Danieli 3
3
Bahomibwa mushisambilo shiomulilo omululumo
1Omuruchi Nebukadineza yakasia eshifwanani shieitsahaabu, eshia oburambi bwashio bwahela amakhono amakhumi kasasaba, nobuchiikha amakhono kasasaba; nashisiniisia khumuhololookhwe kwaDura, mulukongo lwaBabeli. 2Mana Nebukadineza narumana okhukhung'aasia abaami, nabasinjilili, nabakafuna, nabakofu beshiina, nababiishi bamapeesa, nabayaasii, nabamakuru, naboburuchi bosi betsingongo, mbu beetse mumulukha kwokhwahula eshifwanani tsana eshia omuruchi Nebukadineza yali nasinjisiye. 3Kho abaami, nabasinjilili, nabakafuna, nabakofu beshiina, nababiishi bamapeesa, nabayaasii, nabamakuru, naboburuchi bosi betsingongo nibakhung'aana khumulukha kwokhwahula eshifwanani eshia omuruchi Nebukadineza yali nasinjisiye. 4Mana omuupi womulome nalanjisia, ari Inywe abetsimbia namahanga nabetsinimi, mulakwa muri nanwa; mbu 5khushise shiosi eshia mulahulila amayoosi kolwika, nelilele, nelichieng'i, neindongooli, nelitungu, nelimuka, nobukhana bwetsimbia tsiosi, mwikhupe hasi nimwinamila eshifwanani shieitsahaabu eshia omuruchi Nebukadineza yasinjisiye; 6ne omundu yesi oureekhupa hasi okhushiinamila ta, habwenaho alasukunwa mushisambilo shiomulilo omululumu, mukari bwene. 7Kho khushise eshio, olwa abandu bosi bahulila amayoosi kolwika, nelilele, nelichieng'i, neindongooli, nelitungu, nobukhana bwetsimbia tsiosi, abetsimbia tsiosi namahanga netsinimi nibeekhupa hasi nibeenamila eshifwanani shieitsahaabu eshia omuruchi Nebukadineza yali nasinjisiye.
8Kho khushise eshio abaKalidayo bandi beetsa, nibasitaaka abaYahudi; 9nibaboolela omuruchi Nebukadineza bari Omwami omuruchi, oyindile obushia nobushia! 10Omwami omuruchi, wakhupa omulome nosunga mbu buli mundu ouhulila amayoosi kolwika, nelilele, nelichieng'i, neindongooli, nelitungu, nelimuka, nobukhana bwetsimbia tsiosi, yeekhupe hasi niyeenamila eshifwanani shieitsahaabu tsana; 11khandi mbu omundu yesi oureekhupa hasi okhushiinamila ta, alasukunwa mushisambilo shiomulilo omululumu, mukari bwene. 12Ne baliho abaYahudi bandi aba waraho khumakhuwa kolukongo lwaBabeli, banga Shadaraka, Meshaki, naAbedinego; nabo, omwami omuruchi, baleka likhuwalio; shibakhalabanila abanyasayebo kata okhwinamila eshifwanani shieitsahaabu eshia wasinjisiye ta.
13Mana Nebukadineza muburimabwe nomubululubwe yalaka mbu Shadaraka, Meshaki, naAbedinego baleerwe. Kho nibaleera abandu abo imbeli womuruchi. 14Nebukadineza nabareeba mbu Inywe Shadaraka, Meshaki, naAbedinego, embulilanga mbu shimukhalabanilanga nyasaye wanje, kata okhwinamila eshifwanani shieitsahaabu eshia ndasinjisiye ta; nitoto, nohomba? 15Nimuba nimwirecheeshe mbu khushise shiosi eshia mulahulila amayoosi kolwika, nelilele, nelichieng'i, neindongooli, nelitungu, nelimuka, nobukhana bwetsimbia tsiosi, okhwikhupa hasi nimwinamila eshifwanani eshia ndakholile, kho nobulayi; ne nimuba nimureenama ta, habwenaho mulasukunwa mushisambilo shiomulilo omululumu, mukari bwene; ne kuli heena omunyasaye kwosi okulamuhonia mumakhono kanje?
16Shadaraka naMeshaki naAbedinego nibakalusia nibasunjila omuruchi bari Omwami Nebukadineza, libulaho elichila nikhukhukalusiamwo mumakhuwa kano ta. 17Nyasaye weefwe owa khukhalabanilanga naba nanyala okhukhuhonia mushisambilo shiomulilo omululumu nomumukhonokwo, kho alakhuhonia, omwami omuruchi. 18Ne butswa, omwami omuruchi, omanye mbu shikhulakhalabanila abanyasayebo kata okhwinamila eshifwanani tsana eshieitsahaabu eshia wasinjisia ta.
19Mana Nebukadineza nalula muno, mumonimwe nimukalukhana pe khuShadaraka, Meshaki, naAbedinego; nalachilisia omulilo kweshisambilo kumeetwe akhandi musaafu okhushila okwetsindaalo tsiosi. 20Khandi nalaka abalulu bandi abomwihelie okhuboha Shadaraka, Meshaki, naAbedinego, nokhubasukuna mushisambilo shiomulilo omululumu. 21Kho abandu abo babohwa, nibali netsingubo tsifuubila netsikanzu netsingofia tsiabwe nebiifwalo bindi biosi, nibasukunwa mushisambilo shiomulilo omululumu, mukari bwene. 22Ne okhuba lilako liomuruchi liatinyisibwa muno, nashio eshisambilo nishiyiile okhushila, tsimemu tsiomulilo tsieera abandu abo abachinga Shadaraka, Meshaki, naAbedinego. 23Abandu abo bataru, Shadaraka, Meshaki, naAbedinego, nibakwisibwa mushisambilo shiomulilo omululumu nibaboyilwe.
24Mana omuruchi Nebukadineza nachenya, nabuukha matetekhana; nareeba abakofu beshiinashie ari Shikhusukuune abandu bataru ababoyilwe mumulilo? Nibakalusia mbu Nitoto, omwami omuruchi. 25Nabakalusia ari Ne endolanga abandu bane, abalekhuule, abachendanga mumulilo mukari, nikurabatsuuniakhwo ta; ne oyo owakhane mumoni afwana shinga omwana wabanyasaye.
26Mana Nebukadineza nasita ahambi khumuliango kweshisambilo shiomulilo omululumu; naboola mbu Shadaraka, Meshaki, naAbedinego, inywe abasumba baNyasaye Ouli Ikulu Muno, rule, mwitse hano. Nabo Shadaraka, Meshaki, naAbedinego nibarula mumulilo. 27Ne abaami nabasinjilili nabakafuna nabakofu beshiina shiomuruchi nibakhung'aanaho nibalola abandu abo, shinga omulilo olwa kurabeele nobunyali bwosi khumibili chiabwe, kata liswi liemirwe chiabwe okhusambwa, kata tsingubo tsiabwe tsifuubila okhuyia, kata okhuhunya khwomulilo okhuba khubo tawe. 28Nebukadineza naboola mbu Nyasaye waShadaraka, Meshaki, naAbedinego yeetsoomibwe! Niye owaruma malaikawe nahonia abasumbabe abamwisiikanga, nibakhaya likhuwa liomuruchi, nibahaana emibili chiabwe buhaana, mbu baleshe okhukhalabanila kata okhwinamila omunyasaye yesi, habula Nyasaye wabwe yenyene. 29Kho bulaano ekhupa omulome, mbu ababuli luyia nabuli lihanga nabuli lulimi abakhaboola likhuwa liosi libii khuNyasaye waShadaraka, Meshaki, naAbedinego, balatonywe ebitonye ebitonye, tsinzu tsiabwe nitsilikululwa pe; shichila abulaho omunyasaye undi yesi ounyala okhuhonia abandu ario ta. 30Mana omuruchi niyeemekha Shadaraka, Meshaka, naAbedinego mulukhongo lwaBabeli.
Currently Selected:
Danieli 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
