ܣܶܦܪܳܐ ܕ݄ܒܪܺܝܬ̥ܳܐ 26

1ܘܗܰܘܺܝ ܟܰܦܢܳܐ ܒܺܗ̄ܝ ܐܰܪܥܳܐ، ܣܛܰܪ ܡܽܗ̄ܘ ܟܰܦܢܳܐ ܩܰܕ̱ܡܳܝܳܐ ܕܰܗ̄ܘܺܝ ܒܰܝّܰܘܡ̈ܶܐ ܕܰܐܒܪܳܗܳܡ. ܘܰܐܙّܶܗ ܐܺܝܣܚܳܩ ܠܓܰܒ ܐܰܒܺܝܡܰܠ݄ܟ ܗ̄ܽܘ ܡܰܠܟܳܐ ܕܰܦܠܶܫܬܳܝ̈ܶܐ، ܠܓܳܕ̥ܳܪ. 2ܘ݄ܚܙܶܐ ܐܶ‌ܠܶܗ ܡܳܪܝܳܐ ܘܐܡ݄ܪ ܠܶܗ ܠܶܗ: ”ܠܳܐ ܢܳܚܬܰܬ ܠܡܶܨܪܶܝܢ. ܝܺܬܰܒ̥ ܒܺܗ̄ܝ ܐܰܪܥܳܐ ܕܳܐܡܰܪ ܐ̱ܢܳܐ ܠܳܟ̥. 3ܥܡܰܪ ܒܺܗ̄ܝ ܐܰܪܥܰܬ̥ܶܐ، ܘ݄ܓܕܳܗ̄ܘܶܐ ܐ̱ܢܳܐ ܐܰܥܡܳܟ̥ ܘܓ݄ܡܒܰܪܰܟ̥ܢܳܟ̥، ܥܰܠ ܕܶܐ‎ܠܳܟ̥ ܘܠܽܗ̄ܘ ܙܰܪܥܰܝܕ̥ܳܟ̥ ܓܕܳܗ̄ܒܶܐ ܐ̱ܢܳܐ ܟܽܘܠّܶܗ ܗ̄ܰܡّܰܠܟ̈ܘܳܬ̥ܰܢܺܝ. ܘ݄ܓܣܳܝܰܡ ܐ̱ܢܳܐ ܒܽܗ̄ܘ ܝܺܡܳܝܳܐ ܕܺܝܡܶܐ ܠܺܝ ܠܰܐܒܪܳܗܳܡ ܒܰܒܳܟ̥. 4ܘ݄ܓܡܰܙ݄ܕ ܐ̱ܢܳܐ ܗ̄ܽܘ ܙܰܪܥܰܝܕ̥ܳܟ̥ ܐܟ̥ ܕܰܟّܘ̇ܟܒ̥̈ܶܐ ܕܺܗ̄ܝ ܫܡܰܝܳܐ، ܘ݄ܓܕܳܗ̄ܒܶܐ ܐ̱ܢܳܐ ܠܽܗ̄ܘ ܙܰܪܥܰܝܕ̥ܳܟ̥ ܟܽܘܠّܶܗ ܗ̄ܰܢ ܐܰܪ̈ܥܳܬ̥ܰܢܺܝ. ܘܒܽܗ̄ܘ ܙܰܪܥܰܝܕ̥ܳܟ̥ ܓܡܺܝܒܰܪܟ̥ܺܝ ܟܽܘܠّܶܗ ܗ̄ܰܥّܰܡ̈ܶܐ ܕܺܗ̄ܝ ܐܰܪܥܳܐ، 5ܥܰܠ ܕܫܰܡ݄ܥ ܐܰܒܪܳܗܳܡ ܗ̄ܽܘ ܡܰܐܡܪܰܝܕ̥ܺܝ، ܘ݄ܢܛ݄ܪ ܠܶܗ ܗ̄ܰܩّܳܢ̈ܽܘܢܰܝܕ̥ܺܝ ܘܰܦّܽܘܩܕ̈ܳܢܰܝܕ̥ܺܝ ܘܰܘّܰܥܕ̈ܰܝܕ̥ܺܝ ܘܰܗ̄ܢ ܢܳܡܽܘܣ̈ܰܝܕ̥ܺܝ.“ 6ܘܝܰܬܽܒ̥ ܐܺܝܣܚܳܩ ܒܓܳܕ̥ܳܪ.

7ܘ݄ܡܫܰܐܶ‍ܠّܰܗ ܠܶܗ ܗ̄ܰܢ ܢܳܫ̈ܶܐ ܕܽܗ̄ܘ ܐܰܬ̥ܪܳܐ ܥܰܠ ܗ̄ܺܝ ܐܰܢ̱ܬ̥ܬܰܝܕ̥ܶܗ، ܘܐܡ݄ܪ ܠܶܗ: ”ܚܳܬ̥ܺܝ ܝܳܐ،“ ܥܰܠ ܕܙܰܝ݄ܥ ܕܳܐܡ݄ܪ: ”ܗ̄ܺܝ ܐܰܢ̱ܬ̥ܬܰܝܕ̥ܺܝ ܝܳܐ،“ ܕܠ݄ܐ ܐܙّ݄ܢ ܩܳܛܠܺܝ ܠܶܗ ܗ̄ܰܢ ܢܳܫ̈ܶܐ ܕܽܗ̄ܘ ܐܰܬ̥ܪܳܐ ܠܰܫܰܢ ܪܰܦܩܳܐ، ܥܰܠ ܕܫܰܦ݄ܪܬܳܐ ܗ̄ܘܰܐ ܒܺܗ̄ܝ ܚܶܙܘܰܝܕ̥ܰܗ. 8ܘܡ݄ܐ ܕܦܰܝ݄ܫ ܬܰܡܳܐ ܝܰܘܡ̈ܶܐ ܓ̥ܰܠܰܒܶܐ، ܐܰܒܺܝܡܰܠ݄ܟ، ܗ̄ܽܘ ܡܰܠܟܳܐ ܕܰܦܠܶܫܬܳܝ̈ܶܐ، ܚ݄ܪ ܠܶܗ ܡܺܗ̄ܝ ܟܰܘܬ̥ܳܐ، ܘ݄ܚܙܶܐ ܠܶܗ ܠܺܐܝܣܚܳܩ ܟܰܐܠܶܗ ܟܡ݄ܦܨ݄ܚ ܥܰܡ ܪܰܦܩܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ. 9ܘ݄ܩܪܶܐ ܠܶܗ ܐܰܒܺܝܡܰܠ݄ܟ ܠܺܐܝܣܚܳܩ ܘܐܡ݄ܪ ܠܶܗ: ”ܟܰܐܠܰܗ ܗ̄ܺܝ ܐܰܢ̱ܬ̥ܬܰܝܕ̥ܳܟ̥ ܝܳܐ! ܐܰܝܕܰܪܒܳܐ ܐ݄ܡّܰܪ̱ܬ ܗ̄ܘܰܐ ܕܚܳܬ̥ܺܝ ܝܳܐ؟“ ܐܺܝܣܚܳܩ ܐܡ݄ܪ ܠܶܗ: ”ܡܺܐܝܕ̥ܶܗ ܕܐܡ݄ܪ ܠܺܝ: ܕܠ݄ܐ ܐܙّܶܗ ܡܳܝܰܬ̥ ܐ̱ܢܳܐ ܡܶܛܽܘܠܳܬ̥ܰܗ.“ 10ܘܐܡ݄ܪ ܠܶܗ ܠܶܗ ܐܰܒܺܝܡܰܠ݄ܟ: ”ܡ݄ܢܝܳܐ ܗܰܬ̥ܶܐ ܕܣ݄ܡ ܠܳܟ̥ ܐܶܒܰܢ؟ ܠܳܐ ܦܰܝ݄ܫ ܗ̄ܘܰܐ ܡܶܕܶܐ ܕܕܳܡ݄ܟ̥ ܢܳܫܳܐ ܡܽܗ̄ܘ ܥܰܡܳܐ ܥܰܡ ܗ̄ܺܝ ܐܰܢ̱ܬ̥ܬܰܝܕ̥ܳܟ̥، ܘ݄ܓܡܰܡܛܰܬ ܗ̄ܘܰܐ ܐܰܥܠܰܢ ܚܛܺܝܬ̥ܳܐ.“ 11ܘܡܰܩܘܶܐ ܠܶܗ ܐܰܒܺܝܡܰܠ݄ܟ ܥܰܠ ܗ̄ܽܘ ܥܰܡܳܐ ܟܽܘܠܶܗ ܘܐܡ݄ܪ ܠܶܗ: ”ܡܰܢ ܕܡܰܟܽܒ̥ ܠܽܗ̄ܘ ܓܰܒ̥ܪܰܢܳܐ ܘܠܺܗ̄ܝ ܐܰܢ̱ܬ̥ܬܰܝܕ̥ܶܗ ܩܰܛܠܳܐ ܓܡ݄ܩܛ݄ܠ.“

12ܘ݄ܙܪ݄ܥ ܠܶܗ ܐܺܝܣܚܳܩ ܒܺܗ̄ܝ ܐܰܪܥܳܐ، ܘܰܐܬ̥ܺܝ ܠܶܗ ܒܺܗ̄ܝ ܫܰܢ̱ܬܰܝܳܐ ܡܳܐܐ ܕ݄ܣܥܳܪ̈ܶܐ. ܘܡܳܪܝܳܐ ܡܒܰܪܰܟ̥ ܠܶܗ. 13ܘܗܰܘܺܝ ܢܳܫܳܐ ܪܰܒܳܐ، ܘܟܘ̇ܠ ܕܟܳܐܬ̥ܶܐ ܝܳܪܰܒ̥ ܗ̄ܘܰܐ ܗ݄ܠ ܕܝܰܪܽܒ̥ ܓ̥ܰܠܰܒܶܐ. 14ܘܗܰܘܺܝ ܠܶܗ ܩܰܢܝܳܢܳܐ ܕ݄ܥܘܳܢ̈ܶܐ ܘܩܰܢܝܳܢܳܐ ܕܬܰܘܪ̈ܶܐ ܘ݄ܓܪ̈ܶܝܥܶܐ ܓ̥ܰܠܰܒܶܐ. ܘ݄ܚܣ݄ܡّܶܗ ܐܶܒܶܗ ܗ̄ܰܦܠܶܫܬܳܝ̈ܶܐ. 15ܘܟܽܘܠّܶܗ ܗ̄ܰܒّܺܐܪ̈ܶܐ ܕ݄ܚܦܺܝܪ݄ܢّܶܗ ܗ̄ܰܓܪ̈ܶܝܥܶܐ ܕܽܗ̄ܘ ܒܰܒܳܐ، ܒܰܝّܰܘܡ̈ܶܐ ܕܰܐܒܪܳܗܳܡ ܗ̄ܽܘ ܒܰܒܳܐ، ܛܡܺܝܪ݄ܢّܶܗ ܗ̄ܰܦܠܶܫܬܳܝ̈ܶܐ ܘ݄ܡܠܰܢّܶܗ ܥܰܦܪܳܐ. 16ܘܐܡ݄ܪ ܠܶܗ ܐܰܒܺܝܡܰܠ݄ܟ ܠܺܐܝܣܚܳܩ: ”ܙܳܟ̥ ܡܶܢ̱ ܓܰܒܰܢ ܥܰܠ ܕܰܗ̄ܘܰܬ ܒܚܰܝܠܳܐ ܙ݄ܕ ܡܶܢܰܢ.“ 17ܘܰܐܙّܶܗ ܐܺܝܣܚܳܩ ܡܶܢ̱ ܬܰܡܳܐ ܘ݄ܫܪܶܐ ܠܶܗ ܒܽܗ̄ܘ ܢܰܚܠܳܐ ܕܓܳܕܳܪ ܘܝܰܬܽܒ̥ ܬܰܡܳܐ.

18ܘܕܰܥ݄ܪ ܐܺܝܣܚܳܩ ܘ݄ܚܦ݄ܪ ܠܶܗ ܗ̄ܰܒّܺܐܪ̈ܶܐ ܕܰܡّܰܝ̈ܶܐ ܕ݄ܚܦܺܝܪ݄ܢّܶܗ ܗ̄ܰܓܪ̈ܶܝܥܶܐ ܕܽܗ̄ܘ ܒܰܒܰܝܕ̥ܶܗ ܒܰܝّܰܘܡ̈ܶܐ ܕܰܐܒܪܳܗܳܡ ܗ̄ܽܘ ܒܰܒܳܐ، ܘ݄ܛܡܺܝܪ݄ܢّܶܗ ܗ̄ܰܦܠܶܫܬܳܝ̈ܶܐ ܡܶܢ̱ ܒ݄ܬ̥݄ܪ ܕܡܰܝ݄ܬ̥ ܐܰܒܪܳܗܳܡ. ܘ݄ܩܪܶܐ ܠܰܗ ܠّܶܗ ܐ݄ܫܡܳܢ̈ܶܐ ܐܟ̥ ܕܰܗ̄ܢ ܐ݄ܫܡܳܢ̈ܶܐ ܕ݄ܩܪܶܐ ܗ̄ܘܰܐ ܠّܶܗ ܗ̄ܽܘ ܒܰܒܳܐ. 19ܘ݄ܚܦ݄ܪّܶܗ ܗ̄ܰܓܪ̈ܶܝܥܶܐ ܕܺܐܝܣܚܳܩ ܒܽܗ̄ܘ ܢܰܚܠܳܐ، ܘ݄ܚܙܰܠّܶܗ ܬܰܡܳܐ ܒܺܐܪܳܐ ܕܡܰܝ̈ܶܐ ܚܰܝ̈ܶܐ. 20ܘܰܪّܳܥܝ̈ܶܐ ܕܓܳܕܳܪ ܩܰܝܺܝܡܺܝ ܥܰܠ ܗ̄ܰܪّܳܥܝ̈ܶܐ ܕܺܐܝܣܚܳܩ ܘܐܡ݄ܪّܶܗ: ”ܕܺܝܕ̥ܰܢ ܢܶܝ ܗ̄ܰܡّܰܝ̈ܶܐ.“ ܘ݄ܩܪܶܐ ܠܶܗ ܐ݄ܫܡܰܗ ܕܺܗ̄ܝ ܒܺܐܪܳܐ ”ܥܰܣܩܳܐ“ ܥܰܠ ܕܗܰܘܺܝ ܥܰܣܩܽܘܬ̥ܳܐ ܐܰܥܡܶܗ. 21ܘ݄ܚܦ݄ܪّܶܗ ܒܺܐܪܳܐ ܚܪܶܬܳܐ، ܘܰܐܥܠܰܗ ܣܬܶܝ ܡܓܰܪܰܠّܶܗ ܚܕ̥ܳܕ̥̈ܶܐ. ܘ݄ܩܪܶܐ ܠܶܗ ܐ݄ܫܡܰܗ ܣܳܛܳܢܳܐ. 22ܘ݄ܢܩܺܝܠ ܡܶܢ̱ ܬܰܡܳܐ ܘ݄ܚܦ݄ܪّܶܗ ܒܺܐܪܳܐ ܚܪܶܬܳܐ ܘܠܳܐ ܡܓܰܪܰܠّܶܗ ܚܕ̥ܳܕ̥̈ܶܐ ܐܰܥܠܰܗ. ܘ݄ܩܪܶܐ ܠܶܗ ܐ݄ܫܡܰܗ ܪܰܚܒܽܘܬ̥. ܘܐܡ݄ܪ ܠܶܗ: ”ܐ݄ܥܕܳܐ ܡܰܪܘܰܚ ܠܶܗ ܠܰܢ ܡܳܪܝܳܐ ܘܡܰܙ݄ܕ ܠܶܗ ܠܰܢ ܒܺܗ̄ܝ ܐܰܪܥܳܐ.“ 23ܘܣܰܠ݄ܩ ܡܶܢ̱ ܬܰܡܳܐ ܠܒܺܪܫܒܰܥ. 24ܘ݄ܓܠܶܐ ܐܰܥܠܶܗ ܡܳܪܝܳܐ ܒܽܗ̄ܘ ܠܰܠܝܰܘܳܐ ܘܐܡ݄ܪ ܠܶܗ ܠܶܗ: ”ܐܳܢܳܐ ܐ̱ܢܳܐ ܗ̄ܽܘ ܐܰ‌ܠܳܗܳܐ ܕܰܐܒܪܳܗܳܡ ܗ̄ܽܘ ܒܰܒܰܝܕ̥ܳܟ̥، ܠܳܐ ܙܰܝܥܰܬ، ܡܺܐܝܕ̥ܶܗ ܕܰܐܥܡܳܟ̥ ܐ̱ܢܳܐ، ܘܓ݄ܡܒܰܪܰܟ̥ܢܳܟ̥ ܘ݄ܓܡܰܙ݄ܕ ܐ̱ܢܳܐ ܗ̄ܽܘ ܙܰܪܥܰܝܕ̥ܳܟ̥ ܠܰܫܰܢ ܐܰܒܪܳܗܳܡ ܗ̄ܽܘ ܥܰܒܕܰܝܕ̥ܺܝ.“ 25ܘ݄ܒܢܶܐ ܠܶܗ ܬܰܡܳܐ ܡܰܕ̥݄ܒܚܳܐ، ܘ݄ܩܪܶܐ ܠܶܗ ܒ݄ܐܫܡܶܗ ܕܡܳܪܝܳܐ. ܘܡܰܩ݄ܡ ܠܶܗ ܬܰܡܳܐ ܗ̄ܽܘ ܡܰܫܟܢܰܝܕ̥ܶܗ. ܘܰܓܪ̈ܶܝܥܶܐ ܕܺܐܝܣܚܳܩ ܚܦ݄ܪّܶܗ ܬܰܡܳܐ ܒܺܐܪܳܐ.

26ܘܰܐܒܺܝܡܰܠ݄ܟ ܐܰܬ̥ܺܝ ܠܣܺܝܕܶܗ ܡܶܢ̱ ܓܳܕ̥ܳܪ، ܘܰܐܚܙܽܘܬ̥ ܗ̄ܽܘ ܪܳܚܡܰܝܕ̥ܶܗ، ܘܦܺܝܟ̥ܶܠ ܗ̄ܽܘ ܪܰܒܳܐ ܕܽܗ̄ܘ ܚܰܝܠܰܝܕ̥ܶܗ. 27ܘܐܡ݄ܪ ܠܰܗ ܠّܶܗ ܐܺܝܣܚܳܩ: ”ܡ݄ܢܝܳܐ ܕܰܐܬ̥ܺܝܬܽܘ ܠܣܺܝܕܺܝ؟ ܗܰܬܽܘ ܡܥܰܢܰܬܟ̥ܽܘ ܡܶܢܺܝ، ܘ݄ܡܫܰܕܰܪܟ̥ܽܘ ܠܺܝ ܡܶܢ̱ ܣܺܝܕܰܝܟ̥ܽܘ؟“ 28ܘܐܡ݄ܪّܰܗ ܠܶܗ: ”ܚܙܳܝܳܐ ܚܙܶܐ ܠܰܢ ܕܗܰܘܺܝ ܡܳܪܝܳܐ ܐܰܥܡܳܟ̥، ܘܐܡ݄ܪ ܠܰܢ ܛܪܳܐ ܗܳܘܶܐ ܝܺܡܳܝܳܐ ܒܰܝܢ ܐܶ‌ܠܰܢ ܘܶܐ‌ܠܳܟ̥، ܘ݄ܕܡܰܩܺܝܡܺܝܢܰܐ ܩܝܳܡܳܐ ܐܰܥܡܳܟ̥. 29ܕܠܳܐ ܣܰܝܡܰܬ ܠܰܢ ܒܺܝܫܬܳܐ، ܐܟ̥ ܕܐܰܚܢܰܐ ܠܳܐ ܡܰܟܽܒ̥ ܠܰܢ ܠܳܟ̥، ܘܐܟ̥݄ ܕܣ݄ܡ ܠܰܢ ܐܰܥܡܳܟ̥ ܛܳܒ̥ܽܘܬ̥ܳܐ ܘ݄ܡܫܰܕܰܪ ܠܰܢ ܠܳܟ̥ ܒ݄ܫܠܳܡܳܐ. ܐ݄ܥܕܳܐ ܗܰܬ ܗ̄ܰܬ ܗ̄ܽܘ ܡܒܰܪܟ̥ܳܐ ܕܡܳܪܝܳܐ.“ 30ܘܣ݄ܡ ܠܰܗ ܠّܶܗ ܡܽܐܘܟܠܳܐ، ܘܰܐܟ̥݄ܠّܶܗ ܘ݄ܫܬܰܠّܶܗ. 31ܘ݄ܒܨܰܦܪܳܐ ܩܶܕܰܡܬܳܐ ܝܺܡܰܠّܶܗ ܚܰܕ̱ ܠܽܗ̄ܘ ܐܰܚܽܘܢܳܐ، ܘ݄ܡܫܰܕܪܺܝ ܠܶܗ ܐܺܝܣܚܳܩ. ܘܰܐܙّ݄ܢ ܡܶܢ̱ ܣܺܝܕ̥ܶܗ ܒ݄ܫܠܳܡܳܐ. 32ܘܗܰܘܺܝ ܒܽܗ̄ܘ ܝܰܘܡܰܘܳܐ، ܘܰܐܬ̥݄ܢ ܗ̄ܰܓܪ̈ܶܝܥܶܐ ܕܺܐܝܣܚܳܩ ܘܡܰܘܕ̥ܰܥّܰܗ ܠܶܗ ܥܰܠ ܗ̄ܺܝ ܩܰܛܪܳܐ ܕܺܗ̄ܝ ܒܺܐܪܳܐ ܕ݄ܚܦ݄ܪّܶܗ ܘܐܡ݄ܪّܰܗ ܠܶܗ: ”ܚܙܶܐ ܠܰܢ ܡܰܝ̈ܶܐ.“ 33ܘ݄ܩܪܶܐ ܠܶܗ ܐ݄ܫܡܰܗ ”ܣܰܒ̥ܥܳܐ،“ ܡܰܗ̄ܘܟ̥ܰܐ ܩܪܶܐ ܠܶܗ ܐ݄ܫܡܰܗ ܕܺܗ̄ܝ ܡܕ̥ܺܝܢ̱ܬܳܐ ܒܺܪܫܒܰܥ ܗ݄ܠ ܠܰܐܕܝܰܘܡܰܐ.

34ܘܗܰܘܺܝ ܥܺܣܽܘ ܐܰܒܪܶܗ ܕܰܐܪܒܥܺܝ ܐ݄ܫܢ̈ܶܐ، ܘܡ݄ܕ ܠܶܗ ܐܰܢ̱ܬ̥ܬܳܐ ܝܺܗܽܘܕܺܝܬ ܗ̄ܺܝ ܒܰܪܬ̥ܳܐ ܕܒܶܪܺܝ ܗ̄ܽܘ ܚܺܝܬ̥ܳܝܳܐ ܘ݄ܠܒܶܣܡܰܬ ܗ̄ܺܝ ܒܰܪܬ̥ܳܐ ܕܰܐ‌ܠܽܘܢ ܗ̄ܽܘ ܚܰܘܳܝܳܐ، 35ܘܡܰܡܺܝܪܳܐ ܗ̄ܺܝ ܪܽܘܚܳܐ ܕܺܐܝܣܚܳܩ ܘ݄ܕܪܰܦܩܳܐ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 26: ܟܬܒܐ

Highlight

Copy