Okhukalushila 4
4
Musa yachesiyia abalsiraeli mbu babe abahulili
1Ne bulaano, iwe Isiraeli, reka amarwi khumakhuwa akalachilisibwa khandi khukobukhalachi bwosi, aka emwechesinjia, mbu mukakholenje; mbu mubeetsenje mwoyo, nimwinjila nimubukula eshialo eshia OMWAMI, Nyasaye wabakuuka beenywe, yamuheelesia. 2Murameetakhwo elindi khwikhuwa liene elia emulachilisia, kata muralileemiakhwo ta; ne mbu mulindenje amalako kOMWAMI Nyasaye weenywe aka emulaka. 3Tsimoni tsieenywe tsialuutsi aka OMWAMI yakhola eBaali-peori; okhuba abasaatsa abalondakhwo Baali-peori, OMWAMI Nyasayewo yabatibia hakari weenywe. 4Nebutswa inywe abahanda khuMWAMI Nyasaye weenywe mushiliho mwoyo mwesi leelo. 5Lole, ndamwechesia akalachilisibwa nende akobukhalachi, shinga OMWAMI Nyasaye wanje olwa yandaka, mbu mukakholenje mushialo eshia mwitsa okhwinjilamwo okhushibukula. 6Khulwako, mukalinde nimukakhola; okhuba buno nibwo obuchesi bweenywe khandi obumanyilisii bweenywe imbeli wetsimbia tsiabandu abalahulilanga akalachilisibwa kano kosi nibaboola mbu Toto mwene, lihanga lino neliabandu abachesi abobumanyilisii. 7Okhuba lili heena lihanga likhongo elili nomunyasaye ouli ahambi ninabo shinga OMWAMI Nyasaye weefwe olwa abeetsanga khwifwe, buli olwa khumuhaabilanga lwosi? 8Kata lili heena lihanga likhongo elili nende akalachilisibwa nakobukhalachi akali amalunjishi shinga amalako kano kosi aka ereetsanga imbeli weenywe leelo?
Abalsiraeli beetsusibwa khukeekholela eHorebu
9Habula wiyile kahala, olinde omwoyokwo bulayi, oleshe okhwibilila aka tsimonitsio tsialola, khandi mbu kaleshe okhurula mumwoyokwo tsindaalo tsiosi tsiobulamubwo; nebutswa okabamanyie abaanabo nabaana babaanabo; 10mbu akeinyanga eya wasinjila imbeli wOMWAMI Nyasayewo muHorebu, olwa OMWAMI yamboolela mbu Ukhung'aasilie abandu, nasi nembahulilisie amakhuwa kanje, beeche okhuriitsanga tsindaalo tsiosi olwa bashimenya mushialo, khandi mbu babeechesie abaana babwe bario. 11Neenyu mwasita ahambi nimusinjila hasi weshikulu; eshikulu nashio nishiakha omulilo okhuula mwikulu mukari mwene, neshiilima namaleesi nolucheka. 12Mana OMWAMI yasungana nineenywe okhurula ewa yali, mumulilo hakari; mwahulila omwoyo kwamakhuwake, nimuralolakhwo likondo liosi ta; habula omwoyo kwonyene. 13Mana yamurumbulila indakanoye eya yamulaka okhukholanga, mbu amalako ekhumi tsana; nakahandiika khurubaho rubili rwamachina. 14Khandi mundaalo tsienetsio OMWAMI yandaka okhumwechesia akalachilisibwa nakobukhalachi, mbu mukakholenje mushialo eshia mwitsa okhwambukha okhushilia.
Obuchesiyii khukobwinamili bwebifwanani
15Kho mwiyile kahala muno; okhuba shimwalola likondo lieimbia yosi yosi ta, khunyanga eyo olwa OMWAMI yasunganila nineenywe muHorebu okhurula ewa yali mumulilo hakari; 16kho muleshe okhwiyonoonia nimwikholela eshifwanani eshibaatse, eshifwanana nelikondo liosi, omufwano kwomundu weshisaatsa kata oweshikhasi, 17omufwano kweisolo yosi eyili khushialo, omufwano kwelinyonyi liosi elili netsimbaha elipulukha khwikulu, 18omufwano kweshindu shiosi eshimoolanga khwiloba, kata omufwano kweinyeeni yosi eyibeetsanga mumatsi akali hasi weshialo; 19khandi mbu oleshe okhuchinguula tsimonitsio khwikulu, mana olwa oba nolola eliuba nomwesi netsinyininyini, amahe kosi akomwikulu, oba nokhweswa nobiinamila nobikhalabanila, ebio ebia OMWAMI Nyasayewo yakabila tsimbia tsiosi tsiabandu etsili hasi welikulu liosi. 20Nebutswa OMWAMI yamubukula inywe, namurusia mumulilo omululumu shinga okurulanga eshibia, mbu muMisiri, mana mumubeele abandu bebe omwene, shinga olwa muli leelo. 21Khandi OMWAMI yandiililwa oburima khulweenywe, niyeetsuba mbu shindakhaambukha Yorodani kata shindakheenjila mushialo eshio eshilayi eshia OMWAMI Nyasayewo yakhuheele shibe obulaame, ta. 22Habula ekhoyile okhufwila mushialo shino, shikhoyile okhwambukha Yorodani ta; ne inywe mulaambukha, nimubukula eshialo eshio eshilayi. 23Mwiyile kahala, muleshe okhwibilila indakano yOMWAMI Nyasaye weenywe eya yalakana nineenywe, nimwikholela eshifwanani eshibaatse eshifwanana neshindu shiosi eshia OMWAMI Nyasayewo yakhukaania ta. 24Okhuba OMWAMI Nyasayewo nomulilo okusambanga; niye Nyasaye weimbalikha.
25Olwa oliibula abaana, nabeetsukhulu, nimuba nimwamenya mushialo eshise eshirambi, nimuba nimwiyoonoonia nimukhola eshifwanani eshibaatse eshifwanana neshindu shiosi, nimukhola akali amabii mumoni tsiOMWAMI Nyasayewo, nimumusinyisia, 26enanBa likulu nende eshialo okhumuyinga nobuloli inyanga yino, mbu mundaalo etsili ahambi mwitsa okhusishila elala okhurula mushialo eshio eshia mulaambukha Yorodani nimutsia okhushibukula; tsindaalo etsia mulamenyamwo shitsilaba tsinyinji ta, ne mulatibilibwa elala. 27Khandi OMWAMI alamusalaasia mumbia tsiabandu, ne mulatong'a abatuutu butswa mumahanga ewa OMWAMI alamuyila. 28Mana ebweneyo mulakhalabanila abanyasaye bebisaala namachina, emilimo chiamakhono kabandu, abaralolanga, kata okhuhulila kata okhulia, kata okhuhunyilisia ta. 29Ne kata ebweneyo, noba nomukhaaba OMWAMI Nyasayewo olamunyoola, noba nomurunilisia nomwo-yokwo kwosi nende eshiimoshie shiosi. 30Olwa oliba noli mumasila, amakhuwa ako kosi nikakhukwiliile, mundaalo tsiobumaliilishi olakalushila OMWAMI Nyasayewo, nohulila omwoyokwe. 31Okhuba OMWAMI Nyasayewo niNyasaye wetsimbabasi; shialakhusukuna kata okhukhumalilana, kata okhwibilila indakano yabakuukabo eya yabeetsubila tawe.
32Okhuba oreebe bulaano tsindaalo tsiene etsiabira, etsialiho iwe norashiabaho ta, okhurula khunyanga eya Nyasaye yalonjelamwo omundu khushialo, nokhurula khushihesi shielikulu elubeka eyi okhuula khushihesi shialio elubeka eyi, likhuwa niliba nilieekhola likhongo shinga lino, kata niliahuliilikhakhwo elifwana lirio, nohomba? 33Bali heena abandu abahulilakhwo omwoyo kwomunyasaye nikuboolanga mumulilo hakari, shinga iwe olwa wahulila, nibabaho mwoyo? 34Kata ali heena omunyasaye owateema okhutsia okhwibukulila lihanga okhurula hakari welihanga lindi, khulwa obuteemwi, khulwa ebilolelo, khulwa akamangaliimwa, khulwa lihe, khulwa omukhono kwamaani, khulwa omukhono okunyiililwe okhubahabina, khandi khulwa akamariisia amakhongo, shinga OMWAMI Nyasaye weenywe olwa yamukholela muMisiri, nimulola netsimoni tsieenywe? 35Iwe wamanyibwa, mbu omanye shinga OMWAMI olwa ali ye Nyasaye; abulaho oundi, habula ye yenyene. 36Okhurula mwikulu yakhuhulilisia omwoyokwe mbu akhwibaalile; khandi khushialo yakhulolosilia omulilokwe omukhongo; khandi wahulila amakhuwake nikarula hakari womulilo tsana. 37Ne shichila yaheelanga abakuukabo, niko akachila yalobola olwibulo lwabwe inyuma wabwe, nakhurusiamwo halala nokhubahokhwe, nende obunyalibwe obukhongo, okhurula eMisiri, 38niyeelusia imbeliwo amahanga akakhushila obukhongo netsingufu, okhukhwinjisia nakhuheelesia eshialo shiabwe shibe obulaame, shinga olwa shili leelo. 39Kho omanye leelo luno, niwitsulila mumwoyo, mbu OMWAMI niye Nyasaye mwikulu ikulu khandi mushialo hasi; abulaho oundi ta. 40Nawe olindenje aka yalachilisia namalakoke aka ekhulaka leelo, mbu okaasenje, nende abaanabo inyumawo, khandi mbu tsindaalotsio tsimeeteshe mushialo eshia OMWAMI Nyasayewo akhuheelesia, ebisoni nebisoni.
Amataala kobwilushilo akali ebukwe weYorodani
41Mana Musa yaahula amataala kataru akali injelekha weYorodani okuhenjile ewa eliuba lifwindilanga; 42mbu omwiri womundu yeelushilenjeyo, oyo ouba niyeetsukhana niyeera owashie, ne narabeelenje namukiya ta; mbu niyeelushiile elala khumataala ako, abeetsenje mwoyo; 43akeene ngakano, mbu Bezeri mushitsiimi, khumuhololookhwe, khulwa abaReubeni; naRamotsi muGileadi, khulwa abaGadi; naGolani muBashani, khulwa abaManase.
Akoburanjilili bwokhukalushila mumalako
44Kano niko amalako aka Musa yara imbeli wabaana baIsiraeli; 45kano niko akoburumbusi, nakalachilisibwa, nakobukhalachi, aka Musa yaboolela abaana baIsiraeli olwa barula eMisiri, 46injelekha weYorodani, mwibanda elihengana nende Betsi-peori, mushialo shiaSihoni omuruchi wabaAmori, abamenyanga eHeshiboni; nibo aba Musa nabaana baIsiraeli bahula olwa barula eMisiri; 47nibabukula eshialoshie mbu shibe eshiabwe, nende eshialo shiaOgu omuruchi waBashani, abaruchi babili abo babaAmori, abalinji injelekha weYorodani okuhenjile ewa eliuba lifwindilanga; 48okhurula eAroeri, elili khundulo welibanda liaArinoni, okhuula khushikulu shiaSirioni, ne nishio Heremoni; 49halala nende Araba yosi injelekha weYorodani ebukwe, okhuula khunyanza yaAraba, mundalila tsiaPisiga.
Currently Selected:
Okhukalushila 4: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
