Mariko 3
3
Yesu alamya mukoni wa makonongola mu lwire lwa Sabato
(Mat 12:9-14; Luk 6:6-11)
1Inyuma kwaho, Yesu nianaxuba iingira mwa sinakoki. Nomo mwabaa mundu muuma wa makonongola mwa minwe. 2aBafarisayo bobabaa bali umo, niabanasita Yesu yo mesha kutsibu kwemenya ngakuno akalamya amundu uyo mwa lwire lwa Sabato, kubwishi babaa ni abamuxondako kinwa kyemusongera. 3Yesu nianabwira amundu uyo mbu: «Batuka uimane ha katikati ka bandu.» 4Niyo abutsa abandu bobabaa bali aho mbu: «Mbeni aMuomba atuhere rubu lwekola bibuya neri ikola bibi mu lwire lwa Sabato? Ilamya mundu neri imwita? Wetuwe hataba mundu yaneena kinwa kyoshekyoshe.» 5Yesu nianasitabo amesha mu butsibuke kubwishi bwa myete yabo mitsibu. Nianabwira amundu uyo mbu: «Lambula akuboko kwawe.» Nianalambula akuboko, nialinalama. 6aBafarisayo niabanahuluka mwa sinakoki neya isimola na kikanga kya Herote kwekola nama yeita Yesu.
Bandu bangi bahikira Yesu
7Yesu na bemitsa bewe niabanaenda bonabene kwa musike wa ngetsi ye Ngalilaya. Na mubuanano munene wa bandu nianamukulikira. Abandu babaa abatenga mwa kyango kye Ngalilaya na kye Yuteya, 8ne Yerusalemu, na mwa kihuo kye Itumeya, na mwa kihuo kya kwa lindi ishirya ra lwichi lwe Yorotani, na mwa kyango kye Tiro ne Sitona. Bandu bangi berehikira Yesu kubwishi ni bameumpfa abinwa byoshe byerekola. 9Niyo Yesu abwira abemitsa bewe mbu bamuteanyitse bwato buuma kwebula mbu amubuanano atamupfundeeretsaa. 10Abandu bobabaa na makoni berehumirana kwebula mbu bahike harali nemupfulako kubwishi alamyaa bandu bangi. 11Na mwa mango bobabaa baundirwe na bixwatsi baxungaa Yesu, niabanapfukama mwa mbere siwe nelaka mbu: «Iwe uli Muala wa Ongo.» 12Wetuwe Yesu nianahangirabo kutsibu mbu batapfuliraao mundu ku iye yende.
Yesu alondola abemitsa ikumi na babiri
(Mat 10:1-4; Luk 6:12-16)
13Inyuma kwaho Yesu nianauruka kwa kitwa, nianabirangira abemitsa babaa alaireko, nabo niabanahika harali. 14Nianalondola mubo ikumi na babiri balukaa mbu ndumwa, kwebula mbu babe kuuma naye nelikabo kwepfula amwatsi wa Ongo, 15nehabo maala mehentsa abixwatsi. 16Arekumi na babiri abo balondolaa ni bobano: Simoni yo Yesu atolaa aretsina kandi mbu ye Petero, 17Yakobo, ne mualabo mbu ye Yohana, ababiri boshe ni baala ba Sebetayo. Yesu alukaabo mbu: «Boanereke» (rebula mbu murungumano wa mulashano), 18Andereya, ne Firipo, ne Baritolomayo, ne Matayo, ne Tomasi, ne Yakobo muala wa Alufayo, ne Taleo, ne Simoni wa mwa kikanga kya Baselote, 19ne Yuta Isikariyote, yahotaa Yesu.
Yesu axondwa na kipfunga kiwe
20Inyuma kwaho, Yesu nianafuluka mwa nyumba. Mubuanano munene wa bandu nianaxuba ikorana. Na kubwishi bwekyo Yesu na bemitsa bewe batabonekya kashangi kelya bilyo. 21Mwa mango abandu ba kipfunga kiwe baumpfaa abinwa ibyo, niabanaya imubinga, kubwishi bereneena mbu ahara musire.
Abeisa ba Muomba baluka Yesu mbu ye Belisebuli
(Mat 12:22-32; Luk 11:14-23; 12:10)
22Abeyisa ba Muomba bobatengaa i Yerusalemu baneena kuluenda Yesu mbu: «Aundirwe ne Belisebuli#3:22 Aretsina «Belisebuli», lindi itsina ra Shitani..» Na bandi nabo baneena mbu: «Amukulukulu wa bixwatsi yeremuha amaala ma rehentsa abixwatsi.» 23Niyo Yesu abirangira abeisa ba Muomba, nebwirabo mu mishinga mbu: «Bate ko Shitani angaihentsa yewene?» 24Bandu ba bwami buuma bakerelwa bonabene ku bonabene, abwami ubo ni bukahera. 25Na bandu ba nyumba nguma bakerelwa bonabene ku bonabene, akipfunga ikyo ni kitendeba na maala kiro na hake. 26Ali Shitani angailwisa yewene, na bwami buwe bukeabana, amaala mewe ni makahwa, na bwami buwe ni bukahera. 27Amundu atangakocha iingira mu nyumba ya mundu wa nyiki, nenyaa abindu byaweteko ali atatsamumina. Wetuwe amekinda imumina, ni yangakocha iheka abindu biwe. 28Mwa kuli, anibabwira ku abandu bendeshashirwa asantsambi sabo soshe, na sangambo soshe sobakolera Ongo. 29Wetuwe amundu yangakamba aMutima Akomire, atendeshashirwa kiro na hake. Endeheka antsambi ihikira kwa ntsindiro. 30Yesu abwiraabo atyo, kubwishi baneenaa mbu: «Aundirwe na kixwatsi.»
Baala babo Yesu ne nina
(Mat 12:46-50; Luk 8:19-21)
31Mwa kashangi umo, baala babo Yesu ne nina niabanahika neimana hambua. Niabanalika mundu mbu amubirangire. 32Mubuanano munene wa bandu abaa atsungwire ku Yesu, niabanamubwira mbu: «Nyoko, na baala benyu, na bali benyu bali hambua abakuxonda.»
33Yesu nianaxubya mbu: «Inde ye mali na bonde bo baala betu?» 34Inyuma kwaho, nianasindera abandu bobabaa bamutsungwireko neneena mbu: «Mali na baala betu ni bobaikere hano. 35Kubwishi kintsi mundu yakola nga ko Ongo ashashire, uyo, ye muala wetu, ye mwali wetu, ye na mali.»
Currently Selected:
Mariko 3: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
