nobuyinda, namuheele nende obunyali okhuliitsangakhwo, nokhubukula omukabokwe, nokhwikhoyela emilimochie--ako nako neshihaanwa shiaNyasaye. 20Okhuba shialiitsulilanga muno tsindaalo tsiobulamubwe ta, shichila Nyasaye yeetsusinjia ebisebie omwikhoyo okwomumwoyo.
Currently Selected:
Omwilwatsi 5: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
