Okhukalushila 17
17
1Oramumalila OMWAMI Nyasayewo omusango kweing'ombe kata likondi elilikhwo obulema kata obubii bwosi ta; okhuba neshisinyo khuMWAMI Nyasayewo.
2Omundu naba nanyoolekha hakariwo, mwitaala liosi elia OMWAMI Nyasayewo akhuheelesia, kata omusaatsa kata omukhasi, oukhola akali amabii imbeli wOMWAMI Nyasayewo nakhaya indakanoye, 3owakhaba natsiile okhukhalabanila abanyasaye bandi nabeenamila, kata eliuba, kata omwesi, kata inyininyini yosi eyomwihe lielikulu, elia ndakaana; 4nawe noboolelwa, nohulilakhwo; kho oreebelesie butinyu; ne lola, niliba nilili eliatoto, nilimanyiishe habwene, mbu eshisinyo eshio shiikholanga muIsiraeli, 5kho omurusie ebulafu, omundu oyo omusaatsa kata omukhasi ouba nakholile likhuwa elo libii, haluyia Iwelitaala, omusaatsa oyo kata omukhasi oyo nobalasa namachina mbu bafwe. 6Khuminwa chiabaloli babili, kata abaloli bataru, oyo ouli okhwirwa yeerwe; ne khumunwa kwomuloli mulala shianyala okhwirwa ta. 7Amakhono kabaloli niko akalaranjilila khuye okhumwira, nolunyumakhwo amakhono kabandu bosi. Nilwo olwa olarusia obubii obuli hakari weenywe.
8Likhuwa niliba nilibuukha elikhukhaya okhukhalaka, elili hakari wobwiri nobwiri bundi, kata hakari weshifunaane neshifunaane shindi kata hakari wobuupani nobuupani bundi, amayingano akali mukari mumataalako; kho orule, otikulushe otsie habundu yaho aha OMWAMI Nyasayewo alalobola; 9otsie ewabakuhani abaLawi, newomuyaasii oulabaho mundaalo etsio; mana oreebelesie, nabo balakhumanyia eshiina eshikhoyeele. 10Nawe olakhola akeshiina eshio shinga olwa shili eshia balakhumanyia okhurula habundu yaho aha OMWAMI alalobola; oleetsulilanga okhukhola kosi aka balakhwechesia shinga olwa kali. 11Akamalako kano aka balakhwechesia shinga olwa kali, nakobukhalachi obwa balakhuboolela shinga olwa kali, nolwa olakholanga Orashiama okhurula khushiina eshia balakhumanyia, khumukhono musaatsa kata omukhasi ta. 12Naye omundu oukhola natsaalikha, narahulila omukuhani ouba nasinjiileyo okhukhalabana imbeli w Nyasayewo, kata omuyaasii ta, omundu oyo afwe; okhuula orusie obubii obuli muIsiraeli. 13Abandu bosi nabo balahulila, nibaria, nibaratsaalikhanga khandi ta.
Ameebaalo khukomuruchi
14Olwa olaba niwulile khushialo eshia OMWAMI Nyasayewo akhuheelesia, noshilia, nomenyamwo, nosunga mbu Ndalaraho omuruchi yaruche, shingana amahanga kosi akambotokhana, 15kho toto wakhanyala okhumukhola omuruchi oukhuruka, omundu oyo owa OMWAMI Nyasayewo alalobola, olareho omundu owokhubaana beenywe abe omuruchi oukhuruka; ne oramuraho omusuku yesi akhuruche, ourali omwana weenywe ta. 16Habula aleshe okhwibunjishila tsifarasi, kata okhukalusia abandu eMisiri mbu mana tsifarasitsie tsiinjihe, tashichila OMWAMI yamusunjila mbu Okhurula olwa leelo murakalushila khunjila eyo khandi ta. 17Khandi aleshe okhwibunjishila abakhasi, omwoyokwe kuleshe okhushiama; kata aleshe okhwibunjishila ifeetsa nende itsahaabu ta.
18Khandi olwa aliba niyeekhaale khushifumbi shioburuchibwe, alahandiika ikopi yamalako kano mwibuuku, nahenjela khushieneshio eshia abakuhani abaLawi bali ninashio. 19Nalio, abeetsenje ninalio; ne asoomenjemwo tsindaalo tsiosi tsiobulamubwe; mbu yeeche okhuriitsanga OMWAMI Nyasayewe, nalindanga amakhuwa kosi kamalako kano nende akalachilisibwa kano, nakakholanga; 20mbu omwoyokwe kuleshe okhwichinjimisia okhushila abaana babwe, khandi mbu aleshe okhukotola okhurula khwilako khumukhono musaatsa kata omukhasi; mbu kho tsindaalotsie tsimeeteshe muburuchibwe, ye nabaanabe, hakari waIsiraeli.
Currently Selected:
Okhukalushila 17: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
