Mariko 16
16
Arepfuka ra Yesu.
(Mat 28:1-8; Luk 24:1-8; Yoh 20:1,2)
1Alwire lwa Sabato lwabere lwametsuka, Mariya we Makitala, ne Mariya nina wa Yakobo, na undi mukatsi yalukwa mbu ye Salome, niabanaula lungo kweya ihakalo kwa ndundwe ya Yesu. 2Mwe lutumbi kutsibu, lwa lwire lubere lwa reinga, mwehuluka ra retsuba, niabanalamukira kwesinda. 3Bereenda niababutsabutsanya mbu: «Mbeni inde yakatuhiringityitsa arebale roliri kwa lukyo lwa resinda!» 4Wetuwe babere babatula amesha, niabanalola kwa arebale lisiikirwe ira musike. Arebale iro, rabaa linene kutsibu. 5Niabanaingira mwesinda umo, niabanaxunga mutabana muuma ni aikere kwa munda wa malyo, ni aimbere kantsu ka mweru. Niabanaishalima.
6Wetuwe amutabana uyo, nianabwirabo mbu: «Mutaishalimaa, amuxonda Yesu we Nasareti, yobahangikaa kwa musalaba. Amepfuka, atali hano. Mulole hobabaa bamuterekire.» 7Tsene Muende yomubwire abemitsa bewe, ne Petero mbu: «Amebaxondolera i Ngalilaya, iyo yomukamuxungirako, ngakuno kwababwiraa.» 8Niabanatenga kwesinda ro Yesu atabwaamo ni abalibita. Ni abatitimana neshishala kutsibu. Batabwira mundu woshewoshe kubwishi ni baubahire ali ate Petero ho. Bibe bityo.
Yesu apfumbukira ku Mariya we Makitala
(Mat 28:9-10; Yoh 20:11-18)
9Yesu abere amepfuka mwelutumbi lwa lwire lubere lwa reinga, nianapfumbukira kasa ku Mariya we Makitala, yahentsaamo abixwatsi birinda.
10Mariya uyo nianaya ipfula amwatsi ku bo Yesu abaa kuuma nabo. Babaa bayongirwe nelira. 11Wetuwe babere bahulikya kwaneena mbu Yesu aliho, na ko Mariya amuxungaa, batamwimirira.
Yesu ampfumbukira ku bemitsa babiri
(Luk 24:13-35)
12Inyuma kwaho, Yesu nianapfumbukira ku bemitsa bewe babiri mu indi shushani. Abemitsa abobabaa baya mwa kihya. 13Babere bafuluka, niabanapfulira abandi bemitsa amwatsi uyo, wetuwe ibo, bataimirira.
Yesu ampfumbukira kwa bemitsa ikumi na muuma
(Mat 28:16-20; Luk 24:36-49; Yoh 20:19-23; Mik 1:6-8)
14Mwa ntsindiro, Yesu nianapfumbukira kwa bemitsa bewe ikumi na muuma ni abalya. Nianakemerabo kwetinda iimirira, na kubwishi bwa myete yabo mitsibu. Akemeraabo atyo, kubwishi bataimiriraa bobamuxungaa amepfuka. 15Inyuma kwaho, nianabwirabo mbu: «Muende mwa kihuo kyoshe mupfule aMwatsi Mubuya kwa bandu boshe. 16Yakawimirira, nerubikwa akaufukala. Wetuwe yatiwimirire akachirwa lubancha. 17Na tulolero totukakulikira aboshe bobakawimirira ni totuno: bakerehentsa abixwatsi mwetsina rani, bakereneena mu mineenere mihya, 18nakiro batsimba ku nchoka mu minwe neri ilya kindu kyoshekyoshe kyokingaita, kitendeirabo kubi. Bakerehira asaminwe sabo ku bakoni, nabo benderelama.»
Yesu akukumwa mu mbingu.
(Mik 1:9-11)
19Abere ameneena atyo, Ninakuwetu Yesu, nianakukumwa mu mbingu neikala kwa malyo ma Ongo. 20Abemitsa niabanaya ipfula aMwatsi Mubuya ahoshe. Ninakuwetu abaa erekola kuuma nabo, nebereretsa akuli ya Mwatsi Mubuya mu tulolero.
Currently Selected:
Mariko 16: HKE
Highlight
Copy
Compare
Share
Want to have your highlights saved across all your devices? Sign up or sign in
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
