Abakolosai 1
1
Lishiesio
1Eyirula khuPaulo, omurume waKristo Yesu, khulwa okhwenya khwaNyasaye, nende khuTimotseo omwana weefwe. 2Yule khubatakatifu nabaana beefwe abali abasuubilwa muKristo, eKolosai.
Obukoosia bube khwinywe, nende omulembe, ebirula khuNyasaye Seefwe.
Aka Paulo yasaayila abaKristayo beKolosai
3Khumuupilanga Nyasaye Samwana Omwami weefwe Yesu Kristo orio, nikhumusaayilanga tsindaalo tsiosi; 4okhuba khwahuliile akobusuubili bweenywe muKristo Yesu, khandi akobuheeli obwa muli ninabwo khubatakatifu bosi, 5khulwa akeenako aka munaayanga, akamubiishilwa mwikulu, aka mwahulilakhwo khale, mwikhuwa liobwatotobweinjiili 6eyamwitsila. Khandinilwo olwa yitswana mushibala shiosi pe, niyama ebiamo niyiinjiha, shinga olwa yikholanga mwinywe mwesi yirio, okhurula khunyanga olwa mwahulila nimumanya obukoosia bwaNyasaye mubwatoto, 7Ne akeenako mweekakhwo khuEpafura, omusumba owashieefwe omuheelwa, ouli omukhalabani omwisiikwa waKristo khulweefwe; 8khandi niye owakhuboolela akobuheeli bweenywe muRoho.
9Niko akachila nineefwe fwesi, okhurula khunyanga olwa khwahulilakhwo, shikhukonelanga tawe okhulaama nikhumusaayila mbu mwitsusibwe obumanyi bwa ako aka yeenya, mubuchesi noburechelefu bwosi bweshiroho, 10mbumuchendenje shinga olwa kamukhoyeele, olwa muli abOmwami; nimumuchamisia mukosi, nimwama ebiamo mubuli mulimo omulayi, nimumeeta okhumumanya Nyasaye. 11Mukufuhasibwe nobunyali bwosi, amaani koluyalilwe shinga olwa kali, okhuula khubwisimilisi bwosi nobwifwili halala nokhwikhoya. 12Mumukhupile Seefwe orio, owakhunyalila okhuba abakwanile okhusanjilana khubulaame bwabatakatifu mubulafu.
Omwitsulu kwosi kwaNyasaye
13Yakhuhonia mubwami bweshiilima, nakhuhuyia nakhuleera mubwami bwOmwanawe omuheelwa; 14ne muye khunyoolela obununulwi bweefwe, nibwo obuleshelwi bwebionoono bieefwe. 15Ne niye likondo liene liaNyasaye ouralolekha ta, noweebulwa owambeli owomubulonje bwosi. 16Okhuba mumwenoyo nimwo omwa ebindu biosi bialonjelwa, mwikulu khandi mushialo, ebindu ebilolekha nende ebindu ebiralolekha ta; kata nibili ebifumbi biobwami, kata abobwami, kata aboburuchi, kata abobunyali; ebindu biosi bialongwa khululwe, nibichooma khuye. 17Yaliho ebindu biosi nibirashiabaho ta; kata ebindu biosi bihambanilanga muye. 18Khandi niye omurwe kwomubili, nikwo ikanisa; ne niye obusimishi, noweebulwa owambeli okhurula mubafu; mbu mukosi pe, ye abe owambeli. 19Okhuba Nyasaye yachama mbu omwitsulu kwosi kumenye muye; 20khandi khululwe yachama okhusaasania ebindu biosi ninaye omwene, olwa yali nakholile omulembe khulwa amabanga komusalabakwe; mbu khululwe, kata olwa biakhaba ebindu ebiomushialo, kata ebindu ebiomwikulu.
21Neenyu, abalinji khale nimwahukhana nende Nyasaye khandi abasuku mumioyo chieenywe, mubikhole bieenywe ebibii, bulaano yamusaasaniye 22mumubilikwe kweinyama, khulwa okhufwa, okhumuhaana nimuli abatakatifu, ababula eshikha kata eshiokhuhalabililwa imbeliwe ta. 23Nebutswa mukhoyile okhutsiililila mubusuubili, nimutinya khumuse nimutalila, nimurahunzukha okhurula khubunaayi bweinjiili eya mwahulila, eyeelwatswa mubulongwi bwosi hasi welikulu; nasi Paulo ndakholwa omukhalabani wayo.
Obukhalabani bwaPaulo khukanisa
24Ne bulaano ndikhoyela obusaalili bwanje khulweenywe, nasi khulwanje ninzitsusinjia mumubili kwanje akeenako akashileema khumatinyu kaKristo, khulwa omubili kukwe, nikwo ikanisa. 25Nasi ndakwa omukhalabani wayo, obusinjilili shinga olwa buli obwa ndaheebwa nende Nyasaye khulweenywe, mbu okhuusia likhuwa liaNyasaye, 26nilio libiso eliabiswa abebisoni biosi nabetsinzibulo tsiosi, ne bulaano libakalilwa abatakatifube, 27aba Nyasaye yachama okhubamanyia obuyinda bwoluyali Iwelibiso lino shinga olwa buli muBamahanga; ndielino, mbu Kristo mwinywe, eshinoko shiobunaayi bwoluyali.
28Khumurumbulanga, nikhuchesiyia buli mundu, nikhwechesia buli mundu, nobuchesi bwosi, mbu khuhaane buli mundu nali omulamba muKristo. 29Nasi siesi enyakhanilanga likhuwa elo, ninwana, obukholibwe shinga olwa buli obwi.
Currently Selected:
Abakolosai 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
