ܣܶܦܪܳܐ ܕܡܰܦܩܳܢܳܐ 1
1
1ܘܗܰܢܺܝ ܢܶܝ ܗ̄ܰܢ ܐ݄ܫܡܳܢ̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܕܥܰܒܺܝܪܺܝ ܠܡܶܨܪܶܝܢ ܥܰܡ ܝܰܥܩܽܘܒ. ܟܘ̇ܠ ܓܰܒ̥ܪܳܐ ܘܽܗ̄ܘ ܒܰܝܬܰܝܕ̥ܶܗ ܥܰܒܺܝܪܺܝ: 2ܪܽܘܒܶܝܠ ܘܫܶܡܥܽܘܢ ܘܠܶܘܺܝ ܘܺܝܗܽܘܕ̥ܳܐ، 3ܘܺܐܝܣܳܟܳܪ ܘ݄ܙܒܳܘܠܽܘܢ ܘܒܶܢܝܳܡܶܝܢ، 4ܘܕܳܢ ܘܢܰܦܬܳܠܺܝ ܘܓܳܕ ܘܳܐܫܺܝܪ. 5ܘܗܰܘ݄ܢ ܟܽܘܠّܶܗ ܗ̄ܰܢ ܢܰܦܫ̈ܳܬ̥ܳܐ ܕܢܰܦܺܝܩܺܝ ܡܶܢ̱ ܚܰܨܶܗ ܕܝܰܥܩܽܘܒ ܫܰܒ̥ܥܺܝ ܢܰܦܫ̈ܳܬ̥ܳܐ. ܘܝܰܘܣܶܦ ܒܡܶܨܪܶܝܢ ܗ̄ܘܰܐ. 6ܘܡܰܝ݄ܬ̥ ܝܰܘܣܶܦ ܘܟܽܘܠّܶܗ ܗ̄ܰܢ ܐܰܚ̈ܽܘܢܳܢܶܐ، ܘܟܽܘܠܶܗ ܗ̄ܽܘ ܕܳܪܰܘܳܐ. 7ܘܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܡܰܘܠܰܕّܶܗ ܘܝܰܪܺܝܒ̥ܺܝ ܘܙܰܝܺܝܕܺܝ، ܘܗܰܘ݄ܢ ܒܚܰܝܠܳܐ ܪܰܒܳܐ. ܘܡܰܠܝܳܐ ܗ̄ܺܝ ܐܰܪܥܳܐ ܡ݄ܢّܶܗ.
8ܘܩܰܝ݄ܡ ܡܰܠܟܳܐ ܚܰܕ̱ܬ̥ܳܐ ܥܰܠ ܡܶܨܪܶܝܢ ܕܠܳܐ ܐܕ̥ܰܥ ܗ̄ܘܰܐ ܠܝܰܘܣܶܦ. 9ܘܐܡ݄ܪ ܠܶܗ ܠܽܗ̄ܘ ܥܰܡܰܝܕ̥ܶܗ: ”ܟܰܐܠܶܗ ܗ̄ܽܘ ܥܰܡܳܐ ܕܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ ܙܰܝܺܝܕܺܝ ܙ݄ܕ ܡܶܢܰܢ، ܘܗܰܘ݄ܢ ܒܚܰܝܠܳܐ ܙ݄ܕ ܡܶܢܰܢ. 10ܬܳܟ̥ܽܘ ܒܺܗ̄ܝ ܝܕ̥ܰܥܬ̥ܳܐ ܡܰܟܠܺܝܢܰܢّܶܗ ܡܶܩ݄ܕ̱ܡ ܕܙܰܝܕܺܝ، ܟܺܝܬ ܕܗܳܘܶܐ ܐܰܥܠܰܢ ܩܪܳܒܳܐ، ܘܕ݄ܐܙّ݄ܢ ܗ݄ܢّܶܝ ܣܬܶܝ ܡܳܛ݄ܢ ܠܰܒܥܶܠܕ̈ܒܳܒܰܝܕ̥ܰܢ، ܘ݄ܡܚܰܪܒܺܝ ܠܰܢ، ܘܡܰܘܦܩܺܝ ܠܰܢ ܡܺܗ̄ܝ ܐܰܪܥܳܐ.“ 11ܘܡܰܩ݄ܡّܶܗ ܐܰܥܠܰܝّܶܗ ܫܰܠܺܝ̈ܛܳܢܶܐ ܒܺܝܫ̈ܶܐ ܕ݄ܡܫܰܥܒܕ݄ܢّܶܗ ܒܽܗ̄ܘ ܫܽܘܥܒܳܕܰܬّ̥ܶܗ. ܘܒܳܢ݄ܢ ܗ̄ܘܰܘ̱ ܡܕ̥̈ܺܝܢܳܬ̥ܳܐ ܐܳܘܨܪ̈ܶܐ ܠܦܶܪܥܽܘܢ: ܦܺܝܬ̥ܽܘܡ ܘܪܰܥ݄ܡܣܺܝܣ 12ܘܡ݄ܩܰܐ ܕܗ݄ܢّܶܝ ܡܫܰܥ݄ܒܕܺܝ ܗ̄ܘܰܢّܶܗ، ܗܰܩܰܐ ܙܰܝܕܺܝ ܗ̄ܘܰܘ̱ ܘܗܳܘܶܐ ܗ̄ܘܰܘ̱ ܠّܶܗ ܚܰܝܠܳܐ. ܘܥܰܝ݄ܩّܶܗ ܠܰܡّܶܨܪ̈ܳܝܶܐ ܡܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، 13ܘ݄ܒܩܰܫܝܽܘܬ̥ܳܐ ܗ̄ܰܡّܶܨܪ̈ܳܝܶܐ ܡܫܰܥ݄ܒܕܺܝ ܗ̄ܘܰܘ̱ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ. 14ܘܡܰܡܺܝܪܺܝ ܗ̄ܘܰܘ̱ ܗ̄ܰܚّܰܝ̈ܰܬّ̥ܶܗ ܒܽܗ̄ܘ ܦܽܘܠܚܳܢܳܐ ܩܰܫܝܳܐ، ܒܽܗ̄ܘ ܛܺܝܢܳܐ ܘܒܰܠّܶܒܢ̈ܶܐ ܘ݄ܒܟܘ̇ܠ ܥܒ̥ܳܕܳܐ ܕܺܗ̄ܝ ܚܰܩܠܳܐ. ܘ݄ܒܟܘ̇ܠ ܫܽܘܥܒܳܕ̥ܳܐ ܕ݄ܡܫܰܥܒܕܺܝ ܗ̄ܘܰܢّܶܗ ܒܩܰܫܝܽܘܬ̥ܳܐ.
15ܘܐܡ݄ܪ ܠܶܗ ܗ̄ܽܘ ܡܰܠܟܳܐ ܕܡܶܨܪܶܝܢ ܠܰܩّܰܫ̈ܬܳܬ̥ܳܐ (ܗ̄ܰܡّܰܘܠܕܳܢ̈ܶܐ) ܕܰܥّܶܒܪ̈ܳܝܶܐ، ܕ݄ܐܫܡܰܗ ܕ݄ܚܕ̥ܳܐ ܦܽܘܥܳܐ ܘ݄ܐܫܡܰܗ ܕܺܗ̄ܝ ܚܪܶܬܳܐ ܫܽܘܦܪܳܐ. 16ܘܐܡ݄ܪ ܠܰܗ ܠّܶܗ: ”ܐܶܡܰܐ ܕܡܰܘܠܕܺܝܬܽܘ ܠܰܥّܶܒܪ̈ܳܝܶܐ، ܚܙܰܝܽܘ ܗ̄ܺܝ ܢܰܩܠܐ ܕܒܳܪܟܺܝ (ܠܽܗ̄ܘ ܝܰܠܕܳܐ): ܐܶܢ ܐܰܒܪܳܐ ܝܳܐ ܩܛܰܠܽܘ ܠܶܗ، ܘܶܐܢ ܒܰܪܬ̥ܳܐ ܝܳܐ ܛܪܰܝܽܘ ܠܰܗ ܒܰܚّܰܝ̈ܶܐ.“ 17ܘܙܰܝܺܝܥܺܝ ܗ̄ܰܩّܰܫ̈ܬܳܬ̥ܳܐ ܡܶܢ̱ ܐܰܠܳܗܳܐ، ܘܠܳܐ ܣ݄ܡّܶܗ ܐܟ̥ ܕܐܡ݄ܪ ܠܰܗ ܠّܶܗ ܗ̄ܽܘ ܡܰܠܟܳܐ ܕܡܶܨܪܶܝܢ، ܘܛܳܪ݄ܢ ܗ̄ܘܰܘ̱ ܗ̄ܰܢ ܐܰܒܢ̈ܶܐ ܒܰܚّܰܝ̈ܶܐ. 18ܘ݄ܩܪܶܐ ܠܶܗ ܗ̄ܽܘ ܡܰܠܟܳܐ ܕܡܶܨܪܶܝܢ ܠܰܩّܰܫ̈ܬܳܬ̥ܳܐ ܘܐܡ݄ܪ ܠܰܗ ܠّܶܗ: ”ܠܡ݄ܢ ܣ݄ܡܟ̥ܽܘ ܗ̄ܽܘ ܡܶܕܰܢܳܐ ܘ݄ܛܪܰܠܟ̥ܽܘ ܗ̄ܰܢ ܐܰܒܢ̈ܶܐ ܒܰܚّܰܝ̈ܶܐ؟“ 19ܘܐܡ݄ܪّܶܗ ܗ̄ܰܩّܰܫ̈ܬܳܬ̥ܳܐ ܠܦܶܪܥܽܘܢ: ”ܗ̄ܰܢ ܢܶܫ̈ܶܐ ܥܶܒܪ̈ܳܝܶܐ ܠܰܝ̱ܬ ܢܶܝ ܐܟ̥ ܕܰܗ̄ܢ ܢܶܫ̈ܶܐ ܡܶܨܪ̈ܳܝܶܐ، ܥܰܠ ܕܟ݄ܬܢܶܝ ܩܰܫ̈ܬܳܬ̥ܳܐ. ܘܡܶܩ݄ܕ̱ܡ ܕܥܳܒܪܳܐ ܐܰܥܠܰܝّܶܗ ܗ̄ܺܝ ܩܰܫܬܳܐ ܟܡܰܘܠܕܺܝ.“ 20ܘܣ݄ܡ ܠܶܗ ܐܰܠܳܗܳܐ ܛܳܒ̥ܽܘܬ̥ܳܐ ܠܰܩّܰܫ̈ܬܳܬ̥ܳܐ ܥܰܠ ܕܣ݄ܡّܶܗ ܗ̄ܽܘ ܡܶܕܰܢܳܐ. ܘܙܰܝ݄ܕ ܗ̄ܽܘ ܥܰܡܳܐ ܘܗܰܘܺܝ ܠܶܗ ܚܰܝܠܳܐ ܓ̥ܰܠܰܒܶܐ. 21ܘܡ݄ܐ ܕܙܰܝܺܝܥܺܝ ܗ̄ܰܩّܰܫ̈ܬܳܬ̥ܳܐ ܡܶܢ̱ ܐܰܠܳܗܳܐ، ܣ݄ܡ ܠܰܗ ܠّܶܗ ܒ̈ܳܬܶܐ. 22ܘܗܽܒ̥ ܠܶܗ ܦܶܪܥܽܘܢ ܦܽܘܩܕܳܢܳܐ ܠܟܽܘܠܶܗ ܗ̄ܽܘ ܥܰܡܳܐ ܘܐܡ݄ܪ ܠܶܗ: ”ܟܘ̇ܠ ܐܰܒܪܳܐ ܕܡܺܝܬܰܘܠ݄ܕ̥ ܒܽܗ̄ܘ ܢܰܗܪܳܐ ܓ݄ܡܚܰܠܩܺܝܬܽܘ ܠܶܗ، ܘܟܘ̇ܠ ܒܰܪܬ̥ܳܐ ܓܛܳܪܺܝܬܽܘ ܠܰܗ ܒܰܚّܰܝ̈ܶܐ.“
Currently Selected:
ܣܶܦܪܳܐ ܕܡܰܦܩܳܢܳܐ 1: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
