ܣܶܦܪܳܐ ܕ݄ܒܪܺܝܬ̥ܳܐ 27

1ܘܗܰܘܺܝ ܗ̄ܺܝ ܢܰܩܠܐ ܕܡܰܣܽܒ̥ ܠܶܗ ܐܺܝܣܚܳܩ ܘܢܰܩ݄ܨ ܗ̄ܽܘ ܚܙܳܝܳܐ ܕܥܰܝܢ̈ܳܬ̥ܶܗ، ܩܪܶܐ ܠܶܗ ܠܥܺܝܣܽܘ ܗ̄ܽܘ ܐܰܒܪܰܝܕ̥ܶܗ ܗ̄ܽܘ ܪܰܒܳܐ، ܘܐܡ݄ܪ ܠܶܗ ܠܶܗ: ”ܐܰܒܪܺܝ.“ ܘܐܡ݄ܪ ܠܶܗ: ”ܗܰܪܟܶܐ ܐܳܢܳܐ.“ 2ܘܐܡ݄ܪ ܠܶܗ ܠܶܗ ܐܺܝܣܚܳܩ: ”ܟܰܐܠܶܗ ܡܰܣܽܒ̥ ܠܺܝ ܘܠ݄ܐ ܟܳܐܕ̥ܰܥ ܐ̱ܢܳܐ ܗ̄ܽܘ ܝܰܘܡܳܐ ܕܡܳܝܰܬ̥ ܐ̱ܢܳܐ ܐܶܒܶܗ. 3ܐܳܥܕܳܐ ܡܘ̇ܕ ܗ̄ܰܣّܶܦܳܩ̈ܰܝܕ̥ܳܟ̥: ܗ̄ܽܘ ܣܰܝܦܰܝܕ̥ܳܟ̥ ܘܺܗ̄ܝ ܩܶܫܬܰܝܕ̥ܳܟ̥ ܘ݄ܢܦܰܩ ܠܽܗ̄ܘ ܡܰܕ̥݄ܒܪܳܐ ܘܨܘ̇ܕ ܨܰܝܕܳܐ، 4ܘܣܘ̇ܡ ܠܺܝ ܒܽܘܫܳܠܳܐ ܐܟ̥ ܕܟܳܪܳܚܰܡ ܐ̱ܢܳܐ ܘܡܰܝܬܺܝ ܠܺܝ ܕܳܐܟ̥ܰܠ ܐ̱ܢܳܐ ܠܰܫܰܢ ܗ̄ܺܝ ܢܰܦܫܰܝܕ̥ܺܝ ܡܒܰܪܟ̥ܳܐ ܠܳܟ̥ ܡܶܩ݄ܕ̱ܡ ܕܡܳܝܰܬ̥ ܐ̱ܢܳܐ.“

5ܘܪܰܦܩܳܐ ܫܰܡܺܝܥܳܐ ܗ̄ܺܝ ܢܰܩܠܐ ܕܐܡ݄ܪ ܠܶܗ ܐܺܝܣܚܳܩ ܠܥܺܝܣܽܘ ܗ̄ܽܘ ܐܰܒܪܰܝܕ̥ܶܗ. ܘܰܐܙّܶܗ ܥܺܝܣܽܘ ܠܺܗ̄ܝ ܚܰܩܠܳܐ ܕܨܳܝ݄ܕ ܨܰܝܕܳܐ ܕܡܰܡܛܶܐ ܠܶܗ. 6ܘܪܰܦܩܳܐ ܐܡ݄ܪ ܠܰܗ ܠܝܰܥܩܽܘܒ ܗ̄ܽܘ ܐܰܒܪܰܝܕ̥ܰܗ: ”ܟܰܐܠܶܗ ܫܰܡܺܝܥܳܐ ܐ̱ܢܳܐ ܠܒܰܒܳܟ̥ ܕܐܡ݄ܪ ܠܶܗ ܠܥܺܝܣܽܘ ܐܰܚܽܘܢܳܟ̥: 7ܡܰܡܛܺܝ ܠܺܝ ܨܰܝܕܳܐ ܘܣܘ̇ܡ ܠܺܝ ܒܽܘܫܳܠܳܐ، ܘܕܳܐܟ̥ܰܠ ܐ̱ܢܳܐ ܘ݄ܡܒܰܪܰܟ̥ܢܳܟ̥ ܩ݄ܕ̱ܡ ܡܳܪܝܳܐ ܡܶܩ݄ܕ̱ܡ ܕܡܳܝܰܬ̥ ܐ̱ܢܳܐ. 8ܐܰܒܪܺܝ، ܐܳܥܕܳܐ ܫܡܰܥ ܠܽܗ̄ܘ ܡܰܐܡܪܰܝܕ̥ܺܝ ܘܣܘ̇ܡ ܗ̄ܽܘ ܡܶܕܶܐ ܕ݄ܐܡّܳܪ̱ܐ ܐ̱ܢܳܐ ܠܳܟ̥: 9ܙܳܟ̥ ܠܽܗ̄ܘ ܩܰܛܥܳܐ ܘܡܰܡܛܰܝ ܠܺܝ ܡܶܢ̱ ܬܰܡܳܐ ܬܪܶܝ ܨܰܦܽܘܪ̈ܶܐ ܛܳܒ̥̈ܶܐ ܕܥܶܙ̈ܶܐ، ܘ݄ܓܣܰܝܡܰܢّܶܗ ܒܽܘܫܳܠܳܐ ܠܒܰܒܳܟ̥ ܐܟ̥ ܕܟܳܪܳܚ݄ܡ. 10ܘܡܰܘܒ݄ܠ ܠܒܰܒܳܟ̥ ܕܳܐܟ̥݄ܠ، ܘܓ݄ܡܒܰܪܰܟ̥ ܠܳܟ̥ ܩ݄ܕ̱ܡ ܡܳܪܝܳܐ ܡܶܩ݄ܕ̱ܡ ܕܡܳܝ݄ܬ̥.“ 11ܘܐܡ݄ܪ ܠܶܗ ܝܰܥܩܽܘܒ ܠܪܰܦܩܳܐ ܗ̄ܺܝ ܐܶܡܳܐ: ”ܟܰܐܠܶܗ ܥܺܝܣܽܘ ܐܰܚܽܘܢܺܝ ܓܰܒ̥ܪܳܐ ܣܰܥܪܳܢܳܐ ܝܳܐ ܘܳܐܢܳܐ ܓܰܒ̥ܪܳܐ ܫܥܳܥܳܐ ܐ̱ܢܳܐ (ܕܠܳܐ ܣܰܥܪܳܐ). 12ܕܠ݄ܐ ܐܙّܶܗ ܒܰܒܺܝ ܡܡܰܫܡ݄ܫ ܐܰܥܠܺܝ ܘܗܳܘܶܐ ܐ̱ܢܳܐ ܒܥܰܝܢ̈ܳܬ̥ܶܗ ܐܟ̥ ܕܢܳܫܳܐ ܢܟ̥ܺܝܠܳܐ. ܘ݄ܓܡܰܡܛܝܰܬ ܐܰܥܠܺܝ ܠܰܘ̈ܛܳܬ̥ܳܐ ܘܠܳܐ ܒܽܘܪ̈ܟܳܬ̥ܳܐ.“ 13ܘܺܗ̄ܝ ܐܶܡܳܐ ܐܡ݄ܪ ܠܰܗ ܠܶܗ: ”ܐܰܒܪܺܝ، ܗ̄ܰܠّܰܘ̈ܛܳܬ̥ܰܝܕ̥ܳܟ̥ ܛܪܳܐ ܗܳܘ݄ܢ ܐܰܥܠܺܝ، ܒܶܠܚܽܘܕ̥ܶܗ ܫܡܰܥ ܠܽܗ̄ܘ ܡܰܐܡܪܰܝܕ̥ܺܝ ܘܙܳܟ̥ ܡܰܡܛܺܝ ܠܺܝ.“ 14ܘܰܐܙّܶܗ ܡ݄ܕ ܠܶܗ ܘܡܰܝܬܶܐ ܠܶܗ ܠܺܗ̄ܝ ܐܶܡܳܐ. ܘܺܗ̄ܝ ܐܶܡܳܐ ܣ݄ܡ ܠܰܗ ܒܽܘܫܳܠܳܐ ܐܟ̥ ܕܟܳܪܳܚ݄ܡ ܗ̄ܽܘ ܒܰܒܳܐ. 15ܘܡ݄ܕ ܠܰܗ ܪܰܦܩܳܐ ܗ̄ܰܠܒܽܘܫ̈ܶܐ ܫܰܦܺܝܪ̈ܶܐ ܕܥܺܝܣܽܘ ܗ̄ܽܘ ܐܰܒܪܰܝܕ̥ܰܗ ܗ̄ܽܘ ܪܰܒܳܐ ܕܟ݄ܬܢܶܝ ܐܰܥܡܰܗ ܒܽܗ̄ܘ ܒܰܝܬܳܐ، ܘܡܰܠܒ̥ܫܺܝ ܠܰܗ ܠܝܰܥܩܽܘܒ ܗ̄ܽܘ ܐܰܒܪܰܝܕ̥ܰܗ ܗ̄ܽܘ ܙܥܽܘܪܳܐ. 16ܘܰܓّܰܠܕ̈ܶܐ ܕܰܨّܰܦܽܘܪ̈ܶܐ ܕܰܥّܶܙ̈ܶܐ ܡܰܠܒ̥ܫܺܝ ܠܰܗ ܥܰܠ ܐܺܝܕ̥̈ܳܬ̥ܶܗ ܘܥܰܠ ܩܕ̥ܳܠܶܗ ܗ̄ܽܘ ܫܥܺܝܥܳܐ (ܕܠܰܝܒܶܗ ܣܰܥܪܳܐ). 17ܘܗܽܒ̥ ܠܰܗ ܗ̄ܽܘ ܒܽܘܫܳܠܳܐ ܘܽܗ̄ܘ ܠܰܚܡܳܐ ܕܣ݄ܡ ܠܰܗ ܠܝܰܥܩܽܘܒ ܗ̄ܽܘ ܐܰܒܪܰܝܕ̥ܰܗ.

18ܘܡܰܥܒܰܪ ܠܶܗ ܠܽܗ̄ܘ ܒܰܒܳܐ ܘܐܡ݄ܪ ܠܶܗ: ”ܒܰܒܺܝ.“ ܘܐܡ݄ܪ ܠܶܗ: ”ܗܰܪܟܶܐ ܐܳܢܳܐ.“ ܘܐܡ݄ܪ ܠܶܗ: ”ܡܰܢ ܗܰܬ ܐܰܒܪܺܝ؟“ 19ܘܐܡ݄ܪ ܠܶܗ ܝܰܥܩܽܘܒ ܠܽܗ̄ܘ ܒܰܒܳܐ: ”ܐܳܢܳܐ ܐ̱ܢܳܐ ܗ̄ܽܘ ܐܰܒܪܰܝܕ̥ܳܟ̥ ܗ̄ܽܘ ܒܽܘܟ̥ܪܰܝܕ̥ܳܟ̥ ܥܺܝܣܽܘ. ܣ݄ܡ ܠܺܝ ܐܟ̥ ܕܐܡ݄ܪ ܠܳܟ̥ ܠܺܝ. ܩܘ̇ܡ ܝܺܬܰܒ̥ ܘܰܐܟ̥ܘ̇ܠ ܡܽܗ̄ܘ ܨܰܝܕܰܝܕ̥ܺܝ، ܠܰܫܰܢ ܕ݄ܡܒܰܪܟ̥ܳܐ ܠܺܝ ܗ̄ܺܝ ܢܰܦܫܰܝܕ̥ܳܟ̥.“ 20ܘܐܡ݄ܪ ܠܶܗ ܐܺܝܣܚܳܩ ܠܽܗ̄ܘ ܐܰܒܪܰܝܕ̥ܶܗ: ”ܡ݄ܢܝܳܐ ܗܰܢܳܐ ܕܰܗ̄ܘܟ̥ܰܐ ܒܣܽܘܪܗܳܒܳܐ ܚܙܶܐ ܠܳܟ̥، ܐܰܒܪܺܝ؟“ ܘܐܡ݄ܪ ܠܶܗ: ”ܗ̄ܽܘ ܡܶܕܶܐ ܕ݄ܡܛܰܝܰܒ ܠܶܗ ܡܳܪܝܳܐ ܐܰ‌ܠܳܗܰܝܕ̥ܳܟ̥ ܩܽܘܕ̱ܡܺܝ.“ 21ܘܐܡ݄ܪ ܠܶܗ ܐܺܝܣܚܳܩ ܠܝܰܥܩܽܘܒ ܗ̄ܽܘ ܐܰܒܪܰܝܕ̥ܶܗ: ”ܡܩܰܪܽܒ̥ ܕ݄ܡܡܰܫܡܰܫܢܳܟ̥، ܐܰܒܪܺܝ، ܐܶܢ ܗܰܬ ܗ̄ܰܬ ܐܰܒܪܺܝ ܥܺܝܣܽܘ ܐܰܘ ܠܳܐ.“ 22ܘ݄ܡܩܰܪܰܒ̥ ܠܶܗ ܝܰܥܩܽܘܒ ܠܓܰܒ ܐܺܝܣܚܳܩ ܗ̄ܽܘ ܒܰܒܳܐ ܘ݄ܡܡܰܫܡܰܫ ܠܶܗ ܘܐܡ݄ܪ ܠܶܗ: ”ܗ̄ܽܘ ܩܳܠܳܐ ܕܝܰܥܩܽܘܒ ܝܳܐ ܘܺܗ̄ܝ ܓܝܰܫܬܳܐ ܕܺܐܝܕ̥̈ܳܬ̥ܶܗ ܕܥܺܝܣܽܘ ܝܳܐ.“ 23ܘܠܰܐ ܐܕ̥݄ܥ ܠܶܗ ܥܰܠ ܕܰܗ̄ܘ݄ܢ ܗ̄ܘܰܘ̱ ܐܺܝܕ̥̈ܳܬ̥ܶܗ ܒܣܰܥܪܳܐ ܐܟ̥ ܕܰܗ̄ܢ ܐܺܝܕ̥̈ܳܬ̥ܶܗ ܕܥܺܝܣܽܘ ܗ̄ܽܘ ܐܰܚܽܘܢܳܐ. ܘ݄ܡܒܰܪܰܟ̥ ܠܶܗ. 24ܘܐܡ݄ܪ ܠܶܗ: ”ܗܰܬ ܗ̄ܰܬ ܗܰܢܳܐ، ܗ̄ܽܘ ܐܰܒܪܰܝܕ̥ܺܝ ܥܺܝܣܽܘ؟“ ܘܐܡ݄ܪ ܠܶܗ: ”ܐܳܢܳܐ ܐ̱ܢܳܐ.“ 25ܘܐܡ݄ܪ ܠܶܗ ܠܶܗ: ”ܡܩܰܪܽܒ̥ ܠܺܝ ܕܳܐܟ̥ܰܠ ܐ̱ܢܳܐ ܡܽܗ̄ܘ ܨܰܝܕܳܐ ܕܽܗ̄ܘ ܐܰܒܪܰܝܕ̥ܺܝ ܕ݄ܡܒܰܪܟ̥ܳܐ ܠܳܟ̥ ܗ̄ܺܝ ܢܰܦܫܰܝܕ̥ܺܝ.“ ܘ݄ܡܩܰܪܰܒ̥ ܠܶܗ ܠܶܗ ܘܰܐܟ̥ܺܝܠ ܠܶܗ ܘܡܰܡܛܶܐ ܠܶܗ ܠܶܗ ܚܰܡܪܳܐ ܘ݄ܫܬܶܐ ܠܶܗ. 26ܘܐܡ݄ܪ ܠܶܗ ܠܶܗ ܐܺܝܣܚܳܩ ܗ̄ܽܘ ܒܰܒܳܐ: ”ܡܩܰܪܽܒ̥ ܢܫܰܩ ܠܺܝ، ܐܰܒܪܺܝ.“ 27ܘ݄ܡܩܰܪܰܒ̥ ܠܶܗ ܘ݄ܢܫ݄ܩ ܠܶܗ. ܘ݄ܢܩ݄ܚ ܠܶܗ ܪܶܝܚܳܐ ܕܰܠܒܽܘܫ̈ܰܝܕ̥ܶܗ، ܘ݄ܡܒܰܪܰܟ̥ ܠܶܗ ܘܐܡ݄ܪ ܠܶܗ: ”ܚܙܰܝܽܘ ܗ̄ܽܘ ܪܶܝܚܳܐ ܕܽܗ̄ܘ ܐܰܒܪܰܝܕ̥ܺܝ ܐܟ̥ ܕܽܗ̄ܘ ܪܶܝܚܳܐ ܕܺܗ̄ܝ ܚܰܩܠܳܐ ܕ݄ܡܒܰܪܟ̥ܳܐ ܠܶܗ ܡܳܪܝܳܐ. 28ܐܰ‌ܠܳܗܳܐ ܗ̄ܳܒܶܐ ܠܳܟ̥ ܡܽܗ̄ܘ ܛܰܠܳܐ ܕܺܗ̄ܝ ܫܡܰܝܳܐ ܘܡܺܗ̄ܝ ܕܽܘܗܢܺܝܬ̥ܳܐ ܕܺܗ̄ܝ ܐܰܪܥܳܐ، ܘܓ̥ܰܠܰܒܶܐ ܚ̈ܶܛܶܐ ܘܚܰܡܪܳܐ. 29ܥܳܒ̥ܕܺܝ ܠܳܟ̥ ܥܰܡ̈ܶܐ، ܘܶܐܡ̈ܘܳܬ̥ܳܐ ܣܳܓ̥ܕܺܝ ܠܳܟ̥. ܗܘܰܝ ܪܺܝܫܳܐ ܠܰܗ̄ܢ ܐܰܚ̈ܽܘܢܳܢܰܝܕ̥ܳܟ̥، ܘܣܳܓ̥ܕܺܝ ܠܳܟ̥ ܗ̄ܰܢ ܐܰܒܢ̈ܶܐ ܕܶܐܡܳܟ̥. ܗ̄ܰܠّܰܝ̈ܳܛܰܝܕ̥ܳܟ̥ ܠܺܝ̈ܛܶܐ ܢܶܝ، ܘܰܡܒܰܪ̈ܟ̥ܳܢܰܝܕ̥ܳܟ̥ ܒܪ̈ܺܝܟ̥ܶܐ ܢܶܝ.“ 30ܘܺܗ̄ܝ ܢܰܩܠܐ ܕܡܰܬ݄ܡ ܠܶܗ ܐܺܝܣܚܳܩ ܕ݄ܡܒܰܪ݄ܟ̥ ܠܝܰܥܩܽܘܒ، ܘܢܰܦ݄ܩ ܝܰܥܩܽܘܒ ܡܶܢ̱ ܓܰܒ ܐܺܝܣܚܳܩ ܗ̄ܽܘ ܒܰܒܳܐ، ܘܟܰܐܠܶܗ ܥܺܝܣܽܘ ܗ̄ܽܘ ܐܰܚܽܘܢܳܐ ܐܰܬ̥ܺܝ ܡܽܗ̄ܘ ܨܰܝܕܰܝܕ̥ܶܗ. 31ܘܗܺܝّܶܗ ܣܬܶܝ ܣ݄ܡ ܠܶܗ ܒܽܘܫܳܠܳܐ ܘܡܰܥܒܰܪ ܠܶܗ ܠܽܗ̄ܘ ܒܰܒܳܐ. ܘܐܡ݄ܪ ܠܶܗ ܠܽܗ̄ܘ ܒܰܒܳܐ: ”ܛܪܳܐ ܩܳܝ݄ܡ ܒܰܒܺܝ ܘܳܐܟ̥݄ܠ ܡܽܗ̄ܘ ܨܰܝܕܳܐ ܕܽܗ̄ܘ ܐܰܒܪܰܝܕ̥ܶܗ ܕ݄ܡܒܰܪܟ̥ܳܐ ܠܺܝ ܗ̄ܺܝ ܢܰܦܫܰܝܕ̥ܳܟ̥.“ 32ܘܐܡ݄ܪ ܠܶܗ ܐܺܝܣܚܳܩ ܗ̄ܽܘ ܒܰܒܳܐ: ”ܡܰܢ ܗܰܬ؟“ ܘܐܡ݄ܪ ܠܶܗ: ”ܐܳܢܳܐ ܐ̱ܢܳܐ ܗ̄ܽܘ ܐܰܒܪܰܝܕ̥ܳܟ̥ ܗ̄ܽܘ ܒܽܘܟ̥ܪܰܝܕ̥ܳܟ̥ ܥܺܝܣܽܘ.“ 33ܘ݄ܡܒܰܠܗ݄ܕ ܐܺܝܣܚܳܩ ܒܳܠܗܳܕܳܐ ܪܰܒܳܐ ܓ̥ܰܠܰܒܶܐ، ܘܐܡ݄ܪ ܠܶܗ: ”ܡܰܢ ܗ̄ܘܰܐ ܗܰܘܳܐ ܕܨ݄ܕ ܠܶܗ ܨܰܝܕܳܐ ܘܡܰܡܛܶܐ ܠܶܗ ܠܺܝ، ܘܰܐܟ̥ܺܝܠ ܠܺܝ ܡܶܢ̱ ܟܽܘܠܶܗ ܡܶܩ݄ܕ̱ܡ ܕܳܐܬ̥ܰܬ ܘ݄ܡܒܰܪܰܟ̥ ܠܺܝ؟ ܘܗܳܘܶܐ ܒܪܺܝܟ̥ܳܐ ܐܰܥܠܶܗ.“ 34ܘܺܗ̄ܝ ܢܰܩܠܐ ܕܫܰܡ݄ܥ ܥܺܝܣܽܘ ܗ̄ܰܡّܰܐܡܪ̈ܶܐ ܕܽܗ̄ܘ ܒܰܒܳܐ ܡܘܰܠܘܶܠ ܠܶܗ ܘܶܠܘܳܠܳܐ ܪܰܒܳܐ ܘܡܰܪ̱ܺܝܪܳܐ ܓ̥ܰܠܰܒܶܐ، ܘܐܡ݄ܪ ܠܶܗ ܠܽܗ̄ܘ ܒܰܒܳܐ: ”ܡܒܰܪܰܟ̥ ܠܺܝ ܐܳܢܳܐ ܣܬܶܝ، ܝܰܐ ܒܰܒܺܝ؟“ 35ܘܐܡ݄ܪ ܠܶܗ ܠܶܗ ܗ̄ܽܘ ܒܰܒܳܐ: ”ܥܰܒ݄ܪ ܐܰܚܽܘܢܳܟ̥ ܒܢܶܟ̥ܠܳܐ ܘܡ݄ܕ ܠܶܗ ܗ̄ܰܒّܽܘܪ̈ܟܳܬ̥ܰܝܕ̥ܳܟ̥.“ 36ܘܐܡ݄ܪ ܠܶܗ ܥܺܝܣܽܘ: ”ܒ݄ܫܪܳܪܳܐ ܩܪܶܐ ܐ݄ܫܡܶܗ ܝܰܥܩܽܘܒ، ܟܰܐܠܶܗ ܬܰܪܬܶܝ ܟܳܪ̈ܶܐ ܡܰܛܥܶܐ ܠܶܗ ܠܺܝ (ܗܰܘܺܝ ܥܶܩܒܳܐ ܒܕܰܪܒܺܝ): ܒܰܟ̥ܪܽܘܬ̥ܺܝ ܡܺܝܕܳܐ ܠܶܗ، ܘܟܰܐܠܶܗ ܐܳܥܕܳܐ ܗ̄ܰܒّܽܘܪ̈ܟܳܬ̥ܰܝܕ̥ܺܝ ܡܺܝܕܺܝ ܠܶܗ.“ ܘܐܡ݄ܪ ܠܶܗ ܥܺܝܣܽܘ ܠܽܗ̄ܘ ܒܰܒܳܐ: ”ܐܶ‌ܠܺܝ ܠܳܐ ܛܪܶܐ ܠܳܟ̥ ܒܽܘܪܟܬ̥ܳܐ؟“ 37ܡܰܕܥܰܪ ܠܶܗ ܐܺܝܣܚܳܩ ܘܐܡ݄ܪ ܠܶܗ ܠܥܺܝܣܽܘ: ”ܟܰܐܠܶܗ ܡܰܩ݄ܡ ܠܺܝ ܠܶܗ ܪܺܝܫܳܐ ܐܰܥܠܳܟ̥، ܘܣ݄ܡ ܠܺܝ ܟܽܘܠّܶܗ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܓܪ̈ܶܝܥܶܐ ܐܶ‌ܠܶܗ، ܒܚ̈ܶܛܶܐ ܘ݄ܒܚܰܡܪܳܐ ܣܡ݄ܟ̥ ܠܺܝ. ܘܶܐ‌ܠܳܟ̥ ܡ݄ܢ ܣܳܝܰܡ ܐ̱ܢܳܐ، ܐܰܒܪܺܝ؟“ 38ܘܐܡ݄ܪ ܠܶܗ ܥܺܝܣܽܘ ܠܽܗ̄ܘ ܒܰܒܳܐ: ”ܒܽܘܪܟܬ̥ܳܐ ܚܕ̥ܳܐ ܠܚܽܘܕ̥ܰܗ ܟ݄ܬ ܠܳܟ̥، ܒܰܒܺܝ؟ ܡܒܰܪܰܟ̥ ܠܺܝ ܐܳܢܳܐ ܣܬܶܝ، ܒܰܒܺܝ.“ ܘܡܰܥܠܶܐ ܠܶܗ ܥܺܝܣܽܘ ܩܳܠܶܗ ܘܒܰܟ̥ܺܝ. 39ܘܡܰܕܥܰܪ ܠܶܗ ܐܺܝܣܚܳܩ ܗ̄ܽܘ ܒܰܒܳܐ ܘܐܡ݄ܪ ܠܶܗ ܠܶܗ: ”ܟܰܐܠܶܗ ܒܺܗ̄ܝ ܐܰܪܥܳܐ ܬܰܩ݄ܢܬܳܐ ܗܳܘܶܐ ܗ̄ܽܘ ܝܺܬܳܒ̥ܰܝܕ̥ܳܟ̥ ܘܡܽܗ̄ܘ ܛܰܠܳܐ ܕܺܗ̄ܝ ܫܡܰܝܳܐ ܡܶܢ̱ ܠܰܠܥ݄ܠ. 40ܘܥܰܠ ܗ̄ܽܘ ܣܰܝܦܰܝܕ̥ܳܟ̥ ܚܳܝܰܬ، ܘܠܰܐܚܽܘܢܳܟ̥ ܦܳܠܚܰܬ. ܘܶܐܢ ܕܬܰܝܒܰܬ، ܓܡ݄ܬܠܶܐ ܗ̄ܽܘ ܢܺܝܪܰܝܕ̥ܶܗ ܡܶܢ̱ ܩܕ̥ܳܠܳܟ̥.“

41ܘ݄ܡܥܰܢܰܬ ܠܶܗ ܥܺܝܣܽܘ ܡܶܢ̱ ܝܰܥܩܽܘܒ ܥܰܠ ܗ̄ܰܒّܽܘܪ̈ܟܳܬ̥ܳܐ ܕ݄ܡܒܰܪܰܟ̥ ܠܶܗ ܗ̄ܽܘ ܒܰܒܳܐ. ܘܐܡ݄ܪ ܠܶܗ ܥܺܝܣܽܘ ܒܠܶܒܶܗ: ”ܛܪܳܐ ܫܳܦ̊ܥܺܝ ܗ̄ܰܝّܰܘܡ̈ܶܐ ܕܽܗ̄ܘ ܒܰܟ̥ܝܳܐ ܕܥܰܠ ܒܰܒܺܝ، ܗ̄ܺܝ ܢܰܩܠܝܳܐ ܓܩܳܛܰܠ ܐ̱ܢܳܐ ܠܝܰܥܩܽܘܒ ܐܰܚܽܘܢܺܝ.“ 42ܘܐܡܺܝܪ ܠܪܰܦܩܳܐ ܗ̄ܰܡّܰܐܡܪ̈ܶܐ ܕܥܺܝܣܽܘ ܗ̄ܽܘ ܐܰܒܪܰܝܕ̥ܰܗ ܗ̄ܽܘ ܪܰܒܳܐ. ܘ݄ܡܫܰܕܰܪ ܠܰܗ ܩܪܶܐ ܠܰܗ ܠܝܰܥܩܽܘܒ ܗ̄ܽܘ ܐܰܒܪܳܐ ܙܥܽܘܪܳܐ، ܘܐܡ݄ܪ ܠܰܗ ܠܶܗ: ”ܟܰܐܠܶܗ ܥܺܝܣܽܘ ܐܰܚܽܘܢܳܟ̥ ܪܓ̥ܺܝܙܳܐ ܝܳܐ ܐܰܥܠܳܟ̥ ܕܩܳܛܶܠ ܠܳܟ̥. 43ܐܳܥܕܳܐ، ܐܰܒܪܺܝ، ܫܡܰܥ ܗ̄ܽܘ ܡܰܐܡܪܰܝܕ̥ܺܝ، ܘܩܘ̇ܡ ܙܳܟ̥ ܠܓܰܒ ܠܳܒܳܢ ܐܰܚܽܘܢܺܝ ܠܚܳܪܳܢ. 44ܘܺܝܬܰܒ̥ ܬܰܡܳܐ ܝܰܘܡ̈ܳܬ̥ܳܐ ܗ݄ܠ ܕܦܳܝ݄ܚ ܗ̄ܽܘ ܪܽܘܓ̥ܙܳܐ ܕܰܐܚܽܘܢܳܟ̥. 45ܘܗ݄ܠ ܕܫܳܦ݄̊ܥ ܗ̄ܽܘ ܪܽܘܓ̥ܙܳܐ ܕܰܐܚܽܘܢܳܟ̥ ܡܶܢܳܟ̥ ܘܛܳܥܶܐ ܗ̄ܽܘ ܡܶܕܶܐ ܕܣ݄ܡ ܠܳܟ̥ ܐܶܒܶܗ، ܘܓ݄ܡܫܰܕܪܳܐ ܐ̱ܢܳܐ ܕܡܰܡܛܺܝܰܠّܳܟ̥ ܡܶܢ̱ ܬܰܡܳܐ ܕܠ݄ܐ ܐܙّܶܗ ܡ݄ܩܛܳܥܳܐ ܐ̱ܢܳܐ ܡܰܢ̱ ܬܪܰܝܟ̥ܽܘ ܒܚܰܕ̱ ܝܰܘܡܳܐ.“

46ܘܐܡ݄ܪ ܠܰܗ ܪܰܦܩܳܐ ܠܺܐܝܣܚܳܩ: ”ܥܰܝܺܝܩܺܝ ܗ̄ܰܚّܰܝ̈ܰܝܕ̥ܺܝ ܡܶܢ̱ ܒܢ̈ܳܬ̥ܳܐ ܕܚܺܝܬ̥. ܘܶܐܢ ܕܡܳܝ݄ܕ ܝܰܥܩܽܘܒ ܐܰܢ̱ܬ̥ܬܳܐ ܡܰܢ̱ ܒܢ̈ܳܬ̥ܳܐ ܕܚܺܝܬ̥ ܐܟ̥ ܕܰܒܢ̈ܳܬ̥ܰܢܺܝ ܕܽܗ̄ܘ ܐܰܬ̥ܪܰܢܳܐ، ܠܡ݄ܢ ܢܶܝ ܗ̄ܰܚّܰܝ̈ܰܝܕ̥ܺܝ؟“

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 27: ܟܬܒܐ

Highlight

Copy