1 Timotseo 3
3
Akeenyekha khubaaskofu
1Likhuwa lino neliisiikwa, mbu omundu naba nakhaaba omulimo kwa askofu, yeenyanga omulimo omulayi. 2Niko akachila askofu abe oubula eshikha; abe omusaatsa womukhasi mulala, omwileshesii, omwitembelesii, owiyilanga habwene, ouchamanga okhwinjisia abacheni, owamanya okhwechesia; 3araba omumeesi kata owobusoolo ta, habula omuholo, ourali owamayinje kata ouheelanga amapeesa ta. 4Abe ouruka bulayi litaalalie, nabahulilisia abaanabe mubwitembelesii obulayi. 5Omundu naba nakorwa okhuruka litaalalie, alanyala arie okhulinda ikanisa yaNyasaye? 6Araba omusuubili omuyiakha butswa ta, aleshe okhuba owolukungu mana akwe mushiina shiaSetani. 7Nahalala nende ako, akhoyile okhuba oweifuma indayi mubali elwanyi, mbu aleshe okhukwa mubuchiikhwi khulwa omubero kwaSetani.
Akeenyekha khubadikoni
8Abadikoni nabo bario babe aboluyali, abarali abetsinimi tsibili ta, kata abanleesi, kata abalangushilanga inganga tawe; 9babe abahanda khumabiso kamakhuwa ako aka khusuubilanga nomwoyo omweleleshe. 10Nabo bosi bateemwe bario mbeli; mana nibaba nibabula eshikha, bakhalabane mubudikoni. 11Abeshikhasi nabo babe bario aboluyali, abarali abachiishi ta, abeeleshesii, abeesiikwa mumakhuwa kosi. 12Abadikoni babe buli mundu omusaatsa womukhasi mulala, nibaruka abaana namataala kabwe bulayi. 13Shichila ababa nibakhalabaane bulayi mubudikoni beenyoolela abeene itaracha indayi, nende itswoni mukobusuubili obuli muKristo Yesu.
Libiso lieidini yeefwe
14Ekhuhandiichila amakhuwa kano nisuubila okhwitsa ewa oli mundaalo etsili ahambikhwo; 15habula mbu nimba nishinda muno omwanye akabandu shinga olwa bakhoyile okhwiyilanga mubeinzu yaNyasaye, ne nibo ikanisa yaNyasaye oubeetsangaho mwoyo, neisiilo yobwatoto nomuse kwabwo. 16Okhuba bosi bafuchilisania mbu libiso lieidini yeefwe nelikhongo; mbu
Yamanyishila mumubili,
obulunjishibwe bwalolosilibwa muroho,
yalolwa nende abamalaika;
yeelwatswa mumahanga,
yasuubililwa mushibala,
yakulusibwa muluyali.
Currently Selected:
1 Timotseo 3: OUV
Highlight
Copy
Compare
Share
Want to have your highlights saved across all your devices? Sign up or sign in
Oluluyia Union Version © Bible Society of Kenya 1975
