Okhukalushila 19
19
Amataala kobwilushilo; tsiilzakho tsiakhale
(Obub. 35.9-28; Yos. 20.1-9)
1Olwa OMWAMI Nyasayewo alasishia amahanga aka OMWAMI Nyasayewo akhuheelesia eshialo shiako, nawe noshibukula nomenya mumataala kabwe nomutsinzu tsiabwe, 2wiyahulile amataala kataru hakari weshialoshio eshia OMWAMI Nyasayewo akhuheelesia shibe eshishio. 3Okasie tsinjila, nokabula eshialo eshia OMWAMI Nyasayewo alachila nolia, ebitonye bitaru, mbu buli mwiri yeelushileyo.
4Ne shino nishio eshifune eshiakhachila omwiri niyeelushilayo, mbu abe mwoyo; oyo ouba niyeetsukhana niyeera owashie, ne narabeelenje namukiya khale ta; 5shinga olwa omundu yakhaba natsia mumutsuru nowashie okhurema tsikhwi, omukhonokwe nikuchinga ihaywa okhurema omusaala, ihaywa niyirungukha mumuyini niyikhupa owashie nafwa; kho yeelushile elala khumataala ako, abe mwoyo; 6omumali weshikwoli shiamabanga nashiyiile munda aleshe okhulondachila omwiri, namunyoola, shichila injila neindambi, namuupa afwe; nebutswa shiyali nakwanile okhufwa, shichila shiyalinji namukiya ta. 7Niko akachila nikhulaka mbu Wiyahulile amataala kataru. 8Ne OMWAMI Nyasayewo naba nakaliyia tsinzakhotsio, shinga olwa yeetsubila abakuukabo, nakhuheelesia eshialo eshio shiosi eshia yasuubisia okhuheelesia abakuukabo; 9ne nawe noba nolinda lilako lino liosi nolikhola, elia ekhulachilisia leelo, mbu okhuheelanga OMWAMI Nyasayewo, nokhuchenda khunjilatsie tsindaalo tsiosi; kho olameeta amataala kandi kataru khukataru kalia; 10mbu amabanga komundu oubula eshikha kaleshe okhwebeena mushialoshio eshia OMWAMI Nyasayewo akhuha shibe obulaame, mana eshiina shiamabanga shibe khwiwe.
11Nebutswa omundu yesi naba namukiya owashie, namukoneshela, namubuushilakhwo, namuupa butinyu naye nafwa; mana niyeelushila elala eliokhumataala ako; 12kho abakofu belitaala liabwe barumane okhumwendayo, nibamuhaana mumukhono kwomumali weshikwoli shiamabanga, mbu afwe. 13Imoniyo yileshe okhumutiililwa eshisa, nebutswa orusieyo amabanga komundu oubula eshikha muIsiraeli, khandi mbu akoko kakaase.
14Oreeha eshimanyilo shiolwakho Iwowashio ta, eshia abo bakhale baraho, mubulaamebwo obwa olalaamilwa, mushialo eshia OMWAMI Nyasayewo akhuha shibe eshishio.
Amalako khukabarumbusi bobuloli
15Omuloli mulala yenyene shiahela okhuyinga omundu mwikhuwa liobumayaanu bwosi kata eshionoono shiosi eshia yoonoonile ta; khuminwa chiabaloli babili, kata khuminwa chiabaloli bataru, likhuwa litinyisibwe. 16Naba nabuukha omuloli ourali omulunjishi ta okhuyinga omundu, okhurumbula obuloli bwelibii, 17kho abo babili bombi abali neshifunaane basinjile imbeli w, imbeli wabakuhani nabayaasii abalibaho mundaalo etsio; 18mana abayaasii abo balareebelesia butinyu; ne lole, omurumbusi oyo wobuloli naba nali owobubeeyi, narumbuule akobubeeyi khuwashie, 19mana mulamukholela ye shinga olwa yali napaarilenje okhukholela owashie; nilwo olwa olarusia obubii obuli hakariwo. 20Nabo abasikala balahulila nibaria, nibarakholakhwo khandi libii elifwana lirio hakariwo ta. 21Imoniyo yileshe okhutiilwa eshisa; obulamu khubulamu, imoni khumoni, eliino khuliino, omukhono khumukhono, eshilenje khushilenje.
Currently Selected:
Okhukalushila 19: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
