Sang’hano za Wasenga 6
6
Wanhu saba wosaguligwa
1Chipindi icho wajalusona wa Yesu viwakalile wokongezeka kulawila manung'huniko mwa Wayahudi waja wolonga Chiyunani na waja wolonga Chiebulania. Waja wolonga Chiyunani wonung'hunika kua wagane wao wosemwigwa muugolaji wa ndia ya chila zua. 2Ivo wasenga kumi na waidi wawakunzanya bumbila jose da wajalusona wa Yesu walonga, “Havinogile cheye kuleka kuligula usenga wa Mulungu ili chiwagolele wanhu ndia. 3Ivo ndugu zetu, saguleni wanhu saba mmwenu weli na nhogolwa inogile wamemile Muhe wa Mulungu na weli na nzewele. Na cheye chowalekela sang'hano iyo. 4Nacheye chosigala kupula na kuligula usenga wa Mulungu.”
5Mbuli iyo iwanogela wanhu wose mdibumbila da waja wamtogole Mulungu wawasagula Stefano, munhu yomtogola ng'hani Mulungu na yamemile Muhe wa Mulungu, ivija wamsagula Filipo na Pulokolo na Nikanoli na Timoni na Palimena na Nikolao munhu wa Antiokia iyo baho mwaka yakalile kailumba na dini ya Chiyahudi. 6Waweka haulongozi wa wasenga nao wawapulila na kuwapulila ganogile ga Mulungu kwa kuwekila makono.
7Wagendelela kuligula usenga wa Mulungu, waluko wengi wagendelela kongezeka ng'hani uko Yelusalemu, na hata Walava nhambiko wengi wamtogola Yesu.
Stefano kokomigwa
8Mulungu kamwing'ha Stefano ganogile ga Mulungu na udaho wa kusang'hana uzonza mkulu na miujiza mwa wanhu. 9Mbali Wayahudi wamwenga wa ng'anda ya kuiting'hanila Wayahudi ikemigwa Sinagogi da wanhu hulu, wasonga kuibishila na Stefano. Wanhu wao walawila muikae ya Kulene Alekizandilia na wamwenga walawila Kilikia na Asia. 10Mbali Muhe wa Mulungu kamdahiza Stefano kulonga kwa nzewele, hata viwakala wolonga wapotigwa kumuhuma. 11Ivo wawaswangiza wanhu walonge, “Chimhulika Stefano kolonga mbuli za kumuliga Musa na kumuliga Mulungu!” 12Kwaivo, wawadinhiza wanhu, wavele na wafundaji ndagizi wagevuzike. Baho wamgoga Stefano na kumgala mchitala. 13Wagala wanhu wamwenga mchitala ili walonge uvwizi nao walonga, “Munhu ino haleka mbuli za kuliga ng'anda ya Mulungu na ndagizi za Musa. 14Kwavija chimhulika viyolonga kua Yesu wa Nazaleti koibomola ng'anda ino ya Mulungu na kuhindula mazoela gayaching'ile Musa. 15Wanhu wose wakalile mchitala chija wambunhulila meso Stefano, baho wachiona chihanga chake chikala kama cha mtumigwa wa kwa Mulungu.
Currently Selected:
Sang’hano za Wasenga 6: KBV
Highlight
Share
Copy
Want to have your highlights saved across all your devices? Sign up or sign in
The New Testament in Kami @The Word for The World International and Kami Language translation. All rights reserved.
