Danieli 2
2
Danieli yabuula eshisina shielilooro liaNebukadineza
1Haho Nebukadineza yaloora amalooro mumuyika kwakhabili kwoburuchibwe; nanyakhana mumwoyo, nafuba tsindoolo. 2Mana omuruchi yarumana okhulanga abafumu nabobulookooli nabalakulusi nabaKalidayo, mbu babuulile omuruchi akamalooroke. Nabo nibeenjila nibasinjila imbeli womuruchi. 3Omuruchi nabasunjila mbu Endoorile lilooro, ne enyakhaane mumwoyo, okhumanya akelilooro tsana. 4AbaKalidayo tsana nibakalusia omuruchi muluSiria mbu Omwami omuruchi, oyindile obushia nobushia! Boolela abasumbabo lilooro liene, neefu khulakhumanyia eshisina. 5Omuruchi nakalusia nasunjila abaKalidayo mbu Elia emboola ndielino; mbu Nimuba nimurambuulila lilooro liene halala nende eshisina shialio ta, mulatonywa ebitonye ebitonye, tsinzu tsieenywe nitsilikululwa pe. 6Ne nimuba nimumbuulila lilooro liene halala nende eshisina ndalamuheelesia ebihaanwa namatani noluyali oiukhongo; kho mumbuulile lilooro liene halala neshisina shialio. 7Nabo nibakalusia olwakhabili, bari Omuruchi aboolele abasumbabe lilooro, neefu khulakhumanyia eshisina. 8Omuruchi nakalusia, ari Emanyile bulayi mbu mwenya okhwinyoolela obwiyangu, shichila muluutsi elia emboolile shinga olwa lili. 9Ne nimuba nimurambuulila lilooro ta, liliho lilako elala lionyene khwinywe; okhuba mukasiye amakhuwa amamayaanu akobubeeyi okhumboolelanga okhuula olwa eshise nashibe nishibirile; kho mumboolele lilooro liene, nasi nemanye mbu munyala okhumbuulila eshisina shialio. 10AbaKalidayo nibakalusia omuruchi bari Abulaho omundu mushialo shiosi pe owakhanyala okhukhola aka omuruchi yeenya; shichila abulayo omuruchi kata omwami kata owoburuchi undi yesi yesi owareeba omufumu kata owobulookooli kata omuKalidayo yesi likhuwa elifwana lirio. 11Nelikhuwa litinyu elia omuruchi yeenya; kata abulaho owakhanyala okhubuulila omuruchi, nibarali abanyasaye; ne eshimenyo shiabwe shishiliho mubandu ta.
12Khulwako, omuruchi yatiilwa oburima nalula muno, nalaka mbu abachesi bosi beBabeli bamalilanwe. 13Kho omulome kwakhupwa mbu abachesi beerwe; nibakhaaba Danieli nabashie, beerwe. 14Naye Danieli nakalusia amakhuwa kobuchesi noburechelefu khu Ariokhu omwimilisi wabasikari abalindi bomuruchi, owali narulile natsia okhwira abachesi baBabeli; 15nakalusia namusunjila Ariokhu omwimilisi womuruchi tsana ari Nishiina eshichila omulome kwomuruchi nikukhupwa matetekhana kurio? Mana Ariokhu namumanyia Danieli amakhuwa tsana. 16Kho Danieli niyeenjila, nasaba mbu omuruchi amulache eshise, mbu amumanyie omuruchi eshisina shielilooro.
17Mana Danieli natsia ebunanzuwe, naboolela abashie, banga Hanania naMishaeli naAzaria, amakhuwa ako, 18mbu basabe Nyasaye owelikulu tsimbabasi khukelibiso lino; mbu Danieli nabashie baleshe okhumalilanwa halala nabachesi bandi baBabeli. 19Mana libiso tsana nilibisulilwa Danieli mwibisulo eliomushilo. Mana Danieli namwitsoomia Nyasaye owelikulu.
20Danieli nasunga mbu
Eliira liaNyasaye liitsoomibungwe obushia nobushia,
okhuba obuchesi nobunyali nebibie.
21Neniye oukalukhasinjia ebise netsinduukho;
arusinjia abaruchi, niyeemekha abaruchi;
aheelesinjia abachesi obuchesi,
nabo abali nobumanyilisii, abameetela obumanyi.
22Abisulanga amabiso akali musi bwene;
amanyanga akali mushiilima;
obulafu bumenyanga ewa ali.
23E Nyasaye wabakuuka banje,
ekhuupila orio nikhupaaka;
niwe owambeelesia obuchesi nobunyali,
ne bulaano umanyiye ako aka khukhusabile;
okhuba okhumanyiye likhuwa liomuruchi.
24Kho Danieli niyeenjila ewaAriokhu, owa omuruchi yali nalachile okhumalilana abachesi beBabeli; natsia namusunjila ari Oreera abachesi beBabeli ta; ne umbile imbeli womuruchi, nasi ndalabuulila omuruchi eshisina shieliloorolie.
25Mana Ariokhu nayila Danieli imbeli womuruchi bwangu, namusunjila ari Ndakhanyoola omundu owomubaare baYuda, oulabuulila omuruchi eshisina shielilooro. 26Omuruchi namureeba Danieli, owalangwa mbu Beleteshazari, ari Okhanyala okhumbuulila lilooro elia ndaloora, halala nende eshisina shialio, noho? 27Danieli nakalusia omuruchi ari Abulaho omundu omuchesi yesi, kata owobulookooli, kata omufumu, kata omukhwenyi, ounyala okhubuulila omuruchi akelibiso elia omuruchi yeenya; 28nebutswa aliho Nyasaye mwikulu oubisulanga akamabiswi; neniye owamanyiye Nebukadineza akaliba mundaalo tsiolunyuma. Liloorolio, namalolelo akomumurwekwo olwa wali noli khushitali, ngakano; 29mbu iwe, omwami omuruchi, amapaaro kandi kakhwitsila mumwoyo noli khushitali, khumakhuwa akeetsa okhwikhola olunyuma; ne omwenoyo oubisulanga akamabiswi yakhumanyia akali okhwikhola. 30Nebutswa isie, libisulo lino shilimbisuliilwe khulwa obuchesi bwosi bwosi obwa endi ninabwo okhushila oundi yesi ouli mwoyo, ta; habula mbu eshisina shimanyibwe imbeli womuruchi, khandi mbu omanye amapaaro komwoyokwo.
31Omwami omuruchi, walola; mbu eshifwanani eshikhongo shieshio. Eshifwanani eshio, eshiamaani, eshing'inang'inu muno, shiasinjila imbeliwo; okhulolekha khwashio nikhuba okhwamariisia. 32Nashio eshifwanani tsana, omurwe kwashio kwali okweitsahaabu indayi, eshilifu shiashio namakhono nibili bieifeetsa, inda yashio namarango ebiomukasa, 33ebilenje biashio bieshibia, namalaarol kashio akeshibia elubeka nakelitoyi elubeka. 34Ne noshihenganga, lichina liaremwa, aharali omukhono kwomundu yesi ta, nilikhupa eshifwanani amalaaro kashio, akali akeshibia nelitoyi, nilikaaraka ebitonye ebitonye. 35Mana eshibia tsana, nelitoyi, nomukasa, neifeetsa, neitsahaabu, biosi halala nibiarakwa ebitonye ebitonye, nibikwa shinga omukhuutsi muwanyi mushimiyu; omuyeka nikubiyila, nibiranyoolekhakhwo ta; lichina liene eliakhupa eshifwanani nilikwa eshikulu eshikhongo, nishiitsula eshialo shiosi.
36Kho lilooro ndielo; ne bulaano khuboolele omuruchi eshisina shialio. 37Iwe, omwami omuruchi, oli omuruchi wabaruchi; Nyasaye owelikulu wakhuheelesia oburuchi, nobunyali, namaani, noluyali. 38Hosi hosi ewa abaana babandu bamenyanga, wabahaana mumukhonokwo, halala netsisolo etsiomubulimo namanyonyi akomwikulu, nakhukhola omuruchi wabio. Kho niwe omurwe kweitsahaabu. 39Inyumawo oburuchi bundi bulabuukha obulaleema khububwo, mana khandi oburuchi bundi, obwakhataru, obwomukasa, obulaba noburuchi khushialo shiosi pe. 40Oburuchi bwakhane nabwo bulabaho, obwamaani shinga eshibia; eshibia shiarakanga ebindu biosi nishibitubula; kho shinga eshibia eshitubulanga biosi, obwenobwo bulaaraka nibutubula burio. 41Ne shinga olwa walola amalaaro netsinzala nibili ebielitoyi liomulonji elubeka nebieshibia elubeka, nindio bulaba obwauni obwakabukhana; nebutswa bulabamwo amaani keshibia, shinga olwa walola eshibia nishitsokasibwa nelitoyi lilonje. 42Ne shinga tsinzala tsiebilenje olwa tsiali etsieshibia elubeka netsielitoyi elubeka, nolwa obwami tsana bulaba obwamaani elubeka, nibutamba amaani elubeka. 43Ne shinga olwa walola eshibia nishitsokasibwa nelitoyi lilonje, nolwa balatsokatsokana khulwa okhuteeshaninjia; ne shibalahambaana bulayi ta, shinga eshibia olwa shiratsokana obulayi nelitoyi tawe. 44Ne mundaalo tsiabaruchi abo, Nyasaye owelikulu alaraho oburuchi oburaliakamibwa, kata obwami bwabwo okhubira butsie mumakhono koluyia lundi ta; ne bulaaraka obwami obwo bwosi ebitonye ebitonye nibubulia, obwene nibusinjila mziayo; 45shinga olwa walola lichina niliremwa mushikulu, aharali omukhono kwomundu yesi ta, niliaraka eshibia tsana nomukasa nelitoyi neifeetsa neitsahaabu, ebitonye ebitonye. Nyasaye omukhongo wamanyia omuruchi amakhuwa akeetsa okhwikhola olunyuma. Lilooro liene nitoto, khandi oburimbululi bweshisina nihabwene.
46Mana omuruchi Nebukadineza niyeekhupa hasi mafumama namwinamila Danieli, nalaka mbu bamuleerele isadaka nibamutuumilia amalesi keshing'aari. 47Omuruchi namusunjila Danieli ari Toto mwene, Nyasaye weenywe niye Nyasaye wabanyasaye, nOmwami wabaruchi, nomubisuli wakamabiswi; okhuba onyalile okhubisula libiso lino. 48Omuruchi namukhulunduyia Danieli, namuheelesia ebihaanwa ebinji ebikhongo, namwemekha khulukongo lwosi lwaBabeli, namukhola omukhulundu khubachesi bosi baBabeli. 49Danieli nasaba omuruchi, naye naraho Shadaraka, Meshaki, nende Abedinego khumakhuwa kolukongo lwaBabeli; ne Danieli yatong'a mwitookho liomuruchi.
Currently Selected:
Danieli 2: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
