Marɨko 8

Yesʉ alɨsa bandʉ bɨhʉmbɨ bɨne

(Mat 15:32-39)

1Ko bɨro ebyo muhindano mʉnene wa bandʉ mobashʉba hindana. Kʉshangwa babyaga ni bathawithe ku kalyo, Yesʉ mwabɨrɨkɨra abɨga bʉwe, n'ɨbwɨrabo athɨ: 2«Nyamafwɨra abandʉ aba bo shashi, kʉshangwa bamikala nangye hano bɨro bɨshathʉ, nabo bathakiwithe kalyo. 3Na nyamabwɨrabo nyɨthɨ bagende ewabo bʉtsɨra irya, nɨbalekʉlɨra mo nzɨra, kʉshangwa bagʉma mo kathi kabo bathathoka hale.» 4Abɨga bʉwe mobamʉshʉbɨtsya bathɨ: «Mo mbwarara mo hano, thwabona akalyo ko hayi y'eryuguthya abandʉ boshi aba?» 5Yesʉ mwabʉtsyabo athɨ: «Muwithe kʉ mikati ɨngahɨ?» Nabo mobamʉshʉbɨtsya bathɨ: «Thuwithe kʉ mikati ɨrɨnda.» 6Aho Yesʉ mwahamʉla abandʉ bikale ahishi. Honyuma kw'aho mwatsɨmba emikati ɨrɨnda eyo, mwasɨma Gongo, mwatsitsangaro n'ɨharo abɨga bʉwe bagabɨrero ko bandʉ. N'abɨga mobagabaro ko bandʉ. 7Babyaga bawithe kuthyo na kʉ thʉhere thʉke-thʉke thʉke. Yesʉ mwasɨma Gongo bʉshana n'othʉhere otho, n'ɨbwɨra abɨga bʉwe athɨ bagabetho kuthyo. 8Abandʉ boshi mobalya n'iugutha. Honyuma kw'aho abɨga mobathola-thola ebɨtse-bɨtse byashakaga, mobyotsutsya bɨthonga bɨrɨnda. 9Abandʉ bo balyaga akalyo ako babyaga bangana hofɨ bɨhʉmbɨ bɨne. Honyuma kw'aho Yesʉ mwalagabo. 10Aho n'aho Yesʉ mwashambɨra mo bwatho hagʉma n'abɨga bʉwe, na mwagenda mo kɨhʉgo kya Talimanuta.

aBafarisayo abashondya kɨmɨnyɨkalo

(Mat 16:1-4)

11aBafarisayo mobahikira Yesʉ n'ɨthanga ikubisania naye. Mobamʉlengako mw'ɨmʉshaba akolerebo kɨmɨnyɨkalo kyo kikangania kw'amaka ʉwe athoka mo lʉbʉla. 12Yesʉ mwahʉmʉlɨkana kʉtsɨbʉ mo mʉthɨma na mwanegena athɨ: «Bʉshana na ki imwe bandʉ b'olʉgero lʉno omushondya ɨshʉnga kɨmɨnyɨkalo? Kwenene enyɨbabwɨra, muthikangibwe kɨmɨnyɨkalo n'ekɨgʉma!»

13Honyuma kw'aho, mwamikabo na mwashambɨra kandɨ mo bwatho, na mwashabʉkɨra ko ʉndɨ mwishirya w'engetsɨ.

Tsatsʉ y'aBafarisayo na ya Herote

(Mat 16:5-12)

14Abɨga ba Yesʉ babyaga nɨbamɨbɨrɨrwa ɨheka emikati, he babyaga nibawithe ku mukati mʉgʉma mʉsha mo bwatho. 15Yesʉ mwahamʉlabo athɨ: «Ohe, muyitheye ko tsatsʉ y'aBafarisayo n'eya Herote.» 16Abɨga mobathanga ɨbwɨrana bathɨ: «Anegena athya bʉshana thuthawithe ku mikati.» 17Yesʉ mwamɨnya ebɨnwa bagenda abanegena, aho mwabʉtsyabo athɨ: «Bʉshana na ki omukubisania bʉshana n'erɨbʉsha emikati? Muthetsi mwamɨnya kʉtse ɨkɨngʉlwako bwenge? Emɨthɨma enyu ɨkɨnalɨ mɨtsɨbʉ? 18Muwithe mesho, hewethuwe muthalolire? Muwithe mathwi, hewethuwe mʉthalɨ omwonvwa? Muthakibukire 19mo ndambi nyatsitsangaga emikati ithano n'ɨrɨsa abandʉ bɨhʉmbɨ bɨthano? Mo ndambi eyo momwotsutsya bɨthonga bɨngahɨ by'ebɨtse-bɨtse by'emikati?» Mobashubya bathɨ: «Ikumi na bɨbɨrɨ.» 20Naye mwashʉba bʉtsyabo athɨ: «Na mo ndambi nyatsitsangaga emikati ɨrɨnda n'ɨrɨsa bandʉ bɨhʉmbɨ bɨne, momwotsutsya bɨthonga bɨngahɨ by'ebɨtse-bɨtse by'emikati?» Mobamʉshʉbɨtsya bathɨ: «Bɨrɨnda.» 21Aho Yesʉ mwabʉtsyabo athɨ: «Muthetsi mwamɨnya kɨndʉ?»

Yesʉ alamya mbumi mo muyi w'iBetesaita

22Yesʉ n'abɨga bʉwe mobahika mo muyi w'iBetesaita. Eyo bandʉ bagʉma mobalethera Yesʉ yo mʉndʉ mʉgʉma mbumi n'ɨmʉshaba amʉkoleko. 23Yesʉ mwatsɨmba okʉboko kw'embumi eyo n'ɨmʉthwala embʉga y'omʉrongo. Yesʉ mwatsɨra mathandɨ ko mesho w'omʉndʉ oyo, n'imuhirako eminwe yɨwe, mwamʉbʉtsya athɨ: «Wanamashʉnga kɨndʉ?» 24Embumi moyashʉmba amesho waro n'ɨnegena yɨthɨ: «Nyamashʉnga bandʉ abagenda, hewethuwe abashʉngɨka nga mɨthɨ.» 25Yesʉ mwashʉba kola ko mesho w'embumi eyo, naro moyalola kʉbʉya. Amesho waro mwalama, n'ɨlola ko bɨndʉ byoshi ko kʉbʉya-kʉbʉya. 26Honyuma kw'aho Yesʉ mwamʉbwɨra athɨ ashʉbe ewe, n'ɨmʉhamʉla athɨ athashʉbaga mo mʉrongo oyo.

Petero amɨnyɨsa ko Yesʉ nɨ Kirisito

(Mat 16:13-20; Luk 9:18-21)

27Yesʉ n'abɨga bʉwe mobagenda ko mʉnda w'emɨrongo yo yabyaga hofɨ n'omuyi w'iKaisaria Filipi. Babere banalɨ omo nzɨra, mwabʉtsyabo athɨ: «Abandʉ abanegena bathɨ ingye nyɨrɨ ndɨ?» 28Nabo mobamʉshʉbɨtsya bathɨ: «Bagʉma abanegena bathɨ ɨwe ʉlɨ Yoani Mubatisya, n'abandɨ abanegena bathɨ ɨwe ʉlɨ Elia, n'abandɨ abanegena bathɨ ɨwe ʉlɨ mʉgʉma w'oko bamɨnyeretsɨ.»

29Aho Yesʉ mwabʉtsyabo athɨ: «Nemwe omʉnegena mʉthɨ ingye nyɨrɨ ndɨ?» Petero mwamʉshʉbɨtsya athɨ: «Ɨwe nɨ Kirisito.» 30Nɨmo Yesʉ ahamʉlabo athɨ bathanalinda babwɨra mʉndʉ y'ekɨnwa ekyo.

Yesʉ afʉla omwatsɨ w'olʉholo n'erilubuka lɨwe

(Mat 16:21-28; Luk 9:22-27)

31Honyuma kw'aho Yesʉ mwathanga ɨkangɨrɨtsya abɨga bʉwe athɨ: «Bɨtholere oMʉgala w'oMʉndʉ agatsɨbwe n'ɨthɨndwa n'abimanitsi b'abandʉ, n'aBaheri Bakʉlʉ hagʉma n'aBakangɨrɨtsya b'oMʉgomba. Andithwa n'oko kɨro ky'akashathʉ honyuma w'olʉholo lʉwe andalubuka.» 32Agenda abwɨrabo ebɨnwa ebyo kʉbʉya-kʉbʉya. Aho Petero mwatsɨmba Yesʉ n'ɨyɨhɨgʉla naye n'ɨthanga ɨmʉkemera. 33Hewethuwe Yesʉ mwabɨndʉkɨra abɨga bʉwe n'ɨkemera Petero n'ɨnegena athɨ: «Thoka hofɨ nangye hano ɨwe Sitani, kʉshangwa emɨganɨtsye awe ɨthalɨ ya Gongo hewethuwe nɨ ya bandʉ.»

Mʉhanda w'ɨkwama Yesʉ

34Honyuma kw'aho, Yesʉ mwabɨrɨkɨra omuhindano w'abandʉ hagʉma n'abɨga bʉwe, n'ɨbwɨrabo athɨ: «Omʉndʉ amashasha ɨnyɨkwama, athayɨtsomanaga yowene, hewethuwe ayɨsɨnge ɨheka omʉsalaba ʉwe n'ɨnyɨkwama. 35Kʉshangwa omʉndʉ yo ushondya ilamya obʉyɨngo bʉwe, andahetsyabo, hewethuwe oyo wandahetsya obʉyɨngo bʉwe bʉshana nangye na bʉshana n'eNgʉlʉ Mbʉya, andalamyabo. 36Nɨ ndundi ehɨ ko mʉndʉ erɨbona obushoki boshi bw'ekɨhʉgo, hewethuwe nɨahetsya obʉyɨngo bʉwe? 37Hathalɨ kɨndʉ kyoshi-kyoshi kyo mʉndʉ angakotsya ɨhana bʉshana ashabʉle obʉyɨngo bʉwe.»

38Bʉshana n'ekyo, obʉlɨ mʉndʉ yo ʉnyɨfwɨra shoni, n'ɨfwɨra amakangɨrɨtsya aye wo shoni mo kathi k'abandʉ b'olʉgero lʉno, olo luthawithe iyinihirwa na lʉshɨngɨtsɨ embere sa Gongo, oMʉgala w'oMʉndʉ andamʉfwɨra shoni kuthyo, andabya ahika hagʉma n'abamalaɨka babuyirire, mo lʉkengerwa lw'Ishe.

Currently Selected:

Marɨko 8: ver

Highlight

Copy