Mariko 4
4
Amushinga wa mubibi
(Mat 13:1-9; Luk 8:4-8)
1Yesu nianaxuba itangira iiyisa kwa musike wa ngetsi ye Ngalilaya. Mubuanano munene wa bandu nianamutsungulako. Kubwishi bwekyo, nianaurukira mu bwato bobwabaa buli kwa ngetsi, na bandu baimana kwa musike wa ngetsi. 2Yesu nianaiyisabo binwa bingi mu mishinga. Nianabwirabo mbu: 3«Muumpfe! Lwire luuma, mundu muuma nianaya ibiba mbuto mwa ixwa liwe. 4Abere ali yabiba asambuto ito, mbuto siuma sitoera kwa musike wa nchira, asanyonyi sihika nelyato. 5Na Sindi sitoera hohali mabale, hohatali mutaka mungi. Asambuto ito sixuka chuba, kubwishi habaa hatali mutaka mungi, 6wetuwe aretsuba rabere rakola, niasinauma kubwishi amilya yato ni itasimikire mwa mutaka. 7Na sindi sitoera mu mahwa. Amahwa ayo maxuka nepfundeeretsato, nato sifundwa ihetako bipfuma. 8Wetuwe sindi mbuto sitoera ku mutaka wa buinu. Sixuka, nehetako bipfuma, siuma sihetako makumi ashatu, sindi sihetako kiratu, na sindi iyana.» 9Inyuma kwaho, Yesu niananeena mbu: «Yawete matwi meumpfa, aumpfe!»
Yesu aiyisa mu mishinga
(Mat 13:10-17; Luk 8:9-10)
10Inyuma kwaho, Yesu abere ali yewene, abemitsa bewe ikumi na babiri, kuuma na mubuanano wa bandu wabaa ali hofi naye niabanamubutsa mbu aanulirebo ku amishinga iyo ibwire. 11Yesu nianaxubitsabo mbu: «Imwe muherwe xumo yaremenya abinwa byo bibishirwe bya Bwami bwa Ongo, wetuwe abandi bandu bobatali kuuma nemwe, abaumpfa abinwa byoshe byoniiyisabo mu mishinga, 12kwebula mbu:
‹Beresindera,
wetuwe baterelola,
berehulikya, wetuwe batereumpfa,
kwebula mbu batabindukiraa Ongo
neshashirwa.›#4:12 neshashirwa. Soma Isaya 6:9-10. »
Yesu aanulira amushinga wa mubibi
13Niyo Yesu abwirabo kandi mbu: «Muli mutamenyire amushinga uyu, ni mukamenya aindi mishinga mute? 14Amubibi anabiba Kinwa kya Ongo. 15Bandu bauma banaikiritsa aKinwa ikyo ngakuno kwa sambuto sosatoeraa kwa musike wa nchira, wetuwe bamekinda iumpfakyo, Shitani ni ahika ni atengya kyokyabyalwaa mubo. 16Amutaka wa mabale, ha sambuto satoeraa, hashushene na bandu bobanaumpfa aKinwa kya Ongo, ni baikiritsakyo mu lumoo. 17Wetuwe ni kitibe na milya mwa miete yabo, ni baikiritsakyo mu kashangi kake. Mwa kashangi aminubo na myereko yahikirabo kubwishi bwa Kinwa kya Ongo, ni basiakyo chuba. 18Amutaka wa mahwa, ha sambuto satoeraa, hashushanyibwe na bobanaumpfa aKinwa kya Ongo, 19wetuwe aminubo ya kianiro kino, na rexumira abitwe, na tundi tulabwa twalwawelwawe twameingira mwa mitima yabo, ni twapfundeeretsa aKinwa ikyo kyokiri mwa myete yabo, nehangirakyo kwehetako bipfuma. 20Na mutaka wa buinu, wa byalwaamo asambuto, ashushanyibwe na bandu bobanaumpfa aKinwa kya Ongo, neikiritsakyo. Nabo ni baba na bipfuma. Bauma bipfuma makumi ashatu, na bandi kiratu, na bandi iyana.»
Amushinga wa retala na nengo
(Luk 8:16-18)
21Inyuma kwaho Yesu nianabwirabo mbu: «Mbeni banawakya itala kwepfunikiraro mu kitonga neri kwehiraro mweshishi wa ngyingo! Mbeni batahanikaro ku kahango! 22Batyoho, hatali kyoshekyoshe kyokibishirwe, kyokitendemenyibwa, neri hate nama yosheyoshe yoitendexwikulwa kyenene. 23Yawete matwi meumpfa, aumpfe!»
24Yesu nianaxuba ibwirabo mbu: «Munerekohya kushe kwa binwa byomuhulikya! Ongo endebalengera mwa nengo yomunerelengeramo abandi bandu, neongerera kutsibu. 25Kubwishi yawete ku kindu endeongererwa kindi, wetuwe yatawete ku kindu, endenyawa na kairembire iba nako.»
Mushinga wa mbuto sosiixukira
26Yesu niananeena kandi mbu: «Talola kwa Bwami bwa Ongo bushushene na mundu muuma yabyalaa mbuto mwexwa liwe. 27Kintsi lwire abaa anereonchira, nesisimuka. Na mwa kashangi umo asambuto ni serexuka neera, wetuwe ateremenya kwa sambuto asixuka. 28Amutaka wonawene waxukya amyaka, abiti kasa, inyuma kwaho abikumba na ngano yoyiera kwa bikumba. 29Mwa mango angano yaera, amundu ni aya ichayo kubwishi ni kianiro kyeshayo.»
Amushinga wa kaheke ka haratali
(Mat 13:31-32; Luk 13:18-19)
30Yesu nianaxuba ineena mbu: «Tushushanye aBwami bwa Ongo naki? Neri tulinganyebo na uhe mushinga? 31Bushushire kaheke ka haratali. Kanaira kaxolekwa, ni kaheke kake kutsibu ilengya asindi mbeke soshe sa kwa kihuo. 32Wetuwe kameotola ixolekwa, ni kaheta kutsibu ilengya asindi mbuto soshe. Ni kwaba na ndabi nyingi, sinabe na sanyonyi sa mwa kyanya ni sahika nehimba asanyutu sato mwa kipfutsa kya sandabi sao.»
33Yesu abaa ereiyisa abandu mu mishinga mingi, ngakuno kwa abandu abaumpfa. 34Ataneenaa nabo butsira mushinga, wetuwe mwa mango ali kuuma na bemitsa bewe bonabene, ni ereanulirabo abindu byoshe.
Yesu atsitsa amuhusi
(Mat 8:23-27; Luk 8:22-25)
35Lwabere lwahara luoloolo lwa lwire ulo, Yesu nianabwira abemitsa bewe mbu: «Tushabukire kwa undi mushirya wa ngetsi.»
36Abemitsa niabanalaa amubuanano wa bandu, niabaurukira mwa bwato bo Yesu abaa alimo, neenda kuuma naye. Na mandi mato mamukulikira. 37Muhusi mutsibu nianatangira kwa ngetsi, amechi niamanaiumanga mwa bwato, na bwato niabunatangira iuchula mechi. 38Wetuwe Yesu ni aonchire ira nyuma wa bwato ni asheemere ku musheemero. Abemitsa bewe niabanamusisimula nemubwira mbu: «Mwiyisa, utalaire kwepfa retu?» 39Yesu nianasisimuka, nianakemera amuhusi nebwira angetsi mbu: «Tsira! Hehera!»
Amuhusi nianatsira, niakunaba muhehero. 40Inyuma kwaho Yesu nianabwira abemitsa bewe mbu: «Amuubaha kubwishi bwaki? Mutatsamwaba na bwimire ihikira tsene?»
41Wetuwe niabanaubaha kutsibu, niabanatangira ibutsabutsanya mbu: «Munduki uyu, anabe na muhusi na ngetsi abimuumpfira?»
Currently Selected:
Mariko 4: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
