Okhukalushila 14
14
Eshiima shindi eshiomumasika nishikaanwa
1Muli abaana bOMWAMI Nyasaye weenywe; mureesalakakhwo, kata okhubeka liswi mulwotoosi khulwa omufu ta. 2Okhuba oli oluyia olutakatifu lwOMWAMI Nyasayewo; ne OMWAMI yakhulobola obe oluyia olukoosi olwakhaba olulwe omwene, okhushila tsimbia tsiosi etsili khushialo.
Tsisolo tsisiiyikhu nende ezsionzusilo
3Oraliakhwo eshiomusilo shiosi shiosi ta. 4Tsisolo etsia mulaliitsanga nzietsino; mbu ing'ombe, nelikondi, neimbusi, 5neimbongo, neshitsusu, neikongoni, neipuri, neimbusi inashikulu, neikhulo, nelikondi linashikulu. 6Nebutswa buli solo eyakabukhana oluhakayu, eya oluhakayu lwayo Iweeyara hakari ebitonye bibili, eyinyanyanga ikaamuula, musolo tsiosi, muchiliitsenje. 7Habula khutsinyanyanga ikaamuula kata khutsili noluhakayu olweeyara, muleshenje okhulia khutsino; mbu ingamia, neshituyu, nelicheneli, shichila tsinyanyanga ikaamuula, ne shitsikabukhananga oluhakayu ta; khwinywe netsiomusilo; 8nende imbiitsi, shichila yakabukhana oluhakayu, ne shiyinyanyanga ikaamuula ta; khwinywe neyomusilo. Muraliakhwo khunyama yatsio, kata okhutiilakhwo khubirundu biatsio ta.
9Khubiomumatsi biosi, ebia mulaliitsangakhwo mbiebino; mbu shiosi shiosi eshili nebibehe nende amasale, mulaliitsanga; 10nebutswa shiosi shiosi eshibula ebibehe namasale, murashiliitsangakhwo ta; khwinywe neshiomusilo.
11Khumanyonyi amasiiyikhu, mulaliitsanga. 12Ne aka muranyala okhuliakhwo ta ngakano; mbu inditsu, neshikhokorelo, nelihuutselo; 13neshikhupi, nolukakha, khumbia tsiabio shinga olwa tsili; 14buli likhokho, khumbia yalio shinga olwa yili; 15nelihuto, neimbukambuka, neinyanje, nelihungu, khumbia tsiabio shinga olwa tsili; 16nelikhuule, neliyichichi, neifiitibili; 17neimwari, neingosia, nenamulobi; 18nelikuyi, nelinakha, khumbia tsiabio shinga olwa tsili, ne lihutihuti, nelinyinya. 19Ne ebindu biosi ebiselasela, ebili netsimbaha, khwinywe nebiomusilo; shibilaliibwakhwo ta. 20Amanyonyi kosi akali amasiiyikhu, mulaliitsanga.
21Muraliakhwo khushindu shiosi eshifwa shiene khubwashio ta; onyala okhushimuheelesia omurende ouli mwitaalalio, alie; kata onyala okhukusia omusuku; okhuba muli oluyia olutakatifu lwOMWAMI Nyasaye weenywe. Orateekha eshimeeme mumabeele kanyina ta.
Amalako khukeshitonye shielikhumi
22Orachweya okhwahulanga eshitonye shielikhumi shiokhumameeto kosi keimwoyo, ebio ebirula mumukunda omuyika buli muyika, ta. 23Ne yaho imbeli w Nyasayewo, habundu aha alalobola okhumenyiayo eliiralie, niho aha olaliiranga eshitonye eshio shielikhumi eshieimeleyo, neshieidivaiyo, neshiamafurako, nebiibulwa biambeli bietsing'ombetsio nebiebiayobio; mbu weche okhuriitsanga OMWAMI Nyasayewo tsindaalo tsiosi. 24Nebutswa oburambi bwoluchendo nibuba nibukhukhaya, oburanyala okhubichinga ta, olwa OMWAMI Nyasayewo alakhuheelesia ikhabi, shichila habundu tsana nehale muno aha OMWAMI Nyasayewo alalobola okhuraho eliiralie; 25kho oshikalule amapeesa, noboha amapeesa ako nokabukula mumukhono, notsia habundu yaho aha OMWAMI Nyasayewo alalobola; 26mana okule amapeesa ako shiosi shiosi eshia wenya, mbu tsing'ombe, kata amakondi, kata idivai, kata amalwa, kata shiosi shiosi eshia omwoyokwo kwenya, noliira yaho imbeli wOMWAMI Nyasayewo, niwikhoya, iwe nende abomunzuyo; 27nomuLawi oyo ouli mwitaalalio, oramwibala ta; okhuba shialikhwo nomukabo kata obulaame ninawe ta.
28Buli olwa emiyika chiba nichihweele chitaru, oyininjie ebitonye bielikhumi biosi ebiokhumameetoko akomuyika kwenokwo, obibiishe mwitaalalio; 29ne okhuba omuLawi shialikhwo nomukabo kata obulaame ninawe ta, ye, halala nomurende, nomubisandu, nomukhasi omulekhwa, abali mwitaalalio, beetse balie beekure; mbu OMWAMI Nyasayewo akhuheelesie ikhabi mumilimo chiosi chiamakhonoko echia okholanga.
Currently Selected:
Okhukalushila 14: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
