Okhukalushila 13
13
1Omunabii naba nabuukha mwinywe, kata omuloori wamalooro, nakhumanyia eshilolelo kata eshiamakana, 2nashio eshilolelo kata eshiamakana nishiusibwa; mana nakhuboolelakhwo mbu Chenda khulondekhwo abanyasaye bandi, aba oramanyilenje ta, khubakhalabanile; 3kho orahulila amakhuwa komunabii oyo, kata omuloori wamalooro oyo ta; okhuba OMWAMI Nyasaye weenywe amuteemanga, okhumanya nimuba nimuheelanga OMWAMI Nyasaye weenywe nomwoyo kweenywe kwosi nende eshiimo shieenywe shiosi. 4Mumulondenjekhwo OMWAMI Nyasaye weenywe, nimumuria, nimulinda amalakoke, nimuhulila amakhuwake, nimumukhalabanila nimumuhandakhwo. 5Nebutswa omunabii oyo, kata omuloori wamalooro, yeerwe bwirwa; okhuba yaboolile akeinduli khuMWAMI Nyasaye weenywe, owamurusia mushialo shiaMisiri, nakhununula munzu yobunyakhani, okhukhukhwesa orule khunjila eya OMWAMI Nyasayewo yakhulaka okhuchendakhwo. Nilwo olwa olarusia obubii obuli hakari weenywe.
6Omusiani weenywe owomweenyu, kata omwanawo omusiani kata omukhaana, kata omukhasiwo owokhushilifushio, kata omwitsawo ouli shinga omwoyokwo kwene, naba nakhutsuuba mabiswi, ari Chenda khutsie khukhalabanile abanyasaye bandi, aba oramanyilenje, kata iwe kata abakuukabo ta, 7abokhubanyasaye betsimbia tsiabandu abamubotokhana, ababa nibali ahambi ninawe kata ehale ninawe, okhurula khushihesi shieshialo okhuula khushihesi shindi shieshialo; 8oramufuchiilila kata okhumuhulila ta; imoniyo yileshe okhumubeela eshisa, kata oramuhonokosia kata okhumubisa tawe. 9Nebutswa okhwira omwire; omukhono kukwo kube okwambeli khuye okhumwira, nolunyumakhwo amakhono kabandu bosi. 10Omulase namachina mbu afwe; shichila yateemile okhukhukhwesa okhurula ewa OMWAMI Nyasayewo, owakhurusia mushialo shiaMisiri, okhurula munzu yobunyakhani. 11Ne Isiraeli yosi yilahulila, niyiria, niyirakholakhwo obubii obufwana shinga obwo hakari weenywe khandi ta.
12Noba nohulila nikaboolwa khwitaala liosi eliomumataalako aka OMWAMI Nyasayewo akhuheelesia okhumenyamwo, mbu 13Abandu bandi abamayaanu abeshifwabwi barulile hakari weenywe, nibakhwesa abamenyanga mwitaala liabwe, bari Chende khutsie khukhalabanile abanyasaye bandi, aba muramanyilenje ta; 14kho oreebelesie, orunilisie, noreeba obutinyu; ne lola, niliba nilili eliatoto, nilimanyiishe habwene mbu eshisinyo eshio shiikholanga hakari weenywe, 15kho okhurootsa orootse abamenyanga mwitaala elo nolukanga, nolimululila elala, nabalimwo bosi, nemiruko chialio, nolukanga. 16Obunjishe ebiyaayo bialio biosi mulwanyi lwalio, nosambila litaala omulilo, nebiyaayo bialio biosi pe, khuMWAMI Nyasayewo; lilakwa eshituuli obushia nobushia; shililiumbakhwakhwo khandi ta. 17Kata eshindu shiosi shishilahanda khumukhonokwo ta, khu ebio ebiakwisibwa omusilo; mbu OMWAMI ashiukhane arule khubululu bwoburimabwe, nalolosia tsimbabasitsie, nakhubeela eshisa, nakhwinjiyia, shinga olwa yeetsubila abakuukabo; 18olwa olareka amarwi khumwoyo kwOMWAMI Nyasayewo, okhulindanga amalakoke kosi aka ekhulaka inyanga yino, okhukholanga akali amalunji imbeli wOMWAMI Nyasayewo.
Currently Selected:
Okhukalushila 13: OUV
Highlight
Share
Compare
Copy
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
