Sang’hano za Wasenga 7

Stefano koigombela mchitala

1Baho, mkulu wa Walava nhambiko kamuuza Stefano, “Ivo mbuli zino zigoloka?”

2Nayo Stefano kamwidka, “Ndugu zangu na tata zangu nhegelezeni! Mulungu mkulu kamlawila tati yetu Ibulahimu muiisi ya Mesopotamia kakala yang'hali hanahamila uko Halani. 3Mulungu kamlongela segela kulawa muiisi yako na kuwaleka walukolo wako, uite mbaka kuiisi yonda nikulagusile.’ 4Kwaivo Ibulahimu kasegela muiisi ya Kalidayo kaita kukala isi ya Halani. Tati yake viyadanganike Mulungu kamlava kaidi Halani keza kukala muiisi ino imkala sambi. 5Mulungu hamwing'ile hata hanhu hadodo ya isi ino ili iwe yake. Mbali kamlalika kumwing'ha isi ino iwe yake na ulelo wake hata kama chipindi icho Ibulahimu hakalile na mwana. 6Mulungu kamulongela vino, ‘Ulelo wako wogaligwa muuisi ija si yao na uko wotendigwa kua watumwa na kudununzigwa kwa milao mia nne. 7Mbali niye noitoa isi iyo mwawadununzigwa. Amala nowalava muisi iyo weze hanhu hano wanifugamile. 8Baho Mulungu kamwing'ha Ibulahimu lagano da kwingiza kumbi wana wa chilume. Ivo Ibulahimu kamwingiza kumbi mwanage yokemigwa Isaka zua da nane kulawa viyavumbuke. Na Isaka ivija kamwingiza kumbi Yakobo. Nayo Yakobo ivija kawasang'hanila waja wavele wetu kumi na waidi. 9Kwavija wavele wetu wamonela maya Yusufu wamgula ili yawe mtumwa muiisi ya Misili. Mbali Mulungu kakala hamwe nayo, 10kamulohola Yusufu mgamadununzo gake gose kamwing'ha nzewele na kutogoligwa na Falao mfaume wa Misili ija yamwikile yawe mkulu wa isi ija na muing'anda ya ufaume. 11Labaho, kulawilila nzala ng'hulu muisi yose ya Misili na Kanani, igalile gayo kulu nao wasaho wetu hawadahile kupata ndia. 12Mbali Yakobo viyahulike uko Misili kukala na ndia kawalagiza wanage manake wasaho zetu waite Misili kwa mala ya mosi. 13Viwaitile kaidi Yusufu kaitambula kwa wakulu zake na Falao mfaume wa Misili kawamanya waja wakulu zake Yusufu. 14Baho Yusufu kawalagiza wamgale Misili Yakobo tataake hamwe na walukolo zake wose, nao wakala wanhu sabini na tano. 15Ivo Yakobo kahulumuka kuita isi ya Misili kuja iyo na wasaho zetu wadanganika. 16Mitufi yao ibwelezigwa mbaka Shekemu, na kuwandigwa mdipanga dija diguligwe kwa sente na Ibulahimu kulawa kwa wanage Hamoli.

17“Chipindi cha Mulungu kutenda laliko jake diyamwing'ile Ibulahimu vuukalile behi kuvika wanhu wetu wagendelela kongezeka ng'hani uko Misili. 18Haichikomelezo kengila mfaume imwenga ija hamanyile chochose kwa mbuli ya Yusufu kasonga kulongoza isi ya Misili. 19Mfaume iyo kasonga kuwadununza wasaho zetu kawashwangiza wawaleke kunze wana wao ili wadanganike. 20Musa kavumbuka mchipindi icho, kakala mwana mnovu ng'hani. Tata na mami yake wamlela ukae kwa miezi midatu, 21Viwamwikile kutali na hakae biti Falao kamsola na kumlela kama mwanage mwenyego. 22Musa kafundigwa nzewele zose za Misili, kakala galu kwa ulonzi na sang'hano.

23Viyavikize milao alubaini kalonda kuita kuwalola walukolo wake uko Izilaeli. 24Kamona muizilaeli miyage kodununzigwa na munhu wa Misili, Musa kamsunha na kumkoma ili kumlihiza chisasi kwa kumonela muizilaeli. 25Kagiza kua ndugu zake wovimanya kua Mulungu kowalohola kubitila iyo, mbali ndugu zake hawavimanyile. 26Igolo yake kawaona Waizilaeli waidi wogomba kageza kuwalamula kalonga, ‘Mweye wanhu mwa ndugu habali mogomba ivo?’ 27Ija yakalile komtoa miyage, kamsung'ha Musa hamgwazo na kumlongela, ‘Yelihi yakwikile kua chilongozi na mlamuzi wetu? 28Ivo, kolonda kung'oma kama vuumkomile ija mmisili igolo.’ 29Musa viyahulike mbuli izo, kakimbilila uko Midiani kuyakalile kama nyambenyambe, na kalela wana waidi wa chilume.

30Viibitile milao alubaini, Mtumigwa wa kwa Mulungu kamlawila Musa mchisolo chikalile chokwaka moto kuja kuchiwala behi na lugongo lwa Sinai. 31Musa viyaionile mbuli iyo kakanganya ng'hani, kakikwesela behi chija chisolo ili yakilole goya kamhulika Mndewa Mulungu viyamlongela, 32‘Niye ni Mulungu wa wasaho zako, Mulungu wa Ibulahimu na Isaka na Yakobo.’ Musa kadumba na kugudema na hagezile kwinula chihanga chake. 33Baho Mndewa kamlongela, ‘Vula makwabaza gako kwa vija hanhu hanho wimile ni hanhu hangu. 34Kweli niwaona wanhu wangu viwadununzika nihulika ndilo yao na nihulumuka niwalohole, lelo nokulagiza Misili.’ 35“Musa iyo ija wanhu wa Izilaeli wamlemile viwalongile, ‘Yelihi yakwikile kua chilongozi na mlamuzi wetu?’ Mulungu kamtumila mtumigwa wa kwa Mulungu ija yamlawile muichisolo chikalile chokwaka moto kumlagiza Musa yawe chilongozi na mlohozi. 36Iyo yawalongoze waja wanhu kulawa Misili kwa kusang'hana miujiza na uzonza, muiisi ya Misili na muibahali ya Shamu. Ivija kawalongoza wanhu mchiwala kwa milao alubaini. 37Ino iyo ija Musa yawalongele Waizilaeli, ‘Mulungu kokwiza kuwenulila mlagusi kama niye kulawa kwa mulukolo wenu wenyego.’ 38Musa yakalile muuting'hanilo wa wanhu ukalile kuluwala haja mtumigwa wa kwa Mulungu viyalongile nayo hamwe na tata zetu kulugongo lwa Sinai, nayo kabokela mbuli za ugima ili yaching'he cheye. 39“Mbali wavele wetu walema kumtegeleza Musa, wamlema na walonda kubweleganya Misili. 40Wamulongela Haluni, ‘Chitendele milungu yonda ichilongoze mnzila, manake hachimanyile gaja gampatile Musa yachilongoze kulawa Misili.’ 41Chipindi icho icho chiwatendile nyang'iti yaigalile na gung'hundila da ng'ombe, wailavila nhosa ya kulukuzigwa na kumvinila lusona iyo nyang'iti iwatendile kwa makono gao wenyego. 42Ivo Mulungu viyasegele hamwao, kawaleka wafugamile nhondo za kuulanga, kama viyandikigwe mchitabu cha walagusi wa Mulungu

‘Mweye wanhu wa Izilaeli! Ivo, sio niye

mnichinjile wanyama

na kunilavila nhosa ya kulukuza kwa milao alubaini kuluwala.

43Mchipapa chiheha cha mulungu Moleki

na nyang'iti ya nhondo ya mulungu wenu Lefani

imutendile ili kuifugamila

kwa mbuli iyo nowagala mmahame kutali kubita Babeli.’

44“Wavele wetu viwakalile kuja kulawala wakala na hema kama chilaguso kua Mulungu kahamwe nao. Wadizenga hema ijo kama Mulungu viyamulagize Musa kudizenga. 45Wavele wetu waibokela hema iyo mbaka chipindi cha Yoshua viwaisolile isi ija kulawa kwa wanhu waja Mulungu yawawingile haulongozi wao, hema iyo ikala baho mbaka chipindi cha Daudi.

46Daudi kapata ng'hekewa kulawa kwa Mulungu kampula Mulungu chibali cha kumzengela ng'anda ili iyo na Waizilaeli wose wamfugamile umo. 47Mbali Selemani iyo yamzengele Mulungu ng'anda iyo.

48“Hataivo, Iyo yali Kuchanha ng'hani hakala mzing'anda zizengigwe na wanhu kama vija mlagusi wa Mulungu viyalongile,

49‘Kuulanga uko kuchigoda changu cha ufaume

na muiisi ni hanhu ha kwika magulu gangu

Ivo, monizengela ng'anda yavilihi?’

Ivo, hanhu hangu hakukala halihi?

50Ivo, sio niye nivilumbile vinhu vose?’ ”

51Stefano kagendelela kulonga, “Mweye mwa wadulu, mioyo yenu na magutwi genu ni kama ga wanhu hawammanyile Mulungu. Momlema Muhe wa Mulungu kama viwatendile wasaho zetu. 52Walagusi wa Mulungu wose wasaho zetu wawamdununza. Wawakoma hata waja walongile kwa mbuli ya kwiza kwake ija yosang'hana gaja goyolonda Mulungu. 53Mweye iyo muibokele ija ndagizi igaligwe na Watumigwa wa kwa Mulungu mbali hamuitegeleze!”

Stefano kotoigwa mabwe

54Waja vilongozi wa chitala viwahulike gago wagevuzika ng'hani na waluma meno kwa ludoko. 55Mbali Stefano kuno kamema Muhe wa Mulungu, kalola kuulanga kaona bung'hulo da ukulu wa Mulungu na Yesu kema ubanzi wa nhogolwa wa Mulungu. 56Labaho kalonga, “Loleni noona ulanga ufunhuligwa! Na Mwana wa Munhu kema ubanzi wa nhogolwa wa Mulungu.”

57Baho wanhu wose wakalile haja mchitala watoa nyangi na kusita magutwi gao, amala wose wamvamila hamwe. 58Wamulava kunze wamgala kutali kulawa mzikae wasonga kumtoa mabwe. Waja walongile uvwizi kwa mbuli yake wavula migolole yao na kwika hammagulu ga mbwanga imwe yokemigwa Sauli. 59Viwakalile womtoa mabwe, Stefano kalonga, “Mndewa Yesu bokela muhe wangu!” 60Kafugama mavindi, na kulila kwa dizi kulu kuno yolonga, “Mndewa walekesele malozo gano gawatenda!” Viyamalile kulonga gago kadanganika.

Currently Selected:

Sang’hano za Wasenga 7: KBV

Highlight

Copy