ܣܶܦܪܳܐ ܕ݄ܒܪܺܝܬ̥ܳܐ 49
49
1ܘ݄ܩܪܶܐ ܠܶܗ ܝܰܥܩܽܘܒ ܠܰܗ̄ܢ ܐܰܒܢ̈ܰܝܕ̥ܶܗ ܘܐܡ݄ܪ ܠܰܗ ܠّܶܗ: ”ܠܬܰܡܽܘ ܘܓ݄ܕܡܰܚܘܶܢܰܢܟ̥ܽܘ ܗ̄ܽܘ ܡܶܕܶܐ ܕ݄ܓܕܳܗ̄ܘܶܐ ܐܰܥܡܰܝܟ̥ܽܘ ܒܰܝّܰܘܡ̈ܶܐ ܚܰܪ̈ܳܝܶܐ. 2ܠܬܰܡܽܘ ܘ݄ܫܡܰܥܽܘ ܝܰܐ ܗ̄ܰܢ ܐܰܒܢ̈ܶܐ ܕܝܰܥܩܽܘܒ، ܫܡܰܥܽܘ ܠܺܐܝܣܪܳܐܶܝܠ ܒܰܒܰܝܟ̥ܽܘ. 3ܪܽܘܒܶܝܠ ܗ̄ܽܘ ܒܽܘܟ̥ܪܰܝܕ̥ܺܝ ܗܰܬ، ܗ̄ܽܘ ܚܰܝܠܰܝܕ̥ܺܝ، ܘܽܗ̄ܘ ܪܺܝܫܳܐ ܕܺܗ̄ܝ ܚܺܝܨܽܘܬ̥ܰܝܕ̥ܺܝ. ܟܽܘܠܳܟ̥ ܐܺܝܩܳܪܳܐ ܘܟܽܘܠܳܟ̥ ܥܽܘܫܢܳܐ. 4ܩܰܠܺܝܥܰܬ ܐܟ̥ ܕܰܡّܰܝ̈ܶܐ. ܠ݄ܐ ܓܦܰܝܫܰܬ، ܥܰܠ ܕܣܰܠܺܝܩܰܬ ܠܰܓّܰܠ̈ܶܐ ܕܒܰܒܳܟ̥. ܒ݄ܫܪܳܪܳܐ ܡܚܰܪܰܡ ܠܳܟ̥ ܗ̄ܰܓّܰܠܰܝ̈ܕ̥ܺܝ ܘܣܰܠܺܝܩܰܬ.
5”ܫܶܡܥܽܘܢ ܘܠܶܘܺܝ ܐܰܚ̈ܽܘܢܳܢܶܐ. ܣܶܦܳܩ̈ܶܐ ܕܽܗ̄ܘ ܪܽܘܓ̥ܙܳܐ ܢܶܝ ܡܽܗ̄ܘ ܟܝܳܢܰܬّ̥ܶܗ. 6ܒܽܗ̄ܘ ܐ̱ܪܳܙܰܬّ̥ܶܗ ܠܳܐ ܥܰܒܺܝܪܳܐ ܗ̄ܺܝ ܢܰܦܫܰܝܕ̥ܺܝ، ܘܒܽܗ̄ܘ ܟܢܽܘܫܝܰܬّ̥ܶܗ ܠܳܐ ܢܰܚ݄ܬ ܐ̱ܢܳܐ ܡܽܗ̄ܘ ܐܺܝܩܳܪܰܝܕ̥ܺܝ، ܡܺܐܝܕ̥ܶܗ ܕܒܽܗ̄ܘ ܪܽܘܓ̥ܙܰܬّ̥ܶܗ ܩܛ݄ܠّܶܗ ܓܰܒ̥ܪ̈ܶܐ، ܘܒܺܗ̄ܝ ܫܚܰܢܬܰܬّ̥ܶܗ ܥܩ݄ܪّܶܗ ܫܽܘܪܳܐ. 7ܠܺܝܛܳܐ ܝܳܐ ܗ̄ܽܘ ܪܽܘܓ̥ܙܰܬّ̥ܶܗ ܥܰܠ ܕܟ݄ܬ ܝܳܐ ܥܰܫܺܝܢܳܐ، ܘܺܗ̄ܝ ܫܚܰܢܬܰܬّ̥ܶܗ ܥܰܠ ܕܟ݄ܬ ܝܳܐ ܩܫܺܝܬ̥ܳܐ. ܓܦܳܠܰܓ̥ܢܰܢّܶܗ ܒܝܰܥܩܽܘܒ ܘܓ݄ܡܒܰܪܒܰܙܢܰܢّܶܗ ܒܺܐܝܣܪܳܐܶܝܠ.
8”ܝܰܐ ܝܺܗܽܘܕ̥ܳܐ، ܐܶܠܳܟ̥ ܓܡܰܘܕ݄ܢ ܐܰܚ̈ܽܘܢܳܢܳܟ̥. ܐܺܝܕ̥ܳܟ̥ ܥܰܠ ܩܕ̥ܳܠܶܗ ܕܰܒܥܶܠܕ̈ܒܳܒܰܝܕ̥ܳܟ̥. ܓܣܳܓ̥ܕܺܝ ܠܳܟ̥ ܗ̄ܰܢ ܐܰܒܢ̈ܶܐ ܕܒܰܒܳܟ̥. 9ܓܽܘܪܝܳܐ (ܐܰܒܪܳܐ) ܕܽܗ̄ܘ ܐܰܪܝܳܐ ܝܺܗܽܘܕ̥ܳܐ. ܐܰܒܪܺܝ، ܡܽܗ̄ܘ ܩܰܛܠܳܐ ܣܰܠܺܝܩܰܬ. ܒܪ݄ܟ ܠܶܗ ܘܪܰܒ̥݄ܥ ܐܟ̥ ܕܽܗ̄ܘ ܐܰܪܝܳܐ، ܘ݄ܐܟ̥ ܕܽܗ̄ܘ ܓܽܘܪܝܳܐ ܕܽܗ̄ܘ ܐܰܪܝܳܐ، ܘܡܰܢ ܓܡܰܩ݄ܡ ܠܶܗ؟ 10ܗ̄ܺܝ ܚܰܛܪܳܐ ܕܽܗ̄ܘ ܫܽܘܠܛܳܢܳܐ ܠ݄ܐ ܟ݄ܐܙّܰܗ ܡܶܢ̱ ܝܺܗܽܘܕ̥ܳܐ، ܘܫܰܠܺܝܛܳܐ ܠ݄ܐ ܓܡ݄ܩܛ݄ܥ ܡܽܗ̄ܘ ܙܰܪܥܰܝܕ̥ܶܗ ܗ݄ܠ ܕܳܐܬ̥ܶܐ ܗܰܘܳܐ ܕܕܺܝܕ̥ܶܗ ܝܳܐ (ܗ̄ܺܝ ܡܰܠܟܽܘܬ̥ܳܐ)، ܘܶܐܠܶܗ ܟܢܳܛܪܺܝ ܗ̄ܰܥّܰܡ̈ܶܐ. 11ܓܡܰܐܣ݄ܪ ܒܺܗ̄ܝ ܣܰܬܳܐ ܗ̄ܽܘ ܥܺܝܠܰܝܕ̥ܶܗ، ܘܒܽܗ̄ܘ ܟܰܪܣܒ̥ܳܢܳܐ ܕܺܗ̄ܝ ܣܰܬܳܐ ܗ̄ܽܘ ܐܰܒܪܳܐ ܕܺܗ̄ܝ ܚܡ݄ܪܬܰܝܕ̥ܶܗ. ܓܡܰܚܘ݄ܪ ܒܽܗ̄ܘ ܚܰܡܪܳܐ ܗ̄ܽܘ ܠܒܽܘܫܰܝܕ̥ܶܗ، ܘܒܽܗ̄ܘ ܐܰܕܡܳܐ ܕܰܥّܶܢܒ̥̈ܶܐ ܗ̄ܽܘ ܠܒܽܘܫܰܝܕ̥ܶܗ. 12ܓܒܳܪܩܺܝ ܥܰܝܢ̈ܳܬ̥ܶܗ ܡܽܗ̄ܘ ܚܰܡܪܳܐ، ܘ݄ܟܚܰܘܪܺܝ ܥܰܪ̈ܫܳܢܶܗ ܡܽܗ̄ܘ ܚܰܠܒ̥ܳܐ.
13”ܙܒܳܘܠܽܘܢ ܥܰܠ ܣܰܦ̊ܘ̈ܳܬ̥ܳܐ ܕܰܝّܰܡ̈ܶܐ ܟܝܳܬܽܒ̥، ܘܗܺܝّܶܗ ܥܰܠ ܗ̄ܽܘ ܫܽܘܦܪܳܐ ܕܰܣܦܺܝܢ̈ܶܐ، ܘܽܗ̄ܘ ܬܚܽܘܡܰܝܕ̥ܶܗ ܗ݄ܠ ܨܰܝܕܳܢ.
14”ܐܺܝܣܳܟܳܪ ܓܰܒ̥ܪܳܐ ܓܰܒܳܪܳܐ ܕܟܳܪܳܒ̥݄ܥ ܒܰܝܢ ܗ̄ܰܕّܰܪ̈ܒܳܢܶܐ. 15ܘ݄ܚܙܶܐ ܠܶܗ ܕܺܗ̄ܝ ܕܽܘܟܬ̥ܰܝܕ̥ܶܗ ܫܰܦ݄ܪܬܳܐ ܝܳܐ، ܘܺܗ̄ܝ ܐܰܪܥܰܝܕ̥ܶܗ ܛܰܒ̥ܬܳܐ ܝܳܐ. ܘܡܰܢܚܰܬ ܠܶܗ ܟܰܬܦܶܗ ܠܽܗ̄ܘ ܫܽܘܥܒܳܕ̥ܳܐ، ܘܗܰܘܺܝ ܠܺܗ̄ܝ ܡܰܕܰܐܬܳܐ.
16”ܕܳܢ ܓܕܳܝ݄ܢ ܠܽܗ̄ܘ ܥܰܡܰܝܕ̥ܶܗ ܐܟ̥ ܕܚܰܕ̱ ܡܰܢ̱ ܫّܰܒܛ̈ܶܐ ܕܺܐܝܣܪܳܐܶܝܠ. 17ܓܕܳܗ̄ܘܶܐ ܕܳܢ ܚܰܘܝܳܐ ܕܥܰܠ ܗ̄ܽܘ ܕܰܪܒܳܐ، ܘܟܽܘܪܦܳܐ ܕܥܰܠ ܗ̄ܰܫܒ̥ܺܝ̈ܠܶܐ، ܟܢܳܟ݄ܬ ܗ̄ܽܘ ܣܘ̇ܣܝܳܐ ܒܽܗ̄ܘ ܥܰܪܩܽܘܒ̥ܰܝܕ̥ܶܗ، ܘ݄ܓܡܰܢܦ݄ܠ ܗ̄ܽܘ ܪܰܒ̥ܳܟ̥ܰܝܕ̥ܶܗ ܠܒ݄ܬ̥ܪܶܗ. 18ܠܽܗ̄ܘ ܦܽܘܪܩܳܢܰܝܕ̥ܳܟ̥ ܢܰܛ݄ܪ ܐ̱ܢܳܐ، ܡܳܪܝܳܐ.
19”ܓܳܕ ܒܓܰܝܣܳܐ ܓܢܳܦ݄ܩ، ܘܗܺܝّܶܗ ܓܓܳܪ݄ܫ ܗ̄ܽܘ ܥܰܪܩܽܘܒ̥ܳܐ. 20ܐܳܫܺܝܪ، ܛܰܒ̥ܬܳܐ ܝܳܐ ܗ̄ܺܝ ܐܰܪܥܰܝܕ̥ܶܗ، ܘܗܺܝّܶܗ ܓܕܳܗ̄ܒܶܐ ܡܽܐܘܟܠܳܐ ܠܰܡّܰܠܟ̈ܶܐ. 21ܢܰܦܬܳܠܺܝ، ܡܫܰܕܪܳܐ ܪܗܺܝܒܳܐ ܝܳܐ، ܟܳܗ̄ܒܶܐ ܡܰܐܡܪܳܐ ܫܰܦܺܝܪܳܐ.
22”ܐܰܒܪܶܗ ܕܺܗ̄ܝ ܬܰܪܒܺܝܬ̥ܳܐ ܝܳܐ ܝܰܘܣܶܦ، ܐܰܒܪܶܗ ܕܺܗ̄ܝ ܬܰܪܒܺܝܬ̥ܳܐ. ܚܘ̇ܪ ܝܰܐ ܥܰܝܢܳܐ: ܒܶܢܝܳܢܳܐ ܥܰܫܺܝܢܳܐ ܪܰܟܺܝܒ̥ܳܐ ܥܰܠ ܗ̄ܽܘ ܫܽܘܪܳܐ. 23ܘ݄ܡܩܰܛܰܠّܶܗ ܐܰܥܡܶܗ ܘܙܰܝܺܝܕܺܝ، ܘܩܰܝܺܝܡܺܝ ܐܰܥܠܶܗ ܪ̈ܺܝܫܶܐ ܕܰܚّܰܝ̈ܠܶܐ. 24ܐܶܠܳܐ ܕܰܥܺܝܪܳܐ ܒܚܰܝܠܳܐ ܗ̄ܺܝ ܩܶܫܬܰܝܕ̥ܶܗ. ܘܰܕܪ̈ܳܥܳܢܶܐ ܕܺܐܝܕ̥̈ܳܬ̥ܶܗ ܡܰܛ݄ܢ ܠܟܽܘܠّܶܗ ܒܽܗ̄ܘ ܚܰܝܠܳܐ ܕܰܐܠܳܗܶܗ ܕܝܰܥܩܽܘܒ، ܘܒܽܗ̄ܘ ܐ݄ܫܡܳܐ ܕܽܗ̄ܘ ܪܳܥܝܳܐ ܕܺܗ̄ܝ ܟܶܐܦܳܐ ܕܺܐܝܣܪܳܐܶܝܠ. 25ܐܰܠܳܗܳܐ ܕܒܰܒܳܟ̥ ܓ݄ܡܥܰܕܰܪ ܠܳܟ̥، ܘܺܐܝܠܫܰܕܰܝ ܓ݄ܡܒܰܪܰܟ̥ ܠܳܟ̥: ܗ̄ܺܝ ܒܽܘܪܟܬ̥ܳܐ ܕܺܗ̄ܝ ܫܡܰܝܳܐ ܡܶܢ̱ ܠܰܠܥ݄ܠ ܘܺܗ̄ܝ ܒܽܘܪܟܬ̥ܳܐ ܕܽܗ̄ܘ ܝܰܡܳܐ ܒܽܗ̄ܘ ܥܽܘܡܩܳܐ ܕܠܰܠܬܰܚ، ܗ̄ܺܝ ܒܽܘܪܟܬ̥ܳܐ ܕܰܬّܰܕ̈ܝܶܐ ܘܕܰܪّܰܚܡ̈ܶܐ. 26ܗ̄ܰܒّܽܘܪ̈ܟܳܬ̥ܳܐ ܕܒܰܒܳܟ̥ (ܐܰܠܳܟ̥) ܙܰܝܺܝܕܺܝ ܥܰܠ ܗ̄ܰܒّܽܘܪ̈ܟܳܬ̥ܳܐ ܕܰܒّܰܒ̈ܰܝܕ̥ܺܝ، ܗ݄ܠ ܕܗܰܘܺܝ ܗ̄ܽܘ ܣܰܒܪܳܐ ܕܟܳܐܬ̥ܶܐ ܡܺܗ̄ܝ ܫܡܰܝܳܐ ܕ݄ܠܥܳܠܰܡ ܥܰܠ ܪܺܝܫܶܗ ܕܝܰܘܣܶܦ، ܘܥܰܠ ܪܺܝܫܶܗ ܕܽܗ̄ܘ ܟܠܺܝܠܳܐ ܕܰܗ̄ܢ ܐܰܚ̈ܽܘܢܳܢܰܝܕ̥ܶܗ.
27”ܒܶܢܝܳܡܶܝܢ ܕܶܒ̥ܳܐ ܚܳܛܽܘܦܳܐ، ܒܨܰܦܪܳܐ ܓܕܳܐܟ̥݄ܠ ܗ̄ܽܘ ܡܶܕܶܐ ܕܨ݄ܕ ܠܶܗ، ܘܒ݄ܓܢܰܝܬܶܗ ܕܝܰܘܡܳܐ ܓܦܳܠ݄ܓ̥ ܗ̄ܽܘ ܡܶܕܶܐ ܕܦܰܝ݄ܫ ܡܽܗ̄ܘ ܨܰܝܕܳܐ.“
28ܗܰܢܺܝ ܢܶܝ ܗ̄ܰܬܪܰܥܣܰܪ ܫܰܒ̈ܛܶܐ ܕܺܐܝܣܪܳܐܶܝܠ ܟܽܘܠّܶܗ. ܘܗܰܢܳܐ ܝܳܐ ܗ̄ܽܘ ܡܶܕܶܐ ܕܐܡ݄ܪ ܠܰܗ ܠّܶܗ ܝܰܥܩܽܘܒ ܗ̄ܽܘ ܒܰܒܰܬّ̥ܶܗ. ܐܡ݄ܪ ܠܰܗ ܠّܶܗ ܘ݄ܡܒܰܪܟ̥ܺܝ ܠܶܗ، ܟܘ̇ܠ ܚܰܕ̱ ܐܟ̥ ܕܺܗ̄ܝ ܒܽܘܪܟܬ̥ܰܝܕ̥ܶܗ ܡܒܰܪܰܟ̥ ܠܶܗ.
29ܘܡܰܩܘܶܐ ܠܶܗ ܐܰܥܠܰܝّܶܗ ܘܐܡ݄ܪ ܠܰܗ ܠّܶܗ ܗ̄ܽܘ ܒܰܒܰܬّ̥ܶܗ: ”ܐܳܢܳܐ ܓܡܳܛܶܐ ܐ̱ܢܳܐ ܠܽܗ̄ܘ ܥܰܡܰܝܕ̥ܺܝ، ܩܒ̥ܰܪܽܘ ܠܺܝ ܓܰܒ ܗ̄ܰܒّܰܒ̈ܰܝܕ̥ܺܝ، ܒܺܗ̄ܝ ܡܥܰܪܬ̥ܳܐ ܕܒܺܗ̄ܝ ܚܰܩܠܳܐ ܕܥܶܦܪܽܘܢ ܗ̄ܽܘ ܚܺܝܬ̥ܳܝܳܐ، 30ܒܺܗ̄ܝ ܡܥܰܪܬ̥ܳܐ ܕܒܺܗ̄ܝ ܚܰܩܠܳܐ ܕܰܐܥ݄ܦܬܳܐ ܕܟ݄ܬ ܝܳܐ ܩ݄ܕ̱ܡ ܡܰܡܪܶܐ ܕܒܺܗ̄ܝ ܐܰܪܥܳܐ ܕ݄ܟܢܰܥܢ ܕ݄ܙܒ̥݄ܢ ܠܶܗ ܐܰܒܪܳܗܳܡ ܡܶܢ̱ ܥܶܦܪܽܘܢ ܗ̄ܽܘ ܚܺܝܬ̥ܳܝܳܐ ܠܝܽܘܪܬ̥ܳܢܳܐ ܕܩܰܒ̥ܪܳܐ. 31ܬܰܡܳܐ ܩܒ̥݄ܪّܶܗ ܠܰܐܒܪܳܗܳܡ ܘ݄ܠܣܰܪܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ. ܘܬܰܡܳܐ ܩܒ̥݄ܪّܶܗ ܠܺܐܝܣܚܳܩ ܘܪܰܦܩܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ. ܘܬܰܡܳܐ ܩܒ̥݄ܪ ܠܺܝ ܠܶܝܰܐ. 32ܗ̄ܺܝ ܚܰܩܠܳܐ ܘܺܗ̄ܝ ܡܥܰܪܬ̥ܳܐ ܕܟ݄ܬ ܝܳܐ ܐܶܒܰܗ ܙܒ̥ܺܝܢܺܝ ܡܰܗ̄ܢ ܐܰܒܢ̈ܶܐ ܕܚܺܝܬ̥.“ 33ܘܺܗ̄ܝ ܢܰܩܠܐ ܕܡܰܬ݄ܡ ܠܶܗ ܝܰܥܩܽܘܒ ܡܽܗ̄ܘ ܦܽܘܩܕܳܢܳܐ ܠܰܗ̄ܢ ܐܰܒܢ̈ܰܝܕ̥ܶܗ، ܦܫ݄ܛ ܠܶܗ ܪ̈ܰܓ̥ܠܳܬ̥ܶܗ ܒܽܗ̄ܘ ܥܰܪܣܳܐ (ܒܰܓّܰܠ̈ܶܐ)، ܘܟܰܝܽܒ̥ ܠܶܗ ܘܡܰܝ݄ܬ̥. ܘܡܰܛܺܝ ܠܓܰܒ ܗ̄ܽܘ ܥܰܡܰܝܕ̥ܶܗ.
Currently Selected:
ܣܶܦܪܳܐ ܕ݄ܒܪܺܝܬ̥ܳܐ 49: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
