ܣܶܦܪܳܐ ܕ݄ܒܪܺܝܬ̥ܳܐ 25

1ܘܕܰܥ݄ܪ ܐܰܒܪܳܗܳܡ ܘܡ݄ܕ ܠܶܗ ܐܰܢ̱ܬ̥ܬܳܐ ܐ݄ܫܡܰܗ ܩܶܢܛܽܘܪܳܐ. 2ܘܡܰܘܠܰܕ ܠܰܗ ܠܶܗ ܙܰܡܪܳܢ ܘܝܰܩܫܳܢ ܘܡܳܕܳܢ ܘܡܶܕܝܰܢ ܘܰܐܫܒܳܩ ܘܫܽܘܚ. 3ܘܝܰܩܫܳܢ ܡܰܘܠܰܕ ܠܶܗ ܠ݄ܫܒܳܐ ܘ݄ܠܕܳܪܳܢ. ܘܰܗ̄ܢ ܐܰܒܢ̈ܶܐ ܕܕܳܪܳܢ ܗܰܢܺܝ ܢܶܝ: ܐܰܫܽܘܕܺܝܡ ܘܠܳܛܫܺܝܡ ܘܳܐܡܺܝܡ. 4ܘܰܗ̄ܢ ܐܰܒܢ̈ܶܐ ܕܡܶܕܝܰܢ: ܥܦܳܐ ܘܚܳܦܳܪ ܘ݄ܚܢܽܘܟ̥ ܘܰܐܒܺܝܕ̥ܰܥ ܘܰܐ‌ܠܕܰܥܳܐ. ܟܽܘܠّܶܗ ܗܰܢܺܝ ܗ̄ܰܢ ܐܰܒܢ̈ܶܐ ܕܩܶܢܛܽܘܪܳܐ ܢܶܝ. 5ܘܗܽܒ̥ ܠܶܗ ܐܰܒܪܳܗܳܡ ܟܘ̇ܠ ܡܶܕܶܐ ܕܟ݄ܬ ܠܶܗ ܠܺܐܝܣܚܳܩ ܗ̄ܽܘ ܐܰܒܪܰܝܕ̥ܶܗ. 6ܘܠܰܗ̄ܢ ܐܰܒܢ̈ܶܐ ܕܺܗ̄ܝ ܓܪܰܥܬܳܐ ܕܰܐܒܪܳܗܳܡ، ܐܰܒܪܳܗܳܡ ܗܽܒ̥ ܠܶܗ ܡܰܘܗܒ̈ܳܬ̥ܳܐ. ܘ݄ܡܫܰܕܪܺܝ ܠܶܗ ܠܪܰܚܽܘܩܳܐ ܡܶܢ̱ ܓܰܒ ܐܺܝܣܚܳܩ ܗ̄ܽܘ ܐܰܒܪܳܐ ܗܶܫ ܗܺܝّܶܗ ܒܰܚّܰܝ̈ܶܐ، ܒܺܗ̄ܝ ܩܰܕ̱ܡܰܝܬܳܐ ܠܺܗ̄ܝ ܐܰܪܥܳܐ ܕܽܗ̄ܘ ܡܰܕ݄ܢܚܳܐ.

7ܘܗܰܢܺܝ ܢܶܝ ܗ̄ܰܝّܰܘܡ̈ܶܐ ܕܰܗ̄ܢ ܐ݄ܫܢ̈ܶܐ ܕܰܚّܰܝ̈ܶܐ ܕܰܐܒܪܳܗܳܡ ܕܚܰܝܺܝ: ܡܳܐܐ ܘܚܰܡّ݄ܫ ܘܫܰܒ̥ܥܺܝ ܐ݄ܫܢ̈ܶܐ. 8ܘܟܰܝܽܒ̥ ܠܶܗ ܐܰܒܪܳܗܳܡ، ܘܡܰܝ݄ܬ̥ ܒܣܳܒ̥ܽܘܬ̥ܳܐ ܛܰܒ̥ܬܳܐ. ܡܰܣܽܒ̥ ܠܶܗ ܘܣܰܒ̥݄ܥ ܡܰܢ̱ ܝّܰܘܡ̈ܳܬ̥ܰܝܕ̥ܶܗ. ܘܡܰܛܺܝ (ܩܒ̥ܺܝܪ) ܠܓܰܒ ܗ̄ܽܘ ܥܰܡܰܝܕ̥ܶܗ. 9ܘܺܐܝܣܚܳܩ ܘܺܐܝܫܡܳܥܶܝܠ ܗ̄ܰܢ ܐܰܒܢ̈ܶܐ ܩܒ̥݄ܪّܶܗ ܒܺܗ̄ܝ ܡܥܰܪܬ̥ܳܐ ܐܰܥ݄ܦܬܳܐ ܕܒܺܗ̄ܝ ܚܰܩܠܳܐ ܕܥܶܦܪܽܘܢ ܗ̄ܽܘ ܐܰܒܪܳܐ ܕܨܳܚܳܪ ܗ̄ܽܘ ܚܺܝܬ̥ܳܝܳܐ ܕܟ݄ܬ ܝܳܐ ܩ݄ܕ̱ܡ ܡܰܡܪܶܐ، 10ܗ̄ܺܝ ܚܰܩܠܳܐ ܕ݄ܙܒ̥݄ܢ ܠܶܗ ܐܰܒܪܳܗܳܡ ܡܰܗ̄ܢ ܐܰܒܢ̈ܶܐ ܕܚܺܝܬ̥ ܠܽܗ̄ܘ ܝܽܘܪܬ̥ܳܢܳܐ ܕܽܗ̄ܘ ܩܰܒ̥ܪܳܐ. ܬܰܡܳܐ ܩܒ̥ܺܝܪ ܐܰܒܪܳܗܳܡ ܘܣܰܪܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ. 11ܘܒ݄ܬ̥݄ܪ ܕܡܰܝ݄ܬ̥ ܐܰܒܪܳܗܳܡ، ܐܰ‌ܠܳܗܳܐ ܡܒܰܪܰܟ̥ ܠܶܗ ܠܺܐܝܣܚܳܩ ܗ̄ܽܘ ܐܰܒܪܰܝܕ̥ܶܗ. ܘܝܰܬܽܒ̥ ܐܺܝܣܚܳܩ ܓܰܒ ܗ̄ܺܝ ܒܺܐܪܳܐ ܕܽܗ̄ܘ ”ܚܰܝܳܐ ܚܙܶܐ ܠܶܗ ܠܺܝ ܚܰܝܳܐ.“

12ܘܗܰܢܺܝ ܢܶܝ ܗ̄ܰܝܠܺܝܕ̥̈ܶܐ (ܗ̄ܽܘ ܙܰܪܥܳܐ) ܕܺܐܝܫܡܳܥܶܝܠ ܗ̄ܽܘ ܐܰܒܪܳܐ ܕܰܐܒܪܳܗܳܡ ܕܡܰܘܠܰܕ ܠܰܗ ܗܳܓܳܪ ܗ̄ܺܝ ܡܶܨܪܰܝܬܳܐ ܗ̄ܺܝ ܓܪܰܥܬܳܐ ܕܣܰܪܳܐ ܠܰܐܒܪܳܗܳܡ. 13ܘܗܰܢܺܝ ܢܶܝ ܗ̄ܰܢ ܐ݄ܫܡܳܢ̈ܶܐ ܕܰܗ̄ܢ ܐܰܒܢ̈ܶܐ ܕܺܐܝܫܡܳܥܶܝܠ ܡܽܗ̄ܘ ܪܰܒܰܬّ̥ܶܗ ܠܽܗ̄ܘ ܙܥܽܘܪܰܬّ̥ܶܗ: ܗ̄ܽܘ ܒܽܘܟ̥ܪܳܐ ܕܺܐܝܫܡܳܥܶܝܠ ܢܒܺܝܽܘܬ̥، ܘܩܶܕ̥ܳܪ، ܘܰܐܪܒܳܠ، ܘܡܰܒܣܰܡ، 14ܘܡܰܫܡܰܥ، ܘܪܽܘܡܳܐ، ܘܡܰܣܳܐ، 15ܘܚܳܕ̥ܳܪ، ܘܬ̥ܰܝܡܳܐ، ܘ݄ܢܛܽܘܪ، ܘ݄ܢܦܶܫ، ܘ݄ܩܕܶܡ. 16ܘܗܰܢܺܝ ܢܶܝ ܗ̄ܰܢ ܐܰܒܢ̈ܶܐ ܕܺܐܝܫܡܳܥܶܝܠ، ܘܗܰܢܺܝ ܗ̄ܰܢ ܐ݄ܫܡܳܢ̈ܰܬّ̥ܶܗ ܒܰܕّܽܘ̈ܟܳܬ̥ܰܬّ̥ܶܗ ܘܒܰܚّܶܣ̈ܢܰܬّ̥ܶܗ: ܬܪܰܥܣܰܪ ܪ̈ܰܒܳܢܶܐ ܠܰܥّܰܡ̈ܰܬّ̥ܶܗ. 17ܗܰܢܺܝ ܢܶܝ ܗ̄ܰܢ ܐ݄ܫܢ̈ܶܐ ܕܰܚّܰܝ̈ܶܐ ܕܺܐܝܫܡܳܥܶܝܠ: ܡܳܐܐ ܘ݄ܫܒ̥ܰܥ ܘ݄ܬܠܶܬ̥ܺܝ ܐ݄ܫܢ̈ܶܐ. ܘܟܰܝܽܒ̥ ܠܶܗ ܘܡܰܝ݄ܬ̥. ܘܡܰܛܺܝ (ܠܰܬ݄ܡ ܓܰܒ) ܠܽܗ̄ܘ ܥܰܡܰܝܕ̥ܶܗ. 18ܘܝܰܬܺܝܒ̥ܺܝ ܡܶܢ̱ ܚܘܺܝܠܳܐ ܘܗ݄ܠ ܫܽܘܕ ܕܩ݄ܕ̱ܡ ܡܶܨܪܶܝܢ ܕܒܺܗ̄ܝ ܥܒܰܪܬܳܐ ܕܳܐܬ̥ܽܘܪ، ܥܰܠ ܗ̄ܽܘ ܬܚܽܘܡܳܐ ܕܟܽܘܠّܶܗ ܗ̄ܰܢ ܐܰܚ̈ܽܘܢܳܢܰܝܕ̥ܶܗ ܝܰܬܽܒ̥.

19ܘܗܰܢܺܝ ܢܶܝ ܗ̄ܰܝܠܺܝܕ̥̈ܶܐ (ܗ̄ܽܘ ܙܰܪܥܳܐ) ܕܺܐܝܣܚܳܩ ܗ̄ܽܘ ܐܰܒܪܳܐ ܕܰܐܒܪܳܗܳܡ. ܐܰܒܪܳܗܳܡ ܡܰܘܠܰܕ ܠܶܗ ܠܺܐܝܣܚܳܩ. 20ܘܗܰܘܺܝ ܐܺܝܣܚܳܩ ܐܰܒܪܶܗ ܕܰܐܪܒܥܺܝ ܐ݄ܫܢ̈ܶܐ ܗ̄ܺܝ ܢܰܩܠܐ ܕܡ݄ܕ ܠܶܗ ܪܰܦܩܳܐ ܗ̄ܺܝ ܒܰܪܬ̥ܳܐ ܕ݄ܒܬܽܘܐܶܝܠ ܗ̄ܽܘ ܐܳܪܳܡܳܝܳܐ ܡܶܢ̱ ܦܳܕܳܢ ܕܳܐܪܳܡ ܗ̄ܺܝ ܚܳܬ̥ܳܐ ܕܠܳܒܳܢ ܗ̄ܽܘ ܐܳܪܳܡܳܝܳܐ، ܡܺܝܕܳܐ ܠܶܗ ܐܰܢ̱ܬ̥ܬܳܐ ܐܶ‌ܠܶܗ. 21ܘ݄ܡܨܰܠܶܐ ܠܶܗ ܐܺܝܣܚܳܩ ܩ݄ܕ̱ܡ ܡܳܪܝܳܐ ܠܰܫܰܢ ܗ̄ܺܝ ܐܰܢ̱ܬ̥ܬܰܝܕ̥ܶܗ ܕܟ݄ܬ ܝܳܐ ܥܩܰܪܬ̥ܳܐ. ܘܫܰܡ݄ܥ ܠܶܗ ܡܳܪܝܳܐ، ܘ݄ܒܛܺܝܢܳܐ ܪܰܦܩܳܐ ܗ̄ܺܝ ܐܰܢ̱ܬ̥ܬܰܝܕ̥ܶܗ. 22ܘܰܗ̄ܢ ܐܰܒܢ̈ܰܝܕ̥ܰܗ ܒܟܰܪܣܰܗ ܡܰܥܺܝܩܺܝ ܗ̄ܘܰܘ̱ ܚܕ̥ܳܕ̥̈ܶܐ. ܘܐܡ݄ܪ ܠܰܗ: ”ܕܳܗ̄ܘܝܳܐ ܗܰܘܟ̥ܰܐ ܠܡ݄ܢ ܓܚܳܝܳܐ ܐ̱ܢܳܐ؟“ ܘܰܐܙّܰܗ ܕ݄ܡܫܰܐܺܠܳܐ ܡܶܢ̱ ܡܳܪܝܳܐ. 23ܘܐܡ݄ܪ ܠܶܗ ܠܰܗ ܡܳܪܝܳܐ: ”ܬܪܶܝ ܥܰܡ̈ܶܐ ܟܺܝܬ ܒܟܰܪܣܰܟ̥. ܘܬܰܪܬܶܝ ܐܶܡ̈ܘܳܬ̥ܳܐ ܡܶܢ̱ ܟܰܪܣܰܟ̥ ܓܡ݄ܦܪܳܫܺܝ. ܐܽܘܡܬ̥ܳܐ ܓܕܽܗ̄ܘܝܳܐ ܙ݄ܕ ܒܚܰܝܠܳܐ ܡܺܗ̄ܝ ܚܪܶܬܳܐ. ܘܽܗ̄ܘ ܪܰܒܳܐ ܓܕܳܗ̄ܘܶܐ ܥܰܒܕܳܐ ܠܽܗ̄ܘ ܙܥܽܘܪܳܐ.“ 24ܘܟܰܡܺܝܠܺܝ ܗ̄ܰܝّܰܘܡ̈ܰܝܕ̥ܰܗ ܕܡܰܘܠܕܳܐ، ܘܟܰܐܠܶܗ ܬܳܡ̈ܶܐ (ܬܪܶܝ ܙܥܽܘܪ̈ܶܐ) ܒܟܰܪܣܰܗ. 25ܘܢܰܦ݄ܩ ܗ̄ܽܘ ܩܰܕ̱ܡܳܝܳܐ ܣܡܰܩܪܳܢܳܐ. ܘܟܽܘܠܶܗ ܥܰܙܩ̈ܳܬ̥ܳܐ ܕܣܰܥܪܳܐ (ܡܟܰܚܟܠܳܐ). ܘ݄ܩܪܶܐ ܠܶܗ ܐ݄ܫܡܶܗ ܥܺܝܣܽܘ. 26ܘܒ݄ܬ̥ܪܶܗ ܢܰܦ݄ܩ ܗ̄ܽܘ ܐܰܚܽܘܢܳܐ، ܘܒܺܐܝܕ̥ܶܗ ܟܨܳܝ݄ܕ ܥܰܪܩܽܒّ̥ܶܗ ܕܥܺܝܣܽܘ. ܘ݄ܩܪܶܐ ܠܶܗ ܐ݄ܫܡܶܗ ܝܰܥܩܽܘܒ. ܘܺܐܝܣܚܳܩ ܐܰܒܪܶܗ ܕ݄ܐܫܬܺܝ ܐ݄ܫܢ̈ܶܐ ܗ̄ܘܰܐ ܗ̄ܺܝ ܢܰܩܠܐ ܕܡܰܘܠܕܺܝ ܠܰܗ. ܘܝܰܪܺܝܒ̥ܺܝ ܗ̄ܰܙܥܽܘܪ̈ܶܐ.

ܝܰܥܩܽܘܒ ܘܥܺܝܣܽܘ

27ܘܗܰܘܺܝ ܥܺܝܣܽܘ ܓܰܒ̥ܪܳܐ ܨܰܝܳܕܳܐ، ܓܰܒ̥ܪܳܐ ܕܽܗ̄ܘ ܡܰܕ̥݄ܒܪܳܐ، ܘܝܰܥܩܽܘܒ ܓܰܒ̥ܪܳܐ ܬܰܡܺܝܡܳܐ ܘܥܳܡ݄ܪ ܒܽܗ̄ܘ ܡܰܫܟܢܳܐ. 28ܘ݄ܪܚ݄ܡ ܠܶܗ ܐܺܝܣܚܳܩ ܠܥܺܝܣܽܘ ܥܰܠ ܕܽܗ̄ܘ ܨܰܝܕܰܝܕ̥ܶܗ ܒܦܶܡܶܗ ܗ̄ܘܰܐ. ܘܪܰܦܩܳܐ ܪܚ݄ܡ ܠܰܗ ܠܝܰܥܩܽܘܒ. 29ܘ݄ܡܒܰܫܶܠ ܠܶܗ ܝܰܥܩܽܘܒ ܒܽܘܫܳܠܳܐ. ܘܟܰܐܠܶܗ ܥܺܝܣܽܘ ܗ̄ܽܘ ܐܰܚܽܘܢܰܝܕ̥ܶܗ ܟܳܐܬ̥ܶܐ ܡܺܗ̄ܝ ܚܰܩܠܳܐ ܘܗܺܝّܶܗ ܟܰܦܺܝܢܳܐ ܘܒܰܛܺܝܠܳܐ. 30ܘܥܺܝܣܽܘ ܐܡ݄ܪ ܠܶܗ ܠܝܰܥܩܽܘܒ: ”ܡܰܘܟܶܠ ܠܺܝ ܡܰܢ̱ ܣّܶܡܳܩ̈ܰܢܺܝ ܗ̄ܽܘ ܣܶܡܳܩܰܢܳܐ ܥܰܠ ܕܟܺܝܬ ܐ̱ܢܳܐ ܟܰܦܺܝܢܳܐ ܘܒܰܛܺܝܠܳܐ.“ ܡܰܗ̄ܘܟ̥ܰܐ ܩܪܶܐ ܠܶܗ ܐ݄ܫܡܶܗ ܐܰܕܽܘܡ (ܣܶܡܳܩܳܐ). 31ܐܡ݄ܪ ܠܶܗ ܠܶܗ ܝܰܥܩܽܘܒ: ”ܡܙܰܒ݄ܢ ܠܺܝ ܐܰܕܝܰܘܡܰܐ ܗ̄ܺܝ ܒܰܟ̥ܪܽܘܬ̥ܰܝܕ̥ܳܟ̥.“ 32ܘܐܡ݄ܪ ܠܶܗ ܥܺܝܣܽܘ ܒܠܶܒܶܗ: ”ܟܰܐܠܶܗ ܐܳܢܳܐ ܐܰܙܳܠܳܐ ܠܽܗ̄ܘ ܡܰܘܬܳܐ، ܡ݄ܢ ܟܣܰܝܡܳܐ ܠܺܝ ܗ̄ܺܝ ܒܰܟ̥ܪܽܘܬ̥ܳܐ؟“ 33ܐܡ݄ܪ ܠܶܗ ܠܶܗ ܝܰܥܩܽܘܒ: ”ܝܺܡܰܝ ܠܺܝ ܐܰܕܝܰܘܡܰܐ.“ ܘܺܝܡܶܐ ܠܶܗ ܠܶܗ. ܘ݄ܡܙܰܒܰܢ ܠܶܗ ܗ̄ܺܝ ܒܰܟ̥ܪܽܘܬ̥ܰܝܕ̥ܶܗ ܠܝܰܥܩܽܘܒ. 34ܘܝܰܥܩܽܘܒ ܗܽܒ̥ ܠܶܗ ܠܥܺܝܣܽܘ ܕܳܐܟ̥݄ܠ ܠܰܚܡܳܐ ܘܒܽܘܫܳܠܳܐ ܕ݄ܛܠܰܒ̥ܚ̈ܶܐ. ܘܰܐܟ̥ܺܝܠ ܠܶܗ ܘ݄ܫܬܶܐ ܠܶܗ ܘܩܰܝ݄ܡ ܐܰܙّܶܗ. ܘ݄ܡܚܰܩܰܪ ܠܶܗ ܥܺܝܣܽܘ ܗ̄ܺܝ ܒܰܟ̥ܪܽܘܬ̥ܳܐ.

Currently Selected:

ܣܶܦܪܳܐ ܕ݄ܒܪܺܝܬ̥ܳܐ 25: ܟܬܒܐ

Highlight

Copy