2 Yohana 1
1
Lishiesio
1Eyirula khumukofu, yule khumukhaye omulobole nende abaanabe, aba eheelanga mubwatoto; ne isie sienyene ta, habula nende bosi abamanya obwatoto, 2khulwa obwatoto obwo obumenyanga mwifwe, khandi obulabeetsanga nineefwe halala obushia nobushia. 3Obukoosia netsimbabasi nomulembe ebirula khuNyasaye Samwana khandi khuYesu Kristo Omwana waSamwana, bilabeetsanga nineefwe mubwatoto nobuheeli.
Okhumenyanga mumeebaalo kaKristo
4Esangaala muno, shichila ndanyoola abandi abokhubaanabo nibachendanga mubwatoto, shinga olwa Seefwe yakhulaka. 5Kho bulaano, omukhaye, ekhusaaya likhuwa. Shindi shinga oukhuhandiichila lilako liyia ta, habula lienelo elia khwalinji ninalio okhurula khukhuchaaka; mbu khuheelanenje. 6Obuheeli mbwobuno, mbu khuchendenje munjila yamalakoke. Lino nilio lilako liene, shinga olwa mwalihulilanga okhurula khukhuchaaka, mbu muchendelenje mulio.
7Okhuba abakaatii abanji barulile nibatsia mushialo, abareeyama shinga Yesu Kristo olwa yeetsa mumubili ta. Omukaati khandi omufukuli waKristo ngwoyo. 8Mwihenje abeene, muleshe okhufwilwa akeenako aka khwanyakhanila, habula mbu munyoole omukabo kweenywe habwene.
9Outsiililila imbeli, naramenya mumeebaalo kaKristo ta, shialikhwo nende Nyasaye tawe; ne oumenya mumeebaalo ako niye ouli nende Samwana nOmwana bombi. 10Omundu yesi naba namwitsila, ne nareetsa nameebaalo ako ta, muramwinjisia munzu kata okhumusbiesia tawe 11shichila oumushiesia asanjilana ninaye khubikholebie ebibii.
Ameshiesio akahelelesia
12Kata nindi namakhuwa amanji okhumuhandiichila, shinzenya okhukahandiika khulukaratasi nende obwino ta; ne enaayanga okhumwitsila mbu khusungane mumoni namumoni, mbu okhwikhoya khweenywe khwitsule. 13Abaana bomukhaana weenywe omulobole bakhushiesiye.
Currently Selected:
2 Yohana 1: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
