Mariko 5
5
Yesu alamya mundu yaundirwe na bixwatsi
(Mat 8:28-34; Luk 8:26-39)
1Inyuma kwaho, Yesu na bemitsa bewe niabanahika kwa undi mushirya wa ngetsi ye Ngalilaya, mwa kihuo kya Bakerasi.#5:1 Abandu bo balukwa «Bakerasi» hano, Matayo alukabo mbu «Baketari» Soma Matayo 8:28. 2Yesu abere atenga mwa bwato, mo kashangi umo, mundu muuma yabaa atenga kwa masinda ni aundirwe na bixwatsi, nianakorana naye. 3Amundu uyo abaa anaikala kwa masinda, ni hataba na mundu woshewoshe yabaa angakocha imumina mu bulebule. 4Ngendo nyingi amilundi yiwe yabaa inasibikwa mu byuma, na saminwe siwe mu bulebule. Wetuwe ni erechichanga amabulebule na byuma ibyo. Habaa hataba na mundu woshewoshe yabaa angamukocha. 5Akashangi koshe, kiro na mwishi, abaa anatubatuba kwa masinda na kwa bitwa ni erelaka kutsibu neibabatsanga mu mabale. 6Abere axunga Yesu hale ku iye, nianaihuta neshinga amapfi mwa mbere siwe, 7nelaka kutsibu mbu: «Yesu Muala wa Ongo Nina mu Mbingu, aunixondakoki? Anikuhema, mwetsina ra Ongo, utaninubyaa!» 8Akixwatsi kyaneenaa kityo kubwishi Yesu abaa akemerakyo mbu: «We kixwatsi, tenga mwa mundu uyu!»
9Yesu nianabutsakyo mbu: «Aretsina rawe wende?» Niakinamuxubyitsa mbu: «Aretsina rani ngye Kichiri, kubwishi itwe tuli bangi.» 10Akixwatsi niakinaitondoola ku Yesu mbu atahentsaabyo mwa kihuo umo.
11Aho, hofi na kitwa, habaa kihyo kinene kya ngulube ni asikererako. 12Abixwatsi niabinaitondoola ku Yesu mbu: «Utulike tuingire mwa ngulube siraa.» 13Yesu nianahato rubu. Abixwatsi niabinatenga mwa mundu uyo, neingira mwa ngulube. Akihyo kyoshe kya sangulube kyabaa akishembashemba bihumbi bibiri niakinatenga kwa kitwa neiuma mwa ngetsi, nato niasinatsika.
14Abasumba ba sangulube ito baenda chuba ipfula amwatsi mwa mulungu na mwa mitsi. Abandu niabanahika kwebula mbu baxunge ku kyokyametsuka. 15Babere bamehika hofi ne Yesu, niabanaxunga amundu yabaa aundirwe na bixwatsi ni aikere, niaimbere kushe, ni amefulukya abwenge buwe. Niabanaubaha. 16Bobaxungaa ku byobyametsuka, niabanapfulirao abandu byobyahikiraa amundu yabaa aundirwe na bixwatsi na byobyahikiraa asangulube.
17Niyo abandu batangira iitondoola ku Yesu mbu atenge mwa kihuo kyabo.
18Yesu abere ali yaurukira mwa bwato, amundu yabaa aundirwe na bixwatsi nianaitondoola kuye mbu aende kuuma naye. 19Wetuwe Yesu atamutsiyira. Nianamubwira mbu: «Enda kwa wenyu, mwa kipfunga kyawe, pfulirabo abyoshe byo Ninakuwetu amekukolera na kwakupfiraa bwoncho.» 20Amundu uyo nianaenda, nianatangira ipfula abyoshe byo Yesu amukoleraa mwa kihuo kye «Ndekapoli#5:20 Ndekapoli Ni bula mbu kihuo kya milungu ikumi.». Na bandu boshe bobamuxungaa niabanashishala kutsibu.
Yesu alamya mwali wa Yairo
(Mat 9:18-26; Luk 8:40-56)
21Yesu nianashabuka kwa undi mushirya wa ngetsi ye Ngalilaya mu bwato. Abere ali kwa musike wa ngetsi, bandu bangi niabanabuanana hofi naye. 22Mukulukulu muuma wa mwa hekalu yalukwa mbu ye Yairo nianahika. Abere axunga ku Yesu nianapfukama mwa mbere siwe. 23Nianaitondoola kuye mbu: «Mwali wani mulere ali ku lwepfa. Anikuhema uwiche kasa, umuhireko asaminwe sawe, nge alama nebaho!»
24Yesu nianaenda kuuma naye. Mubuanano wa bandu bangi nianamukulikira nemupfundeeretsa. 25Na mubo ni muli mukatsi muuma ni amebanda myaka ikumi nebiri ni alwere bukoni bwehetsa shiama. 26Amukatsi uyu abaa amenuba kutsibu kweendera banganga bangi nehetsa bitwe bingi. Wetuwe atakocha ilama, na bukoni buiongerera kutsibu. 27Amukatsi uyo abere ameumpfa amwatsi kuluenda Yesu, nianaingira mwa kati ka mubuanano wa bandu ira nyuma ku Yesu, nepfula kwa lukimba luwe, 28kubwishi abaa ereibubukya mbu: «Nikenepfulaho kwa lukimba lwa Yesu, ni nikalama.» 29Abere anapfulaho kwa lukimba lwa Yesu, mo kashangi umoho, abukoni buwe bwa rehetsa ashiama niabunachikira, nianaiumpfa mwa mubiri uwe kwamelama. 30Na mo kashangi umoho, Yesu nianakengula kwa maala mewe mamekola mulimo. Nianakebera mwa kati ka mubuanano nebutsa mbu: «Inde yamepfula kwa lukimba lwani?» 31Abemitsa bewe niabanamuxubyitsa mbu: «Utatsene kwa bandu abakupfundeeretsa? Ungabutsa ute kwinde yamekupfulako?»
32Wetuwe Yesu nianalola kwa minda yoshe kwebula mbu axunge ku yashamupfulako. 33Amukatsi uyo nianaubaha netangira ititimana, kubwishi ni amekengula abyoshe byobyamemuhikira. Niyo ahika nepfukama mwa mbere sa Yesu nemubwira akuli yoshe. 34Yesu nianamubwira mbu: «Mwali wani, abwimire bwawe bwamekulamya. Iendere mu buholo, abukoni bwawe bwamelama.»
35Yesu abere atatsakinda ineena abinwa ibyo, bandu bauma niabanahika ni abatenga ira mwa Yairo amukulukulu wa sinakoki, neneena mbu: «Mwali wawe amepfa, utakinubyaa amwiyisa.» 36Wetuwe Yesu atalaa kwa binwa uko, nianabwira amukulukulu wa sinakoki uyo mbu: «Utaubahaa, unaimiriraeho.»
37Yesu atatsiya mbu mundu woshewoshe amuhereketse, ali ate Petero, ne Yakobo, ne Yohana, muala wabo Yakobo. 38Babere bahika ha mwa Yairo, Yesu nianashinganaho burunga bungi, abandu ni abalira nelaka kutsibu. 39Nianaingira mwa nyumba nebwirabo mbu: «Amuira burunga bungi nelira kubwishi bwaki? Amwana atapfire, wetuwe anaonchireho!» 40Niabanatangira imushekenyula. Niyo Yesu ahulukya abandu boshe ha mbuwa, nianatsimba ababuti ba mwana uyo kuuma na bemitsa bewe bashatu, niabanaingira mwa kyumba kya mwana abaa alimo. 41Yesu nianatsimba amwana kwa kuboko, nianamubwira mbu: «Talita kumu, ni bula mbu: ‹Mwananyere, anikubwira mbu batuka!›»
42Mo kashangi umoho, amwananyere nianabatuka netangira iiendera. Abaa na miaka ikumi nebiri. Abandu niabanashishala kwexunga kwa kinwa uko. 43Wetuwe Yesu nianahangirabo mbu batapfulirao mundu woshewoshe. Inyuma kwaho nianabwirabo mbu bahe amwana uyo yo bilyo.
Currently Selected:
Mariko 5: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
