Mariko 15
15
Yesu mwa mbere sa Pilato
(Mat 27:1-2; 14:14; Luk 23:1-5; Yoh 18:28-38)
1Mwe lutumbi, boshebakungu, na bangumwa, na beyisa ba Muomba, na bakulukulu boshe ba Bushenge Bukulu, niabanamina kinwa kyetsimba Yesu. Niabanamutsimba nemutwalira Pilato. 2Pilato nianabutsa Yesu mbu: «Mbeni iwe we mwami wa Bayahuti?» Yesu nianamuxubitsa mbu: «Wamebulako.» 3Boshebakungu niabanasongera Yesu binwa bingi. 4Niyo Pilato amubutsa kandi mbu: «Iwe kuutauxubya kiro na kinwa? Talola ku binwa bingana byobakusongera!» 5Wetuwe Yesu ataxubya kandi kiro na kinwa kyoshekyoshe. Pilato naye nianashishala.
Yesu achirwa lubancha lwa lupfu.
(Mat 27:15-26; Luk 23:13-25; Yoh 18:39; 19:16)
6Mu kintsi lwire lukulu lwa Pasaka, Pilato abaa muhanga welikulirabo mundu muuma wa muliki, yobabaa bashashire. 7Habaa mundu muuma wa muliki yalukwa mbu ye Baraba, aminwaa kuuma na batengu kubwishi bwa bwiti mu kianiro kya kahinchangano. 8Abandu niabanaendera Pilato, nemuhema mbu akolerebo nga kwatula aira. 9Pilato nianabutsabo mbu: «Amuxonda mbu nibalikulire amwami wa Bayahuti?» 10Abulaa atyo ni echi ku boshebakungu bamehana Yesu kwemupfira muono.
11Wetuwe boshebakungu, niabanaisiritsa abandu mbu baheme Pilato mbu alikulirebo Baraba. 12Pilato nianabutsa abandu kandi mbu: «Mbeni amuxonda mbu niire amundu yomuluka mbu mwami wa Bayahuti yonde!» 13Niabanamuxubyitsa ni abalaka mbu: «Umuhangike ku musalaba!» 14Pilato nianabutsabo mbu: «Mbeni kihe kibi kyakolire!» Wetuwe niabanalaka kutsibu mbu: «Umuhangike ku musalaba!»
15Pilato kwexonda imoya bandu, nianalikulirabo Baraba. Nianakalihya mbu bakubite Yesu yo ngonyi nemuhana mbu ahangikwe ku musalaba.
Abasura bashekenyula Yesu
(Mat 27:27-30; Yoh 19:2-3)
16Abasura niabanatwala Yesu mwa mbuwa ya nyumba ya kafurunere. Niabanabirangira akindi kichiri kyoshe kya basura. 17Niabanaimbakya Yesu kantsu ka ngola netsinga ngata ya ndabi sa mahwa nemuimbakyayo kwa mutwe. 18Inyuma kwaho, niyo bamuketsa mbu: «Waliha mwami wa Bayahuti! Atukuketsa!» 19Niabanamukubita lusheke kwa mutwe, bamuchirako mate, neshinga amapfi, kwepfukama mwa mbere siwe. 20Babere bamemushekenyula, niabanamukungula akantsu ka ngola ako, nemuimbakya asangimba siwe kandi. Niabanaenda naye ira mbuwa kweya imuhangika kwa musalaba.
Yesu ahangikwa kwa musalaba
(Mat 27:32-44; Luk 23:26-43; Yoh 19:17-27)
21Mundu muuma we Kurene, yabaa alukwa mbu ye Simoni, ishe wa Lekisandere ne Rufu#15:21 Rufu Soma Baroma 16:13. nianatsuka aho ni atenga mwa ixwa. Abasura bamuminga iheka amusalaba wa Yesu. 22Niabanatwala Yesu hohalukwa mbu «Kolikota», rebula mbu: «Handu ha Kahangatsi.» 23Niabanamuha tifai ixubene na makali#15:23 Tifai ixubene na makali: Kixomyo kyepfibwa kinahabwa mundu y'akahangikwa ku musalaba kwekehya abwaale., wetuwe nianatinda ixomayo. 24Inyuma kwaho, niabanamuhangika ku musalaba, niabanaabana asangimba siwe mu ikuba mbayi kwemenya amuhango wa kintsi mundu.#15:24 Soma Saburi 22:19. 25Sabaa saa ishatu sa makyerakyera bali yo bamuhangika kwa musalaba. 26Niabanaandika abinwa byobituma achirwa lubancha mbu: «Mwami wa Bayahuti!» 27Niabanamuhangika kuuma na bandi banyai babiri, muuma kwa malyo na undi kwa malembe. 28aMaandiko Makomire momabwire mbu: «Ahirwaa hauma na bakotsi ba bibi,»#15:28 Soma Isaya 53:12. niamanabarerera.
29Na bobabaa abatsuka aho, babaa abamukamba, niabatinganya amitwe yabo mbu: «Iwe wowabaa auxonda ishambula ahekalu nehimba indi mu biro bishatu, 30tsene uiufule wenawene, uikimye na kwa musalaba!» 31Aboshebakungu, kuuma na beyisa ba Muomba niabanashekenyula Yesu mbu: «Aufulaa abandi, wetuwe tsene amelemwa iiufula yewene. 32Ewo! Ali ye Kirisitu, mwami wa Baisiraeri, tsene aikimye kwa musalaba, kwebula mbu netwe tulole, nemwimirira.» Banabe na bobahangikwaa kuuma naye, nabo babaa ni abanamukamba.
Arepfa ra Yesu
(Mat 27:45-56; Luk 23:44-49; Yoh 19:28-30)
33Kabere kahara kati ka mwishi niakunatowa mutsimya kwa kihuo kyoshe, ihika mu saa mwenda. 34Saa mwenda sabere saeraho, Yesu nianalaka mu mulenge mule mbu: «Eloyi, Eloyi, lama sabakitani!» Rebula mbu: «Ongo wani, Ongo wani, wamenisiya kuki?»#15:34 Soma Saburi 22:2. 35Bandu bauma bobabaa bali aho, babere bahulikya kwameneena, babula mbu: «Muumpfe! Abirangira Eliya!» 36Muuma mubo nianalibita, nianabobetsa fufuma mu tifai iyaire neminayo ku lusheke. Inyuma kwaho nianaurukitsayo Yesu kwebula mbu axomeyo, neneena mbu: «Lika tulole ngakuno Eliya akawicha imukimya kwa musalaba.» 37Wetuwe Yesu nianalaka mu mulenge mule, netowa amwete.
38Apasiya ya mwa hekalu niainabereka bihande bibiri itangira ira luulu ihikira hashi. 39Amukulukulu wa basura yabaa aimene mwa mbere sa Yesu, abere axunga ko Yesu ametowa amwete, niananeena mbu: «Mwa kuli, amundu uyu anabaa Muala wa Ongo!»
40Aho, habaa bakatsi bauma ni abaloleketsa hale, mubo ni muli, Mariya we Makitala, ne Mariya nina wa Yakobo, ne Yose, ne Salome. 41Abakatsi abo bobakulikiraa Yesu nemukolera mwa mango abaa ali i Ngalilaya. Na bandi bakatsi bangi bamukulikiraa ihikira i Yerusalemu, nabo babaa bali aho.
Aretabwa ra Yesu
(Mat 27:57-61; Luk 23:50-56; Yoh 19:38-42)
42Lwabere lwahara luoloolo, lwa lwire lwareiteanya aSabato, Yosefu we Arimateya nianahika ira mwa Pilato. 43Yosefu uyo abaa mwicha i Arimateya, naye ni apfirwe xoni mwa Bushenge Bukulu. Abaa ni alindirire arehika ra Bwami bwa Ongo. Nianaya ira mwa Pilato butsira buba kwehema andundwe ya Yesu. 44Pilato nianaishalima kutsibu kweumpfa mbu Yesu amekinda ipfa. Kubatyo, Pilato nianabirangira amukulukulu wa basura nemubutsa ngakuno kwametsuka kashangiki Yesu atoire amwete. 45Pilato abere aumpfa amuxubyo wa mukulukulu uyo, nianaha Yosefu yo rubu kweheka andundwe ya Yesu. 46Yosefu nianaya iula lushangi lwa kichiro kinene, nianatengya amubiri wa Yesu kwa musalaba, nianabungabungirao mwa lushangi ulo, nianaya itao mu isinda rolitimirwe mu lukanga. Inyuma kwaho, nianahiringitya ibale linene kwa lukyo lwa resinda. 47Mariya we Makitala, ne Mariya nina wa Yose, babaa abasindera ho Yesu aterekwaa.
Currently Selected:
Mariko 15: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
