Okhukalushila 3
3
AbaIsiraeli bahula Ogu waBashani
(Obub. 21.31-35)
1Mana nikhushiukhana nikhutsia khunjila yaBashani; naye Ogu omuruchi waBashani narula okhukhuyinga, ye nabandube bosi, nibakhuseerela lihe eEderei. 2OMWAMI niyasunjila mbu Oramuria ta; okhuba emalile okhumuhaana mumukhonokwo, halala nabandube bosi neshialoshie; nawe olamukholela shinga olwa wakho-lela Sihoni omuruchi wabaAmori, owamenya eHeshiboni. 3Kho OMWAMI Nyasaye weefwe nahaana Ogu omuruchi waBashani yesi mumukhono kweefwe, nabandube bosi; nikhumurootsa okhuula olwa aratong'a omundu yesi ta. 4Nikhubukula amataalake kosi mundaalo etsio; kata shjlialiho litaala liosi elia khwachweya okhubukula ta; mbu amataala amakhumi kasasaba, mumbali tsiosi tsiaArigobu, oburuchi bwaOgu muBashani. 5Amataala ako kosi kali netsingoba tsirambi, nebilibwa nemiyinjiilo; khandi nende amataala akabula tsingoba amanji. 6Khwakamululila elala, shinga olwa khwakholela Sihoni omuruchi waHeshiboni, nikhumululila elala buli litaala nabalimwo bosi, mbu abasaatsa, nabakhasi, nabaana abatiiti bosi. 7Habula emiruko, nende ebiyaayilwe mumataala ako, khwabukula bibe ebiolutiitsi bieefwe. 8Nikhubukula eshialo mundaalo etsio, mumakhono kabaruchi abo babili babaAmori abali injelekha weYorodani, okhurula khwibanda liaArinoni okhuula khushikulu shiaHeremoni; 9ne Heremoni tsana, abaSidoni bashilanga mbu Sirioni, nabo abaAmori bashilanga mbu Seniri; 10mbu amataala kosi komuhololookhwe, naGileadi shiosi, naBashani shiosi, okhuula khuSaleka naEderei, amataala koburuchi bwaOgu muBashani. 11Okhuba Ogu omuruchi waBashani niye owasikala yenyene khumusikalo kwabaRefai; lole, eshitalishie shiali eshitali shieshibia; shishiliho eRaba ewabaana baAmoni noho? Oburambi bwashio bwachelwa amakhono shienda, nobuchiikha amakhono kane, nochela khumukhono shinga bosi olwa bachelanga.
AbaReubeni nabaGadi neinusu yabaManase bamenya injelekha weYorodani ebukwe
(Obub. 32.1-42)
12Ne eshialo eshio khwashibukula mundaalo etsio shibe eshieefwe; nimbaheelesia abaReubeni nabaGadi eshialo okhurula eAroeri, elili khundulo welibanda liaArinoni, nende eshitonye shieshialo shiebikulu shiaGileadi, namataala kashio. 13Ne eshitonye shiaGileadi eshiatong'a, nende Bashani shiosi, oburuchi bwaOgu, mumbali tsiosi tsiaArigobu, ndabaheelesia abeinusu yoluyia lwaManase. Ne Bashani eshio shiosi shilangungwa mbu eshialo shiabaRefai. 14Yairi waManase yabukula mumbali tsiosi tsiaArigobu, okhuula khulwakho lwabaGeshuri nabaMaaka; nalanga mumbali etsio khuliira lilie, mbu Hawo-tsi-yairi, shinga olwa tsilangwa okhuula olwa leelo. 15Khandi ndaheelesia Makhiri Gileadi. 16Nabo abaReubeni nende abaGadi, ndabaheelesia eshialo okhurula eGileadi okhuula khwibanda liaArinoni; libanda liene hakari walio niliba olwakho; okhuula khumwalo kwaYaboki, okuli olwakho lwabaana baAmoni; 17nende Araba shiosi, Yorodani nikuba olwakho, okhurula khuKhineretsi okhuula khunyanza yaAraba, niyo Inyanza Yomuunyu, mundalila tsiaPisiga, elubeka Iwebukwe.
18Ne mundaalo etsio ndamulachilisia mbu OMWAMI Nyasaye weenywe yamuheelesia eshialo shino shibe eshieenywe. Mwambushe nimwimanuule ebimanulwa bieenywe, inywe abasaatsa beitswoni mwesi, imbeli wabaana beenywe, abaana baIsiraeli. 19Nebutswa abakhasi beenywe nabaana beenywe abatiiti baleekhala mumataala aka ndamuheelesia, halala nemiruko chieenywe; emanyile shinga olwa muli nemiruko eminji; 20okhuula olwa OMWAMI alahuluusia abaana beenywe, nineenywe mwesi, nabo bosi nibalia eshialo eshia OMWAMI Nyasaye weenywe yabaheelesia injelekha waYorodani; kho habwenaho mulakalukha buli mundu khwilobalie elia ndamuheelesia. 21Khandi mundaalo etsio ndamulachilisia Yoswa ndi Tsimonitsio tsialuutsi kosi aka OMWAMI Nyasaye weenywe yakholeele abaruchi abo babili; ne nilwo olwa OMWAMI alakholela oburuchi bwosi ario, buli hosi ewa witsa okhubirila. 22Murabaria ta; okhuba OMWAMI Nyasaye weenywe niye oumulwanilanga.
Musa shiyamokwa okhwinjile eKanaani ta.
23Khandi mundaalo etsio ndamusaaya OMWAMI muno, mbu 24E OMWAMI Nyasaye, bulaano wachaachile okhumanyia omusumbawo obukhongobwo, nomukhonokwo kwetsingufu; okhuba ali heena omunyasaye yesi mwikulu kata mushialo ounyala okhukhola emilimo shinga echichio, kata ebikhole biamaani shinga ebibio? 25Ekhusaaya mbu ofuchiilile enyambushe, endole eshialo eshilayi eshio eshili injelekha waYorodani, mbu ebikulu ebilayi bilia, nende Lebanoni. 26Nebutswa OMWAMI yandiililwa oburima khulweenywe, narambulilakhwo ta; OMWAMI niyasunjila mbu Leshela yaho! Orasunjilakhwo khukano khandi ta. 27Niina otsie khubutenje bwaPisiga, ochinguule tsimoni ohenje mumbo, nenotsi, nesautsi, nende ebukwe, olole netsimonitsio; okhuba shiolaambukha Yorodani kuno ta. 28Nebutswa olachilisie Yoswa, nomuumia ikholo, nomumeetela amaani; okhuba ye alaambukha niyeemilila lihanga lino, nachila nibalia eshialo eshia olalola. 29Kho nikhu-menya mwibanda elihengana nende Betsi-peori.
Currently Selected:
Okhukalushila 3: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
