ܥܒܳܕ̥̈ܶܐ ܕܰܫܠܺܝܚ̈ܶܐ 12

ܝܰܥܩܽܘܒ ܟܡ݄ܩܛ݄ܠ ܘܫܶܡܥܽܘܢ ܟܡ݄ܚܒ݄ܫ

1ܘܒܽܗ̄ܘ ܙܰܒܢܰܘܳܐ، ܗܶܪܳܘܕ̥ܶܣ ܗ̄ܽܘ ܡܰܠܟܳܐ ܕ݄ܟܡ݄ܩܪܶܐ ܐܰܓ̥ܪܺܦܳܘܣ ܡܰܚ݄ܬ ܠܶܗ ܐܺܝܕ̥ܳܐ ܥܰܠ ܗ݄ܢ ܡܰܗ̄ܢ ܢܳܫ̈ܶܐ ܕܒܺܗ̄ܝ ܥܺܕ̱ܬܳܐ ܠܰܫܰܢ ܕܡܰܟܽܒّ̥ܶܗ. 2ܘ݄ܩܛܺܝܠ ܠܶܗ ܒܽܗ̄ܘ ܣܰܝܦܳܐ ܠܝܰܥܩܽܘܒ ܗ̄ܽܘ ܐܰܚܽܘܢܳܐ ܕܝܽܘܚܰܢܳܢ. 3ܘܺܗ̄ܝ ܢܰܩܠܐ ܕ݄ܚܙܶܐ ܠܶܗ ܕܒܰܣ݄ܡّܶܗ ܠܰܝّܽܘܕ̥̈ܳܝܶܐ، ܡܳܘܙܰܕ ܠܶܗ ܕܙܳܒ݄ܛ ܠܫܶܡܥܽܘܢ ܟܶܐܦܳܐ ܣܬܶܝ، ܘܰܝّܰܘܡ̈ܳܬ̥ܰܢ݄ܟ (ܕܽܗ̄ܘ ܥܶܐܕ̥ܳܐ) ܕܰܦّܰܛܺܝܪ̈ܶܐ ܗ̄ܘܰܝܢܶܝ. 4ܘ݄ܙܒ݄ܛ ܠܶܗ ܘ݄ܡܚܰܠܰܩ ܠܶܗ ܒܽܗ̄ܘ ܚܒܽܘܫܝܳܐ، ܘܡܰܫܠܰܡ ܠܶܗ ܠܰܫܬܰܥܣܰܪ ܦܳܠ̈ܚܶܐ ܕܢܳܛܪܺܝ ܠܶܗ، ܘܒ݄ܬ̥݄ܪ ܡܽܗ̄ܘ ܦܶܨܚܳܐ ܕܡܰܫܠܰܡ ܠܶܗ ܠܽܗ̄ܘ ܥܰܡܳܐ ܕܰܝّܽܘܕ̥̈ܳܝܶܐ. 5ܘܗܶܫ ܫܶܡܥܽܘܢ ܢܛܺܝܪܳܐ ܗ̄ܘܰܐ ܒܽܗ̄ܘ ܚܒܽܘܫܝܳܐ، ܗ̄ܺܝ ܥܺܕ̱ܬܳܐ ܡܩܰܪܒ̥ܳܐ ܗ̄ܘܰܐ ܨܠܽܘܬ̥ܳܐ ܐܰܡ݄ܢܬܳܐ ܠܰܐ‌ܠܳܗܳܐ ܡܶܢ̱ ܚܠܳܦܶܗ.

ܡܳܪܝܳܐ ܟܡܰܘܦ݄ܩ ܠܫܶܡܥܽܘܢ ܡܽܗ̄ܘ ܚܒܽܘܫܝܳܐ

6ܘܒܽܗ̄ܘ ܠܰܠܝܰܘܳܐ، ܕ݄ܠܨܰܦܪܳܐ ܓܡܰܫܠܰܡ ܗ̄ܘܰܝ ܠܶܗ، ܘܗܺܝّܶܗ ܫܶܡܥܽܘܢ ܕܰܡܺܝܟ̥ܳܐ ܗ̄ܘܰܐ ܒܰܝܢ ܬܪܶܝ ܦܳܠ̈ܚܶܐ، ܘܡܰܐܣܪܳܐ ܗ̄ܘܰܐ ܒܬܰܪܬܶܝ ܫܺܫܠ̈ܳܬ̥ܳܐ، ܘ݄ܚܪ̈ܶܢܶܐ ܢܳܛܪܺܝ ܗ̄ܘܰܘ̱ ܗ̄ܰܬّܰܪ̈ܥܶܐ ܕܽܗ̄ܘ ܚܒܽܘܫܝܳܐ، 7ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܩܰܝ݄ܡ ܠܰܠܥ݄ܠ ܡܶܢܶܗ، ܘܢܽܘܗܪܳܐ ܡܰܢܗܰܪ ܠܶܗ ܒܟܽܘܠܶܗ ܗ̄ܽܘ ܚܒܽܘܫܝܳܐ، ܘ݄ܕܩ݄ܪ ܠܶܗ ܒܓܰܒܶܗ ܘܡܰܩ݄ܡ ܠܶܗ ܘܐܡ݄ܪ ܠܶܗ ܠܶܗ: ”ܩܘܿܡ ܡܰܠܺܝܙܳܐ!“ ܘܢܰܦܺܝܠܺܝ ܗ̄ܰܫّܺܫܠ̈ܳܬ̥ܳܐ ܡܶܢ̱ ܐܺܝܕ̥̈ܳܬ̥ܶܗ. 8ܘܐܡ݄ܪ ܠܶܗ ܠܶܗ ܗ̄ܽܘ ܡܰܠܰܐܟ̥ܳܐ: ”ܡܰܐܣ݄ܪ ܚܰܨܳܟ̥، ܘ݄ܠܒ̥ܰܫ ܗ̄ܰܡܣܳܢ̈ܰܝܕ̥ܳܟ̥.“ ܘܣ݄ܡ ܠܶܗ ܗܰܘܟ̥ܰܐ. ܘܐܡ݄ܪ ܠܶܗ ܠܶܗ ܣܬܶܝ: ”ܠܒ̥ܰܫ ܗ̄ܽܘ ܠܒܽܘܫܰܝܕ̥ܳܟ̥ ܘܬܳܟ̥ ܒ݄ܬ̥ܪܺܝ.“ 9ܘܢܰܦ݄ܩ، ܘ݄ܐܙّܶܗ ܗ̄ܘܰܐ ܒ݄ܬ̥ܪܶܗ ܘܗܺܝّܶܗ ܠܳܐ ܐܕ̥ܰܥ ܗ̄ܘܰܐ ܕ݄ܫܪܳܪܳܐ ܝܳܐ ܗܰܬ̥ܶܐ ܕܗܰܘܝܳܐ ܥܰܠ ܐܺܝܕ̥ܶܗ ܕܽܗ̄ܘ ܡܰܠܰܐܟ̥ܳܐ، ܘܚܳܫܰܒ̥ ܗ̄ܘܰܐ ܕܚܶܙܘܳܐ ܚܳܙܶܐ ܗ̄ܘܰܐ. 10ܘܺܗ̄ܝ ܢܰܩܠܐ ܕܫܰܦܺ̊ܝܥܺܝ ܗ̄ܺܝ ܕܽܘܟܬ̥ܳܐ ܩܰܕ̱ܡܰܝܬܳܐ ܕܰܗ̄ܢ ܢܳܛܽܘܪ̈ܶܐ ܘܕܰܬّܰܪܬܶܝ ܡܰܛ݄ܢ ܗܳܠ ܠܽܗ̄ܘ ܬܰܪܥܳܐ ܕܽܗ̄ܘ ܦܰܪܙܠܳܐ، ܘ݄ܦܬܺܝܚ ܐ‌ܰܠّܶܗ ܡܶܢ̱ ܪܽܘܚܶܗ، ܘܺܗ̄ܝ ܢܰܩܠܐ ܕܢܰܦܺܝܩܺܝ ܘ݄ܩܛ݄ܥّܶܗ ܚܰܕ̱ ܕܰܪܒܳܐ، ܦܪܺܝܫ ܡܶܢ ܓܰܒܶܗ ܗ̄ܽܘ ܡܰܠܰܐܟ̥ܳܐ. 11ܗ̄ܺܝ ܢܰܩܠܝܳܐ ܫܶܡܥܽܘܢ ܐܰܕ̥݄ܥ ܘܐܡ݄ܪ ܠܶܗ: ”ܐܳܥܕܳܐ ܐܰܕ̥݄ܥ ܐ̱ܢܳܐ ܕܒ݄ܫܪܳܪܳܐ ܡܳܪܝܳܐ ܡܫܰܕܰܪ ܠܶܗ ܗ̄ܽܘ ܡܰܠܰܐܟ̥ܰܝܕ̥ܶܗ ܘܡܰܦܠܰܛ ܠܶܗ ܠܺܝ ܡܶܢ̱ ܐܺܝܕ̥ܶܗ ܕܗܶܪܳܘܕ̥ܶܣ ܗ̄ܽܘ ܡܰܠܟܳܐ، ܘܡܽܗ̄ܘ ܡܶܕܶܐ ܕܳܐܒܥܺܝ ܗ̄ܘܰܘ̱ ܗ̄ܰܝّܽܘܕ̥̈ܳܝܶܐ ܕܣܰܝܡܺܝ ܐܶܒܺܝ.“ 12ܘܺܗ̄ܝ ܢܰܩܠܐ ܕܰܐܕ̥݄ܥ، ܐܰܬ̥ܺܝ ܠܽܗ̄ܘ ܒܰܝܬܳܐ ܕܡܰܪܝܰܡ ܗ̄ܺܝ ܐܶܡܳܐ ܕܝܽܘܚܰܢܳܢ ܗܰܘܳܐ ܕ݄ܩܪܶܐ ܡܰܪܩܳܘܣ، ܡܺܐܝܕ̥ܶܗ ܕܰܐܚ̈ܽܘܢܳܢܶܐ ܓ̥ܰܠܰܒܶܐ ܟ݄ܬ ܗ̄ܘܰܘ̱ ܬܰܡܳܐ ܠܰܬܺܝܡ̈ܶܐ ܘ݄ܡܨܰܠ݄ܢ ܗ̄ܘܰܘ̱. 13ܘܕ݄ܩ ܠܶܗ ܒܽܗ̄ܘ ܬܰܪܥܳܐ ܕܺܗ̄ܝ ܕܳܪܬܳܐ، ܘܢܰܦܺܝܩܳܐ ܕܡܰܕܥܪܳܐ ܐܰܥܠܶܗ ܚܕ̥ܳܐ ܛܠܺܝܬ̥ܳܐ ܕ݄ܐܫܡܰܗ ܪܳܘܕܺܝ، 14ܘܰܐܕ̥ܺܝܥܳܐ ܗ̄ܽܘ ܩܳܠܳܐ ܕܫܶܡܥܽܘܢ، ܘܡܺܗ̄ܝ ܦܨܺܝܚܽܘܬ̥ܰܝܕ̥ܰܗ ܠܳܐ ܦܬ݄ܚ ܠܰܗ ܠܶܗ ܗ̄ܽܘ ܬܰܪܥܳܐ، ܐܶ‌ܠܳܐ ܕܰܥܺܝܪܳܐ ܒܪܰܗܛܳܐ ܘܐܡ݄ܪ ܠܰܗ ܠّܶܗ: ”ܟܰܐܠܶܗ ܫܶܡܥܽܘܢ ܟܰܠܝܳܐ ܥܰܠ ܗ̄ܽܘ ܬܰܪܥܳܐ ܕܺܗ̄ܝ ܕܳܪܬܳܐ!“ 15ܟ݄ܐܡّܺܪ̱ܝ ܠܰܗ: ”ܙܽܘܥܬ̥ܳܐ ܨ݄ܕ ܠܰܗ ܠܰܟ̥.“ ܘܗܺܝّܰܗ ܙ݄ܕ ܐ݄ܡّܳܪ̱ܐ ܗ̄ܘܰܐ ܕܗܰܬ̥ܶܐ ܗܰܘܟ̥ܰܐ ܝܳܐ! ܘܗ݄ܢّܶܝ ܐ݄ܡّܺܪ̱ܝ ܗ̄ܘܰܘ̱ ”ܟܺܝܬ ܕܳܗ̄ܘܶܐ ܗ̄ܽܘ ܡܰܠܰܐܟ̥ܰܝܕ̥ܶܗ.“ 16ܘܫܶܡܥܽܘܢ ܕܳܝܰܩ ܗ̄ܘܰܐ ܒܽܗ̄ܘ ܬܰܪܥܳܐ. ܘܢܰܦܺܝܩܺܝ ܚܙܰܠّܶܗ ܘ݄ܡܕܰܘܡܪܺܝ. 17ܘܒܺܐܝܕ̥ܶܗ ܣܳܝܰܡ ܗ̄ܘܰܐ ܠّܶܗ ܪܶܡܙܳܐ ܕܟܳܠ݄ܢ، ܘܥܰܒ݄ܪ ܐܡ݄ܪ ܠܰܗ ܠّܶܗ ܐܰܝܕܰܪܒܳܐ ܡܳܪܝܳܐ ܡܰܘܦܰܩ ܠܶܗ ܡܽܗ̄ܘ ܚܒܽܘܫܝܳܐ. ܘܐܡ݄ܪ ܠܰܗ ܠّܶܗ: ”ܡܰܘܕ̥ܶܥܽܘ ܗܰܢܺܝ ܠܝܰܥܩܽܘܒ ܘܠܰܗ̄ܢ ܐܰܚ̈ܽܘܢܳܢܶܐ.“ ܘܢܰܦ݄ܩ ܐܰܙّܶܗ ܠܰܐܬ̥ܪܳܐ ܚܪܶܢܳܐ.

ܗ̄ܽܘ ܪܽܘܓ̥ܙܳܐ ܕܗܶܪܳܘܕ̥ܶܣ ܘܽܗ̄ܘ ܡܰܘܬܰܝܕ̥ܶܗ

18ܘܺܗ̄ܝ ܢܰܩܠܐ ܕܗܰܘܺܝ ܨܰܦܪܳܐ، ܗܰܘܺܝ ܗ̄ܘܰܐ ܫܓ̥ܽܘܫܝܳܐ ܪܰܒܳܐ ܒܰܝܢ ܗ̄ܰܦّܳܠ̈ܚܶܐ ܥܰܠ ܫܶܡܥܽܘܢ ܕܡ݄ܢ ܗܰܘܺܝ ܠܶܗ. 19ܘܗܶܪܳܘܕ̥ܶܣ ܗ̄ܺܝ ܢܰܩܠܐ ܕܰܐܒ݄ܥ ܠܶܗ ܘܠܳܐ ܚܙܶܐ ܠܶܗ، ܕ݄ܢ ܠܶܗ ܗ̄ܰܢ ܢܳܛܽܘܪ̈ܶܐ ܘܗܽܒ̥ ܠܶܗ ܦܽܘܩܕܳܢܳܐ ܕܡܰܝܬ̥ܺܝ. ܘܢܰܦ݄ܩ ܡܶܢ̱ ܝܺܗܽܘܕ̥ ܘܰܐܙّܶܗ ܝܰܬܽܒ̥ ܒܩܶܣܰܪܺܝܰܐ. 20ܘܥܰܠ ܕܟ݄ܬ ܗ̄ܘܰܐ ܗܶܪܳܘܕ̥ܶܣ ܪܓ̥ܺܝܙܳܝܳܐ ܡܰܗ̄ܢ ܢܳܫ̈ܶܐ ܕܨܽܘܪ ܘܨܰܝܕܳܐ، ܠܰܬܺܝܡܺܝ ܠ݄ܚܕ̥ܳܕ̥̈ܶܐ ܘܰܐܬ̥݄ܢ ܠܓܰܒܶܗ. ܘܓ̥ܰܠܰܒܶܐ ܐܰܒܺܝܥܺܝ ܡܶܢ̱ ܒܠܰܣܛܳܘܣ ܕܟ݄ܬ ܗ̄ܘܰܐ ܪܰܒܳܐ ܕܰܥّܰܒ̥ܳܕ̈ܶܐ ܕܽܗ̄ܘ ܩܽܘܨܪܳܐ ܕܽܗ̄ܘ ܡܰܠܟܳܐ. ܘܰܐܒܺܝܥܺܝ ܡܶܢܶܗ ܕܳܗ̄ܘܰܠّܶܗ ܫܰܝܢܳܐ، ܡܺܐܝܕ̥ܶܗ ܕܽܗ̄ܘ ܡܽܐܘܟܠܳܐ ܕܽܗ̄ܘ ܐܰܬ̥ܪܰܬّ̥ܶܗ ܡܺܗ̄ܝ ܡܰܠܟܽܘܬ̥ܳܐ ܕܗܶܪܳܘܕ̥ܶܣ ܗ̄ܘܰܐ. 21ܘ݄ܒܚܰܕ̱ ܝܰܘܡܳܐ ܝܕ̥ܺܝܥܳܐ، ܗܶܪܳܘܕ̥ܶܣ ܠܒ̥݄ܫ ܠܶܗ ܗ̄ܽܘ ܠܒܽܘܫܳܐ ܕܺܗ̄ܝ ܡܰܠܟܽܘܬ̥ܳܐ، ܘܝܰܬܽܒ̥ ܥܰܠ ܗ̄ܽܘ ܟܽܘܪܣܝܳܐ ܕܽܗ̄ܘ ܕܺܝܢܳܐ ܘܡ݄ܫܓ̥ܰܠ ܗ̄ܘܰܐ ܥܰܡ ܗ̄ܰܢ ܢܳܫ̈ܶܐ. 22ܘܽܗ̄ܘ ܥܰܡܳܐ ܟܽܘܠܶܗ ܡܰܙܥܰܩ ܗ̄ܘܰܐ ܘܳܐܡܰܪ ܗ̄ܘܰܐ: ”ܗܰܢܺܝ ܗ̄ܰܡّܰܐܡܪ̈ܶܐ ܕܰܐ‌ܠܳܗܳܐ ܢܶܝ ܘܠܰܝ̱ܬ ܢܶܝ ܕܢܳܫܳܐ!“ 23ܘܥܰܠ ܕܠܳܐ ܗܽܒ̥ ܠܶܗ ܬܶܫܒܽܘܚܬܳܐ ܠܰܐ‌ܠܳܗܳܐ، ܒܺܗ̄ܝ ܫܳܥܬ̥ܰܝܕ̥ܰܗ، ܗ̄ܽܘ ܡܰܠܰܐܟ̥ܳܐ ܕܡܳܪܝܳܐ ܡܚܶܐ ܠܶܗ، ܘ݄ܡܬܰܘܠ݄ܥ ܘܡܰܝ݄ܬ̥. 24ܗ̄ܺܝ ܣܒܰܪܬ̥ܳܐ ܕܰܐ‌ܠܳܗܳܐ ܡ݄ܟܪܳܙܳܐ ܗ̄ܘܰܐ ܘܝ݄ܪܒ̥ܳܐ ܗ̄ܘܰܐ. 25ܘܕܰܥܺܝܪܺܝ ܒܰܪܢܰܒܰܐ ܘܫܳܐܘܳܠ ܡܶܢ̱ ܐܽܘܪܶܫܠܶܡ ܠܰܐܢܛܺܝܳܘܟ̥ܺܝ ܒ݄ܬ̥݄ܪ ܕ݄ܡܟܰܡܰܠ ܠّܶܗ ܗ̄ܺܝ ܬܶܫܡܶܫܬܰܬّ̥ܶܗ، ܘܡܰܘܒܰܠّܶܗ ܐܰܥܡܰܝّܶܗ ܝܽܘܚܰܢܳܢ ܗܰܘܳܐ ܕ݄ܩܪܶܐ ܡܰܪܩܳܘܣ.

Currently Selected:

ܥܒܳܕ̥̈ܶܐ ܕܰܫܠܺܝܚ̈ܶܐ 12: ܟܬܒܐ

Highlight

Copy