Okhukalushila 18
18
Emikabo chiabakuhani nabaLawi
1Abakuhani abaLawi, nibo oluyia lwosi lwaLawi, shibalabakhwo nomukabo kata obulaame nende Isiraeli ta; balaliitsanga ebihaanwa biOMWAMI ebikholelwa omulilo, nende biosi ebibakhoyeele. 2Shibalabakhwo nobulaame mubaana babwe ta; OMWAMI nive obulaame bwabwe, shinga olwa yababoolela 3Ne bino nibio ebikhoyeele abakuhani, ebirula khubandu, khubeenabo abamala omusango, kata nikuba ing'ombe kata likondi; mbu baheelesie omukuhani eshiambeli, netsiseya tsibili, nende lisombo. 4Ebirongole bieimeleyo nebieidivaiyo, nebiamafurako, nobwoya obwambeli obutetwa khumakondiko, obimuheelesinjie. 5Okhuba OMWAMI Nyasayewo yamulobola mumbiatsio tsiosi, mbu asinjilenje okhukhalabana muliira liOMWAMI, ye nabaanabe, obushia nobushia.
6Ne omuLawi yesi naba narula mwitaala liosi eliomuIsiraeli yosi ewa yamenyakhwo, niyeetsa nokhwenya khwosi khwomwoyokwe, habundu tsana aha OMWAMI alalobola; 7kho akhalabane muliira liOMWAMI Nyasayewe, shinga abaLawi abaana babwe bosi olwa bakholanga, abasinjilangaho imbel wOMWAMI. 8Babe nemikabo echiokhulia echihelana, halala nende ebio ebinyoolekha mukhukusia ebiasamwana.
Obuchesiyii khukebiima biamahanga ebili eshisinyo
9Olwa olaba niwinjiile mushialo eshia OMWAMI Nyasayewo akhuheelesia, oreekakhwo okhukhola ebisinyo biamahanga ako ta. 10Aleshe okhunyooleshela mwinywe omundu yesi oubisia omwanawe omusiani kata omukhaana mumulilo, omundu yesi oukhupa olubu, kata omulakulusi, kata omulookooli, kata omufila, 11kata omulosi, kata owamayengo, kata owebitsoyelo, kata omufumu oureebanga abafwa amakhuwa, ta. 12Okhuba omundu yesi oukholanga amakhuwa ako nowokusinyo khuMWAMI; ne khulwa emisinyo echio OMWAMI Nyasayewo abeelusia imbeliwo. 13Obeetsenje habwene imbeli wOMWAMI Nyasayewo. 14Okhuba amahanga ako, aka witsa okhubukula, kahulilanga abo abakhola obulakulusi, kata abakhupa olubu; habula iwe, OMWAMI Nyasayewo shiyakhufuchiilila okhukhola orio ta.
Nyasaye yasuubisia okhubaheelesia omunabii ouli shinga Musa
15OMWAMI Nyasayewo alakhubuusilia omunabii ourula hakari mwinywe, owokhubaana beenywe, oufwanana ninasi; mumuhulilenje ye; 16kosi aka wenyela OMWAMI Nyasayewo muHorebu khunyanga yelibukaana shinga olwa kali; ori Endeshe okhuhulila omwoyo kwOMWAMI Nyasaye wanje khandi, kata endeshe okhulola omulilo omukhongo kuno khandi ta, mbu endeshe okhufwa. 17OMWAMI niyamboolela mbu Bateechile, mukosi aka basunjile. 18Ndalababuusilia omunabii okhurula mubaana babwe, oufwanana ninawe, ndalareetsanga amakhuwa kanje mumunwakwe, naye alaboolelanga kosi aka ndalamulaka. 19Ne omundu yesi oukhaya okhuhulila amakhuwa kanje aka alaboolanga muliira lianje, isie ndalamubanzakhwo. 20Nebutswa omunahii oulatsaalikha okhuboola likhuwa muliira lianje, nasi nindamulachile okhuliboola ta, kata oulaboolanga mumeera kabanyasaye bandi, omunabii oyo alafwa. 21Ne noba nokanakania mumwoyokwo mbu Ne nakhwahukhasie khurie likhuwa elia OMWAMI araboolile ta? 22Olwa omunabii aboola muliira liOMWAMI, likhuwa liene niliralondakhwo, kata niliramala liikhole ta, elo nelikhuwa elia OMWAMI araboolile tawe; omunabii aliboolile mukhutsaalikha; oramuria ta.
Currently Selected:
Okhukalushila 18: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
