Yohana 21

Yesu kowalawila waluko wake saba

1Vigamalile gago, Yesu kawalawila kaidi waluko wake hamgwazo ha lamba ya Tibelia. Nayo kawalawila vino, 2Simoni Petulo na Tomasi ija yokemigwa pacha, na ija Natanieli mwenekae wa Kana ya Galilaya, na wana waidi wa Zebedayo na waluko wamwenga waidi, wakala wose hamwe. 3Simoni Petulo kawalongela, “Noita kuloa somba.” Nao wamlongela, “Cheye choilongoza na gweye.” Baho waita na kukwela muingalawa, mbali chilo icho hawapatile chochose. 4Lukwili imitondo, Yesu kema hamgwazo lamba, mbali waja waluko hawamanyile kama ija iyo Yesu. 5Baho Yesu kawauza, “Wabwanga hampatile somba wowose?” Wao wamwidika, “Hambe, hachinapata chinhu.”

6Yesu kawalongela, “Tandeni wavu ubanzi wa kulume mwa ngalawa na mweye mopata somba.” Baho, watanda nyavu zao ubanzi uo, mbali sambi hawadahile kukwega kaidi kwa wingi wa somba.

7Baho ija mwaluko Yesu yeli na wende nayo kamlongela Petulo, “Che! Mndewa! Simoni Petulo viyahulike kua ni Mndewa, kaizinga valo jake, kwa vija kakala hanavala chivalo, nayo kazumha mmazi. 8Mbali waja waluko wamwenga weza haingalawa, hawakalile hatali kulawa haingema yovika utali wa mita mia, wakwega lwavu umemile somba. 9Viwavikile mhwani, wauona moto wa makala na hachanha yake hekigwa somba na mgate. 10Yesu kawalongela, “Wagaleni hano somba chidogo muwatandile.”

11Basi, Simoni Petulo kakwela muingalawa na kuukwega uja lwavu mbaka muingema lwavu ukala umemile somba wakulu mia moja na hamsini na nhatu. Hata kama wakala wingi ivo wavu haudegeke. 12Yesu kawalongela, “Izoni mzimbuse tumbo.” Baho habule hata munhu imwe kulawa mja mwawaluko wake yagezile kumuuza, “Gweye kwa nani? Manake wavimanya kakala Mndewa. 13Yesu kaita kausola mgate, kaweng'ha, na katenda na kwa waja somba.

14Ino ikala mala ya kadatu Yesu kuwalawilila waluko wake kulawa viyazilibuke.

Yesu komlagiza Petulo

15Viwakomeleze kuzimbusa tumbo, Yesu kamuuza Simoni Petulo, “Simoni mwana wa Yohana! Ivo, kuna wende na niye kubita wano?” Nayo kamwidika, Ena, Mndewa, kovimanya kua niye nina wende na gweye.” Yesu kamlongela, “Walise ng'hondolo wangu.” 16Amala Yesu kamulongela kaidi, “Simoni mwana wa Yohana! Ivo, kuna wende na niye?” Petulo kedika, “Ena Mndewa, gweye kuvimanya kua nina wende na gweye.” Yesu kamlongela, “Susila ng'hondolo wangu.” 17Yesu kamuuza Petulo mala ya kadatu, “Simoni mwana wa Yohana! Ivo, kuna wende na niye?” Baho Petulo kagwa fufunhende ng'hani kwa vija Yesu kamuuza mala ya kadatu, “Kuna wende na niye?” Kamlongela, “Mndewa gweye kogamanya gose, gweye kovimanya kua nina wende na gweye.” Yesu kamalongela, “Walise ng'hondolo wangu.” 18Kweli nokulongela, vuukalile mbwanga kuzoela kuifunga msipi na kuita kokose kuulonda. Mbali kuuvele kogolosa makono gako na munhu imwenga kokuvaza na kukugala kuja hulonda kuita.” 19Kwa kulonga ivo, Yesu kalagusa vija Petulo vondayadanganike na kumwing'ha nhogolwa Mulungu. Amala kamlongela, “Niwinze.”

Yesu na ija mwaluko imwenga

20Baho Petulo kahinduka, kamuona ija mwaluko Yesu yeli na wende nayo, komuwinza yatogoligwe ng'hani na Yesu komuwinza, ino mwaluko iyo ija yamsigamile Yesu viwakalile muindia ya chigulogulo kumuuza, “Mndewa yelihi yonda yakuhinduke?” 21Basi Petulo kamuona iyo, kamuuza Yesu, “Mndewa chilihi chomlawila ino?”

22Yesu kamlongela, “Kama nihalonda yasigale mbaka nibwele, “Gweye kuna mbuli yaki? Gweye niwinze niye.”

23Baho mbuli iyo yenela mwa waja waluko kua mwaluko iyo hadanganika. Mbali Yesu hamlongele kua mwaluko iyo hadanganika ila kalonga, “Kama nolonda yasigale mbaka vonda nibwele, kuna mbuli yaki?”

24Ino iyo ija yazionile mbuli zino na kuzandika. Na cheye chovimanya kua gayalongile ni kweli.

Mbuli za chikomelezo za Yohana

25Hana mbuli zimwenga nyingi ziyasang'hane Yesu, maza zahandikigwe zose, imwe mbaka imwenga notonga kua hata isi yenyego yahelekile kwenela vitabu vija maza vyandikigwe.

Currently Selected:

Yohana 21: KBV

Highlight

Copy