ܥܒܳܕ̥̈ܶܐ ܕܰܫܠܺܝܚ̈ܶܐ 10
10
ܗ̄ܺܝ ܥܺܕ̱ܬܳܐ ܟܡܰܩܒܠܳܐ ܟܽܘܠّܶܗ ܗ̄ܰܥّܰܡ̈ܶܐ
1ܘܟ݄ܬ ܗ̄ܘܰܐ ܒܩܶܣܰܪܺܝܰܐ ܚܰܕ̱ ܓܰܒ̥ܪܳܐ ܐ݄ܫܡܶܗ ܩܳܘܪܢܺܠܺܝܳܘܣ، ܪܺܝܫܳܐ ܕܡܳܐܐ ܗ̄ܘܰܐ، ܡܶܢ̱ ܓܽܘܕܳܐ ܕ݄ܟܡ݄ܩܪܳܝܳܐ ܐܺܝܛܰܠܺܝܩܺܐ. 2ܗܰܢܳܐ ܙܰܕܺܝܩܳܐ ܗ̄ܘܰܐ ܘܙܳܝܰܥ ܗ̄ܘܰܐ ܡܰܢ̱ ܐܠܳܗܳܐ، ܗܺܝّܶܗ ܘܟܽܘܠܶܗ ܗ̄ܽܘ ܒܰܝܬܰܝܕ̥ܶܗ. ܘܣܳܝܰܡ ܗ̄ܘܰܐ ܙܶܕ̈ܩܳܬ̥ܳܐ ܓ̥ܰܠܰܒܶܐ ܥܰܡ ܗ̄ܽܘ ܥܰܡܳܐ، ܘ݄ܒܟܘ̇ܠ ܙܰܒܢܳܐ ܡܨܰܠܶܐ ܗ̄ܘܰܐ ܠܰܐܠܳܗܳܐ. 3ܗܰܢܳܐ ܒܓܰܠܝܳܐ ܚܙܶܐ ܠܶܗ ܗ̄ܽܘ ܡܰܠܰܐܟ̥ܳܐ ܕܰܐܠܳܗܳܐ ܒܚܶܙܘܳܐ، ܠܰܐܦ ܗ̄ܺܝ ܫܳܥܬ̥ܳܐ ܬܫܰܥ (ܬܠ݄ܬ̥ ܒ݄ܬ̥݄ܪ ܦܰܠܓܶܗ ܕܝܰܘܡܳܐ)، ܕܥܰܒ݄ܪ ܠܣܺܝܕ̥ܶܗ ܘܐܡ݄ܪ ܠܶܗ ܠܶܗ: ”ܩܳܘܪܢܺܠܺܝܶܐ!“ 4ܘܗܺܝّܶܗ ܚ݄ܪ ܠܶܗ ܐܶܒܶܗ ܘܙܰܝ݄ܥ ܘܐܡ݄ܪ ܠܶܗ: ”ܡ݄ܢܝܳܐ ܡܳܪܝ!“ ܘܐܡ݄ܪ ܠܶܗ ܠܶܗ ܗ̄ܽܘ ܡܰܠܰܐܟ̥ܳܐ: ”ܗ̄ܰܨܠܰܘ̈ܳܬ̥ܰܝܕ̥ܳܟ̥ ܘܰܙّܶܕ̈ܩܳܬ̥ܰܝܕ̥ܳܟ̥ ܣܰܠܺܝܩܺܝ ܠܕܽܘܟ̥ܪܳܢܳܐ ܩ݄ܕ̱ܡ ܐܰܠܳܗܳܐ. 5ܘܳܐܥܕܳܐ ܡܫܰܕ݄ܪ ܓܰܒܪ̈ܶܐ ܠܺܗ̄ܝ ܡܕ̥ܺܝܢ̱ܬܳܐ ܕܝܳܘܦܺܝ ܘܡܰܝܬܰܝ ܠܫܶܡܥܽܘܢ ܕ݄ܟܡ݄ܩܪܶܐ ܟܶܐܦܳܐ. 6ܟܰܐܠܶܗ ܢܰܚܳܬܳܐ ܒܽܗ̄ܘ ܒܰܝܬܳܐ ܕܫܶܡܥܽܘܢ ܗ̄ܽܘ ܨܰܒ̥ܳܥܳܐ ܕܽܗ̄ܘ ܓܰܠܕܳܐ، ܕܟ݄ܬ ܝܳܐ ܥܰܠ ܣܰܦ̊ܬܶܗ ܕܽܗ̄ܘ ܝܰܡܳܐ.“ 7ܘܺܗ̄ܝ ܢܰܩܠܐ ܕܰܐܙّܶܗ ܗ̄ܽܘ ܡܰܠܰܐܟ̥ܳܐ ܕ݄ܫܓ̥ܺܝܠ ܐܰܥܡܶܗ، ܩܪܶܐ ܠܶܗ ܬܪܶܝ ܡܰܗ̄ܢ ܢܳܫ̈ܶܐ ܕܽܗ̄ܘ ܒܰܝܬܰܝܕ̥ܶܗ، ܘܚܰܕ̱ ܦܳܠܚܳܐ (ܪܽܘܡܳܝܳܐ) ܕܙܳܝ݄ܥ ܗ̄ܘܰܐ ܡܰܢ̱ ܐܠܳܗܳܐ، ܘܫܳܡܰܥ ܗ̄ܘܰܝ ܠܶܗ. 8ܘܐܡ݄ܪ ܠܰܗ ܠّܶܗ ܥܰܠ ܟܽܘܠ ܡܶܕܶܐ ܕ݄ܚܙܶܐ ܠܶܗ، ܘ݄ܡܫܰܕܪܺܝ ܠܶܗ ܠܝܳܘܦܺܝ.
ܗ̄ܽܘ ܚܶܙܘܳܐ ܕ݄ܚܙܶܐ ܠܫܶܡܥܽܘܢ ܒܝܳܘܦܺܝ
9ܘܒܽܗ̄ܘ ܝܰܘܡܳܐ ܚܪܶܢܳܐ، ܘܗ݄ܢّܶܝ ܐܰܙ̈ܳܠܶܐ ܒܽܗ̄ܘ ܕܰܪܒܳܐ، ܘ݄ܡܩܰܪܰܒّ̥ܶܗ ܠܺܗ̄ܝ ܡܕ̥ܺܝܢ̱ܬܳܐ، ܣܰܠ݄ܩ ܫܶܡܥܽܘܢ ܥܰܠ ܗ̄ܺܝ ܓܳܪܳܐ ܕ݄ܡܨܰܠܶܐ ܒܰܫّܶܬ̥ ܫܳܥܺܝ̈ܢ (ܦܰܠܓܶܗ ܕܝܰܘܡܳܐ). 10ܘܟܰܦ݄ܢ ܘܰܐܒ݄ܥ ܕܳܐܟ̥݄ܠ. ܘܗ݄ܢّܶܝ ܟ݄ܡܛܰܝܒܺܝ ܠܶܗ (ܡܽܐܘܟܠܳܐ)، ܢܰܦ݄ܠ ܐܰܥܠܶܗ ܬܶܗܪܳܐ ܘܕܽܘܡܳܪܳܐ. 11ܘ݄ܚܙܶܐ ܠܶܗ ܗ̄ܰܫܡܰܝ̈ܶܐ ܦܬܺܝܚ̈ܶܐ، ܘܚܰܕ̱ ܣܶܦܳܩܳܐ ܐܟ̥ ܕܟܶܬܳܢܳܐ ܪܰܒܳܐ، ܡܰܐܣܪܳܐ ܡܰܗ̄ܢ ܐܰܪܒܰܥ ܩܳܪ̈ܢܰܘܳܬ̥ܳܐ، ܟܢܳܚ݄ܬ ܡܺܗ̄ܝ ܫܡܰܝܳܐ ܥܰܠ ܗ̄ܺܝ ܐܰܪܥܳܐ. 12ܘܟ݄ܬ ܗ̄ܘܰܐ ܐܶܒܶܗ ܡܶܢ̱ ܟܽܘܠّܶܗ ܗ̄ܰܚّܰܝ̈ܘܳܬ̥ܳܐ ܕܰܗ̄ܢ ܐܰܪܒܰܥ ܪ̈ܰܓ̥ܠܳܬ̥ܶܐ، ܘܪ̈ܰܚܫܳܐ ܕܺܗ̄ܝ ܐܰܪܥܳܐ، ܘܛܰܝܪ̈ܶܐ ܕܺܗ̄ܝ ܫܡܰܝܳܐ. 13ܘܩܳܠܳܐ ܐܰܬ̥ܺܝ ܠܶܗ ܕܟܳܐܡ݄ܪ: ”ܫܶܡܥܽܘܢ! ܩܘܿܡ، ܢܚܰܪ ܘܰܐܟ̥ܽܘܠ.“ 14ܘܫܶܡܥܽܘܢ ܐܡ݄ܪ ܠܶܗ: ”ܚܳܣ ܡܳܪܝ، ܒܰܚّܰܝ̈ܶܐ ܠܰܐ ܐܟ̥ܺܝܠ ܠܺܝ ܡܶܕܶܐ ܛܰܢܦܳܐ ܘ݄ܡܚܰܪܡܳܐ.“ 15ܘ݄ܠܬّܰܪܬܶܝ ܟܳܪ̈ܶܐ ܐܬ̥ܺܝ ܠܶܗ ܩܳܠܳܐ: ”ܐܰܝܢܰܐ ܕܰܐܠܳܗܳܐ ܡܚܰܠܶܐ ܠܶܗ ܗܰܬ ܠܳܐ ܡܚܰܪܡܰܬ.“ 16ܘܗܰܬ̥ܶܐ ܗܰܘܝܳܐ ܬܠ݄ܬ̥ ܟܳܪ̈ܶܐ، ܘܥܰܠܺܝ ܗ̄ܽܘ ܣܶܦܳܩܳܐ ܠܺܗ̄ܝ ܫܡܰܝܳܐ.
ܡ݄ܢ ܐܡ݄ܪ ܠܶܗ ܗ̄ܽܘ ܚܶܙܘܳܐ؟
17ܘܫܶܡܥܽܘܢ ܘܗܺܝّܶܗ ܡܺܝܕܰܘܡܰܪ ܗ̄ܘܰܐ ܒܢܰܦܫܶܗ ܕܡ݄ܢܝܳܐ ܗ̄ܽܘ ܚܶܙܘܳܐ ܕ݄ܚܙܶܐ ܠܶܗ، ܡܰܛ݄ܢ ܗ̄ܰܓّܰܒ̥ܪ̈ܰܢ݄ܟ ܕ݄ܡܫܰܕܪܺܝ ܗ̄ܘܰܘ̱ ܡܶܢ̱ ܩܳܘܪܢܺܠܺܝܳܘܣ، ܘ݄ܡܫܰܐܠّܶܗ ܥܰܠ ܗ̄ܽܘ ܒܰܝܬܳܐ ܕܢܰܚ݄ܬ ܐܶܒܶܗ ܫܶܡܥܽܘܢ، ܘܰܐܬ̥݄ܢ ܟܰܠ݄ܢ ܥܰܠ ܗ̄ܽܘ ܬܰܪܥܳܐ ܕܺܗ̄ܝ ܕܳܪܬܳܐ. 18ܘܬܰܡܳܐ ܩܳܪ݄ܢ ܗ̄ܘܰܘ̱ ܘ݄ܡܫܰܐܺܠܺܝ ܗ̄ܘܰܘ̱ ܕܶܐܢ ܫܶܡܥܽܘܢ ܕ݄ܟܡ݄ܩܪܶܐ ܟܶܐܦܳܐ ܗܰܪܟܶܐ ܢܰܚ݄ܬ. 19ܘܗܶܫ ܫܶܡܥܽܘܢ ܪܳܢܶܐ ܗ̄ܘܰܐ ܒܽܗ̄ܘ ܚܶܙܘܳܐ، ܗ̄ܽܘ ܪܽܘܚܳܐ ܐܡ݄ܪ ܠܶܗ ܠܶܗ: ”ܟܰܐܠ݄ܢ ܬܠܳܬ̥ܳܐ ܓܰܒܪ̈ܶܐ ܟ݄ܐܒܥܺܝ ܠܳܟ̥! 20ܩܘܿܡ ܢܚܰܬ ܘܙܳܟ̥ ܐܰܥܡܰܝّܶܗ ܘ݄ܛܪܳܐ ܠܶܒܳܟ̥ ܠܳܐ ܡ݄ܦܠ݄ܓ̥، ܡܺܐܝܕ̥ܶܗ ܕܳܐܢܳܐ ܐ̱ܢܳܐ ܕ݄ܡܫܰܕܪܺܝ ܠܺܝ.“ 21ܗܶܕܺܝ ܢܰܚ݄ܬ ܫܶܡܥܽܘܢ ܓܰܒ ܗ̄ܰܓّܰܒ̥ܪ̈ܶܐ، ܘܐܡ݄ܪ ܠܰܗ ܠّܶܗ: ”ܐܳܢܳܐ ܐ̱ܢܳܐ ܕܟ݄ܐܒܥܺܝܬܽܘ، ܥܰܠ ܡ݄ܢ ܐܰܬ̥ܺܝܬܽܘ؟“ 22ܘܐܡ݄ܪّܰܗ ܠܶܗ: ”ܓܰܒ̥ܪܳܐ ܚܰܕ̱ ܕ݄ܐܫܡܶܗ ܩܳܘܪܢܺܠܺܝܳܘܣ، ܪܺܝܫܳܐ ܕܡܳܐܐ، ܓܰܒ̥ܪܳܐ ܛܳܒ̥ܳܐ ܘܙܰܝܳܥܳܐ ܡܰܢ̱ ܐܠܳܗܳܐ، ܘܽܗ̄ܘ ܥܰܡܳܐ ܕܰܝّܽܘܕ̥̈ܳܝܶܐ ܟܽܘܠܶܗ ܟܣܳܗ݄ܕ ܐܰܥܠܶܗ. ܘܽܗ̄ܘ ܡܰܠܰܐܟ̥ܳܐ ܩܰܕܺܝܫܳܐ ܐܡ݄ܪ ܠܶܗ ܠܶܗ ܒܽܗ̄ܘ ܚܶܙܘܳܐ ܕ݄ܡܫܰܕ݄ܪ ܘܡܰܥܒܰܪ ܠܳܟ̥ ܠܽܗ̄ܘ ܒܰܝܬܰܝܕ̥ܶܗ ܠܰܫܰܢ ܕܫܳܡ݄ܥ ܡܶܠܬ̥ܳܐ ܡܶܢܳܟ̥.“ 23ܘܫܶܡܥܽܘܢ ܡܰܥܒܪܺܝ ܠܶܗ ܘܡܰܩܒܠܺܝ ܠܶܗ ܐܰܝܟܳܐ ܕܢܰܚ݄ܬ ܗ̄ܘܰܐ، ܘܠܽܗ̄ܘ ܝܰܘܡܳܐ ܕܒ݄ܬ̥ܪܶܗ، ܩܰܝ݄ܡ ܢܰܦ݄ܩ ܐܰܙّܶܗ ܐܰܥܡܰܝّܶܗ، ܘܗ݄ܢ ܡܰܗ̄ܢ ܐܰܚ̈ܽܘܢܳܢܶܐ ܕ݄ܒܝܳܘܦܺܝ ܐܰܙّ݄ܢ ܐܰܥܡܶܗ. 24ܘܒ݄ܬ̥݄ܪ ܝܰܘܡܳܐ ܥܰܒ݄ܪ ܠܩܶܣܰܪܺܝܰܐ. ܘܩܳܘܪܢܺܠܺܝܳܘܣ ܢܳܛܰܪ ܗ̄ܘܰܐ ܠّܶܗ، ܗܺܝّܶܗ ܥܰܡ ܗ̄ܰܩّܰܪ̈ܺܝܒ̥ܰܝܕ̥ܶܗ ܘܰܚّܰܒ̥ܪ̈ܳܢܶܐ ܘܰܚّܰܒܺܝܒ̈ܶܐ ܕ݄ܩܪܶܐ ܠܶܗ. 25ܘܺܗ̄ܝ ܢܰܩܠܐ ܕܥܰܒ݄ܪ ܫܶܡܥܽܘܢ، ܢܰܦ݄ܩ ܩܳܘܪܢܺܠܺܝܳܘܣ ܠܩܰܕ̱ܡܽܘܬ̥ܶܗ ܘܢܰܦ݄ܠ ܣܓ̥݄ܕ ܠܶܗ ܩ݄ܕ̱ܡ ܪ̈ܰܓ̥ܠܳܬ̥ܶܗ. 26ܘܫܶܡܥܽܘܢ ܡܰܩ݄ܡ ܠܶܗ ܘܐܡ݄ܪ ܠܶܗ ܠܶܗ: ”ܩܘܿܡ، ܐܳܢܳܐ ܣܬܶܝ ܢܳܫܳܐ ܐ̱ܢܳܐ.“ 27ܘܗܺܝّܶܗ ܟܡ݄ܫܓ̥݄ܠ ܐܰܥܡܶܗ ܥܰܒ݄ܪ ܘ݄ܚܙܶܐ ܠܶܗ ܢܳܫ̈ܶܐ ܓ̥ܰܠܰܒܶܐ ܕܰܐܬ̥݄ܢ ܗ̄ܘܰܘ̱ ܠܬܰܡܳܐ. 28ܘܐܡ݄ܪ ܠܰܗ ܠّܶܗ: ”ܗܰܬܽܘ ܟ݄ܐܕ̥ܥܺܝܬܽܘ ܕܠ݄ܐ ܟܳܗ̄ܘܶܐ ܠܚܰܕ̱ ܝܽܘܕ̥ܳܝܳܐ ܕܳܗ̄ܒܶܐ ܘܫܳܩ݄ܠ ܥܰܡ ܢܳܫܳܐ ܢܽܘܟ̥ܪܳܝܳܐ ܕܠܳܐ ܗ̄ܘܶܐ ܡܰܗ̄ܢ ܢܳܫ̈ܰܝܕ̥ܶܗ، ܐܶܠܳܐ ܐܰܠܳܗܳܐ ܡܰܚܘܶܐ ܠܶܗ ܠܺܝ ܕܠܳܐ ܐܡܰܪ ܐ̱ܢܳܐ ܥܰܠ ܢܳܫܳܐ ܕܟ݄ܬ ܝܳܐ ܛܰܢܦܳܐ ܐܰܘ ܡܚܰܪܡܳܐ. 29ܡܰܗ̄ܘܟ̥ܰܐ، ܡܶܚܕ̥ܳܐ ܐܰܬ̥ܺܝ ܐ̱ܢܳܐ ܗ̄ܺܝ ܢܰܩܠܐ ܕ݄ܡܫܰܕܰܪܟ̥ܽܘ ܒ݄ܬ̥ܪܺܝ. ܘܳܐܥܕܳܐ ܟ݄ܡܫܰܐܶܠ ܐ̱ܢܳܐ ܠܟ̥ܽܘ: ܠܡ݄ܢ ܡܫܰܕܰܪܟ̥ܽܘ ܒ݄ܬ̥ܪܺܝ؟“
30ܩܳܘܪܢܺܠܺܝܳܘܣ ܐܡ݄ܪ ܠܶܗ ܠܶܗ: ”ܡܶܢ̱ ܐܰܪܒܥܳܐ ܝܰܘܡ̈ܶܐ ܗܳܠ ܐܳܥܕܳܐ ܘܳܐܢܳܐ ܨܰܝܳܡܳܐ ܐ̱ܢܳܐ ܘܠܰܐܦ ܗ̄ܺܝ ܫܳܥܬ̥ܳܐ ܬܠ݄ܬ̥ ܒ݄ܬ̥݄ܪ ܡܶܢ̱ ܦܰܠܓܶܗ ܕܝܰܘܡܳܐ ܡܨܰܠܶܐ ܠܺܝ ܒܽܗ̄ܘ ܒܰܝܬܳܐ، ܩܰܝ݄ܡ ܩܽܘܕ̱ܡܺܝ ܚܰܕ̱ ܓܰܒ̥ܪܳܐ ܠܰܒ̥ܺܝܫܳܐ ܚܶܘܳܪܳܐ، 31ܘܐܡ݄ܪ ܠܶܗ ܠܺܝ: ܩܳܘܪܢܺܠܺܝܶܐ، ܫܡܺܝܥܳܐ ܗ̄ܺܝ ܨܠܽܘܬ̥ܰܝܕ̥ܳܟ̥، ܘܠܰܙّܶܕ̈ܩܳܬ̥ܰܝܕ̥ܳܟ̥ ܕܽܘܟ̥ܪܳܢܳܐ ܗܰܘܺܝ ܩ݄ܕ̱ܡ ܐܰܠܳܗܳܐ، 32ܙܳܟ̥ ܡܫܰܕ݄ܪ ܢܳܫ̈ܶܐ ܠܺܗ̄ܝ ܡܕ̥ܺܝܢ̱ܬܳܐ ܕܝܳܘܦܺܝ، ܘܡܰܝܬܰܝ ܠܫܶܡܥܽܘܢ ܕ݄ܟܡ݄ܩܪܶܐ ܟܶܐܦܳܐ، ܘܟܰܐܠܶܗ ܢܰܚܳܬܳܐ ܒܽܗ̄ܘ ܒܰܝܬܳܐ ܕܫܶܡܥܽܘܢ ܗ̄ܽܘ ܨܰܒ̥ܳܥܳܐ ܕܽܗ̄ܘ ܓܰܠܕܳܐ، ܕܟ݄ܬ ܝܳܐ ܥܰܠ ܣܰܦ̊ܬܶܗ ܕܽܗ̄ܘ ܝܰܡܳܐ، ܘܗܺܝّܶܗ ܓܕܳܐܬ̥ܶܐ ܓܡ݄ܫܓ̥݄ܠ ܐܰܥܡܳܟ̥. 33ܘܒܺܗ̄ܝ ܫܳܥܬ̥ܰܝܕ̥ܰܗ، ܡܫܰܕܰܪ ܠܺܝ ܒ݄ܬ̥ܪܳܟ̥، ܘܗܰܬ ܛܳܒ̥ܳܐ ܣ݄ܡ ܠܳܟ̥ ܕܰܐܬ̥ܰܬ. ܘܟܰܐܠܶܗ ܟܽܘܠܰܢ ܩܽܘܕ̱ܡܳܟ̥ ܢܰܐ ܘܟ݄ܐܒܥܺܝܢܰܐ ܕܫܳܡܥܺܝܢܰܐ ܟܽܘܠّܶܗ ܗ̄ܰܦّܽܘܩܕ̈ܳܢܶܐ ܕܰܐܬ̥ܺܝ ܠܳܟ̥ ܡܰܢ̱ ܐܠܳܗܳܐ.“
ܗ̄ܽܘ ܡܰܐܡܪܳܐ ܕܫܶܡܥܽܘܢ
34ܘܫܶܡܥܽܘܢ ܦܬ݄ܚ ܠܶܗ ܦܶܡܶܗ ܘܐܡ݄ܪ ܠܶܗ: ”ܒ݄ܫܪܳܪܳܐ ܐܰܕ̥݄ܥ ܐ̱ܢܳܐ ܕܰܐܠܳܗܳܐ ܠ݄ܐ ܟܣܳܝ݄ܡ ܦܽܘܪܫܳܢܳܐ ܒܰܝܢ ܗ̄ܰܥّܰܡ̈ܶܐ. 35ܐܶܠܳܐ ܒܰܝܢ ܟܽܘܠّܶܗ ܗ̄ܰܥّܰܡ̈ܶܐ، ܐܰܝܢܰܐ ܕܙܳܝ݄ܥ ܡܰܢ̱ ܐܠܳܗܳܐ ܘܣܳܝ݄ܡ ܛܳܒ̥ܽܘܬ̥ܳܐ، ܡܰܩܒܠܳܐ ܝܳܐ ܓܰܒܶܗ. 36ܡܺܐܝܕ̥ܶܗ ܕܺܗ̄ܝ ܡܶܠܬ̥ܳܐ ܕ݄ܡܫܰܕܰܪ ܠܶܗ ܠܰܗ̄ܢ ܐܰܒܢ̈ܶܐ ܕܺܐܝܣܪܳܐܶܝܠ، ܘ݄ܡܣܰܒܰܪܺܝ ܠܶܗ ܫܠܳܡܳܐ ܘܫܰܝܢܳܐ ܒܺܐܝܕ̥ܶܗ ܕܝܶܫܽܘܥ ܡܫܺܝܚܳܐ، ܗܰܢܳܐ ܝܳܐ ܡܳܪܝܳܐ ܕܟܽܘܠّܶܗ (ܗ̄ܰܥّܰܡ̈ܶܐ). 37ܘܗܰܬܽܘ ܣܬܶܝ ܟ݄ܐܕ̥ܥܺܝܬܽܘ ܒܺܗ̄ܝ ܡܶܠܬ̥ܳܐ ܕܗܰܘܝܳܐ ܒܟܽܘܠܰܗ ܝܺܗܽܘܕ̥، ܕ݄ܡܫܰܪܶܐ ܠܰܗ ܡܽܗ̄ܘ ܓܠܺܝܠܳܐ ܒ݄ܬ̥݄ܪ ܡܺܗ̄ܝ ܡܰܥܡܽܘܕ̥ܺܝܬ̥ܳܐ ܕ݄ܟܪ݄ܙ ܠܶܗ ܝܽܘܚܰܢܳܢ 38ܥܰܠ ܝܶܫܽܘܥ ܕܡܶܢ̱ ܢܳܨܪܰܬ̥، ܕܰܐܠܳܗܳܐ ܡܫ݄ܚ ܠܶܗ ܒܪܽܘܚܳܐ ܕܩܽܘܕܫܳܐ ܘ݄ܒܚܰܝܠܳܐ. ܘܗܺܝّܶܗ ܗ̄ܘܰܐ ܕܟܳܪܰܟ̥ ܗ̄ܘܰܐ ܘܡܰܢ݄ܚ ܗ̄ܘܰܐ ܠܰܗ̄ܢ݄ܟ ܕܟܰܝܽܒّ̥ܶܗ ܡܽܗ̄ܘ ܒܺܝܫܳܐ، ܡܺܐܝܕ̥ܶܗ ܕܰܐܠܳܗܳܐ ܐܰܥܡܶܗ ܗ̄ܘܰܐ. 39ܘܰܐܚܢܰܐ ܗ̄ܰܣّܳܗܕ̈ܰܝܕ̥ܶܗ ܢܰܐ ܥܰܠ ܟܽܘܠ ܡܶܕܶܐ ܕܣ݄ܡ ܠܶܗ ܒܟܽܘܠܰܗ ܗ̄ܺܝ ܐܰܪܥܳܐ ܕܺܝܗܽܘܕ̥ ܘܕܽܐܘܪܶܫܠܶܡ. ܘܶܐܠܶܗ ܠܰܗ̄ܢܳܐ ܗ̄ܰܝّܽܘܕ̥̈ܳܝܶܐ ܡܥܰܠܰܩّܶܗ ܥܰܠ ܗ̄ܽܘ ܩܰܝܣܳܐ ܘ݄ܩܛ݄ܠّܶܗ. 40ܘܶܐܠܶܗ ܐܰܠܳܗܳܐ ܡܰܩ݄ܡ ܠܶܗ ܒ݄ܬ̥݄ܪ ܬܠܳܬ̥ܳܐ ܝܰܘܡ̈ܶܐ، ܘܗܽܒ̥ ܠܶܗ ܠܶܗ ܕܡܰܚܘܶܐ ܒܓܰܠܝܳܐ ܩ݄ܕ̱ܡ ܗ̄ܺܝ ܥܰܝܢܳܐ. 41ܠܳܐ ܠܽܗ̄ܘ ܥܰܡܳܐ ܟܽܘܠܶܗ، ܐܶܠܳܐ ܐܶܠܰܢ ܐܰܝܢܰܐ ܕܡܰܢ̱ ܐܠܳܗܳܐ ܡܢܰܩܶܝܢܰܐ ܕܗܳܘܺܝܢܰܐ ܠܶܗ ܣܳܗܕ̈ܶܐ، ܐܰܚܢܰܐ ܕܰܐܟ̥ܺܝܠ ܠܰܢ ܐܰܥܡܶܗ ܘ݄ܫܬܶܐ ܠܰܢ، ܒ݄ܬ̥݄ܪ ܡܺܗ̄ܝ ܩܝܰܡܬܰܝܕ̥ܶܗ ܡܒܰܝܢ ܗ̄ܰܡّܺܝ̈ܬ̥ܶܐ. 42ܘܗܽܒ̥ ܠܶܗ ܠܰܢ ܦܽܘܩܕܳܢܳܐ ܕܟܳܪܙܺܝܢܰܐ ܘܣܳܗܕܺܝܢܰܐ ܠܽܗ̄ܘ ܥܰܡܳܐ، ܕܰܗ̄ܢܳܐ ܝܳܐ ܕ݄ܦܪܺܝܫ ܡܰܢ̱ ܐܠܳܗܳܐ ܕܰܝܳܢܳܐ ܕܰܚّܰܝ̈ܶܐ ܘܕܰܡّܺܝ̈ܬ̥ܶܐ. 43ܘܰܐܥܠܶܗ ܗ̄ܰܢܒܺܝ̈ܶܐ ܟܽܘܠّܶܗ ܣܗ݄ܕّܶܗ: ܕܟܽܘܠ ܚܰܕ̱ ܕ݄ܡܗܰܝܡ݄ܢ ܒ݄ܐܫܡܶܗ ܓܡܰܩܒ݄ܠ ܫܽܘܒܩܳܢܳܐ ܕܰܚܛܳܗ̈ܶܐ.“
ܢܚܳܬܳܐ ܕܪܽܘܚܳܐ ܕܩܽܘܕܫܳܐ ܥܰܠ ܗ̄ܰܥّܰܡ̈ܶܐ
44ܘܗܶܫ ܫܶܡܥܽܘܢ ܡ݄ܫܓ̥ܰܠ ܗ̄ܘܰܐ ܗ̄ܰܡّܶܠܰܢ̈ܺܝ، ܢܰܚܺܝܬܳܐ ܪܽܘܚܳܐ ܕܩܽܘܕܫܳܐ ܥܰܠ ܟܽܘܠّܶܗ ܕܫ݄ܡܥܺܝ ܗ̄ܘܰܘ̱ ܗ̄ܺܝ ܡܶܠܬ̥ܳܐ. 45ܘܰܗ̄ܢ ܐܰܚ̈ܽܘܢܳܢܶܐ ܓܙܺܝܪ̈ܶܐ (ܗ̄ܰܝّܽܘܕ̥̈ܳܝܶܐ ܕܡܰܩܒܰܠّܶܗ ܡܫܺܝܚܳܐ) ܕܰܐܬ̥݄ܢ ܐܰܥܡܶܗ ܡܕܰܘܡܪܺܝ ܘ݄ܡܚܰܝܪܺܝ ܥܰܠ ܕܺܗ̄ܝ ܡܰܘܗܰܒܬܳܐ ܕܪܽܘܚܳܐ ܕܩܽܘܕܫܳܐ ܥܰܠ ܗ̄ܰܥّܰܡ̈ܶܐ ܣܬܶܝ ܢܰܚܺܝܬܳܐ ܘܛܰܝܺܝܦܳܐ، 46ܥܰܠ ܕܫ݄ܡܥܺܝ ܗ̄ܘܰܘ̱ ܢّܶܗ ܟܡ݄ܫܓ̥ܳܠܺܝ ܒܠܶܫܳܢ̈ܶܐ ܘܡܰܘܪܒ̥ܺܝ ܗ̄ܘܰܘ̱ ܠܰܐܠܳܗܳܐ. ܘܐܡ݄ܪ ܠܶܗ ܫܶܡܥܽܘܢ: 47”ܩܰܝ ܢܳܫܳܐ ܟܺܝܒܶܗ ܡܰܟܠܶܐ ܗ̄ܰܡّܰܝ̈ܶܐ ܕܠܳܐ ܥܳܡܕ̥ܺܝ ܗܰܢ݄ܟ؟ ܟܰܐܠܶܗ ܡܰܩܒܰܠّܶܗ ܪܽܘܚܳܐ ܕܩܽܘܕܫܳܐ ܐܟ̥݄ܕܘܳܬ̥ܰܢ.“ 48ܗ̄ܺܝ ܢܰܩܠܝܳܐ، ܗܽܒ̥ ܠܰܗ ܠّܶܗ ܦܽܘܩܕܳܢܳܐ ܕܥܳܡܕܺܝ ܒ݄ܐܫܡܶܗ ܕܡܳܪܰܢ ܝܶܫܽܘܥ ܡܫܺܝܚܳܐ. ܘܰܐܒܺܝܥܺܝ ܡܶܢܶܗ ܕܦܳܝ݄ܫ ܓܰܒܰܝّܶܗ ܟܡܳܐ ܝܰܘܡ̈ܶܐ.
Currently Selected:
ܥܒܳܕ̥̈ܶܐ ܕܰܫܠܺܝܚ̈ܶܐ 10: ܟܬܒܐ
Highlight
Share
Copy
Want to have your highlights saved across all your devices? Sign up or sign in
Suryoyo Bible © 2024 Aramaic Bible Translation
