ܣܶܦܪܳܐ ܕ݄ܒܪܺܝܬ̥ܳܐ 50
50
1ܘܢܰܦ݄ܠ ܝܰܘܣܶܦ ܥܰܠ ܦܳܬ̥ܶܗ ܕܽܗ̄ܘ ܒܰܒܳܐ ܘܒܰܟ̥ܺܝ ܐܰܥܠܶܗ ܘ݄ܢܫ݄ܩ ܠܶܗ. 2ܘܡܰܩܘܶܐ ܠܶܗ ܝܰܘܣܶܦ ܥܰܠ ܗ̄ܰܓܪ̈ܶܝܥܰܝܕ̥ܶܗ ܗ̄ܰܢ ܐܳܣ̈ܰܘܳܬ̥ܳܐ ܕ݄ܡܚܰܢܛܺܝ ܠܽܗ̄ܘ ܒܰܒܳܐ. ܘ݄ܡܚܰܢܰܛّܶܗ ܗ̄ܰܢ ܐܳܣ̈ܰܘܳܬ̥ܳܐ ܠܺܐܝܣܪܳܐܶܝܠ. 3ܘܟܰܡܺܝܠܺܝ ܗ̄ܰܢ ܐܰܪܒܥܺܝ ܝܰܘܡ̈ܶܐ، ܥܰܠ ܕܗܰܘܟ̥ܰܐ ܟܳܟܳܡܠܺܝ ܗ̄ܰܝّܰܘܡ̈ܶܐ ܕܰܡܚܰܢ̈ܛܶܐ. ܘܒܰܟ̥݄ܢ ܐܰܥܠܶܗ ܗ̄ܰܡّܶܨܪ̈ܳܝܶܐ ܫܰܒ̥ܥܺܝ ܝܰܘܡ̈ܶܐ. 4ܘܥܰܒܺܝܪܺܝ ܗ̄ܰܝّܰܘܡ̈ܶܐ ܕܽܗ̄ܘ ܒܰܟ̥ܝܰܝܕ̥ܶܗ. ܘܐܡ݄ܪ ܠܶܗ ܝܰܘܣܶܦ ܠܽܗ̄ܘ ܒܰܝܬܳܐ ܕܦܶܪܥܽܘܢ: ”ܐܶܢ ܟ݄ܬ ܠܺܝ ܪ̈ܰܚܡܶܐ ܒܥܰܝܢ̈ܳܬ̥ܰܝܟ̥ܽܘ، ܐܡܰܪܽܘ ܩ݄ܕ̱ܡ ܦܶܪܥܽܘܢ: 5ܒܰܒܺܝ ܡܰܘܡܶܐ ܠܶܗ ܠܺܝ ܘܐܡ݄ܪ ܠܶܗ: ܟܰܐܠܺܝ ܓܡܳܝܰܬ̥ ܐ̱ܢܳܐ. ܒܽܗ̄ܘ ܩܰܒ̥ܪܰܝܕ̥ܺܝ ܕ݄ܙܒ̥݄ܢ ܠܺܝ ܒܺܗ̄ܝ ܐܰܪܥܳܐ ܕ݄ܟܢܰܥܢ ܬܰܡܳܐ ܓܩܳܒ̥ܪܰܬ ܠܺܝ. ܐܳܥܕܳܐ ܓܣܳܠܰܩ ܐ̱ܢܳܐ ܩܳܒ̥ܰܪ ܐ̱ܢܳܐ ܠܒܰܒܺܝ ܘܕܳܥܰܪ ܐ̱ܢܳܐ.“ 6ܘܐܡ݄ܪ ܠܶܗ ܦܶܪܥܽܘܢ: ”ܣܠܰܩ ܘ݄ܩܒ̥ܰܪ ܒܰܒܳܟ̥ ܐܟ̥ ܕܡܰܘܡܶܐ ܠܶܗ ܠܳܟ̥.“
7ܘܣܰܠ݄ܩ ܝܰܘܣܶܦ ܕܩܳܒ̥݄ܪ ܗ̄ܽܘ ܒܰܒܰܝܕ̥ܶܗ، ܘܣܰܠܺܝܩܺܝ ܐܰܥܡܶܗ ܟܽܘܠّܶܗ ܗ̄ܰܓܪ̈ܶܝܥܶܐ ܕܦܶܪܥܽܘܢ ܘܰܣّܳܒ̥̈ܶܐ ܕܽܗ̄ܘ ܒܰܝܬܰܝܕ̥ܶܗ، ܘܟܽܘܠّܶܗ ܗ̄ܰܣّܳܒ̥̈ܶܐ ܕܺܗ̄ܝ ܐܰܪܥܳܐ ܕܡܶܨܪܶܝܢ. 8ܘܟܽܘܠܶܗ ܗ̄ܽܘ ܒܰܝܬܳܐ ܕܝܰܘܣܶܦ ܘܰܗ̄ܢ ܐܰܚ̈ܽܘܢܳܢܰܝܕ̥ܶܗ ܘܽܗ̄ܘ ܒܰܝܬܳܐ ܕܽܗ̄ܘ ܒܰܒܰܝܕ̥ܶܗ ܣܰܠܺܝܩܺܝ ܐܰܥܡܶܗ. ܒܶܠܚܽܘܕ̥ ܗ̄ܰܢ ܢܰܥܺܝܡ̈ܰܬّ̥ܶܗ ܘܰܥܘܳܢ̈ܰܬّ̥ܶܗ ܘܰܬّܰܘܪ̈ܰܬّ̥ܶܗ ܛܪܰܢّܶܗ ܒܺܗ̄ܝ ܐܰܪܥܳܐ ܕܓܶܫܳܢ. 9ܘܣܰܠܺܝܩܺܝ ܐܰܥܡܶܗ ܣܬܶܝ ܡܰܪ̈ܟܒܳܬ̥ܳܐ ܘܦܰܪ̈ܳܫܶܐ، ܘܗܰܘܝܳܐ ܡܰܫܪܺܝܬ̥ܳܐ ܪܰܒܬ̥ܳܐ ܓ̥ܰܠܰܒܶܐ. 10ܘܰܐܬ̥݄ܢ ܗ݄ܠ ܠܰܗ̄ܢ ܐܰܕܪ̈ܳܬ̥ܳܐ ܕܳܐܛܳܪ ܕܟ݄ܬܢܶܝ ܒܽܗ̄ܘ ܥܶܒܪܳܐ ܕܝܽܘܪܕܢܳܢ. ܘܬܰܡܳܐ ܣ݄ܡّܶܗ ܒܰܟ̥ܝܳܐ ܘܘܶܠܘܳܠܳܐ ܓ̥ܰܠܰܒܶܐ. ܘܣ݄ܡ ܠܶܗ ܠܽܗ̄ܘ ܒܰܒܰܝܕ̥ܶܗ ܒܰܟ̥ܝܳܐ ܫܰܒ̥ܥܳܐ ܝܰܘܡ̈ܶܐ. 11ܘܰܟܢܰܥܢܳܝ̈ܶܐ، ܗ̄ܰܝّܰܬܺܝܒ̥̈ܶܐ ܕܺܗ̄ܝ ܐܰܪܥܳܐ، ܚܙܰܠّܶܗ ܗ̄ܽܘ ܚܰܫܳܐ ܕܗܰܘܺܝ ܒܰܗ̄ܢ ܐܰܕܪ̈ܳܬ̥ܳܐ ܕܰܐܛܳܪ ܘܐܡ݄ܪّܶܗ: ”ܚܰܫܳܐ ܪܰܒܳܐ ܝܳܐ ܗܰܢܳܐ ܠܰܡّܶܨܪ̈ܳܝܶܐ.“ ܡܰܗ̄ܘܟ̥ܰܐ ܩܪܰܠّܶܗ ܐ݄ܫܡܶܗ ”ܐܶܒܰܠ ܡܶܨܪܶܝܢ“ ܕܟ݄ܬ ܝܳܐ ܒܽܗ̄ܘ ܥܶܒܪܳܐ ܕܝܽܘܪܕܢܳܢ. 12ܘܗܰܘܟ̥ܰܐ ܣ݄ܡّܰܗ ܠܶܗ ܗ̄ܰܢ ܐܰܒܢ̈ܰܝܕ̥ܶܗ ܐܟ̥ ܕܡܰܩܘܶܐ ܠܶܗ ܐܰܥܠܰܝّܶܗ. 13ܘ݄ܛܥ݄ܢّܶܗ ܘܡܰܘܒܰܠّܶܗ ܠܺܗ̄ܝ ܐܰܪܥܳܐ ܕ݄ܟܢܰܥܢ، ܘ݄ܩܒ̥݄ܪّܶܗ ܒܺܗ̄ܝ ܡܥܰܪܬ̥ܳܐ ܕܟ݄ܬ ܝܳܐ ܕܒܺܗ̄ܝ ܚܰܩܠܳܐ ܕܰܐܥ݄ܦܬܳܐ ܕ݄ܙܒ̥݄ܢ ܠܶܗ ܐܰܒܪܳܗܳܡ ܚܰܩܠܳܐ ܠܽܗ̄ܘ ܝܽܘܪܬ̥ܳܢܳܐ ܕܽܗ̄ܘ ܩܰܒ̥ܪܳܐ ܡܶܢ̱ ܥܶܦܪܽܘܢ ܗ̄ܽܘ ܚܺܝܬ̥ܳܝܳܐ ܕܟ݄ܬ ܝܳܐ ܩ݄ܕ̱ܡ ܡܰܡܪܶܐ.
14ܘܕܰܥ݄ܪ ܝܰܘܣܶܦ ܠܡܶܨܪܶܝܢ ܗܺܝّܶܗ ܘܰܗ̄ܢ ܐܰܚ̈ܽܘܢܳܢܰܝܕ̥ܶܗ ܘܟܽܘܠّܶܗ ܕܣܰܠܺܝܩܺܝ ܐܰܥܡܶܗ ܠܽܗ̄ܘ ܩܒ̥ܳܪܳܐ ܕܽܗ̄ܘ ܒܰܒܳܐ. ܘܒ݄ܬ̥݄ܪ ܡܶܢ̱ ܕ݄ܩܒ̥݄ܪ ܠܶܗ ܠܽܗ̄ܘ ܒܰܒܳܐ، 15ܚܙܰܠّܶܗ ܗ̄ܰܢ ܐܰܚ̈ܽܘܢܳܢܶܐ ܕܝܰܘܣܶܦ ܕܡܰܝ݄ܬ̥ ܗ̄ܽܘ ܒܰܒܰܬّ̥ܶܗ ܘܙܰܝܺܝܥܺܝ ܘܐܡ݄ܪّܶܗ: ”ܕܠ݄ܐ ܐܙّܶܗ ܡܰܟܽܒ̥ ܠܰܢ ܝܰܘܣܶܦ، ܘܠ݄ܐ ܐܙّܶܗ ܡܰܕܥ݄ܪ ܐܰܥܠܰܢ ܟܽܘܠܰܗ ܗ̄ܺܝ ܒܺܝܫܬܳܐ ܕܣ݄ܡ ܠܰܢ ܐܶܒܶܗ.“ 16ܘ݄ܡܩܰܪܰܒّ̥ܶܗ ܠܓܰܒ ܝܰܘܣܶܦ ܘܐܡ݄ܪّܰܗ ܠܶܗ: ”ܒܰܒܳܟ̥ ܗܽܒ̥ ܠܶܗ ܦܽܘܩܕܳܢܳܐ ܡܶܩ݄ܕ̱ܡ ܕܡܳܝ݄ܬ̥ ܘܐܡ݄ܪ ܠܶܗ: 17ܗܰܘܟ̥ܰܐ ܐܡܰܪܽܘ ܠܝܰܘܣܶܦ: ܒܒܳܥܽܘ ܫܒܰܩ ܗ̄ܺܝ ܣܰܟ̥ܠܽܘܬ̥ܳܐ ܕܰܗ̄ܢ ܐܰܚ̈ܽܘܢܳܢܰܝܕ̥ܳܟ̥ ܘܰܚܛܳܗ̈ܰܬّ̥ܶܗ ܕܣ݄ܡّܶܗ ܒܺܝܫܬܳܐ ܐܰܥܡܳܟ̥. ܘܳܐܥܕܳܐ ܫܒܰܩ ܗ̄ܺܝ ܣܰܟ̥ܠܽܘܬ̥ܳܐ ܕܰܓܪ̈ܶܝܥܶܐ ܕܰܐܠܳܗܳܐ ܕܒܰܒܳܟ̥.“ ܘܒܰܟ̥ܺܝ ܝܰܘܣܶܦ ܗ̄ܺܝ ܢܰܩܠܐ ܕܐܡ݄ܪّܰܗ ܠܶܗ. 18ܘܰܐܙّ݄ܢ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܘܢܰܦܺܝܠܺܝ ܩܽܘܕ̱ܡܶܗ ܘܐܡ݄ܪّܶܗ: ”ܟܰܐܠܰܢ ܐܰܚܢܰܐ ܓܪ̈ܶܝܥܶܐ ܐܶܠܳܟ̥.“ 19ܘܐܡ݄ܪ ܠܰܗ ܠّܶܗ ܝܰܘܣܶܦ: ”ܠܳܐ ܙܰܝܥܺܝܬܽܘ، ܡܺܐܝܕ̥ܶܗ ܕܬܰܚܬܶܗ ܕܰܐܠܳܗܳܐ ܐ̱ܢܳܐ. 20ܗܰܬܽܘ ܚܫܽܒ̥ܟ̥ܽܘ ܐܰܥܠܺܝ ܒܺܝܫܬܳܐ، ܘܰܐܠܳܗܳܐ ܚܫܺܝܒ̥ܳܐ ܠܶܗ ܠܺܗ̄ܝ ܛܰܒ̥ܬܳܐ، ܕܣܳܝ݄ܡ ܐܟ̥ ܕܰܐܕܝܰܘܡܰܐ ܘܚܳܝܶܐ ܥܰܡܳܐ ܪܰܒܳܐ. 21ܘܳܐܥܕܳܐ ܠܳܐ ܙܰܝܥܺܝܬܽܘ، ܐܳܢܳܐ ܓ݄ܡܕܰܒܰܪ ܐ̱ܢܳܐ ܠܟ̥ܽܘ، ܐܰܠܟ̥ܽܘ ܘܠܰܗ̄ܢ ܢܰܥܺܝܡ̈ܰܬ̥ܟ̥ܽܘ.“ ܘ݄ܡܒܰܣܰܡ ܠܶܗ ܘܡܰܬ̥ܢܰܚ ܠܶܗ ܠܶܒܰܝّܶܗ.
22ܘܝܰܬܽܒ̥ ܝܰܘܣܶܦ ܒܡܶܨܪܶܝܢ ܗܺܝّܶܗ ܘܰܒّܶܝ ܒܰܒ̈ܶܐ ܟܽܘܠّܶܗ. ܘܚܰܝܺܝ ܝܰܘܣܶܦ ܡܳܐܐ ܘ݄ܥܣܰܪ ܐ݄ܫܢ̈ܶܐ. 23ܘ݄ܚܙܶܐ ܠܶܗ ܝܰܘܣܶܦ ܠܰܐܦܪܶܝܡ ܐܰܒܢ̈ܶܐ ܬܠܺܝܬ̥ܳܝ̈ܶܐ. (ܘ݄ܚܙܶܐ ܠܶܗ) ܣܬܶܝ ܗ̄ܰܢ ܐܰܒܢ̈ܶܐ ܕܡܳܟ̥ܺܝܪ ܗ̄ܽܘ ܐܰܒܪܳܐ ܕ݄ܡܢܰܫܶܐ ܕܡܰܘܠܕܺܝ ܥܰܠ ܒܰܪ̈ܟܳܬ̥ܶܗ ܕܝܰܘܣܶܦ. 24ܘܐܡ݄ܪ ܠܶܗ ܝܰܘܣܶܦ ܠܰܗ̄ܢ ܐܰܚ̈ܽܘܢܳܢܶܐ: ”ܐܳܢܳܐ ܓܡܳܝܰܬ̥ ܐ̱ܢܳܐ، ܘܰܐܠܳܗܳܐ ܓܡܰܕ̥ܟܰܪܟ̥ܽܘ، ܘ݄ܓܡܰܣܠܰܩܟ̥ܽܘ ܡܺܗ̄ܝ ܐܰܪܥܰܬ̥ܶܐ ܠܺܗ̄ܝ ܐܰܪܥܳܐ ܕܺܝܡܶܐ ܠܶܗ ܠܰܐܒܪܳܗܳܡ ܘܠܺܐܝܣܚܳܩ ܘ݄ܠܝܰܥܩܽܘܒ.“ 25ܘܡܰܘܡܶܐ ܠܶܗ ܝܰܘܣܶܦ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܘܐܡ݄ܪ ܠܶܗ: ”ܓܡܰܕ̥ܟܰܪܟ̥ܽܘ ܐܰܠܳܗܳܐ، ܡܰܣܠܶܩܽܘ ܗ̄ܰܓّܰܪ̈ܡܰܝܕ̥ܺܝ ܡܰܗ̄ܪܟܶܐ ܐܰܥܡܰܝܟ̥ܽܘ.“ 26ܘܡܰܝ݄ܬ̥ ܝܰܘܣܶܦ ܐܰܒܪܳܐ ܕܡܳܐܐ ܘ݄ܥܣܰܪ ܐ݄ܫܢ̈ܶܐ. ܘ݄ܡܚܰܢܰܛّܶܗ ܘܡܰܚ݄ܬّܶܗ ܒܕܽܘܦܢܳܐ ܒܡܶܨܪܶܝܢ.
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 50: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
