ܥܒܳܕ̥̈ܶܐ ܕܰܫܠܺܝܚ̈ܶܐ 11

ܫܶܡܥܽܘܢ ܟܩܳܝ݄ܡ ܒܚܰܨܳܐ ܕܠܳܐ ܓܙܺܝܪ̈ܶܐ ܡܩܰܒ݄ܠ ܕܰܓܙܺܝܪ̈ܶܐ

1ܘܫܰܡܺܝܥܺܝ ܗ̄ܰܫܠܺܝܚ̈ܶܐ ܘܰܗ̄ܢ ܐܰܚ̈ܽܘܢܳܢܶܐ ܕܒܺܝܗܽܘܕ̥ ܕܰܥّܰܡ̈ܶܐ ܣܬܶܝ ܡܰܩܒܰܠّܶܗ ܗ̄ܺܝ ܡܶܠܬ̥ܳܐ ܕܰܐ‌ܠܳܗܳܐ. 2ܘܺܗ̄ܝ ܢܰܩܠܐ ܕܣܰܠ݄ܩ ܫܶܡܥܽܘܢ ܠܽܐܘܪܶܫܠܶܡ، ܗ̄ܰܡܗܰܝܡܢ̈ܶܐ ܕܡܺܗ̄ܝ ܓܙܽܘܪܬܳܐ (ܗ̄ܰܝّܽܘܕ̥̈ܳܝܶܐ) ܩܰܝܺܝܡܺܝ ܡܩܰܒ݄ܠ ܕܺܝܕ̥ܶܗ، 3ܘ݄ܐܡّܺܪ̱ܝ ܗ̄ܘܰܘ̱: ”ܓܰܒ ܢܳܫ̈ܶܐ ܥܽܘܪ̈ܠܶܐ (ܠܳܐ ܓܙܺܝܪ̈ܶܐ) ܥܰܒ݄ܪ ܘܰܐܟ̥ܺܝܠ ܠܶܗ ܐܰܥܡܰܝّܶܗ.“ 4ܘ݄ܡܫܰܪܶܐ ܠܶܗ ܫܶܡܥܽܘܢ ܕܳܐܡܰܪّܶܗ: 5”ܗ̄ܺܝ ܢܰܩܠܐ ܕ݄ܡܨܰܠܶܐ ܗ̄ܘܰܝ ܐ̱ܢܳܐ ܒܝܳܘܦܺܝ ܚܙܶܐ ܠܺܝ ܒܚܶܙܘܳܐ ܕܢܰܚ݄ܬ ܗ̄ܘܰܐ ܣܶܦܳܩܳܐ ܐܰܝܢܰܐ ܕܕܳܡܶܐ ܗ̄ܘܰܐ ܠܟܶܬܳܢܳܐ، ܘܡܰܐܣܪܳܐ ܗ̄ܘܰܐ ܡܰܗ̄ܢ ܐܰܪܒܰܥ ܩ݄ܪ̈ܢܰܘܳܬ̥ܰܝܕ̥ܶܗ، ܘܡܺܝܛܰܘܛܰܚ ܗ̄ܘܰܐ ܡܺܗ̄ܝ ܫܡܰܝܳܐ ܘܰܐܬ̥ܺܝ ܗܳܠ ܣܺܝܕ̥ܺܝ. 6ܘܚ݄ܪ ܠܺܝ ܐܶܒܶܗ ܘ݄ܚܙܶܐ ܠܺܝ ܕܟܺܝܬ ܐܶܒܶܗ ܚܰܝ̈ܘܳܬ̥ܳܐ ܕܰܗ̄ܢ ܐܰܪܒܰܥ ܪ̈ܰܓ̥ܠܳܬ̥ܶܐ ܘܰܪّܰܚ̈ܫܶܐ ܕܺܗ̄ܝ ܐܰܪܥܳܐ ܘܰܛّܰܝܪ̈ܶܐ ܕܺܗ̄ܝ ܫܡܰܝܳܐ. 7ܘܫܰܡ݄ܥ ܐ̱ܢܳܐ ܩܳܠܳܐ ܕܟܳܐܡܰܪ ܠܺܝ: ’ܫܶܡܥܽܘܢ! ܩܘܿܡ ܢܚܰܪ ܘܰܐܟ̥ܽܘܠ.‘ 8ܘܐܡ݄ܪ ܠܺܝ: ’ܚܳܣ ܡܳܪܝ، ܒܰܚّܰܝ̈ܶܐ ܠܳܐ ܥܰܒ݄ܪ ܠܦܶܡܺܝ ܡܶܕܶܐ ܕܟ݄ܬ ܝܳܐ ܛܰܢܦܳܐ ܘ݄ܡܚܰܪܡܳܐ.‘ 9ܘܕܰܥ݄ܪ ܗ̄ܽܘ ܩܳܠܳܐ ܐܡ݄ܪ ܠܶܗ ܠܺܝ ܡܺܗ̄ܝ ܫܡܰܝܳܐ: ’ܗ̄ܽܘ ܡܶܕܶܐ ܕܰܐ‌ܠܳܗܳܐ ܡܚܰܠܶܠ ܠܶܗ (ܘ݄ܡܕܰܟܶܐ ܠܶܗ) ܗܰܬ ܠܳܐ ܡܚܰܪܡܰܬ.‘ 10ܘܗܰܬ̥ܶܐ ܗܰܘܝܳܐ ܬܠ݄ܬ̥ ܟܳܪ̈ܶܐ، ܘܟܽܘܠ ܡܶܕܶܐ ܣܰܠ݄ܩ ܠܺܗ̄ܝ ܫܡܰܝܳܐ. 11ܘܒܺܗ̄ܝ ܫܳܥܬ̥ܰܝܕ̥ܰܗ، ܐܰܬ̥݄ܢ ܬܠܳܬ̥ܳܐ ܓܰܒܪ̈ܶܐ ܕ݄ܡܫܰܕܪܺܝ ܠܓܰܒܺܝ ܡܶܢ̱ ܩܳܘܪܢܺܠܺܝܳܘܣ ܡܶܢ̱ ܩܶܣܰܪܺܝܰܐ ܘܩܰܝܺܝܡܺܝ ܥܰܠ ܗ̄ܽܘ ܬܰܪܥܳܐ ܕܽܗ̄ܘ ܒܰܝܬܳܐ ܕܟ݄ܬ ܗ̄ܘܰܝ ܐ̱ܢܳܐ ܐܶܒܶܗ. 12ܘܽܗ̄ܘ ܪܽܘܚܳܐ ܐܡ݄ܪ ܠܰܗ ܠܺܝ: ܙܳܟ̥ ܐܰܥܡܰܝّܶܗ ܕܠܳܐ ܦܠܺܝܓ̥ܽܘܬ̥ܳܐ. ܘܰܐܬ̥݄ܢ ܐܰܥܡܺܝ ܗܰܢܺܝ ܗ̄ܰܢ ܐ݄ܫܬܳܐ ܐܰܚ̈ܽܘܢܳܢܶܐ، ܘܥܰܒܺܝܪܺܝܢܰܐ ܠܽܗ̄ܘ ܒܰܝܬܳܐ ܕܽܗ̄ܘ ܓܰܒ̥ܪܳܐ. 13ܘܡܰܚܟܶܐ ܠܶܗ ܠܰܢ ܐܰܝܕܰܪܒܳܐ ܚܙܶܐ ܠܶܗ ܒܽܗ̄ܘ ܒܰܝܬܰܝܕ̥ܶܗ ܗ̄ܽܘ ܡܰܠܰܐܟ̥ܳܐ ܕܩܰܝ݄ܡ ܘܐܡ݄ܪ ܠܶܗ ܠܶܗ: ܡܫܰܕ݄ܪ ܠܺܗ̄ܝ ܡܕ̥ܺܝܢ̱ܬܳܐ ܕܝܳܘܦܺܝ ܘܡܰܝܬܰܝ ܠܫܶܡܥܽܘܢ ܕ݄ܟܡ݄ܩܪܶܐ ܟܶܐܦܳܐ، 14ܘܗܺܝّܶܗ ܓ݄ܕܡ݄ܫܓ̥݄ܠ ܐܰܥܡܳܟ̥ ܗ̄ܰܡّܶܠ̈ܶܐ ܕܰܐܒّܶܗ ܓܕܳܗ̄ܘ݄ܢ ܠܳܟ̥ ܚܰܝ̈ܶܐ، ܗܰܬ ܘܟܽܘܠܶܗ ܗ̄ܽܘ ܒܰܝܬܰܝܕ̥ܳܟ̥. 15ܘܺܗ̄ܝ ܢܰܩܠܐ ܕ݄ܡܫܰܪܶܐ ܠܺܝ ܬܰܡܳܐ ܕܡ݄ܫܓ̥ܰܠ ܐ̱ܢܳܐ، ܢܰܚܺܝܬܳܐ ܪܽܘܚܳܐ ܕܩܽܘܕܫܳܐ ܐܰܥܠܰܝّܶܗ ܐܟ̥ (ܕܢܰܚܺܝܬܳܐ) ܐܰܥܠܰܢ ܡܶܢ̱ ܡܶܩ݄ܕ̱ܡ. 16ܘܰܐܬ̥ܺܝ ܠܒܳܠܺܝ ܗ̄ܺܝ ܡܶܠܬ̥ܳܐ ܕܡܳܪܰܢ ܕܐܡ݄ܪ ܗ̄ܘܰܝ ܠܶܗ: ܝܽܘܚܰܢܳܢ ܡܰܥܡܰܕ̥ ܠܶܗ ܒܰܡّܰܝ̈ܶܐ، ܐܶ‌ܠܳܐ ܗܰܬܽܘ ܓܥܳܡܕ̥ܺܝܬܽܘ ܒܪܽܘܚܳܐ ܕܩܽܘܕܫܳܐ. 17ܘܶܐܢ ܗܰܘܟ̥ܰܐ ܐܰ‌ܠܳܗܳܐ، ܕܠܳܐ ܦܽܘܪܫܳܢܳܐ، ܗܽܒ̥ ܠܶܗ ܗ̄ܺܝ ܡܰܘܗܰܒܬܳܐ ܠܰܥّܰܡ̈ܶܐ ܕ݄ܡܗܰܝܡܰܢّܶܗ ܒܡܳܪܰܢ ܝܶܫܽܘܥ ܡܫܺܝܚܳܐ ܐܟ̥ ܕܐܶ‍ܠܰܢ ܣܬܶܝ، ܐܳܢܳܐ ܡܰܢ ܐ̱ܢܳܐ ܕܡܰܟܠܶܐ ܐ̱ܢܳܐ ܠܰܐ‌ܠܳܗܳܐ.“ 18ܘܺܗ̄ܝ ܢܰܩܠܐ ܕܫܰܡܺܝܥܺܝ ܗ̄ܰܡّܶܠܰܢ̈ܺܝ ܟܰܠ݄ܢ، ܘ݄ܡܫܰܒܰܚّܶܗ ܠܰܐ‌ܠܳܗܳܐ ܘ݄ܐܡّܺܪ̱ܝ ܗ̄ܘܰܘ̱: ”ܟܳܗ̄ܘܶܐ ܕܠܰܥّܰܡ̈ܶܐ ܣܬܶܝ ܐܰ‌ܠܳܗܳܐ ܗܽܒ̥ ܠܶܗ ܬܝܳܒܽܘܬ̥ܳܐ ܠܰܚّܰܝ̈ܶܐ.“

ܗ̄ܽܘ ܫܽܘܬܳܐܣܳܐ ܕܺܗ̄ܝ ܥܺܕ̱ܬܳܐ ܕܰܐܢܛܺܝܳܟ̥ܺܝܰܐ

19ܘܗܰܢ݄ܟ ܕ݄ܡܒܰܪܒܙܺܝ ܡܺܗ̄ܝ ܡܰܥܺܝܩܽܘܬ̥ܳܐ ܕܗܰܘܝܳܐ ܗ̄ܘܰܐ ܥܰܠ ܐܶܣܛܶܦܰܢܳܘܣ، ܡܰܛ݄ܢ ܗ̄ܘܰܘ̱ ܗܳܠ ܦܽܘܢܺܝܩܺܝ ܘܠܽܗ̄ܘ ܐܰܬ̥ܪܳܐ ܕܩܽܘܦܪܳܘܣ ܘܠܰܐܢܛܺܝܳܟܝܰܐ؛ ܘܥܰܡ ܢܳܫ̈ܶܐ ܠ݄ܐ ܡ݄ܫܓ̥ܳܠܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ ܐܶ‌ܠܳܐ ܥܰܡ ܗ̄ܰܝّܽܘܕ̥̈ܳܝܶܐ ܒܶܠܚܽܘܕ̥ܰܝّܶܗ. 20ܘܗ݄ܢ ܡ݄ܢّܶܗ ܕܟ݄ܬ ܗ̄ܘܰܝܢܶܝ ܡܶܢ̱ ܩܽܘܦܪܳܘܣ ܘܡܶܢ̱ ܩܽܘܪܺܝܢܺܝ، ܗܰܢܺܝ ܥܰܒܺܝܪܺܝ ܠܰܐܢܛܺܝܳܘܟ̥ܺܝ، ܘܡ݄ܫܓ̥ܳܠܺܝ ܗ̄ܘܰܘ̱ ܥܰܡ ܗ̄ܰܝّܰܘܢܳܝ̈ܶܐ ܘ݄ܡܣܰܒܪܺܝ ܗ̄ܘܰܘ̱ ܥܰܠ ܡܳܪܰܢ ܝܶܫܽܘܥ. 21ܘܺܗ̄ܝ ܐܺܝܕ̥ܳܐ ܕܡܳܪܝܳܐ ܐܰܥܡܰܝّܶܗ ܗ̄ܘܰܐ، ܘܓ̥ܰܠܰܒܶܐ ܡܗܰܝܡܰܢّܶܗ ܘܕܰܥܺܝܪܺܝ ܠܡܳܪܝܳܐ.

22ܘܰܗ̄ܢ ܐܰܒܢ̈ܶܐ ܕܺܗ̄ܝ ܥܺܕ̱ܬܳܐ ܕܒܽܐܘܪܶܫܠܶܡ ܫܰܡܺܝܥܺܝ ܒܰܗ̄ܬ̥ܶܐ، ܘ݄ܡܫܰܕܰܪّܶܗ ܠܒܰܪܢܰܒܰܐ ܠܰܐܢܛܺܝܳܘܟ̥ܺܝ. 23ܘܺܗ̄ܝ ܢܰܩܠܐ ܕܰܐܬ̥ܺܝ ܠܬܰܡܳܐ ܘ݄ܚܙܶܐ ܠܶܗ ܗ̄ܺܝ ܛܰܝܒܽܘܬ̥ܳܐ ܕܰܐ‌ܠܳܗܳܐ ܦܨܺܝܚ ܘܰܐܒ݄ܥ ܡ݄ܢّܶܗ ܕܦܰܝܫܺܝ ܡܗܰܝܡܢ̈ܶܐ ܠܡܳܪܰܢ ܡܶܢ̱ ܟܽܘܠܶܗ ܠܶܒܰܝّܶܗ. 24ܘܡܺܐܝܕ̥ܶܗ ܕܓܰܒ̥ܪܳܐ ܛܳܒ̥ܳܐ ܗ̄ܘܰܐ ܘܡܰܠܝܳܐ ܒܪܽܘܚܳܐ ܕܩܽܘܕܫܳܐ ܘܒܺܗ̄ܝ ܗܰܝܡܳܢܽܘܬ̥ܳܐ، ܥܰܡܳܐ ܓ̥ܰܠܰܒܶܐ ܙܰܝ݄ܕ ܠܡܳܪܰܢ. 25ܘܗܺܝّܶܗ ܢܰܦ݄ܩ ܗ̄ܘܰܐ ܠܛܰܪܣܳܘܣ ܕܟܳܪ݄ܟ̥ ܥܰܠ ܫܳܐܘܳܠ. 26ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܡܰܝܬܶܐ ܠܶܗ ܐܰܥܡܶܗ ܠܰܐܢܛܺܝܳܟܺܝܰܐ. ܘܺܗ̄ܝ ܫܰܢ̱ܬܳܐ ܟܽܘܠܰܗ ܥܰܡ ܚܕ̥ܳܕ̥̈ܶܐ ܠ݄ܬܡܺܝ ܗ̄ܘܰܘ̱ ܒܺܗ̄ܝ ܥܺܕ̱ܬܳܐ ܘܡܰܘܠܰܦّܶܗ ܥܰܡܳܐ ܓ̥ܰܠܰܒܶܐ. ܘܡܽܗ̄ܘ ܙܰܒܢܰܘܳܐ، ܩܪ݄ܢ ܗ̄ܰܬّܰܠܡܺܝܕ̥̈ܶܐ ܡܫܺܝܚܳܝ̈ܶܐ ܒܺܗ̄ܝ ܢܰܩܠܐ ܩܰܕ̱ܡܰܝܬܳܐ ܒܰܐܢܛܰܟܝܰܐ.

ܗ̄ܺܝ ܥܺܕ̱ܬܳܐ ܕܰܐܢܛܺܝܳܟ̥ܺܝܰܐ ܟ݄ܡܥܰܕܪܳܐ ܠܺܗ̄ܝ ܥܺܕ̱ܬܳܐ ܕܺܝܗܽܘܕ̥

27ܘܒܰܝّܰܘܡ̈ܳܬ̥ܰܢ݄ܟ، ܐܰܬ̥݄ܢ ܡܶܢ̱ ܐܽܘܪܶܫܠܶܡ ܠܬܰܡܳܐ ܢܒܺܝ̈ܶܐ. 28ܘܚܰܕ̱ ܡ݄ܢّܶܗ ܐ݄ܫܡܶܗ ܐܰܓ̥ܰܒܳܘܣ ܗ̄ܘܰܐ ܘܡܰܘܕ̥ܰܥ ܠܰܗ ܠّܶܗ ܒܺܗ̄ܝ ܪܽܘܚܳܐ ܕܓ݄ܕܗܳܘܶܐ ܟܰܦܢܳܐ ܪܰܒܳܐ ܒܺܗ̄ܝ ܐܰܪܥܳܐ ܟܽܘܠܰܗ. ܘܗܰܘܺܝ ܗ̄ܽܘ ܟܰܦܢܰܢܳܐ ܒܰܝّܰܘܡ̈ܳܬ̥ܳܐ ܕ݄ܩܠܰܘܕܺܝܳܘܣ ܩܶܣܰܪ. 29ܘܰܬّܰܠܡܺܝܕ̥̈ܶܐ، ܟܽܘܠ ܚܰܕ̱ ܐܟ̥ ܕܟ݄ܬ ܗ̄ܘܰܝ ܠܶܗ، ܦܪ݄ܫّܶܗ ܕ݄ܡܫܰܕܪܺܝ ܠܺܗ̄ܝ ܬܶܫܡܶܫܬܳܐ ܠܰܗ̄ܢ ܐܰܚ̈ܽܘܢܳܢܶܐ ܕܥܳܡܪܺܝ ܗ̄ܘܰܘ̱ ܒܺܝܗܽܘܕ̥. 30ܘ݄ܡܫܰܕܰܪّܶܗ ܥܰܡ ܒܰܪܢܰܒܰܐ ܘܫܳܐܘܳܠ ܠܰܩّܰܫ̈ܶܐ ܕܬܰܡܳܐ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 11: ܟܬܒܐ

Highlight

Copy