Mariko 6
6
Becha i Nasareti batinda iimirira Yesu
(Mat 13:53-58; Luk 4:16-30)
1Niyo Yesu atenga iyo, nianaya mwa mulungu uwe wauxukiraamo#6:1 Mulungu uwe wa uxukiraamoi Nasareti. Matayo 13:54; Luka 4:16.. Na bemitsa bewe nabo niabanamukulikira. 2Alwire lwa Sabato lwabere lwaeraho, nianatangira iiyisa mwa sinakoki. Bandu bangi niabanamuumpfiritsa, niabanashishala kutsibu, niabanabutsabutsanya mbu: «Uyu atengyitse abinwa byoshe ibi hai? Buteateanya buli bute ubu bwa habwaa? Mu maalaki mwakola atushingishiro tuli ngakuno utu?» 3Mbeni uyu ate amuseremara, muala wa Mariya, mualabo Yakobo, ne Yose, ne Yuta ne Simoni! Na bali babo, mbeni batali mwa kati ketu! Na kubwishi bwekyo batakocha imwimirira. 4Wetuwe Yesu nianabwirabo mbu: «Amutahwa anapfibwa xoni ahoshe hakatsuka, wetuwe kwawaboho, mwa kati ka banyakyabo, na mwa kipfunga kiweho mwatanapfibwa xoni.» 5Kubwishi bwekyo Yesu atakocha ikola kashingishiro koshekoshe iyo, liri lite aretereka asaminwe siwe ku bakoni bauma nelamyabo. 6Naye nianashishala kutsibu kubwishi bwaretinda iimirira ra bandu abo.
Yesu alika abemitsa bewe
(Mat 10:5-15; Luk 9:1-16)
Inyuma kwaho, Yesu nianatamba mwa mitsi ya mwa mbambambamba se Nasareti, ni aiyisa abandu. 7Nianabirangira abemitsa bewe ikumi na babiri, nianatangira ilikabo babiri babiri, nehabo maala mehentsa abixwatsi. 8Nianakalihyabo mbu: «Mwa luendo lwenyu, mutereheka kindu kyoshekyoshe iri ite ngóma ho. Mutereheka mbikya, neri shaho, neri faranga mwa mikoba yenyu. 9Munereimbala bilyato, wetuwe ni mutiimbale ngimba ibiri.» 10Nianabwirabo kandi mbu: «Kintsi hobakenderebakokera mwa manyumba, ni mwaikalamo ihikira homukendetengera iyo. 11Na kintsi ha bandu benderetinda ibakokera nebaumpfira, ni mwatenga aho, nekunguta amupfupfu wa kwa bishando byenyu. Akinwa ikyo kyendeba kaliho kubo.»
12Niyo abemitsa baenda, ni abahubiri abandu mbu bahingye amiberere yabo mibi. 13Niabanahentsa bixwatsi bingi, niabanahaka mapfuta ku bakoni bangi nelamyabo.
Abandu abaibutsiritsa ngakuno Yesu yende
(Mat 14:1-12; Luk 9:7-9)
14Mwami Herote nianaumpfa amwatsi wa Yesu, kubwishi aretsina liwe ni liire ngulu ahoshe. Bandu bauma berebula mbu: «Uyu ye Yohana Murubiki yamepfuka! Kyokituma aba na maala mekola tushingishiro.» 15Wetuwe abandi berebula mbu: «Uyu ye mutahwa Eliya.» Na bandi mbu: «Iye mutahwa ngakuno muuma wa batahwa ba kwa mira.»
Yohana achibwa amutwe
(Mat 14:3-12; Luk 3:19-20)
16Wetuwe Herote abere aumpfa amyatsi iyo, nianabula mbu: «Yohana Murubiki yonabulaa mbu achibwe amutwe yamepfuka!» 17Herote yewene yakalihyaa mbu Yohana atsimbwe abe nehirwa mwa nyumba ya muliki. Lwabaa lutyo kubwishi Herote ni amehikya Herotiya, muka Firipo, muala wabo. 18Yohana abaa ni amebwira Herote ku atalirene ihikya muka muala wabo.
19Kubwishi bwekyo Herotiya nianabikira Yohana yo muxona nexonda imwita, wetuwe atakocha kubwishi bwa Herote. 20Herote abaa aubahire Yohana, kubwishi ni echi ku Yohana mundu atunganene na kandi mundu akomire. Kubwishi bwekyo nianamulanga. Abaa atsiyire imuhulikya, na kiro mbu abaa anairirikana kutsibu ali aumpfa kwashambala naye.
21Lwire luuma Herotiya nianabonekya nchira yeita Yohana. Na nchira iyo yabaa ni areubuka alwire lwa rebutwa ra Herote, mwa mango akolaa alinye ali yalalika abemanitsi ba mirimo ya kihuo, na bakulukulu ba basura na bakulukulu be Ngalilaya. 22Mwali wa Herotiya nianaingira mwa nyumba ya linye. Nianatsina ihikira luero lwemoya Herote na bobalalikwaa. Niyo mwami Herote abwira amwananyere uyo mbu: «Uniheme kindu kyoshekyoshe kyouxonda, nani nikakuhakyo.» 23Inyuma kwaho nianalahitsa mbu: «Nikakuha kindu kyoshekyoshe kyoukanihema, na kiro kyaba na kiche kya kwa bwami bwani.» 24Amwananyere uyo, nianahuluka neya ibutsa nina mbu: «Nihemeki?» Nina nianamuxubyitsa mbu: «Hema amutwe wa Yohana Murubiki.» 25Mu kashalimo amwananyere uyo, nianafuluka chuba mwa mbere sa mwami nemuhema mbu: «Anixonda mbu unihe tsenetsene amutwe wa Yohana Murubiki kwa mbale kuno.»
26Amwami nianayongwa kutsibu. Wetuwe kubwishi bwarelahitsa liwe mwa mbere sa bandu balalikaa, ni atangakimutindira. 27Niyo amwami alika muuma mwa basura balangi bewe nemubwira mbu aende alete amutwe wa Yohana Murubiki. Amusura nianaenda mwa nyumba ya muliki kwecha amutwe wa Yohana. 28Nianaletao ku mbale. Nianahao amwananyere uyo, naye nianahao nina. 29Mwa mango abemitsa ba Yohana baumpfaa amwatsi uyo, niabanaya ibinga andundwe ya Yohana netayo mu isinda.
Yesu auutya balume bihumbi bitano
(Mat 14:13-21; Luk 9:10-17; Yoh 6:1-14)
30Mwa mango asandumwa safulukaa ho Yesu ali, niasinamutondoolera abinwa byoshe byobakolaa na byoshe byobaiyisaa. 31Abandu bobabaa abawicha na bobaenda babaa bangi kutsibu, anabe iye na bemitsa bewe bataata kashangi kelya. Kubwishi bwekyo nianabwira abemitsa bewe mbu: «Twenabene tuende ho hatali bandu nge mwatamuka kake.» 32Niabanaenda bonabene mwa bwato hohatali bandu.
33Wetuwe bandu bangi bobaxungaabo kwabaenda, niabanamenyabo. Kubatyo abandu niabanatenga mwa mitsi yoshe mu bishando, niabanaxondolerabo yobabaa abaya. 34Yesu abere atenga mwa bwato, nianaxunga mubuanano munene wa bandu, nianapfirabo bwoncho, kubwishi ni bali ngakuno mbuli sitawete musumba. Ni yatangira iiyisabo binwa bingi. 35lwabere lwahara luoloolo, abemitsa ba Yesu niabanamuhikira nemubwira mbu: «Hano bweru, na tsene lwahara luoloolo. 36Laa abandu aba nge baya iiulira bilyo mwa bihya na mwa mitsi ya mwa misike.»
37Yesu nianaxubyitsabo mbu: «Imwe mwenabene muhebo bilyo.» Wetuwe niabanamubutsa mbu: «Auxonda mbu tuende yatuule mikati ya tinari maana mabiri nge twahabo balye?»#6:37 Abichere ibi, abilukwa mbu: «Tinari». Atinari lwabaa lufaranga lwepfuha mundu yamekola mubitsi muuma. Ni bula mbu amaana mabiri ma safaranga ito, sabaa faranga nyingi kutsibu.
38Yesu nianaxubyitsabo mbu: «Muwete ku mikati ingahe? Mutange mwa lola kasa.» Babere bameotola imenya ko ingana, niabanamubwira mbu: «Tunaweteho ku mikati itano na fi ibiri.»
39Niyo Yesu akalihya abemitsa bewe mbu babwire abandu baikale kwa biti hashi mu bitumo bya lwawelwawe. 40Niabanaikala mu bitumo bya bandu iana iana, na makumi atano atano. 41Inyuma kwaho, Yesu nianatsimba amikati itano iyo na safi ibiri, nianalalamira mu mbingu, nianasima Ongo. Nianacha mwa mikati iyo, nianahayo abemitsa bewe kuuma na safi ibiri kweabirato kwa bandu boshe. 42Aboshe niabanalya newuuta. 43Inyuma kwaho, abemitsa niabanatololera abiche bya mikati na bya safi byobafundwaa, bauchutsa bitonga ikumi na bibiri. 44Amuancho wa balume bobalyaaho kwa bilyo, abaa bihumbi bitano.
Yesu atandaira kwa mechi
(Mat 14:22-33; Yoh 6:15-21)
45Mo kashangi umoho, Yesu nianakalihya abemitsa bewe mbu bauruke mwa bwato, nemuxondolera kwa undi mwishirya wa ngetsi ye Ngalilaya, kweerekera amulungu we Betesaita. Mo kishangi umo ashibaa ni alaa amubuanano wa bandu. 46Abere amelaabo nianaya ihema kwa kitwa. 47Bwabere bwahara buoloba, abwato bwabaa mwa kati ka ngetsi, ne Yesu ni ashibire yewene kwa musike wa ngetsi. 48Nianaxunga ko abemitsa bewe abapfuama mu minubo kubwishi amuhusi nierefulukyabo ira nyuma. Bwabere bwaxonda ikya, Yesu nianakulikirabo ni atandaira kwa mechi ma ngetsi, abaa axonda italukabo. 49Nabo babere bamuxunga ali yatandaira kwa mechi ma ngetsi, niabanaanikira mbu mutsimu. Niabanatangira ilaka, 50kubwishi aboshe bamuxungaa, neubaha kutsibu. Wetuwe mo kashangi umoho, Yesu niananeena nabo mbu: «Muisimikiritse, ingye uno! Mutaubahaa!» 51Inyuma kwaho nianauruka mwa bwato bobabaamo, na muhusi nianachikira. Kwikyo, abemitsa niabanashishala kutsibu, 52kubwishi batamenyaa kwakashingishiro ka mikati kabwire, kureba amyete yabo yabaa mitsibu.
Yesu alamya bakoni bangi i Ngenesareti
(Mat 14:34-36)
53Babere bashabuka angetsi, niabanahika mwa kihuo kye Ngenesareti, niabanasheeka abwato kwa musike wa ngetsi. 54Babere batenga mwa bwato, mu kashalimo abandu niabanakengula Yesu. 55Niabanaenda chuba, ni abatsuka mwa kihuo kyoshe ikyo, niabanatangira imuletera abakoni, ni bahetwe ku mindara, niabanaendera Yesu ahoshe hobaumpfaa ku hali. 56Na kintsi ho Yesu ayaa, mwa milungu, na mwa mitsi, neri mwa bihya, abandu berehira abakoni mwa mbua sa mibuanano, neitondoola kwiye mbu alikebo bapfule kwa mupfungo wa lukimba luwe. Na boshe bobapfulaa kulo balamaa.
Currently Selected:
Mariko 6: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
