Omwilwatsi 3
3
Buli likhuwa lili neshise shialio
1Buli shindu shili neinduukho yashio, buli likhuwa elili hasi welikulu nilili neshise shialio; 2mbu eshise shiokhwibulwa, neshise shiokhufwa;
eshise shiokhuraaka, neshise shiokhusiula ebiraache;
3eshise shiokhwira, neshise shiokhuhonia;
eshise shiokhulikulula, neshise shiokhuumbakha;
4eshise shiokhulila, neshise shiokhutsekha;
eshise shiokhwikhuula, neshise shiokhushina;
5eshise shiokhusalaasia amachina, neshise shiokhubunjelesia amachina;
eshise shiokhufumbeelelana, neshise shioburafumbeelelana ta;
6eshise shiokhukhaaba, neshise shiokhukosia;
eshise shiokhubiikha, neshise shiokhusukuna;
7eshise shiokhurandula, neshise shiokhunaba;
eshise shiokhuholeela, neshise shiokhusunga;
8eshise shiokhuheela, neshise shiokhukiya;
eshise shiobusoolo, neshise shiomulembe.
9Ne neinganga shi eya omukholi wemilimo anyoola mubunyakhanibwe?
10Ndaluutsi okhutiika okhwa Nyasaye yaheelesia abaana babandu okhunyakhat ilakhwo. 11Yakhola buli shindu shibe eshikaasu mushise shiashio; khandi yara akobumeli bwene mumioyo chiabandu; ne yakasiye mbu omundu akhaywe okhunoonelesia ebikhole ebia Nyasaye yakhola, okhurula khukhuchaaka okhuula khubumaliilishi. 12Emanyile mbu libulaho lilayi khubo elishila lino, mbu okhwikhoyanga nokhunyoolanga amalayi olwa bashiliho mwoyo. 13Khandi mbu okhuliitsanga nokhunywa nokhusangaalila emilimochie chiosi, neshihaanwa shiaNyasaye. 14Emanyile mbu shiosi shiosi eshia Nyasaye akhola, neshiobushia nobushia; shishinyala okhumeetelwakhwo, kata shishinyala okhubukulwakhwo ta; ni Nyasaye oukholile, mbu abandu bamuriitsenje ye. 15Akaliho bulaano niko akalinjiho. Ne Nyasaye akhaabanga khandi akeenako akarusibwaho.
Obulamu buno bubulamwo obuyaasii bwatoto
16Khandi ndalola hasi welikulu mbu kata habundu wobuyaasii, obubii bwali nibuliyo; kata habundu wobulunjishi, obubii bwali nibuliyo. 17Nisunga mumwoyo kwanje mbu Nyasaye alayaasia abalunjishi nende ababii; okhuba ebweneyo yaliho induukho khulwa buli likhuwa nabuli shikhole. 18Nisunga mumwoyo kwanje khukabaana babandu, mbu Nyasaye abateema, mbu beemanye shinga olwa bali butswa eshinasolo. 19Okhuba akeekholanga khubaana babandu keekholanga khutsisolo; likhuwa elala liikholanga khubio biosi; mbu shinga abo olwa bafwitsanga, nindio natsio tsifwitsanga tsirio; biosi bili nemiuya milala; omundu shiashila tsisolo ta; okhuba kosi namakhaya. 20Biosi bitsia habundu halala; biosi birula mulufu, ne biosi bikalushila olufu. 21Ali heena oumanyile iroho yomundu niyiba niyitsia ikulu, neiroho yeisolo niyiba niyitsia hasi khwiloba? 22Khulwako ndalola mbu libulaho lilayi elishila lino, mbu omundu okhwikhoyela ebikholebie; okhuba okwo nikwo omukabokwe, ne ali heena owakhamukalusia khandi okhulola akaliba inyumawe?
Currently Selected:
Omwilwatsi 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
